Secondo libro dei Maccabei ܡܩܒܝ̈ܐ 1

¹ ܐܚ̈ܐ ܝܗܘ̈ܕܝܐ ܕܒܐܪܫܠܡ ܘܒܐܪܥܐ ܕܝܗܘܕܐ ܠܐ̈ܚܝܢ ܝܗܘ̈ܕܝܐ ܕܒܡܨܪܝܢ ܫܠܡ ܫܠܡܐ ܘܛܝܒܘܬܐ ܥܡܟܘܢ

² ܘܢܛܐܒ ܠܟܘܢ ܐܠܗܐ ܘܢܬܕܟܪ ܩܝܡܗ ܕܥܡ ܐܒܪܗܡ ܘܐܝܣܚܩ ܘܝܥܩܘܒ ܥܒ̈ܕܘܗܝ ܡܗܝ̈ܡܢܐ

³ ܘܢܬܠ ܠܟܘܢ ܠܒܐ ܠܟܘܠܟܘܢ ܕܬܕܚܠܘܢ ܠܗ ܘܬܥܒܕܘܢ ܦܘܩ̈ܕܢܘܗܝ ܒܠܒܐ ܡܠܝܐ ܘܒܢܦܫܐ ܕܡܨܛܒܝܐ

⁴ ܘܢܦܬܚ ܐܕܢ̈ܝܟܘܢ ܘܠܒܘ̈ܬܟܘܢ ܠܢܡܘ̈ܣܘܗܝ ܘܠܦܘܩ̈ܕܢܘܗܝ ܘܢܥܒܕ ܥܡܟܘܢ ܫܠܡܐ

⁵ ܘܢܫܡܥ ܒܥܘܬܟܘܢ ܘܢܬܪܥܐ ܠܟܘܢ ܘܠܐ ܢܫܒܘܩܟܘܢ ܒܙܒ̈ܢܐ ܕܒܝܫܬܐ

⁶ ܘܗܫܐ ܗܐ ܗܪܟܐ ܚܢܢ ܘܡܨܠܝܢܢ ܥܠܝܟܘܢ

⁷ ܘܒܫܢܬ ܡܐܐ ܘܫܬܝܢ ܘܬܫܥ ܒܡܠܟܘܬܗ ܕܕܡܛܪܝܘܣ ܚܢܢ ܝܗܘ̈ܕܝܐ ܟܬܒܢ ܠܟܘܢ ܒܥܩ̈ܬܐ ܘܒܐܘܠܨ̈ܢܐ ܕܡܛܝܘܢ ܒܗܠܝܢ ܫܢ̈ܝܐ ܡܢ ܕܐܫܬܕܪ ܐܝܣܘܢ ܘܐܝܠܝܢ ܕܥܡܗ ܡܢ ܡܠܟܘܬܐ ܠܐܪܥܐ ܩܕܝܫܬܐ

⁸ ܘܐܘܩܕܘ ܬܪ̈ܥܐ ܘܐܫܕܘ ܕܡܐ ܙܟܝܐ ܘܨܠܝܢ ܘܒܥܝܢ ܡܢ ܡܪܝܐ ܘܫܡܥ ܒܩܠܢ ܘܩܪܒܢ ܩܘܪ̈ܒܢܐ ܘܣܡܝܕܐ ܘܐܢܗܪ̈ܢ ܫܪ̈ܓܐ ܘܣܡܢ ܠܚܡ ܐ̈ܦܐ

⁹ ܘܗܫܐ ܬܗܘܘܢ ܥܒܕܝܢ ܥܕܥܕܐ ܕܡ̈ܛܠܐ ܒܟܢܘܢ ܩܕܡ

¹⁰ ܒܫܢܬ ܡܐܐ ܘܬܡܢܐܝܢ ܘܬܡܢܐ ܐܝܠܝܢ ܕܒܐܪܫܠܡ ܘܒܝܗܘܕܐ ܘܟܠܗܘܢ ܣ̈ܒܐ ܕܝܗܘܕܐ ܠܐܪܣܛܒܘܠܘܣ ܡܠܦܢܗ ܕܦܛܠܡܐܘܣ ܡܠܟܐ ܕܐܝܬܘܗܝ ܡܢ ܫܪܒܬܐ ܕܟܗ̈ܢܐ ܡܫܝ̈ܚܝܐ ܘܠܝܗܘ̈ܕܝܐ ܕܒܡܨܪܝܢ ܫܠܡܐ ܘܚܘܠܡܢܐ

¹¹ ܣܓܝ ܘܪܘܪܒܐܝܬ ܡܘܕܝܢܢ ܠܐܠܗܐ ܕܩܡ ܠܢ ܘܦܨܝܢ ܡܢ ܟܠܗܘܢ ܐܘܠܨ̈ܢܐ ܕܐܬܘ ܥܠܝܢ

¹² ܟܕ ܐܬܐ ܥܠܝܢ ܓܝܪ ܡܠܟܐ ܠܩܪܒܐ ܠܡܬܟܬܫܘ ܥܠ ܡܕܝܢܬܐ ܩܕܝܫܬܐ

¹³ ܕܚܩܗ ܘܫܕܝܗܝ ܠܦܪܣ ܟܕ ܓܝܪ ܐܙܠ ܠܬܡܢ ܗܘ ܘܟܠܗ ܚܝܠܗ ܗܘ ܕܡܣܬܒܪ ܗܘܐ ܕܠܐ ܡܙܕܟܐ ܐܬܩܛܠ ܒܗܝܟܠܗ ܕܢܢܝ ܕܐܚܕܘ ܘܚܒܫܘ ܐܢܘܢ ܒܢܟܠܐ ܟܘܡܪ̈ܝܗ ܕܢܢܝ

¹⁴ ܗܘ ܓܝܪ ܐܙܠ ܗܘܐ ܠܬܡܢ ܐܝܟ ܕܢܥܡܪ ܥܡܗ ܐܢܛܝܟܘܣ ܘܪ̈ܚܡܘܗܝ ܡܛܠ ܕܢܣܒ ܩܢܝܢܐ ܣܓܝܐܐ ܒܚܘܫܒܢ ܦܪܢܝܬܐ

¹⁵ ܘܐܬܪܡܝܘ ܘܐܫܬܘܕܝܘ ܠܗ ܟܘܡܪ̈ܝܗ ܕܢܢܝ ܘܗܘ ܕܝܢ ܟܕ ܥܠ ܥܡ ܐܢܫܐ ܙܥܘܪ̈ܐ ܠܓܘ ܡܢ ܫܘܪܗ ܕܗܝܟܠܐ

¹⁶ ܦܬܚܘ ܘܥܠܘ ܥܠܘܗܝ ܡܢ ܬܪܥܐ ܙܥܘܪܐ ܘܐܪܡܝܘ ܥܠܘܗܝ ܟܐ̈ܦܐ ܘܩܛܠܘܗܝ ܘܦܣܩܘ ܪܫܗ ܘܫܕܘ ܠܗܠܝܢ ܕܠܒܪ

¹⁷ ܒܟܠܡܕܡ ܕܝܢ ܡܒܪܟ ܗܘ ܐܠܗܢ ܗܘ ܕܐܫܠܡ ܐܢܘܢ ܠܪ̈ܫܝܥܐ

¹⁸ ܡܛܠ ܗܟܝܠ ܕܥܬܝܕܝܢ ܚܢܢ ܠܡܥܒܕ ܕܘܟܝܗ ܕܗܝܟܠܐ ܒܟܢܘܢ ܩܕܡ ܒܚܡܫܐ ܘܥܣܪܝܢ ܨܒܝܢ ܕܢܘܕܥ ܐܦ ܠܟܘܢ ܕܐܦ ܐܢܬܘܢ ܬܗܘܘܢ ܥܒܕܝܢ ܠܗ ܐܝܟ ܥܕܥܕܐ ܕܡ̈ܛܠܐ ܢܐܡܪ ܠܟܘܢ ܕܝܢ ܐܦ ܥܠ ܢܘܪܐ ܟܕ ܒܢܐ ܢܚܡܝܐ ܗܝܟܠܐ ܘܡܕܒܚܐ ܘܐܣܩ ܩܘܪ̈ܒܢܐ

¹⁹ ܘܟܕ ܐܒܗ̈ܝܢ ܐܙܠܝܢ ܗܘܘ ܠܦܪܣ ܟܗ̈ܢܐ ܙܕܝ̈ܩܐ ܕܒܗܘ ܙܒܢܐ ܢܣܒܘ ܗܘܘ ܡܢ ܢܘܪܐ ܕܡܕܒܚܐ ܡܛܫܝܐܝܬ ܘܛܫܝܘ ܒܒܪܐ ܕܠܐ ܐܝܬ ܗܘܐ ܒܗ ܡ̈ܝܐ ܘܟܣܝܘܗ ܕܠܐܢܫ ܠܐ ܬܬܝܕܥ ܕܘܟܬܗ

²⁰ ܟܕ ܥܒܪ ܕܝܢ ܫܢ̈ܝܐ ܣܓܝܐ̈ܬܐ ܘܫܦܪ ܠܐܠܗܐ ܐܫܬܕܪ ܢܚܡܝܐ ܡܢ ܡܠܟܐ ܕܦܪܣ ܥܡ ܒܢܝ̈ܗܘܢ ܕܟܗ̈ܢܐ ܗܢܘܢ ܕܛܫܝܘ ܗܘܘ ܢܘܪܐ

²¹ ܘܫܕܪ ܐܢܘܢ ܕܢܝܬܘܢ ܢܘܪܐ ܘܐܬܘ ܘܐܡܪܘ ܕܠܐ ܐܫܟܚܘ ܢܘܪܐ ܐܠܐ ܐܢ ܡ̈ܝܐ ܕܠܝܚ̈ܐ ܘܦܩܕ ܕܢܣܒܘܢ ܘܢܝܬܘܢ ܡܢܗܘܢ ܘܟܕ ܕܝܢ ܣܠܩܘ ܕܒܚ̈ܐ ܘܩܘܪ̈ܒܢܐ ܦܩܕ ܢܚܡܝܐ ܠܟܗ̈ܢܐ ܕܢܪܣܘܢ ܡܢܗܘܢ ܥܠ ܩܝ̈ܣܐ ܘܥܠ ܕܒܚ̈ܐ

²² ܘܟܕ ܕܝܢ ܥܒܕܘ ܗܟܢܐ ܘܥܒܪ ܥܕܢܐ ܩܠܝܠ ܕܢܚ ܠܘܩܕܡ ܫܡܫܐ ܟܕ ܥܡܘܛ ܒܥܢ̈ܢܐ ܘܗܝܕܝܢ ܕܠܩܛ ܢܘܪܐ ܪܒܬܐ ܐܝܟ ܕܢܬܡܗܘܢ ܟܠܗܘܢ

²³ ܟܗ̈ܢܐ ܕܝܢ ܒܨܠܘܬܐ ܩܝܡܝܢ ܗܘܘ ܥܕܡܐ ܕܫܠܡܬ ܬܫܡܫܬܗ ܕܢܘܪܐ ܟܗ̈ܢܐ ܕܝܢ ܘܝܘܢܬܢ ܘܫܪܟܐ ܟܕ ܢܚܬܘ ܐܡܪܘ ܗܘܘ ܕܒܨܠܘܬܗ ܕܢܚܡܝܐ ܕܠܩܬ

²⁴ ܐܝܬܝܗ ܗܘܬ ܕܝܢ ܨܠܘܬܗ ܗܟܢܐ ܡܪܝܐ ܡܪܝܐ ܐܠܗܐ ܐܚܝܕ ܟܠ ܘܒܪܘܝܐ ܕܟܠ ܕܚܝܠܐ ܘܚܝܠܬܢܐ ܙܕܝܩܐ ܘܡܪܚܡܢܐ ܡܠܟܐ ܒܠܚܘܕܘܗܝ ܘܒܣܝܡܐ ܒܠܚܘܕܘܗܝ

²⁵ ܡܬܪܣܝܢܐ ܒܠܚܘܕܘܗܝ ܙܕܝܩܐ ܚܝ ܥܠܡ̈ܐ ܘܐܚܝܕ ܟܠ ܦܪܘܩܗ ܕܝܣܪܝܠ ܡܢ ܟܠ ܒܝ̈ܫܬܐ ܗܘ ܕܓܒܐ ܠܐܒ̈ܗܝܢ ܘܩܕܫ ܐܢܘܢ

²⁶ ܩܒܠ ܩܘܪܒܢܐ ܗܢܐ ܥܠ ܐ̈ܦܝ ܟܠܗ ܥܡܟ ܐܝܣܪܝܠ ܘܢܛܪ ܘܩܕܫ ܡܢܬܟ ܘܝܪܬܘܬܟ

²⁷ ܘܟܢܫ ܒܘܕܪܢ ܘܚܪܪ ܠܐܝܠܝܢ ܕܡܫܥܒܕܝܢ ܒܝܬ ܥܡ̈ܡܐ ܛܡ̈ܐܐ ܘܡܣ̈ܠܝܐ ܘܚܘܪܒܢ ܕܢܕܥܘܢ ܥܡ̈ܡܐ ܕܐܢܬ ܗܘ ܐܠܗܢ

²⁸ ܘܫܢܩ ܠܐܝܠܝܢ ܕܡܬܬܪܝܡܝܢ ܘܡܫܥܒܕܝܢ ܒܫܘܒܗܪܐ

²⁹ ܘܫܪܪܝܗܝ ܠܥܡܟ ܒܐܬܪܟ ܩܕܝܫܐ ܐܝܟ ܕܐܡܪ ܡܘܫܐ

³⁰ ܟܗ̈ܢܐ ܕܝܢ ܩܝܡܝܢ ܗܘܘ ܘܡܙܡܪܝܢ ܒܬܫܒ̈ܚܬܐ

³¹ ܘܟܕ ܐܫܬܠܡܘ ܕܒ̈ܚܐ ܘܩܘܪ̈ܒܢܐ ܘܡ̈ܝܐ ܕܐܫܬܚܪܘ ܦܩܕ ܢܚܡܝܐ ܕܢܣܝܡܘܢ ܘܢܚܕܪܘܢܗ ܠܕܘܟܬܐ ܒܟܐ̈ܦܐ ܪ̈ܘܪܒܬܐ

³² ܘܟܕ ܕܝܢ ܥܒܕܘ ܗܟܢܐ ܕܠܩܬ ܫܠܗܒܝܬܐ ܕܢܘܪܐ ܥܕܡܐ ܕܓܡܪ ܢܘܗܪܐ ܕܢܘܪܐ ܕܥܠ ܡܕܒܚܐ

³³ ܟܕ ܕܝܢ ܐܬܝܕܥܬ ܨܒܘܬܐ ܘܐܬܓܠܝܬ ܠܡܠܟܐ ܕܦܪܣ ܕܒܕܘܟܬܐ ܐܝܟܐ ܕܛܫܝܘ ܢܘܪܐ ܗܢܘܢ ܕܐܫܬܒܝܘ ܗܘܘ ܡ̈ܝܐ ܕܠܝܚ̈ܐ ܐܫܬܟܚܘ ܘܡܢܗܘܢ ܩܕܫ ܢܚܡܝܐ ܘܐܝܠܝܢ ܕܥܡܗ ܠܩܘܪ̈ܒܢܐ ܘܠܕܒ̈ܚܐ

³⁴ ܒܢܗ ܡܠܟܐ ܠܕܘܟܬܐ ܘܥܒܕ ܒܗ ܗܝܟܠܐ ܟܕ ܒܩܗ ܠܨܒܘܬܐ

³⁵ ܘܝܗܒ ܗܘܐ ܠܗܘܢ ܕܝܢ ܡܠܟܐ ܡܘܗ̈ܒܬܐ ܪ̈ܘܪܒܬܐ ܘܡܝܬܪ̈ܬܐ ܗܢܘܢ ܕܝܢ ܢܣܒܝܢ ܗܘܘ ܘܝܗܒܝܢ ܠܐܝܠܝܢ ܕܚܣܝܪ ܗܘܐ ܠܗܘܢ

³⁶ ܩܪܐܘܗܝ ܕܝܢ ܕܒܝܬ ܢܚܡܝܐ ܓܘܢܦܬܪ ܕܡܬܬܪܓܡ ܕܘܟܝܐ ܡܬܩܪܐ ܕܝܢ ܒܝܢܬ ܣܓ̈ܝܐܐ ܢܦܬܝ