Genesi ܒܪܝܬܐ 24

¹ ܘܰܐܒܪܳܗܳܡ ܣܐܶܒ ܘܥܰܠ ܒܰܫܢܰܝ̈ܳܐ: ܘܡܳܪܝܳܐ ܒܰܪܶܟ ܠܰܐܒܪܳܗܳܡ ܒܟܽܠ.

² ܘܰܩܪܳܐ ܐܰܒܪܳܗܳܡ ܠܥܰܒܕܶܗ ܣܳܒܳܐ ܪܰܒ ܒܰܝܬܶܗ ܕܫܰܠܺܝܛ ܒܟܽܠ ܕܺܐܝܬ ܠܶܗ: ܘܶܐܡܰܪ ܠܶܗ: ܣܺܝܡ ܐܺܝܕܳܟ ܬܚܶܝܬ ܚܰܨܝ.

³ ܘܰܐܘܡܶܝܟ ܒܡܳܪܝܳܐ ܐܰ‌ܠܳܗܳܐ ܕܰܫܡܰܝܳܐ ܘܰܐܠܳܗܳܐ ܕܰܐܪܥܳܐ: ܕܠܳܐ ܬܶܣܰܒ ܐܰܢ̱ܬܬܳܐ ܠܒܶܪܝ ܡܶܢ ܒܢ̈ܳܬ ܟܢܰܥܢܳܝ̈ܶܐ ܕܝܳܬܶܒ ܐ̱ܢܳܐ ܒܰܝܢܳܬܗܽܘܢ.

⁴ ܐܶܠܳܐ ܠܰܐܪܥܝ ܘܰܠܬܰܘ̈ܠܕܳܬܝ ܙܶܠ: ܘܣܰܒ ܐܰܢ̱ܬܬܳܐ ܠܒܶܪܝ ܐܺܝܣܚܳܩ.

⁵ ܘܶܐܡܰܪ ܠܶܗ ܥܰܒܕܳܐ: ܘܶܐܢ ܠܳܐ ܬܶܨܒܶܐ ܐܰܢ̱ܬܬܳܐ ܠܡܶܐܬܳܐ ܒܳܬܪܝ ܠܰܐܪܥܳܐ ܗܳܕܶܐ: ܡܰܗܦܳܟܽܘ ܐܰܗܦܟܺܝܘܗܝ ܠܰܒܪܳܟ ܠܰܐܪܥܳܐ ܕܰܢܦܰܩܬ ܡܶܢ ܬܰܡܳܢ.

⁶ ܘܶܐܡܰܪ ܠܶܗ ܐܰܒܪܳܗܳܡ: ܐܶܙܕܰܗܪ ܠܳܟ ܕܰܠܡܳܐ ܬܰܗܦܶܟ ܠܒܶܪܝ ܠܬܰܡܳܢ.

⁷ ܡܳܪܝܳܐ ܐܰ‌ܠܳܗܳܐ ܕܰܫܡܰܝܳܐ ܕܕܰܒܪܰܢܝ ܡܶܢ ܬܰܡܳܢ: ܡܶܢ ܒܶܝܬ ܐܳܒܝ: ܘܡܶܢ ܐܰܪܥܳܐ ܕܬܰܘ̈ܠܕܳܬܝ: ܘܕܶܐܡܰܪ ܠܺܝ: ܘܕܰܐܩܺܝܡ ܠܺܝ: ܕܰܠܙܰܪܥܳܟ ܐܶܬܠܺܝܗ̇ ܐܰܪܥܳܐ ܗܳܕܶܐ : ܗܽܘ ܢܫܰܕܰܪ ܡܰܠܰܐܟܶܗ ܩܕܳܡܰܝܟ: ܘܬܶܣܰܒ ܐܰܢ̱ܬܬܳܐ ܠܒܶܪܝ ܡܶܢ ܬܰܡܳܢ.

⁸ ܘܶܐܢ ܠܳܐ ܬܶܬܛܦܺܝܣ ܐܰܢ̱ܬܬܳܐ ܠܡܶܐܬܳܐ ܥܰܡܳܟ: ܗܘܺܝܬ ܙܰܟܳܝ ܡܶܢ ܡܰܘܡܬܝ ܗܳܕܶܐ: ܒܰܠܚܽܘܕ ܠܒܶܪܝ ܠܳܐ ܬܰܗܦܶܟ ܠܬܰܡܳܢ.

⁹ ܘܣܳܡ ܥܰܒܕܳܐ ܐܺܝܕܶܗ ܬܚܶܝܬ ܚܰܨܶܗ ܕܰܐܒܪܳܗܳܡ ܡܳܪܶܗ: ܘܺܝܡܳܐ ܠܶܗ ܥܰܠ ܦܶܬܓܳܡܳܐ ܗܳܢܳܐ.

¹⁰ ܘܰܕܒܰܪ ܥܰܒܕܳܐ ܥܶܣܪܳܐ ܓܰܡ̈ܠܺܝܢ ܡܶܢ ܓܰܡ̈ܠܶܐ ܕܡܳܪܶܗ ܘܶܐܙܰܠ: ܘܡܶܢ ܟܽܠ ܛܽܘܒܳܐ ܕܡܳܪܶܗ ܒܺܐܝܕܶܗ: ܘܩܳܡ ܐܶܙܰܠ ܠܳܐܪܳܡ ܢܰܗܖ̈ܺܝܢ ܠܰܩܪܺܝܬܳܐ ܕܢܳܚܽܘܪ.

¹¹ ܘܰܐܒܪܶܟ ܓܰܡ̈ܠܰܘܗܝ ܠܒܰܪ ܡܶܢ ܩܪܺܝܬܳܐ: ܥܰܠ ܒܺܪܳܐ ܕܡܰܝ̈ܳܐ ܠܥܶܕܳܢ ܪܰܡܫܳܐ: ܠܥܶܕܳܢ ܕܢܳܦ̈ܩܳܢ ܡܳܠ̈ܝܳܬ ܡܰܝ̈ܳܐ.

¹² ܘܨܰܠܺܝ ܘܶܐܡܰܪ: ܡܳܪܝܳܐ ܐܰܠܳܗܶܗ ܕܡܳܪܝ ܐܰܒܪܳܗܳܡ: ܛܰܝܶܒ ܩܕܳܡܰܝ ܝܰܘܡܳܢܳܐ: ܘܰܥܒܶܕ ܛܰܝܒܽܘܬܳܐ ܥܰܡ ܡܳܪܝ ܐܰܒܪܳܗܳܡ.

¹³ ܗܳܐ ܐܶܢܳܐ ܩܳܐܶܡ ܐ̱ܢܳܐ ܥܰܠ ܒܺܪܳܐ ܕܡܰܝ̈ܳܐ: ܘܰܒܢ̈ܳܬ ܐ̱ܢܳܫܰܝ̈ ܩܪܺܝܬܳܐ ܢܳܦ̈ܩܳܢ ܠܡܶܡܠܳܐ ܡܰܝ̈ܳܐ.

¹⁴ ܘܰܥܠܰܝܡܬܳܐ ܕܺܐܡܰܪ ܠܳܗ̇: ܐܰܪܟܶܢ ܠܺܝ ܩܽܘܠܬܶܟܝ ܕܶܐܫܬܶܐ: ܘܬܺܐܡܰܪ ܠܺܝ ܐܶܫܬܰܝ ܘܳܐܦ ܠܓܰܡ̈ܠܰܝܟ ܐܰܫܩܳܐ: ܗܺܝ ܗܺܝ ܕܛܰܝܶܒܬ ܠܥܰܒܕܳܟ ܐܺܝܣܚܳܩ: ܘܰܒܗܳܕܶܐ ܐܶܕܰܥ ܕܥܳܒܶܕ ܐܰܢ̱ܬ ܛܰܝܒܽܘܬܳܐ ܘܩܽܘܫܬܳܐ ܥܰܡ ܡܳܪܝ.

¹⁵ ܘܗܽܘ ܥܕܰܟܺܝܠ ܠܳܐ ܫܰܠܶܡ ܠܰܡܡܰܠܳܠܽܘ: ܘܗܳܐ ܪܰܦܩܰܐ ܢܶܦܩܰܬ ܕܶܐܬܺܝܠܕܰܬ ܠܰܒܬܽܘܐܶܝܠ ܒܰܪ ܡܶܠܟܳܐ ܐܰܢ̱ܬܰܬ ܢܳܚܽܘܪ ܐܰܚܽܘܗܝ ܕܰܐܒܪܳܗܳܡ: ܘܩܽܘܠܬܳܐ ܥܰܠ ܟܰܬܦܳܗ̇.

¹⁶ ܘܰܥܠܰܝܡܬܳܐ ܫܰܦܺܝܪܳܐ ܗܘܳܬ ܒܚܶܙܘܳܐ ܛܳܒ: ܒܬܽܘܠܬܳܐ ܕܓܰܒܪܳܐ ܠܳܐ ܝܰܕܥܳܗ̇: ܘܢܶܚܬܰܬ ܠܒܺܪܳܐ: ܘܰܡܠܳܬ ܩܽܘܠܬܳܐ ܘܣܶܠܩܰܬ.

¹⁷ ܘܰܪܗܶܛ ܥܰܒܕܳܐ ܠܽܐܘܪܥܳܗ̇: ܘܶܐܡܰܪ ܠܳܗ̇: ܐܰܫܩܳܐܺܝܢܝ ܩܰܠܺܝܠ ܡܰܝ̈ܳܐ ܡܶܢ ܩܽܘܠܬܶܟܝ.

¹⁸ ܘܶܐܡܪܰܬ ܠܶܗ: ܐܶܫܬܰܝ ܡܳܪܝ: ܘܶܐܣܬܰܪܗܒܰܬ ܘܰܐܚܬܰܬ ܩܽܘܠܬܳܐ ܥܰܠ ܐܺܝ̈ܕܶܝܗ̇: ܘܰܐܫܩܝܰܬܶܗ.

¹⁹ ܘܓܰܡܪܰܬ ܠܡܰܫܩܳܝܽܘܬܶܗ: ܘܶܐܡܪܰܬ: ܐܳܦ ܠܓܰܡ̈ܠܰܝܟ ܐܶܡܠܶܐ ܥܕܰܡܳܐ ܕܢܶܫܠܡܽܘܢ ܠܡܶܫܬܳܐ.

²⁰ ܘܶܐܣܬܰܪܗܒܰܬ ܘܢܶܦܨܰܬ ܩܽܘܠܬܳܗ̇ ܠܫܶܩܝܳܐ: ܘܪܶܗܛܰܬ ܬܽܘܒ ܠܒܺܪܳܐ ܠܡܶܡܠܳܐ: ܘܰܡܠܳܬ ܠܟܽܠܗܽܘܢ ܓܰܡܠܰܘ̈ܗܝ.

²¹ ܘܓܰܒܪܳܐ ܡܰܫܩܶܐ ܘܡܶܬܒܰܩܶܐ ܒܳܗ̇: ܘܰܡܟܰܬܰܪ ܠܡܶܕܰܥ: ܐܶܢ ܐܰܨܠܰܚ ܡܳܪܝܳܐ ܐܽܘܪܚܶܗ: ܐܰܘ ܠܳܐ.

²² ܘܟܰܕ ܓܡܰܪܘ ܓܰܡ̈ܠܶܐ ܠܡܶܫܬܳܐ: ܢܣܰܒ ܥܰܒܕܳܐ ܩܕܳܫܳܐ ܕܕܰܗܒܳܐ ܡܰܬܩܳܠܳܐ ܡܰܬܩܳܠܶܗ: ܘܰܬܪܶܝܢ ܫܶܐܖ̈ܺܝܢ ܥܰܠ ܐܺܝܕܶܝ̈ܗ̇: ܡܶܢ ܥܶܣܪܳܐ ܕܕܰܗܒܳܐ ܡܰܬܩܳܠܗܽܘܢ.

²³ ܘܶܐܡܰܪ ܠܳܗ̇: ܒܰܪܬ ܡܰܢ ܐܰܢ̱ܬܝ: ܚܰܘܳܐܺܝܢܝ ܐܶܢ ܐܺܝܬ ܠܰܢ ܐܰܬܪܳܐ ܒܶܝܬ ܐܰܒܽܘܟܝ ܠܰܡܒܳܬ.

²⁴ ܘܶܐܡܪܰܬ ܠܶܗ: ܒܰܪܬ ܒܬܽܘܐܶܝܠ ܐ̱ܢܳܐ ܒܰܪ ܡܶܠܟܳܐ ܕܝܶܠܕܰܬ ܠܢܳܚܽܘܪ.

²⁵ ܘܶܐܡܪܰܬ ܠܶܗ : ܘܳܐܦ ܬܶܒܢܳܐ ܘܳܐܦ ܟܶܣܬܳܐ ܣܰܓܺܝ ܠܰܢ: ܘܳܐܦ ܐܰܬܪܳܐ ܠܰܡܒܳܬ.

²⁶ ܘܰܒܪܶܟ ܓܰܒܪܳܐ ܥܰܠ ܐܰܪܥܳܐ: ܘܰܣܓܶܕ ܠܡܳܪܝܳܐ.

²⁷ ܘܶܐܡܰܪ: ܒܪܺܝܟ ܗ̱ܘ̣ ܡܳܪܝܳܐ ܐܰܠܳܗܶܗ ܕܡܳܪܝ ܐܰܒܪܳܗܳܡ: ܕܠܳܐ ܟܠܳܐ ܛܰܝܒܽܘܬܶܗ ܘܩܽܘܫܬܶܗ ܡܶܢ ܡܳܪܝ: ܐܶܠܳܐ ܒܽܐܘܪܚܳܐ ܕܰܒܪܰܢܝ ܡܳܪܝܳܐ ܠܒܶܝܬ ܐܰܚܽܘܗ̇ ܕܡܳܪܝ: ܠܡܶܣܰܒ ܒܰܪܬ ܐܰܚܽܘܗܝ ܕܡܳܪܝ ܠܰܒܪܶܗ.

²⁸ ܘܪܶܗܛܰܬ ܛܠܺܝܬܳܐ ܘܚܰܘܝܰܬ ܠܒܶܝܬ ܐܰܒܽܘܗܝ ܡ̈ܶܠܶܐ ܗܳܠܶܝܢ.

²⁹ ܘܰܠܪܰܦܩܰܐ ܐܺܝܬ ܗܘܳܐ ܐܰܚܳܐ ܘܰܫܡܶܗ ܠܳܒܳܢ: ܘܰܪܗܶܛ ܠܳܒܳܢ ܠܘܳܬ ܓܰܒܪܳܐ ܠܒܰܪ ܠܘܳܬ ܒܺܪܳܐ.

³⁰ ܟܰܕ ܚܙܳܐ ܩܕܳܫ̈ܶܐ ܘܫܶܐܖ̈ܶܐ ܒܺܐܝ̈ܕܰܝ ܚܳܬܶܗ: ܘܟܰܕ ܫܡܰܥ ܡܶܠܶܝ̈ܗ̇ ܕܪܰܦܩܰܐ ܚܳܬܶܗ: ܕܶܐܡܪܰܬ ܕܗܳܟܰܢܳܐ ܐܶܡܰܪ ܠܺܝ ܓܰܒܪܳܐ: ܘܶܐܬܳܐ ܠܘܳܬ ܓܰܒܪܳܐ: ܘܗܳܐ ܩܳܐܶܡ ܠܘܳܬ ܓܰܡ̈ܠܶܐ ܥܰܠ ܒܺܪܳܐ.

³¹ ܘܶܐܡܰܪ ܠܶܗ: ܥܽܘܠ ܒܪܺܝܟܶܗ ܕܡܳܪܝܳܐ: ܠܡܳܢܳܐ ܩܳܐܶܡ ܐܰܢ̱ܬ ܒܫܽܘܩܳܐ: ܘܶܐܢܳܐ ܬܰܩܢܶܬ ܒܰܝܬܳܐ ܘܕܽܘܟܬܳܐ ܠܓܰܡ̈ܠܶܐ.

³² ܘܥ̣ܰܠ ܓܰܒܪܳܐ ܠܒܰܝܬܳܐ: ܘܰܫܪܳܐ ܡܶܢ ܓܰܡ̈ܠܶܐ: ܘܰܐܪܡܺܝ ܬܶܒܢܳܐ ܘܟܶܣܬܳܐ ܠܓܰܡ̈ܠܶܐ: ܘܡܰܝ̈ܳܐ ܠܰܡܫܳܓܽܘ ܖ̈ܶܓܠܰܘܗܝ ܘܖ̈ܶܓܠܶܐ ܕܓܰܒܖ̈ܶܐ ܕܥܰܡܶܗ.

³³ ܘܣܳܡ ܩܕܳܡܰܝܗܽܘܢ ܠܡܶܠܥܰܣ: ܘܶܐܡܰܪ: ܠܳܐ ܠܳܥܶܣ ܐ̱ܢܳܐ ܥܕܰܡܳܐ ܕܺܐܡܰܪ ܡܶܠܰܝ̈: ܐܳܡܪܺܝܢ ܠܶܗ: ܐܶܡܰܪ.

³⁴ ܘܶܐܡܰܪ: ܥܰܒܕܳܐ ܐ̱ܢܳܐ ܕܰܐܒܪܳܗܳܡ.

³⁵ ܘܡܳܪܝܳܐ ܒܰܪܶܟ ܠܡܳܪܝ: ܘܺܝܪܶܒ ܛܳܒ ܘܰܗܘܰܘ ܠܶܗ ܥܳܢ̈ܳܐ: ܘܬܰܘܖ̈ܶܐ: ܘܣܺܐܡܳܐ: ܘܕܰܗܒܳܐ: ܘܥܰܒ̈ܕܶܐ: ܘܰܐܡܗ̈ܳܬܳܐ: ܘܰܐܬܳܢ̈ܶܐ: ܘܓܰܡ̈ܠܶܐ: ܘܚܶܡܖ̈ܳܐ.

³⁶ ܘܝܶܠܕܰܬ ܣܰܪܳܐ ܐܰܢ̱ܬܬܶܗ ܕܡܳܪܝ ܒܪܳܐ ܠܡܳܪܝ ܡܶܢ ܒܳܬܰܪ ܕܣܶܐܒܰܬ: ܘܝܰܗܒ ܠܶܗ ܟܽܠܡܶܕܶܡ ܕܺܐܝܬ ܠܶܗ.

³⁷ ܘܰܐܘܡܝܰܢܝ ܡܳܪܝ ܘܶܐܡܰܪ ܠܺܝ: ܠܳܐ ܬܶܣܰܒ ܐܰܢ̱ܬܬܳܐ ܠܒܶܪܝ ܡܶܢ ܒܢ̈ܳܬ ܟܢܰܥܢܳܝ̈ܶܐ ܕܝܳܬܶܒ ܐ̱ܢܳܐ ܒܰܐܪܥܗܽܘܢ.

³⁸ ܐܶܠܳܐ ܙܶܠ ܠܒܶܝܬ ܐܳܒܝ ܘܰܠܫܰܪܒܰܬܝ: ܘܣܰܒ ܐܰܢ̱ܬܬܳܐ ܠܒܶܪܝ ܡܶܢ ܬܰܡܳܢ.

³⁹ ܘܶܐܡܪܶܬ ܠܡܳܪܝ: ܘܕܰܠܡܳܐ ܠܳܐ ܬܶܨܒܶܐ ܐܰܢ̱ܬܬܳܐ ܠܡܶܐܬܳܐ ܥܰܡܝ.

⁴⁰ ܘܶܐܡܰܪ ܠܺܝ ܡܳܪܝ: ܡܳܪܝܳܐ ܕܦܶܠܚܶܬ ܩܕܳܡܰܘܗܝ: ܗܽܘ ܢܫܰܕܰܪ ܡܰܠܰܐܟܶܗ ܥܰܡܳܟ ܘܢܰܬܩܶܢ ܐܽܘܪܚܳܟ: ܘܬܶܣܰܒ ܐܰܢ̱ܬܬܳܐ ܠܒܶܪܝ ܡܶܢ ܫܰܪܒܰܬܝ ܘܡܶܢ ܒܶܝܬ ܐܳܒܝ.

⁴¹ ܘܗܳܝܕܶܝܢ ܬܶܬܚܰܣܶܐ ܡܶܢ ܡܰܘܡܳܬܝ ܟܰܕ ܬܺܐܙܰܠ ܠܫܰܪܒܰܬܝ. ܘܶܐܢ ܠܳܐ ܢܶܬܠܽܘܢ ܠܳܟ: ܗܘܰܝܬ ܡܚܰܣܰܝ ܡܶܢ ܡܰܘܡܳܬܝ.

⁴² ܘܶܐܬܺܝܬ ܝܰܘܡܳܢܳܐ ܠܘܳܬ ܒܺܪܳܐ ܘܶܐܡܪܶܬ: ܡܳܪܝܳܐ ܐܰ‌ܠܳܗܳܐ ܕܡܳܪܝ ܐܰܒܪܳܗܳܡ: ܐܶܢ ܐܰܬܩܶܢܬ ܐܽܘܪܚܝ ܕܶܐܬܺܝܬ ܥܠܶܝܗ̇.

⁴³ ܗܳܐ ܐܶܢܳܐ ܩܳܐܶܡ ܐ̱ܢܳܐ ܥܰܠ ܒܺܪܳܐ ܕܡܰܝ̈ܳܐ: ܘܰܥܠܰܝܡܬܳܐ ܕܢܳܦܩܳܐ ܠܡܶܡܠܳܐ ܡܰܝ̈ܳܐ: ܘܺܐܡܰܪ ܠܳܗ̇.

⁴⁴ ܐܰܫܩܳܐܺܝܢܝ ܩܰܠܺܝܠ ܡܰܝ̈ܳܐ ܡܶܢ ܩܽܘܠܬܶܟܝ. ܘܬܺܐܡܰܪ ܠܺܝ ܐܳܦ ܐܰܢ̱ܬ ܐܶܫܬܰܝ ܘܳܐܦ ܠܓܰܡ̈ܠܰܝܟ ܐܶܡܠܶܐ: ܗܺܝ ܗܺܝ ܐܰܢ̱ܬܬܳܐ ܕܛܰܝܶܒ ܡܳܪܝܳܐ ܠܒܰܪ ܡܳܪܝ.

⁴⁵ ܘܶܐܢܳܐ ܥܕܰܟܺܝܠ ܠܳܐ ܫܰܠܡܶܬ ܠܰܡܡܰܠܳܠܽܘ ܒܠܶܒܝ: ܘܗܳܐ ܪܰܦܩܰܐ ܢܶܦܩܰܬ ܘܩܽܘܠܬܳܐ ܥܰܠ ܟܰܬܦܳܗ̇: ܘܢܶܚܬܰܬ ܠܥܰܝܢܳܐ ܘܰܡܠܳܬ: ܘܶܐܡܪܶܬ ܠܳܗ̇: ܐܰܫܩܳܐܺܝܢܝ ܩܰܠܺܝܠ ܡܰܝ̈ܳܐ ܡܶܢ ܩܽܘܠܬܶܟܝ.

⁴⁶ ܘܶܐܣܬܰܪܗܒܰܬ ܘܰܐܚܬܰܬ ܩܽܘܠܬܳܗ̇ ܡܶܢܳܗ̇: ܘܶܐܡܪܰܬ ܠܺܝ: ܐܶܫܬܰܝ ܐܳܦ ܠܓܰܡ̈ܠܰܝܟ ܐܰܫܩܳܐ: ܘܶܐܫܬܺܝܬ ܘܳܐܦ ܠܓܰܡܠܰܝ̈ ܐܰܫܩܺܝܬ.

⁴⁷ ܘܫܰܐܶܠܬܳܗ̇ : ܘܶܐܡܪܶܬ ܠܳܗ̇: ܒܰܪܬ ܡܰܢ ܐܰܢ̱ܬ ܘܶܐܡܪܰܬ: ܒܰܪܬ ܒܬܽܘܐܶܝܠ ܐ̱ܢܳܐ ܒܰܪ ܢܳܚܽܘܪ ܕܝܶܠܕܰܬ ܠܶܗ ܡܶܠܟܳܐ: ܘܰܐܪܡܺܝܬ ܫܶܐܖ̈ܶܐ ܒܺܐܝ̈ܕܶܝܗ̇ ܘܰܩܕܳܫ̈ܶܐ ܒܶܐܕܢܶܝ̈ܗ̇. ܘܩܶܥܕܶܬ ܘܣܶܓܕܶܬ ܠܡܳܪܝܳܐ.

⁴⁸ ܘܒܰܪܟܶܬ ܠܡܳܪܝܳܐ ܐܰ‌ܠܳܗܳܐ ܕܡܳܪܝ ܐܰܒܪܳܗܳܡ: ܕܕܰܒܪܰܢܝ ܒܽܐܘܪܚܳܐ ܕܩܽܘܫܬܳܐ ܠܒܶܝܬ ܐܰܚܽܘܗܝ ܕܡܳܪܝ: ܠܡܶܣܰܒ ܒܰܪܬ ܐܰܚܽܘܗܝ ܕܡܳܪܝ ܠܰܒܪܶܗ.

⁴⁹ ܘܗܳܫܳܐ ܐܶܢ ܥܳܒܕܺܝܢ ܐܰܢ̱ܬܽܘܢ ܛܰܝܒܽܘܬܳܐ ܘܩܽܘܫܬܳܐ ܥܰܡ ܡܳܪܝ: ܚܰܘܰܐܢܝ. ܘܶܐܢ ܠܳܐ: ܚܰܘܰܐܢܝ: ܘܶܐܬܦܢܶܐ ܠܝܰܡܺܝܢܳܐ ܐܰܘ ܠܣܶܡܳܠܳܐ.

⁵⁰ ܘܰܥܢܰܘ ܠܳܒܳܢ ܘܰܒܬܽܘܐܶܝܠ: ܘܶܐܡܰܪܘ: ܡܶܢ ܡܳܪܝܳܐ ܢܶܦܩܰܬ ܡܶܠܬܳܐ: ܠܳܐ ܡܶܫܟܚܺܝܢܰܢ ܠܡܺܐܡܰܪ ܠܳܟ ܛܳܒܬܳܐ ܐܰܘ ܒܺܝܫܬܳܐ.

⁵¹ ܗܳܐ ܪܰܦܩܰܐ ܩܕܳܡܰܝܟ ܕܒܰܪ ܘܙܶܠ: ܘܬܶܗܘܶܐ ܐܰܢ̱ܬܬܳܐ ܠܒܰܪ ܡܳܪܳܟ ܐܰܝܟܰܢܳܐ ܕܶܐܡܰܪ ܡܳܪܝܳܐ.

⁵² ܘܟܰܕ ܫܡܰܥ ܥܰܒܕܳܐ ܕܰܐܒܪܳܗܳܡ ܡܶܠܰܝ̈ܗܽܘܢ: ܣܓܶܕ ܥܰܠ ܐܰܪܥܳܐ ܩܕܳܡ ܡܳܪܝܳܐ.

⁵³ ܘܰܐܦܶܩ ܥܰܒܕܳܐ ܡܳܐܢ̈ܶܐ ܕܕܰܗܒܳܐ: ܘܡܳܐܢ̈ܶܐ ܕܣܺܐܡܳܐ: ܘܰܠܒܽܘܫ̈ܶܐ: ܘܝܰܗܒ ܠܪܰܦܩܰܐ: ܘܡܰܘ̈ܗܒܳܬܳܐ ܝܰܗܒ ܠܰܐܚܶܝ̈ܗ̇ ܘܠܶܐܡܳܗ̇.

⁵⁴ ܘܰܠܥܶܣܘ ܘܶܐܫܬܺܝܘ ܗܽܘ ܘܓܰܒܖ̈ܶܐ ܕܥܰܡܶܗ: ܘܒܳܬܘ: ܘܩܰܕܶܡ ܒܫܰܦܪܳܐ ܘܶܐܡܰܪ ܠܗܽܘܢ: ܫܰܕܪܽܘܢܝ ܐܺܙܰܠ ܠܘܳܬ ܡܳܪܝ.

⁵⁵ ܘܶܐܡܰܪܘ ܠܶܗ ܐܰܚ̈ܶܝ̈ܗ̇ ܘܶܐܡܳܗ̇: ܬܶܬܶܒ ܥܠܰܝܡܬܳܐ ܥܰܡܰܢ ܝܺܪܰܚ ܝܰܘܡܺܝ̈ܢ: ܘܗܳܝܕܶܝܢ ܬܺܐܙܰܠ.

⁵⁶ ܘܶܐܡܰܪ ܠܗܽܘܢ: ܠܳܐ ܬܫܰܘܚܪܽܘܢܳܢܝ: ܕܡܳܪܝܳܐ ܐܰܬܩܶܢ ܐܽܘܪܚܝ: ܫܰܕܪܽܘܢܝ ܐܺܙܰܠ ܠܘܳܬ ܡܳܪܝ.

⁵⁷ ܘܶܐܡܰܪܘ: ܢܶܩܪܶܐ ܠܰܛܠܺܝܬܳܐ ܘܢܶܫܐܰܠ ܡܶܢ ܦܽܘܡܳܗ̇.

⁵⁸ ܘܰܩܪܰܐܗ̇ ܠܪܰܦܩܰܐ: ܘܶܐܡܰܪܘ ܠܳܗ̇: ܐܳܙܳܠܐ ܐܰܢ̱ܬ ܥܰܡ ܓܰܒܪܳܐ ܗܳܢܳܐ: ܘܶܐܡܪܰܬ : ܐܳܙܳܠܐ ܐ̱ܢܳܐ.

⁵⁹ ܘܫܰܕܪܽܘܗ̇ ܠܪܰܦܩܰܐ ܚܳܬܗܽܘܢ ܘܰܠܡܰܝܢܰܩܬܳܗ̇. ܘܰܠܥܰܒܕܳܐ ܕܰܐܒܪܳܗܳܡ: ܘܰܠܓܰܒܖ̈ܰܘܗܝ.

⁶⁰ ܘܒܰܪܟܽܘܗ̇ ܠܪܰܦܩܰܐ ܚܳܬܗܽܘܢ: ܘܶܐܡܰܪܘ ܠܳܗ̇: ܚܳܬܰܢ ܐܰܢ̱ܬܝ: ܗܘܳܝ ܠܰܐܠܦ̈ܶܐ ܘܰܠܖ̈ܶܒܘܳܬܳܐ: ܘܢܺܐܪܰܬ ܙܰܪܥܶܟܝ ܐܰܖ̈ܥܳܬܳܐ ܕܰܒܥܶܠܕܒܳܒܰܘ̈ܗܝ.

⁶¹ ܘܩܳܡܰܬ ܪܰܦܩܰܐ ܘܰܥܠܰܝ̈ܡܳܬܳܗ̇: ܘܺܝܬܶܒܝ̈ ܥܰܠ ܓܰܡ̈ܠܶܐ ܘܶܐܙܰܠ̈ܝ ܒܳܬܰܪ ܓܰܒܪܳܐ: ܘܰܕܒܰܪ ܥܰܒܕܳܐ ܠܪܰܦܩܰܐ ܘܶܐܙܰܠ.

⁶² ܘܺܐܝܣܚܳܩ ܐܳܬܶܐ ܡܶܐܬܳܐ ܡܶܢ ܒܺܪܳܐ ܕܚܰܝܳܐ ܚܙܳܢܝ: ܘܗܽܘ ܝܳܬܶܒ ܒܰܐܪܥܳܐ ܕܬܰܝܡܢܳܐ.

⁶³ ܘܰܢܦܰܩ ܐܺܝܣܚܳܩ ܠܰܡܗܰܠܳܟܽܘ ܒܚܰܩܠܳܐ ܒܥܶܕܳܢ ܪܰܡܫܳܐ. ܘܰܐܪܺܝܡ ܥܰܝܢܰܘ̈ܗܝ ܘܰܚܙܳܐ: ܘܗܳܐ ܓܰܡ̈ܠܶܐ ܐܳܬܶܝܢ.

⁶⁴ ܘܰܐܪܺܝܡܬ ܪܰܦܩܰܐ ܥܰܝ̈ܢܶܝܗ̇ ܘܰܚܙܳܬ ܠܺܐܝܣܚܳܩ: ܘܶܐܬܪܰܟܢܰܬ ܥܰܠ ܓܰܡܠܳܐ.

⁶⁵ ܘܶܐܡܪܰܬ ܠܥܰܒܕܳܐ: ܡܰܢܽܘ ܓܰܒܪܳܐ ܗܳܢܳܐ ܕܳܐܬܶܐ ܒܚܰܩܠܳܐ ܠܽܐܘܪܥܰܢ: ܘܶܐܡܰܪ ܥܰܒܕܳܐ: ܗܽܘܝܽܘ ܡܳܪܝ: ܘܢܶܣܒܰܬ ܐܰܪܕܺܝܕܳܐ ܘܶܐܬܟܰܣܝܰܬ.

⁶⁶ ܘܶܐܫܬܰܥܺܝ ܥܰܒܕܳܐ ܠܺܐܝܣܚܳܩ ܟܽܠܗܽܘܢ ܦܶܬܓܳܡ̈ܶܐ ܕܥܶܒܕܰܬ.

⁶⁷ ܘܰܐܥܠܳܗ̇ ܐܺܝܣܚܳܩ ܠܡܰܫܟܢܳܐ ܕܣܰܪܳܐ ܐܶܡܶܗ: ܘܢܰܣܒܳܗ̇ ܠܪܰܦܩܰܐ: ܘܰܗܘܳܬ ܠܶܗ ܐܰܢ̱ܬܬܳܐ: ܘܪܰܚܡܳܗ̇: ܘܶܐܬܒܰܝܰܐ ܐܺܝܣܚܳܩ ܒܳܬܰܪ ܐܶܡܶܗ.