Genesi ܒܪܝܬܐ 34

¹ ܘܢܶܦܩܰܬ ܕܺܝܢܰܐ ܒܰܪܬ ܠܶܝܰܐ ܕܶܐܬܝܰܠܕܰܬ ܠܝܰܥܩܽܘܒ: ܠܡܶܚܙܳܐ ܒܢ̈ܳܬ ܐܰܬܪܳܐ.

² ܘܰܚܙܳܗ̇ ܫܟܺܝܡ ܒܰܪ ܚܡܽܘܪ ܚܰܘܳܝܳܐ ܪܰܒܳܐ ܕܰܐܪܥܳܐ ܘܕܰܒܪܳܗ̇ ܘܰܕܡܶܟ ܥܰܡܳܗ̇ ܘܨܰܥܪܳܗ̇.

³ ܘܢܶܦܩܰܬ ܢܰܦܫܶܗ ܒܳܬܰܪ ܕܺܝܢܰܐ ܒܰܪܬ ܝܰܥܩܽܘܒ: ܘܪܰܚܡܳܗ̇ ܠܰܛܠܺܝܬܳܐ: ܘܰܡܠܳܐ ܒܠܶܒܳܗ̇ ܕܰܛܠܺܝܬܳܐ.

⁴ ܘܶܐܡܰܪ ܫܟܺܝܡ ܠܰܚܡܽܘܪ ܐܰܒܽܘܗܝ: ܣܰܒ ܠܺܝ ܛܠܺܝܬܳܐ ܗܳܕܶܐ ܐܰܢ̱ܬܬܳܐ.

⁵ ܘܝܰܥܩܽܘܒ ܫܡܰܥ ܕܛܰܡܰܐܘ ܠܕܺܝܢܰܐ ܒܰܪܬܶܗ: ܘܰܒܢܰܘ̈ܗܝ ܥܰܡ ܒܥܺܝܪܳܐ ܗܘܰܘ ܒܚܰܩܠܳܐ: ܘܰܫܬܶܩ ܝܰܥܩܽܘܒ ܥܕܰܡܳܐ ܕܶܐܬܰܘ.

⁶ ܘܰܢܦܰܩ ܚܡܽܘܪ ܐܰܒܽܘܗܝ ܕܰܫܟܺܝܡ: ܠܘܳܬ ܝܰܥܩܽܘܒ ܠܰܡܡܰܠܳܠܽܘ ܥܰܡܶܗ.

⁷ ܘܰܒܢܰܝ̈ ܝܰܥܩܽܘܒ ܐܶܬܰܘ ܡܶܢ ܚܰܩܠܳܐ: ܘܟܰܕ ܫܡܰܥܘ ܟܶܪܝܰܬ ܠܗܽܘܢ ܠܓܰܒܖ̈ܶܐ: ܘܶܐܬܒܐܶܫ ܠܗܽܘܢ ܛܳܒ: ܡܶܛܽܠ ܕܰܥܒܰܕܘ ܛܰܡܐܽܘܬܳܐ ܒܺܝܣܪܳܐܶܝܠ: ܘܨܰܥܰܪܘ ܠܒܰܪܬ ܝܰܥܩܽܘܒ: ܘܗܳܟܰܢܳܐ ܠܳܐ ܡܶܬܥܒܶܕ.

⁸ ܘܡܰܠܶܠ ܚܡܽܘܪ ܥܰܡܗܽܘܢ ܘܶܐܡܰܪ ܠܗܽܘܢ: ܫܟܺܝܡ ܒܶܪܝ ܨܒܳܬ ܢܰܦܫܶܗ ܒܒܰܪܬܟܽܘܢ: ܗܰܒܽܘܗ̇ ܠܶܗ ܐܰܢ̱ܬܬܳܐ.

⁹ ܘܶܐܬܚܰܬܰܢܘ ܥܰܡܰܢ: ܒܢ̈ܳܬܟܽܘܢ ܗܰܒܘ ܠܰܢ: ܘܰܒܢ̈ܳܬܰܢ ܣܰܒܘ ܠܟܽܘܢ.

¹⁰ ܘܥܰܡܰܢ ܬܶܒܘ: ܘܰܐܪܥܳܐ ܗܳܐ ܩܕܳܡܰܝܟܽܘܢ: ܬܶܒܘ ܘܶܐܬܬܰܓܰܪܘ ܘܺܝܪܰܬܘ ܒܳܗ̇.

¹¹ ܘܶܐܡܰܪ ܫܟܺܝܡ ܠܰܐܒܽܘܗ̇ ܘܠܰܐܚܶܝ̈ܗ̇: ܐܶܫܟܰܚ ܖ̈ܰܚܡܶܐ ܒܥܰܝ̈ܢܰܝܟܽܘܢ: ܘܟܽܠ ܕܬܺܐܡܪܽܘܢ ܠܺܝ ܐܶܬܶܠ.

¹² ܐܰܣܓܰܘ ܥܠܰܝ ܛܳܒ ܡܰܗܪܳܐ ܘܡܰܘܗ̈ܒܳܬܳܐ: ܘܶܐܬܶܠ ܐܰܝܟܰܢܳܐ ܕܬܺܐܡܪܽܘܢ ܠܺܝ: ܘܗܰܒܘ ܠܺܝ ܛܠܺܝܬܳܐ ܗܳܕܶܐ ܐܰܢ̱ܬܬܳܐ.

¹³ ܘܰܥܢܰܘ ܒܢܰܝ̈ ܝܰܥܩܽܘܒ ܠܰܫܟܺܝܡ ܘܠܰܚܡܽܘܪ ܐܰܒܽܘܗܝ: ܘܶܐܡܰܪܘ ܠܶܗ ܒܢܶܟܠܳܐ: ܥܰܠ ܕܛܰܡܰܐܘ ܠܕܺܝܢܰܐ ܚܳܬܗܽܘܢ.

¹⁴ ܘܶܐܡܰܪܘ: ܠܳܐ ܡܶܫܟܚܺܝܢܰܢ ܠܡܶܥܒܰܕ ܦܶܬܓܳܡܳܐ ܗܳܢܳܐ: ܠܡܶܬܰܠ ܚܳܬܰܢ ܠܓܰܒܪܳܐ ܕܺܐܝܬ ܠܶܗ ܥܽܘܪܠܽܘܬܳܐ: ܡܶܛܽܠ ܕܚܶܣܕܰܐ ܗ̱ܘ ܠܰܢ.

¹⁵ ܒܪܰܡ ܒܗܳܕܶܐ ܢܶܬܛܦܺܝܣ ܠܟܽܘܢ ܐܶܢ ܗܽܘ ܕܬܶܗܘܢ ܐܰܟܘܳܬܰܢ: ܘܬܶܓܙܪܽܘܢ ܟܽܠ ܕܶܟܪܳܐ ܐܰܝܟܰܢܳܐ ܕܰܚܢܰܢ ܓܙܺܝܪܺܝܢ.

¹⁶ ܢܶܬܶܠ ܠܟܽܘܢ ܒܢ̈ܳܬܰܢ: ܘܰܒܢ̈ܳܬܟܽܘܢ ܢܶܣܰܒ ܠܰܢ: ܘܢܶܬܶܒ ܥܰܡܟܽܘܢ: ܘܢܶܗܘܶܐ ܥܰܡܳܐ ܚܰܕ.

¹⁷ ܘܶܐܢ ܠܳܐ ܬܶܫܡܥܽܘܢܳܢ ܠܡܶܓܙܰܪ: ܢܶܕܒܰܪ ܒܰܪܬܰܢ ܘܢܺܐܙܰܠ.

¹⁸ ܘܰܫܦܰܖ̈ܝ ܡܶܠܰܝ̈ܗܽܘܢ ܒܥܰܝ̈ܢܰܝ ܚܡܽܘܪ ܘܰܒܥܰܝ̈ܢܰܝ ܫܟܺܝܡ ܒܪܶܗ.

¹⁹ ܘܠܳܐ ܫܰܘܚܰܪ ܛܰܠܝܳܐ ܠܡܶܥܒܕܳܗ̇ ܠܰܥܒܺܝܕܬܳܐ: ܡܶܛܽܠ ܕܶܐܨܛܒܺܝ ܗܘܳܐ ܒܒܰܪܬ ܝܰܥܩܽܘܒ: ܘܗܽܘ ܝܰܩܺܝܪ ܗܘܳܐ ܡܶܢ ܟܽܠܶܗ ܒܶܝܬ ܐܰܒܽܘܗܝ.

²⁰ ܘܶܐܬܳܐ ܚܡܽܘܪ ܘܰܫܟܺܝܡ ܒܪܶܗ ܠܬܰܪܥܳܐ ܕܰܩܪܺܝܬܗܽܘܢ: ܘܡܰܠܶܠܘ ܥܰܡ ܐ̱ܢܳܫ̈ܳܐ ܕܰܩܪܺܝܬܗܽܘܢ: ܘܶܐܡܰܪܘ ܠܗܽܘܢ.

²¹ ܓܰܒܖ̈ܶܐ ܗܳܠܶܝܢ ܫܳܠܡܺܝܢ ܐܶܢܽܘܢ ܥܰܡܰܢ: ܢܶܬܒܽܘܢ ܒܰܐܪܥܳܐ ܘܢܶܬܬܰܓܪܽܘܢ ܒܳܗ̇: ܘܰܐܪܥܳܐ ܗܳܐ ܪܘܰܚܬܳܐ ܕܺܐܝܕܰܝ̈ܳܐ ܩܕܳܡܝܗܽܘܢ: ܒܢ̈ܳܬܗܽܘܢ ܢܶܣܰܒ ܠܰܢ ܢܶܫ̈ܶܐ: ܘܰܒܢ̈ܳܬܰܢ ܢܶܬܶܠ ܠܗܽܘܢ.

²² ܒܪܰܡ ܒܗܳܕܶܐ ܡܶܬܛܦܺܝܣܺܝܢ ܠܰܢ ܓܰܒܖ̈ܶܐ ܕܢܶܬܒܽܘܢ ܥܰܡܰܢ: ܘܢܶܗܘܶܐ ܥܰܡܳܐ ܚܰܕ: ܡܳܐ ܕܰܓܙܰܪܢ ܟܽܠ ܕܶܟܪܳܐ ܐܰܝܟܰܢܳܐ ܕܗܶܢܽܘܢ ܓܙܺܝܪܺܝܢ.

²³ ܢܶܟܣܰܝ̈ܗܽܘܢ ܘܩܶܢܝܳܢܗܽܘܢ ܘܟܽܠܳܗ̇ ܒܥܺܝܪܗܽܘܢ: ܗܳܐ ܕܺܝܠܰܢ ܐܶܢܽܘܢ: ܒܪܰܡ ܢܶܬܛܦܺܝܣ ܠܗܽܘܢ: ܘܢܶܬܒܽܘܢ ܥܰܡܰܢ.

²⁴ ܘܰܫܡܰܥܘ ܡܶܢ ܫܟܺܝܡ ܘܡܶܢ ܚܡܽܘܪ ܐܰܒܽܘܗܝ: ܟܽܠ ܢܳܦ̈ܩܰܝ ܬܰܪܥܳܐ ܕܰܩܪܺܝܬܶܗ: ܘܰܓܙܰܪܘ ܟܽܠ ܕܶܟܪܳܐ ܟܽܠ ܢܳܦ̈ܩܰܝ ܬܰܪܥܳܐ ܕܰܩܪܺܝܬܶܗ:

²⁵ ܘܰܗܘܳܐ ܒܝܰܘܡܳܐ ܬܠܺܝܬܝܳܐ ܟܰܕ ܚܣܰܢܘ ܟܺܐܒܰܝ̈ܗܽܘܢ: ܢܣܰܒܘ ܬܪܶܝܢ ܒܢܰܘ̈ܗܝ ܕܝܰܥܩܽܘܒ: ܫܶܡܥܽܘܢ ܘܠܶܘܺܝ ܐܰܚܶܝ̈ܗ̇ ܕܕܺܝܢܰܐ: ܓܒܰܪ ܚܰܪܒܶܗ: ܘܥ̣ܰܠܘ ܥܰܠ ܩܪܺܝܬܳܐ ܒܫܶܠܝܳܐ: ܘܩܰܛܶܠܘ ܟܽܠ ܕܶܟܪܳܐ.

²⁶ ܘܠܰܚܡܽܘܪ ܘܠܰܫܟܺܝܡ ܒܪܶܗ ܩܛܰܠܘ ܒܦܽܘܡܳܐ ܕܚܰܪܒܳܐ: ܘܕܰܒܪܽܘܗ̇ ܠܕܺܝܢܰܐ ܚܳܬܗܽܘܢ ܡܶܢ ܒܶܝܬ ܫܟܺܝܡ: ܘܰܢܦܰܩܘ.

²⁷ ܘܰܒܢܰܝ̈ ܝܰܥܩܽܘܒ ܥ̣ܰܠܘ ܥܰܠ ܩܛܺܝ̈ܠܶܐ: ܘܒܰܙܘ ܠܰܩܪܺܝܬܳܐ: ܥܰܠ ܕܛܰܡܰܐܘ ܠܕܺܝܢܰܐ ܚܳܬܗܽܘܢ.

²⁸ ܘܥܳܢ̈ܗܽܘܢ: ܘܬܰܘܖ̈ܰܝܗܽܘܢ: ܘܚܶܡܖ̈ܗܽܘܢ ܕܒܰܩܪܺܝܬܳܐ ܘܕܰܒܚܰܩܠܳܐ ܕܒܰܪܘ.

²⁹ ܘܟܽܠܗܽܘܢ ܢܶܟܣܰܝ̈ܗܽܘܢ ܘܟܽܠܳܗ̇ ܝܺܩܰܪܬܗܽܘܢ: ܘܰܠܢܶܫܰܝ̈ܗܽܘܢ ܫܒܰܘ: ܘܒܰܙܘ ܟܽܠ ܕܺܐܝܬ ܒܰܩܪܺܝܬܳܐ.

³⁰ ܘܶܐܡܰܪ ܝܰܥܩܽܘܒ ܠܫܶܡܥܽܘܢ ܘܰܠܠܶܘܺܝ: ܐܰܗܰܪܬܽܘܢܳܢܝ: ܕܬܰܒܐܫܽܘܢ ܠܺܝ ܒܶܝܬ ܥܳܡܽܘܖ̈ܶܝܗ̇ ܕܰܐܪܥܳܐ: ܒܶܝܬ ܟܢܰܥܢܳܝ̈ܶܐ ܘܒܶܝܬ ܦܰܖ̈ܙܳܝܶܐ: ܘܶܐܢܳܐ ܩܰܠܺܝܠ ܐ̱ܢܳܐ ܒܡܶܢܝܳܢܳܐ: ܘܡܶܬܟܰܢܫܺܝܢ ܥܠܰܝ ܘܡܳܚܶܝܢ ܠܺܝ: ܘܳܐܒܶܕ ܐ̱ܢܳܐ ܐܶܢܳܐ ܘܒܰܝܬܝ.

³¹ ܘܶܐܡܰܪܘ ܐܰܝܟ ܙܳܢܺܝܬܳܐ ܐܶܬܥܒܶܕ ܠܚܳܬܰܢ.