Genesi ܒܪܝܬܐ 13

¹ ܘܰܣܠܶܩ ܐܰܒܪܰܡ ܡܶܢ ܡܶܨܪܶܝܢ: ܗܽܘ ܘܰܐܢ̱ܬܬܶܗ : ܘܟܽܠ ܕܺܐܝܬ ܠܶܗ : ܘܠܽܘܛ ܥܰܡܶܗ ܠܬܰܝܡܢܳܐ.

² ܘܰܐܒܪܰܡ ܥܬܰܪ ܛܳܒ: ܒܩܶܢܝܳܢܳܐ: ܘܰܒܣܺܐܡܳܐ : ܘܰܒܕܰܗܒܳܐ.

³ ܘܶܐܙܰܠ ܠܡܰܫܩܠܳܢܰܘ̈ܗܝ ܡܶܢ ܬܰܝܡܢܳܐ ܘܰܥܕܰܡܳܐ ܠܒܶܝܬ ܐܺܝܠ.

⁴ ܥܕܰܡܳܐ ܠܰܐܬܪܳܐ ܕܰܢܩܰܫ ܗܘܳܐ ܬܰܡܳܢ ܡܰܫܟܢܶܗ ܡܶܢ ܩܕܺܝܡ: ܒܰܝܢܳܬ ܒܶܝܬ ܐܺܝܠ ܠܒܶܝܬ ܥܳܝ: ܠܰܐܬܪܳܐ ܕܡܰܕܒܚܳܐ ܕܰܥ̣ܒܰܕ ܗܘܳܐ ܬܰܡܳܢ ܒܩܰܕܡܰܝܬܳܐ. ܘܰܩܪܳܐ ܬܰܡܳܢ ܐܰܒܪܰܡ ܒܰܫܡܶܗ ܕܡܳܪܝܳܐ.

⁵ ܘܳܐܦ ܠܠܽܘܛ ܕܶܐܙܰܠ ܥܰܡ ܐܰܒܪܰܡ: ܐܺܝܬ ܗܘܰܘ ܥܳܢ̈ܳܐ: ܘܬܰܘܖ̈ܶܐ: ܘܡܰܫܟܢ̈ܶܐ: ܣܽܘܓܳܐܐ ܕܛܳܒ.

⁶ ܘܠܳܐ ܡܣܰܝܒܪܳܐ ܗܘܳܬ ܠܗܽܘܢ ܐܰܪܥܳܐ ܗܳܝ ܠܡܶܬܰܒ ܐܰܟܚܕܳܐ: ܡܶܛܽܠ ܕܰܣܓܺܝ ܗܘܳܐ ܩܶܢܝܳܢܗܽܘܢ ܛܳܒ ܘܠܳܐ ܡܶܫܟܚܺܝܢ ܗܘܰܘ ܠܡܶܬܰܒ ܐܰܟܚܕܳܐ.

⁷ ܘܶܐܬܓܠܺܝ ܡܳܪܝܳܐ ܥܰܠ ܐܰܒܪܰܡ: ܘܶܐܡܰܪ ܠܶܗ : ܠܙܰܪܥܰܟ ܐܶܬܠܺܝܗ̇ ܐܰܪܥܳܐ ܗܳܕܶܐ. ܘܰܒܢܳܐ ܬܰܡܳܢ ܡܰܕܒܚܳܐ ܠܡܳܪܝܳܐ: ܕܶܐܬܓܠܺܝ ܥܠܰܘܗ̱ܝ.

⁸ ܘܶܐܡܰܪ ܐܰܒܪܰܡ ܠܠܽܘܛ: ܠܳܐ ܬܶܗܘܶܐ ܡܰܨܽܘܬܳܐ ܒܰܝ̈ܢܰܝ ܘܠܳܟ: ܘܒܶܝܬ ܖ̈ܳܥܰܘܳܬܝ ܠܖ̈ܳܥܰܘܳܬܳܟ: ܡܶܛܽܠ ܕܓܰܒܖ̈ܶܐ ܐܰܚ̈ܶܐ ܚܢܰܢ.

⁹ ܗܳܐ ܟܽܠܳܗ̇ ܐܰܪܥܳܐ ܩܕܳܡܰܝܟ: ܦܪܽܘܫ ܡܶܢܝ : ܐܶܢ ܐܰܢ̱ܬ ܠܝܰܡܺܝܢܳܐ ܐܶܢܳܐ ܠܣܶܡܳܠܳܐ: ܘܶܐܢ ܐܰܢ̱ܬ ܠܣܶܡܳܠܳܐ ܐܶܢܳܐ ܠܝܰܡܺܝܢܳܐ.

¹⁰ ܘܰܐܪܺܝܡ ܠܽܘܛ ܥܰܝܢܰܘ̈ܗܝ: ܘܰܚܙܳܐ ܟܽܠܳܗ̇ ܐܰܪܥܳܐ ܕܝܽܘܪܕܢܳܢ ܕܟܽܠܳܗ̇ ܒܶܝܬ ܫܶܩܝܳܐ ܗ̱ܝ: ܩܕܳܡ ܕܰܢܚܰܒܶܠ ܐܰ‌ܠܳܗܳܐ ܠܰܣܕܽܘܡ ܘܰܠܥܳܡܽܘܪܳܐ: ܐܰܝܟ ܦܰܪܕܰܝܣܶܗ ܕܰܐ‌ܠܳܗܳܐ: ܘܰܐܝܟ ܐܰܪܥܳܐ ܕܡܶܨܪܶܝܢ ܕܰܒܡܰܥܠܳܢܳܐ ܕܨܳܥܳܢ.

¹¹ ܘܰܓܒܳܐ ܠܶܗ ܠܽܘܛ ܟܽܠܳܗ̇ ܐܰܪܥܳܐ ܕܝܽܘܪܕܢܳܢ ܘܰܫܩܰܠ ܠܽܘܛ ܡܶܢ ܡܰܕܢܚܳܐ: ܘܰܦܪܰܫ ܓܒܰܪ ܡܶܢ ܐܰܚܽܘܗܝ.

¹² ܐܰܒܪܰܡ ܝܺܬܶܒ ܒܰܐܪܥܳܐ ܕܰܟܢܰܥܢ: ܘܠܽܘܛ ܝܺܬܶܒ ܒܩܽܘܖ̈ܝܳܐ ܕܟܳܟܳܪ: ܘܺܝܪܶܬ ܥܕܰܡܳܐ ܠܰܣܕܽܘܡ.

¹³ ܘܐ̱ܢܳܫ̈ܳܐ ܕܰܣܕܽܘܡ ܒܺܝܫܺܝܢ ܘܚܰܛܳܝܺܝ̈ܢ ܛܳܒ ܩܕܳܡ ܡܳܪܝܳܐ.

¹⁴ ܘܶܐܡܰܪ ܡܳܪܝܳܐ ܠܰܐܒܪܰܡ: ܡܶܢ ܒܳܬܰܪ ܕܰܦܪܰܫ ܠܽܘܛ ܡܶܢ ܠܘܳܬܶܗ: ܐܰܪܺܝܡ ܥܰܝܢܰܝ̈ܟ ܘܰܚܙܺܝ ܡܶܢ ܐܰܬܪܳܐ ܕܰܐܢ̱ܬ ܒܶܗ: ܠܓܰܪܒܝܳܐ ܘܰܠܬܰܝܡܢܳܐ: ܘܰܠܡܕܰܢܚܳܐ ܘܰܠܡܰܥܪܒܳܐ.

¹⁵ ܡܶܛܽܠ ܕܟܽܠܳܗ̇ ܐܰܪܥܳܐ ܕܚܳܙܶܐ ܐܰܢ̱ܬ : ܠܳܟ ܐܶܬܠܺܝܗ̇ ܘܰܠܙܰܪܥܳܟ ܥܕܰܡܳܐ ܠܥܳܠܰܡ.

¹⁶ ܘܶܐܥܒܕܺܝܘܗܝ ܠܙܰܪܥܳܟ ܐܰܝܟ ܥܰܦܪܳܐ ܕܰܐܪܥܳܐ: ܕܶܐܢ ܡܶܫܟܰܚ ܐܰܢ̱ܬ ܠܡܶܡܢܳܐ ܥܰܦܪܳܐ ܕܰܐܪܥܳܐ : ܐܳܦ ܙܰܪܥܳܟ ܢܶܬܡܢܶܐ.

¹⁷ ܩܽܘܡ ܗܰܠܶܟ ܒܰܐܪܥܳܐ ܠܽܐܘܪܟܳܗ̇ ܘܠܰܦܬܳܝܳܗ̇: ܡܶܛܽܠ ܕܠܳܟ ܐܶܬܠܺܝܗ̇.

¹⁸ ܘܶܐܬܳܐ ܐܰܒܪܰܡ ܘܥܰܠ ܘܺܝܬܶܒ: ܒܶܝܬ ܒܰܠܽܘܛܳܐ ܕܡܰܡܪܶܐ ܐܳܡܽܘܪܳܝܳܐ ܕܰܒܚܶܒܪܽܘܢ: ܘܰܒܢܳܐ ܬܰܡܳܢ ܡܰܕܒܚܳܐ ܠܡܳܪܝܳܐ.