Genesi ܒܪܝܬܐ 20

¹ ܘܰܫܩܰܠ ܐܰܒܪܳܗܳܡ ܡܶܢ ܬܰܡܳܢ ܠܰܐܪܥܳܐ ܕܬܰܝܡܢܳܐ: ܘܺܝܬܶܒ ܒܶܝܬ ܪܩܶܡ ܠܒܶܝܬ ܓܳܕܳܪ: ܘܰܥܡܰܪ ܐܰܒܪܳܗܳܡ ܒܓܳܕܳܪ.

² ܘܶܐܡܰܪ ܐܰܒܪܳܗܳܡ ܥܰܠ ܣܰܪܳܐ ܐܰܢ̱ܬܬܶܗ ܕܚܳܬܝ ܗ̱ܝ. ܘܫܰܕܰܪ ܐܰܒܝܡܰܠܟ ܡܰܠܟܳܐ ܕܓܳܕܳܪ ܘܕܰܒܪܳܗ̇ ܠܣܰܪܳܐ.

³ ܘܶܐܬܳܐ ܐܰ‌ܠܳܗܳܐ ܥܰܠ ܐܰܒܝܡܰܠܟ ܒܚܶܠܡܳܐ ܕܠܺܠܝܳܐ ܘܶܐܡܰܪ ܠܶܗ: ܗܳܐ ܡܳܐܶܬ ܐܰܢ̱ܬ ܥܰܠ ܐܰܦܰܝ̈ ܐܰܢ̱ܬܬܳܐ ܕܰܕܒܰܪܬ: ܡܶܛܽܠ ܕܰܐܢ̱ܬܰܬ ܓܰܒܪܳܐ ܗ̱ܝ̣.

⁴ ܘܰܐܒܺܝܡܰܠܟ ܠܳܐ ܩܪܶܒ ܠܳܗ̇. ܘܶܐܡܰܪ ܐܰܒܝܡܰܠܟ: ܡܳܪܝܳܐ ܐܳܦ ܥܰܡܳܐ ܙܰܟܳܝܳܐ ܩܳܛܶܠ ܐܰܢ̱ܬ.

⁵ ܗܳܐ ܗܽܘ ܐܶܡܰܪ ܕܚܳܬܝ ܗ̱ܝ̣: ܘܳܐܦ ܗܺܝ ܐܶܡܪܰܬ ܕܳܐܚܝ ܗܽܘ. ܒܬܰܡܺܝܡܽܘܬ ܠܶܒܝ ܘܰܒܕܰܟܝܽܘܬܳܐ ܕܺܐܝܕܰܝ̈ ܥܶܒܕܶܬ ܗܳܕܶܐ.

⁶ ܘܶܐܡܰܪ ܠܶܗ ܐܰ‌ܠܳܗܳܐ ܒܚܶܠܡܳܐ: ܐܳܦ ܐܶܢܳܐ ܝܳܕܰܥ ܐ̱ܢܳܐ ܕܰܒܬܰܡܺܝܡܽܘܬ ܠܶܒܳܟ ܥܒܰܕܬ ܗܳܕܶܐ ܘܰܚܣܰܟܬܳܟ ܐܳܦ ܐܶܢܳܐ ܕܠܳܐ ܬܶܚܛܶܐ ܠܺܝ : ܡܶܛܽܠ ܗܳܢܳܐ ܠܳܐ ܫܒܰܩܬܳܟ ܠܡܶܩܪܰܒ ܠܳܗ̇.

⁷ ܗܳܫܳܐ ܐܰܗܦܶܟ ܐܰܢ̱ܬܰܬ ܓܰܒܪܳܐ: ܡܶܛܽܠ ܕܰܢܒܝܰܐ ܗ̱ܘ: ܘܰܢܨܰܠܶܐ ܥܠܰܝܟ ܘܬܺܐܚܶܐ. ܘܶܐܢ ܠܳܐ ܡܰܗܦܶܟ ܐܰܢ̱ܬ: ܕܰܥ ܕܰܡܡܳܬ ܡܳܐܶܬ ܐܰܢ̱ܬ: ܐܰܢ̱ܬ ܘܟܽܠ ܕܺܐܝܬ ܠܳܟ.

⁸ ܘܩܰܕܶܡ ܐܰܒܝܡܰܠܟ ܒܫܰܦܪܳܐ ܘܰܩܪܳܐ ܠܟܽܠܗܽܘܢ ܥܰܒܕܰܘ̈ܗܝ: ܘܡܰܠܶܠ ܟܽܠܗܶܝܢ ܡ̈ܶܠܶܐ ܗܳܠܶܝܢ ܒܶܐܕܢܰܝ̈ܗܽܘܢ: ܘܰܕܚܶܠܘ ܐ̱ܢܳܫ̈ܳܐ ܛܳܒ.

⁹ ܘܰܩܪܳܐ ܐܰܒܝܡܰܠܟ ܠܰܐܒܪܳܗܳܡ ܘܶܐܡܰܪ ܠܶܗ: ܡܳܢܳܐ ܥܶܒܕܶܬ ܠܳܟ: ܘܡܳܢܳܐ ܚܛܺܝܬ ܠܳܟ ܕܰܐܝܬܺܝܬ ܥܠܰܝ ܘܥܰܠ ܡܰܠܟܽܘܬܝ ܚܛܳܗܳܐ ܪܰܒܳܐ: ܥܒܳܕ̈ܶܐ ܕܠܳܐ ܡܶܬܥܰܒܕܺܝܢ ܥܒܰܕܬ ܥܰܡܝ.

¹⁰ ܘܶܐܡܰܪ ܐܰܒܝܡܰܠܟ ܠܰܐܒܪܳܗܳܡ: ܡܳܢܳܐ ܚܙܰܝܬ ܕܰܥܒܰܕܬ ܦܶܬܓܳܡܳܐ ܗܳܢܳܐ.

¹¹ ܘܶܐܡܰܪ ܐܰܒܪܳܗܳܡ. ܡܶܛܽܠ ܕܶܐܡܪܶܬ: ܕܰܠܡܳܐ ܠܰܝܬ ܕܶܚܠܬܶܗ ܕܰܐ‌ܠܳܗܳܐ ܒܰܐܬܪܳܐ ܗܳܢܳܐ: ܘܢܶܩܛܠܽܘܢܳܢܝ ܥܰܠ ܐܰܦܰܝ̈ ܐܰܢ̱ܬܰܬܝ.

¹² ܒܪܰܡ ܫܰܪܺܝܪܳܐܺܝܬ ܚܳܬܝ ܗܺܝ: ܒܰܪܬ ܐܳܒܝ ܘܠܳܐ ܒܰܪܬ ܐܶܡܝ: ܘܰܗܘܳܬ ܠܺܝ ܐܰܢ̱ܬܬܳܐ.

¹³ ܘܰܗܘܳܐ ܕܟܰܕ ܐܰܦܩܰܢܝ ܐܰ‌ܠܳܗܳܐ ܡܶܢ ܒܶܝܬ ܐܳܒܝ: ܐܶܡܪܶܬ ܠܳܗ̇: ܗܳܕܶܐ ܛܰܝܒܽܘܬܳܐ ܕܬܶܥܒܕܺܝܢ ܥܰܡܝ. ܒܟܽܠ ܐܰܬܰܪ ܕܳܐܙܺܠܝܢ ܚ̱ܢܰܢ ܠܬܰܡܳܢ : ܐܶܡܰܪ ܥܠܰܝ ܕܳܐܚܝ ܗܽܘ.

¹⁴ ܘܰܕܒܰܪ ܐܰܒܝܡܰܠܟ ܥܳܢ̈ܳܐ ܘܬܰܘܖ̈ܶܐ ܘܥܰܒ̈ܕܶܐ ܘܰܐܡ̈ܗܳܬܳܐ ܘܝܰܗܒ ܠܰܐܒܪܳܗܳܡ: ܘܦܰܢܺܝ ܠܶܗ ܠܣܰܪܳܐ ܐܰܢ̱ܬܬܶܗ.

¹⁵ ܘܶܐܡܰܪ ܐܰܒܝܡܰܠܟ ܠܰܐܒܪܳܗܳܡ. ܗܳܐ ܐܰܪܥܝ ܩܕܳܡܰܝܟ. ܟܰܪ ܕܫܰܦܺܝܪ ܒܥܰܝ̈ܢܰܝܟ ܬܶܒ.

¹⁶ ܘܰܠܣܰܪܳܐ ܐܶܡܰܪ. ܗܳܐ ܝܶܗܒܶܬ ܐܳܠܶܦ ܕܰܟܣܶܦ ܠܰܐܚܽܘܟܝ. ܘܗܳܐ ܐܳܦ ܗܽܘ ܝܺܗܺܝܒ ܠܶܟܝ. ܚܠܳܦ ܕܚܰܦܺܝܬܝ ܥܰܝ̈ܢܶܐ ܕܟܽܠ ܕܥܰܡܝ: ܘܥܰܠ ܟܽܠܡܶܕܶܡ ܐܰܟܶܣܬܺܝܢܝ.

¹⁷ ܘܨܰܠܺܝ ܐܰܒܪܳܗܳܡ ܩܕܳܡ ܐܰ‌ܠܳܗܳܐ: ܘܰܐܣܺܝ ܐܰ‌ܠܳܗܳܐ ܠܰܐܒܺܝܡܰܠܟ ܘܠܰܐܢ̱ܬܬܶܗ ܘܠܰܐܡ̈ܗܳܬܶܗ ܘܺܝܠܶܕ̈ܝ.

¹⁸ ܡܶܛܽܠ ܕܡܶܐܚܰܕ ܐܶܚܰܕ ܡܳܪܝܳܐ ܒܰܐܦܰܝ̈ ܟܽܠ ܡܰܪܒܥܳܐ ܕܒܶܝܬ ܐܰܒܝܡܰܠܟ: ܡܶܛܽܠ ܣܰܪܳܐ ܐܰܢ̱ܬܬܶܗ ܕܰܐܒܪܳܗܳܡ.