Genesi ܒܪܝܬܐ 30

¹ ܘܰܚܙܰܬ ܪܳܚܶܝܠ ܕܠܳܐ ܝܳܠܕܳܐ ܠܝܰܥܩܽܘܒ ܘܛܶܢܰܬ ܒܚܳܬܳܗ̇: ܘܶܐܡܪܰܬ ܠܝܰܥܩܽܘܒ: ܗܰܒ ܠܺܝ ܒܢܰܝ̈ܳܐ: ܘܶܐܢ ܠܳܐ ܡܳܝܬܳܐ ܐ̱ܢܳܐ.

² ܘܶܐܬܚܰܡܰܬ ܪܽܘܓܙܶܗ ܕܝܰܥܩܽܘܒ ܥܰܠ ܪܳܚܶܝܠ: ܘܶܐܡܰܪ ܠܳܗ̇: ܚܠܳܦ ܐܰ‌ܠܳܗܳܐ ܐ̱ܢܳܐ: ܕܰܟܠܳܐ ܡܶܢܶܟܝ ܦܺܐܖ̈ܶܐ ܕܟܰܪܣܳܐ.

³ ܘܶܐܡܪܰܬ ܠܶܗ: ܗܳܐ ܐܰܡܬܝ ܒܰܠܗܳܐ: ܥܽܘܠ ܥܠܶܝܗ̇: ܘܬܺܐܠܰܕ ܥܰܠ ܒܽܘܖ̈ܟܰܝ: ܘܶܐܬܒܰܝܰܐ ܐܳܦ ܐܶܢܳܐ ܡܶܢܳܗ̇.

⁴ ܘܝܶܗܒܰܬ ܠܶܗ ܠܒܰܠܗܳܐ ܐܰܡܬܳܗ̇ ܐܰܢ̱ܬܬܳܐ: ܘܥܰܠ ܥܠܶܝܗ̇.

⁵ ܘܒܶܛܢܰܬ ܒܰܠܗܳܐ: ܘܝܶܠܕܰܬ ܠܝܰܥܩܽܘܒ ܒܪܳܐ.

⁶ ܘܶܐܡܪܰܬ ܪܳܚܶܝܠ: ܕܳܢܰܢܝ ܐܰ‌ܠܳܗܳܐ: ܘܳܐܦ ܫܡܰܥ ܒܩܳܠܝ: ܘܝܰܗܒ ܠܺܝ ܒܪܳܐ: ܡܶܛܽܠ ܗܳܢܳܐ ܩܪܳܬ ܫܡܶܗ ܕܳܢ.

⁷ ܘܒܶܛܢܰܬ ܬܽܘܒ ܒܰܠܗܳܐ ܐܰܡܬܳܐ ܕܪܳܚܶܝܠ: ܘܝܶܠܕܰܬ ܒܪܳܐ ܐ̱ܚܪܺܢܳܐ ܠܝܰܥܩܽܘܒ.

⁸ ܘܶܐܡܪܰܬ ܪܳܚܶܝܠ: ܒܥܺܝܬ ܡܶܢ ܡܳܪܝܳܐ: ܘܶܐܬܟܰܫܦܶܬ ܥܰܡ ܚܳܬܝ: ܘܳܐܦ ܐܶܫܟܚܶܬ. ܘܰܩܪܳܬ ܫܡܶܗ ܢܰܦܬܳܠܺܝ.

⁹ ܘܰܚܙܳܬ ܠܶܝܰܐ ܕܩܳܡܰܬ ܡܶܢ ܝܰܠܕܳܐ: ܘܕܶܒܪܰܬ ܠܙܰܠܦܳܐ ܐܰܡܬܳܗ̇: ܘܝܰܗܒܬܳܗ̇ ܐܰܢ̱ܬܬܳܐ ܠܝܰܥܩܽܘܒ.

¹⁰ ܘܝܶܠܕܰܬ ܙܰܠܦܳܐ ܐܰܡܬܳܗ̇ ܕܠܶܝܰܐ ܠܝܰܥܩܽܘܒ ܒܪܳܐ.

¹¹ ܘܶܐܡܪܰܬ ܠܶܝܰܐ ܐܶܬܳܐ ܓܰܕܝ: ܘܰܩܪܳܬ ܫܡܶܗ ܓܳܕ.

¹² ܘܝܶܠܕܰܬ ܙܰܠܦܳܐ ܐܰܡܬܳܗ̇ ܕܠܶܝܰܐ ܒܪܳܐ ܕܰܬܪܶܝܢ ܠܝܰܥܩܽܘܒ.

¹³ ܘܶܐܡܪܰܬ ܠܶܝܰܐ: ܒܬܶܫܒܽܘܚܬܝ ܕܫܰܒܚܳܢ̈ܝ ܒ̈ܢܳܬܳܐ: ܘܰܩܪܳܬ ܫܡܶܗ ܐܳܫܺܝܪ.

¹⁴ ܘܶܐܙܰܠ ܪܽܘܒܺܝܠ ܒܝܰܘ̈ܡܰܝ ܚܨܳܕܳܐ ܕܚܶܛ̈ܶܐ: ܘܶܐܫܟܰܚ ܝܰܒܖ̈ܽܘܚܶܐ ܒܚܰܩܠܳܐ: ܘܰܐܝܬܺܝ ܐܶܢܽܘܢ ܠܠܶܝܰܐ ܐܶܡܶܗ: ܘܶܐܡܪܰܬ ܪܳܚܶܝܠ ܠܠܶܝܰܐ: ܗܰܒܝ ܠܺܝ ܡܶܢ ܝܰܒܖ̈ܽܘܚܶܐ ܕܰܒܪܶܟܝ.

¹⁵ ܘܶܐܡܪܰܬ ܠܳܗ̇ ܠܶܝܰܐ: ܠܳܐ ܟܰܕܽܘ ܠܶܟܝ ܕܰܕܒܰܪܬܝ ܒܰܥܠܝ: ܐܶܠܳܐ ܐܳܦ ܕܬܶܣܒܺܝܢ ܝܰܒܖ̈ܽܘܚܶܐ ܕܒܶܪܝ: ܘܶܐܡܪܰܬ ܪܳܚܶܝܠ: ܡܶܛܽܠ ܗܳܢܳܐ ܢܶܕܡܰܟ ܥܰܡܶܟܝ ܒܠܺܠܝܳܐ ܗܳܢܳܐ ܚܠܳܦ ܝܰܒܖ̈ܽܘܚܶܐ ܕܰܒܪܶܟܝ.

¹⁶ ܘܥܰܠ ܝܰܥܩܽܘܒ ܡܶܢ ܚܰܩܠܳܐ ܒܪܰܡܫܳܐ: ܘܢܶܦܩܰܬ ܠܶܝܰܐ ܠܽܐܘܪܥܶܗ: ܘܶܐܡܪܰܬ: ܠܘܳܬܝ ܥܳܐܶܠ ܐܰܢ̱ܬ ܡܶܛܽܠ ܕܡܶܐܓܰܪ ܐܶܓܰܪܬܳܟ ܒܝܰܒܖ̈ܽܘܚܶܐ ܕܒܶܪܝ. ܘܰܕܡܶܟ ܥܰܡܳܗ̇ ܒܠܺܠܝܳܐ ܗܰܘ.

¹⁷ ܘܫܰܡܥܳܗ̇ ܐܰ‌ܠܳܗܳܐ ܠܠܶܝܰܐ: ܘܒܶܛܢܰܬ ܘܝܶܠܕܰܬ ܠܝܰܥܩܽܘܒ ܒܪܳܐ ܕܚܰܡܫܳܐ.

¹⁸ ܘܶܐܡܪܰܬ ܠܶܝܰܐ: ܝܰܗܒ ܐܰ‌ܠܳܗܳܐ ܐܰܓܪܝ ܕܝܶܗܒܶܬ ܐܰܡܬܝ ܠܒܰܥܠܝ: ܘܰܩܪܳܬ ܫܡܶܗ ܐܺܝܣܳܟܳܪ.

¹⁹ ܘܒܶܛܢܰܬ ܬܽܘܒ ܠܶܝܰܐ: ܘܝܶܠܕܰܬ ܒܪܳܐ ܕܶܫܬܳܐ ܠܝܰܥܩܽܘܒ.

²⁰ ܘܶܐܡܪܰܬ ܠܶܝܰܐ: ܙܰܒܕܰܢܝ ܐܰ‌ܠܳܗܳܐ ܙܶܒܕܳܐ ܛܳܒܳܐ: ܙܰܒܢܳܐ ܗܳܢܳܐ ܢܶܬܢܰܩܰܦ ܠܺܝ ܒܰܥܠܝ: ܡܶܛܽܠ ܕܝܶܠܕܶܬ ܠܶܗ ܫܬܳܐ ܒܢܺܝ̈ܢ: ܘܰܩܪܳܬ ܫܡܶܗ ܙܒܽܘܠܽܘܢ.

²¹ ܘܒܬܪܟܶܢ ܝܶܠܕܰܬ ܒܰܪܬܳܐ: ܘܰܩܪܳܬ ܫܡܳܗ̇ ܕܺܝܢܰܐ.

²² ܘܶܐܬܕܰܟܪܳܗ̇ ܐܰ‌ܠܳܗܳܐ ܠܪܳܚܶܝܠ: ܘܫܰܡܥܳܗ̇ ܐܰ‌ܠܳܗܳܐ: ܘܰܦܬܰܚ ܡܰܪܒܥܳܗ̇.

²³ ܘܒܶܛܢܰܬ ܘܝܶܠܕܰܬ ܒܪܳܐ: ܘܶܐܡܪܰܬ ܐܰܥܒܰܪ ܐܰ‌ܠܳܗܳܐ ܚܶܣܕܝ.

²⁴ ܘܰܩܪܳܬ ܫܡܶܗ ܝܰܘܣܶܦ: ܘܶܐܡܪܰܬ : ܢܰܘܣܶܦ ܠܺܝ ܐܰ‌ܠܳܗܳܐ ܒܪܳܐ ܐ̱ܚܪܺܢܳܐ.

²⁵ ܘܟܰܕ ܝܶܠܕܰܬ ܪܳܚܶܝܠ ܠܝܰܘܣܶܦ: ܐܶܡܰܪ ܝܰܥܩܽܘܒ ܠܠܳܒܳܢ: ܫܰܕܰܪܰܝܢܝ ܐܺܙܰܠ ܠܰܐܬܪܝ ܘܠܰܐܪܥܝ.

²⁶ ܗܰܒܠܺܝ ܢܶܫܰܝ̈ ܘܰܒܢܰܝ̈: ܕܰܦܠܰܚܬܳܟ ܒܗܽܘܢ ܘܺܐܙܰܠ: ܡܶܛܽܠ ܕܰܐܢ̱ܬ ܝܳܕܰܥ ܐܰܢ̱ܬ ܦܽܘܠܚܳܢܳܐ ܕܰܦܠܰܚܬܳܟ.

²⁷ ܘܶܐܡܰܪ ܠܳܒܳܢ ܠܝܰܥܩܽܘܒ: ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ: ܢܰܣܺܝܬ ܕܒܰܪܟܰܢܝ ܡܳܪܝܳܐ ܡܶܛܽܠܬܳܟ.

²⁸ ܘܶܐܡܰܪ ܦܪܽܘܫ ܐܰܓܪܳܟ ܥܠܰܝ ܘܶܐܬܶܠ: ܐܶܡܰܪ ܠܶܗ ܝܰܥܩܽܘܒ: ܐܰܢ̱ܬ ܝܳܕܰܥ ܐܰܢ̱ܬ ܦܽܘܠܚܳܢܳܐ ܕܰܦܠܰܚܬܳܟ: ܘܕܰܗܘܳܐ ܩܶܢܝܳܢܳܟ ܥܰܡܝ.

²⁹ ܡܶܛܽܠ ܕܩܰܠܺܝܠ ܐܺܝܬ ܗܘܳܐ ܠܳܟ ܩܕܳܡܝ ܘܰܣܓܺܝ ܛܳܒ: ܘܒܰܪܟܳܟ ܡܳܪܝܳܐ ܡܶܛܽܠܳܬܝ.

³⁰ ܘܗܳܫܳܐ ܡܳܢܳܐ ܐܶܥܒܶܕ ܐܳܦ ܐܶܢܳܐ ܠܒܰܝܬܝ.

³¹ ܐܶܡܰܪ ܠܶܗ ܠܳܒܳܢ: ܡܳܢܳܐ ܐܶܬܶܠ ܠܳܟ. ܐܶܡܰܪ ܠܶܗ ܝܰܥܩܽܘܒ: ܠܳܐ ܬܶܬܶܠ ܠܺܝ ܡܶܕܶܡ: ܐܶܢ ܬܶܥܒܶܕ ܠܺܝ ܦܶܬܓܳܡܳܐ ܕܳܐܡܰܪ ܐ̱ܢܳܐ ܠܳܟ: ܐܶܗܦܽܘܟ ܐܶܪܥܶܐ ܥܰܢ̈ܳܟ ܘܶܐܛܰܪ.

³² ܐܶܥܒܰܪ ܒܟܽܠܳܗ̇ ܥܳܢ̈ܳܟ ܝܰܘܡܳܢܳܐ: ܘܶܐܦܪܽܘܫ ܠܺܝ ܡܶܢ ܬܰܡܳܢ ܟܽܠ ܐܶܡܪܳܐ ܕܰܩܪܳܚ ܘܦܰܝܣܟܳܝ: ܘܟܽܠ ܐܶܡܪܳܐ ܕܳܐܟܶܡ ܒܚܶܘܳܖ̈ܳܬܳܐ: ܘܦܰܝܣܟܳܝ ܘܰܩܪܳܚ ܒܥܶܙ̈ܶܐ ܢܶܗܘܶܐ ܐܰܓܪܝ.

³³ ܘܬܶܣܗܰܕ ܥܠܰܝ ܙܳܟܽܘܬܝ ܐܰܝܟ ܕܝܰܘܡܳܢܳܐ: ܕܰܡܚܳܪ ܟܰܕ ܬܶܥܽܘܠ ܥܰܠ ܐܰܓܪܝ ܩܕܳܡܰܝܟ: ܟܽܠ ܕܠܳܐ ܗܘܳܐ ܩܪܳܚ ܘܦܰܝܣܟܳܝ ܒܥܶܙ̈ܶܐ: ܘܳܐܟܳܡ ܒܚܶܘܳܖ̈ܳܬܳܐ: ܓܢܺܝܒܰܐ ܗ̱ܘ ܠܺܝ.

³⁴ ܐܶܡܰܪ ܠܶܗ ܠܳܒܳܢ: ܐܺܝܢ ܢܶܗܘܶܐ ܐܰܝܟ ܡܶܠܬܳܟ.

³⁵ ܘܰܦܪܰܫ ܒܝܰܘܡܳܐ ܗܰܘ ܬܰܝܫ̈ܶܐ ܩܰܖ̈ܚܶܐ ܘܦܰܝܣ̈ܟܳܝܶܐ: ܘܟܽܠܗܶܝܢ ܥܶܙ̈ܶܐ ܩܖ̈ܳܚܳܬܳܐ ܘܦܰܝܣܟܳܝ̈ܳܬܳܐ: ܘܟܽܠ ܕܺܐܝܬ ܒܗܶܝܢ ܚܶܘܳܪܳܐ: ܘܟܽܠ ܕܳܐܟܶܡ ܒܚܶܘܳܖ̈ܳܬܳܐ: ܘܝܰܗܒ ܒܝܰܕ ܒܢܰܘ̈ܗܝ.

³⁶ ܘܰܥܒܰܕ ܡܰܪܕܳܐ ܬܠܳܬܳܐ ܝܰܘܡܺܝ̈ܢ ܒܰܝܢܰܘ̈ܗܝ ܠܠܳܒܳܢ: ܘܝܰܥܩܽܘܒ ܪܳܥܶܐ ܥܳܢ̈ܶܗ ܕܠܳܒܳܢ ܗܳܝ ܕܶܐܫܬܰܚܪܰܬ.

³⁷ ܘܰܢܣܰܒ ܠܶܗ ܝܰܥܩܽܘܒ ܙܶܩ̈ܬܶܐ ܚܶܘܳܖ̈ܳܬܳܐ ܖ̈ܰܛܺܝܒܳܬܳܐ: ܕܠܽܘܙܳܐ ܘܰܕܕܽܘܠܒܳܐ: ܘܰܩܠܰܦ ܒܗܶܝܢ ܩܠܳܦ̈ܶܐ ܚܶܘܳܖ̈ܳܬܳܐ: ܘܡܰܚܘܰܪ ܚܶܘܳܪܳܐ ܕܰܒܙܶܩ̈ܬܶܐ.

³⁸ ܘܰܕܥܰܨ ܐܶܢܶܝܢ ܠܙܶܩ̈ܬܶܐ ܕܰܩܠܰܦ ܒܖ̈ܳܗܛܶܐ ܕܡܰܝ̈ܳܐ: ܒܶܝܬ ܡܰܫܬܝܳܐ: ܟܰܪ ܕܳܐܬܝ̈ܳܢ ܥܳܢ̈ܳܐ ܠܡܶܫܬܳܐ ܠܽܘܩܒܰܠ ܥܳܢ̈ܳܐ: ܘܚܳܡ̈ܳܢ ܡܳܐ ܕܳܐܬܝ̈ܳܢ ܠܡܶܫܬܳܐ.

³⁹ ܘܚܳܡ̈ܳܢ ܥܳܢ̈ܳܐ ܥܰܠ ܙܶܩ̈ܬܶܐ: ܘܝܳܠ̈ܕܳܢ ܥܳܢ̈ܳܐ ܐܶܡܖ̈ܶܐ ܩܰܖ̈ܚܶܐ ܘܦܰܝܣܟܳܝ̈ܶܐ.

⁴⁰ ܘܰܦܪܰܫ ܝܰܥܩܽܘܒ ܘܝܰܗܒ ܩܕܳܡ ܥܳܢ̈ܳܐ ܐܶܡܖ̈ܶܐ ܩܰܖ̈ܚܶܐ ܘܦܰܝܣܟܳܝ̈ܶܐ ܘܟܽܠ ܕܳܐܟܳܡ ܒܥܳܢ̈ܶܗ ܕܠܳܒܳܢ: ܘܰܥܒܰܕ ܠܶܗ ܓܙܳܪܳܐ ܒܰܠܚܽܘܕܰܘܗܝ: ܘܠܳܐ ܚܠܰܛ ܐܶܢܶܝܢ ܒܥܳܢ̈ܶܗ ܕܠܳܒܳܢ.

⁴¹ ܘܰܒܟܽܠ ܫܢܳܐ ܕܚܳܡܳܐ ܥܳܢ̈ܳܐ ܒܟܺܝܪܳܝܬܳܐ: ܣܳܐܶܡ ܝܰܥܩܽܘܒ ܙܶܩ̈ܬܶܐ ܩܕܳܡ ܥܳܢ̈ܳܐ ܒܖ̈ܳܗܛܶܐ ܕܢܶܚܡ̈ܝܳܢ ܒܙܶܩ̈ܬܶܐ.

⁴² ܘܒܰܠܩܺܝܫܳܝ̈ܶܐ ܕܥܳܢ̈ܳܐ ܠܳܐ ܣܳܐܶܡ ܗܘܳܐ. ܘܗܳܘܶܝܢ ܠܩܺܝܫܳܝ̈ܶܐ ܠܠܳܒܳܢ: ܘܰܒܟܺܝܖ̈ܳܝܶܐ ܠܝܰܥܩܽܘܒ.

⁴³ ܘܰܥܬܰܪ ܓܰܒܪܳܐ ܛܳܒ ܛܳܒ: ܘܰܗܘܳܬ ܠܶܗ ܥܳܢ̈ܳܐ ܣܰܓܺܝܐܬܳܐ: ܘܥܰܒ̈ܕܶܐ: ܘܰܐܡܗ̈ܳܬܳܐ: ܘܰܐܬܳܢ̈ܶܐ: ܘܓܰܡ̈ܠܶܐ: ܘܚܶܡܖ̈ܳܐ.