Genesi ܒܪܝܬܐ 22

¹ ܘܰܗܘܳܐ ܡܶܢ ܒܳܬܰܪ ܦܶܬܓܳܡ̈ܶܐ ܗܳܠܶܝܢ: ܐܰ‌ܠܳܗܳܐ ܢܰܣܺܝ ܠܰܐܒܪܳܗܳܡ ܘܶܐܡܰܪ ܠܶܗ: ܐܰܒܪܳܗܳܡ: ܘܶܐܡܰܪ ܗܳܐ ܐܶܢܳܐ.

² ܘܶܐܡܰܪ ܠܶܗ. ܕܒܰܪ ܠܰܒܪܳܟ ܠܺܝܚܺܝܕܳܝܳܟ ܕܪܳܚܶܡ ܐܰܢ̱ܬ ܠܺܐܝܣܚܳܩ: ܘܙܶܠ ܠܳܟ ܠܰܐܪܥܳܐ ܕܳܐܡܽܘܖ̈ܳܝܶܐ: ܘܰܐܣܶܩܳܝܗܝ ܬܰܡܳܢ ܠܰܥܠܳܬܳܐ ܥܰܠ ܚܰܕ ܡܶܢ ܛܽܘܖ̈ܶܐ ܕܺܐܡܰܪ ܠܳܟ.

³ ܘܩܰܕܶܡ ܐܰܒܪܳܗܳܡ ܒܨܰܦܪܳܐ ܘܰܐܪܡܺܝ ܥܰܠ ܚܡܳܪܶܗ: ܘܰܕܒܰܪ ܠܰܬܪܶܝܢ ܥܠܰܝ̈ܡܰܘܗܝ ܥܰܡܶܗ ܘܠܺܐܝܣܚܳܩ ܒܪܶܗ: ܘܨܰܠܰܚ ܩܰܝ̈ܣܶܐ ܠܰܥܠܳܬܳܐ: ܘܩܳܡ ܐܶܙܰܠ ܠܰܐܬܪܳܐ ܕܶܐܡܰܪ ܠܶܗ ܐܰ‌ܠܳܗܳܐ.

⁴ ܘܰܠܝܰܘܡܳܐ ܬܠܺܝܬܝܳܐ ܐܰܪܺܝܡ ܐܰܒܪܳܗܳܡ ܥܰܝܢܰܘ̈ܗܝ ܘܰܚܙܳܝܗܝ ܠܰܐܬܪܳܐ ܗܰܘ ܡܶܢ ܪܽܘܚܩܳܐ.

⁵ ܘܶܐܡܰܪ ܠܰܥܠܰܝܡܰܘ̈ܗܝ: ܦܽܘܫܘ ܠܟܽܘܢ ܗܳܪܟܳܐ ܠܘܳܬ ܚܡܳܪܳܐ: ܘܶܐܢܳܐ ܘܛܰܠܝܳܐ ܢܺܐܙܰܠ ܥܕܰܡܳܐ ܠܗܳܪܟܳܐ: ܢܶܣܓܽܘܕ ܘܢܶܗܦܽܘܟ ܠܘܳܬܟܽܘܢ.

⁶ ܘܰܢܣܰܒ ܐܰܒܪܳܗܳܡ ܩܰܝ̈ܣܶܐ ܠܰܥܠܳܬܳܐ: ܘܣܳܡ ܥܰܠ ܐܺܝܣܚܳܩ ܒܪܶܗ: ܘܰܢܣܰܒ ܒܺܐܝܕܶܗ ܢܽܘܪܳܐ ܘܣܰܟܺܝܢܳܐ: ܘܶܐܙܰܠܘ ܬܖ̈ܰܝܗܽܘܢ ܐܰܟܚܕܳܐ.

⁷ ܘܶܐܡܰܪ ܐܺܝܣܚܳܩ ܠܰܐܒܪܳܗܳܡ ܐܰܒܽܘܗܝ: ܘܶܐܡܰܪ ܐܰܒܳܐ: ܘܶܐܡܰܪ : ܗܳܐ ܐܶܢܳܐ ܒܶܪܝ ܘܶܐܡܰܪ ܠܶܗ: ܗܳܐ ܢܽܘܪܳܐ ܘܩܰܝ̈ܣܶܐ: ܐܰܝܟܰܘ ܐܶܡܪܳܐ ܠܰܥܠܳܬܳܐ.

⁸ ܘܶܐܡܰܪ ܐܰܒܪܳܗܳܡ: ܐܰ‌ܠܳܗܳܐ ܢܶܚܙܶܐ ܠܶܗ ܐܶܡܪܳܐ ܠܰܥܠܳܬܳܐ ܒܶܪܝ: ܘܶܐܙܰܠܘ ܬܖ̈ܰܝܗܽܘܢ ܐܰܟܚܕܳܐ.

⁹ ܘܶܐܬܰܘ ܠܰܐܬܪܳܐ ܕܶܐܡܰܪ ܠܶܗ ܐܰ‌ܠܳܗܳܐ: ܘܰܒܢܳܐ ܬܰܡܳܢ ܐܰܒܪܳܗܳܡ ܡܰܕܒܚܳܐ: ܘܰܣܕܰܪ ܩܰܝ̈ܣܶܐ: ܘܦܰܟܪܶܗ ܠܺܐܝܣܚܳܩ ܒܪܶܗ: ܘܣܳܡܶܗ ܥܰܠ ܡܰܕܒܚܳܐ ܠܥܶܠ ܡܶܢ ܩܰܝ̈ܣܶܐ.

¹⁰ ܘܰܐܘܫܶܛ ܐܺܝܕܶܗ ܐܰܒܪܳܗܳܡ: ܘܰܢܣܰܒ ܣܰܟܺܝܢܳܐ ܠܡܶܟܣܶܗ ܠܰܒܪܶܗ.

¹¹ ܘܰܩܪܳܐ ܠܶܗ ܡܰܠܰܐܟܶܗ ܕܰܐ‌ܠܳܗܳܐ ܡܶܢ ܫܡܰܝܳܐ ܘܶܐܡܰܪ: ܐܰܒܪܳܗܳܡ: ܐܰܒܪܳܗܳܡ: ܘܶܐܡܰܪ ܗܳܐ ܐܶܢܳܐ.

¹² ܘܶܐܡܰܪ ܠܶܗ: ܠܳܐ ܬܰܘܫܶܛ ܐܺܝܕܳܟ ܥܰܠ ܛܰܠܝܳܐ: ܘܠܳܐ ܬܶܥܒܶܕ ܠܶܗ ܡܶܕܶܡ: ܡܶܛܽܠ ܕܗܳܫܳܐ ܐܰܘܕܰܥܬ ܕܕܳܚܠܶܗ̇ ܐܰܢ̱ܬ ܕܰܐ‌ܠܳܗܳܐ: ܘܠܳܐ ܚܣܰܟܬ ܠܰܒܪܳܟ ܠܺܝܚܺܝܕܳܟ ܡܶܢܝ.

¹³ ܘܰܐܪܺܝܡ ܐܰܒܪܳܗܳܡ ܥܰܝܢܰܘ̈ܗܝ ܘܰܚܙܳܐ: ܘܗܳܐ ܕܶܟܪܳܐ ܚܰܕ ܐܰܚܺܝܕ ܒܣܰܘܟܬܳܐ ܒܩܰܖ̈ܢܳܬܶܗ: ܘܶܐܙܰܠ ܐܰܒܪܳܗܳܡ ܘܢܰܣܒܶܗ ܠܕܶܟܪܳܐ: ܘܰܐܣܩܶܗ ܠܰܥܠܳܬܳܐ ܚܠܳܦ ܒܪܶܗ.

¹⁴ ܘܰܩܪܳܐ ܐܰܒܪܳܗܳܡ ܫܡܶܗ ܕܰܐܬܪܳܐ ܗܰܘ: ܡܳܪܝܳܐ ܢܶܚܙܶܐ: ܕܶܐܬܶܐܡܰܪ ܝܰܘܡܳܢܳܐ ܒܛܽܘܪܳܐ ܗܳܢܳܐ ܡܳܪܝܳܐ ܢܶܚܙܶܐ.

¹⁵ ܘܰܩܪܳܐ ܡܰܠܰܐܟܶܗ ܕܰܐ‌ܠܳܗܳܐ ܠܰܐܒܪܳܗܳܡ ܕܬܰܪܬܶܝܢ ܙܰܒܢܺܝ̈ܢ ܡܶܢ ܫܡܰܝܳܐ: ܘܶܐܡܰܪ.

¹⁶ ܒܺܝ ܝܺܡܺܝܬ ܐܳܡܰܪ ܡܳܪܝܳܐ. ܚܠܳܦ ܕܰܥܒܰܕܬ ܦܶܬܓܳܡܳܐ ܗܳܢܳܐ: ܘܠܳܐ ܚܣܰܟܬ ܠܰܒܪܳܟ ܠܺܝܚܺܝܕܳܟ ܡܶܢܝ.

¹⁷ ܡܒܰܪܳܟܽܘ ܐܶܒܰܪܟܳܟ: ܘܡܰܣܓܳܝܽܘ ܐܰܣܓܶܐ ܙܰܪܥܳܟ ܐܰܝܟ ܟܰܘ̈ܟܒܰܝ ܫܡܰܝܳܐ: ܘܰܐܝܟ ܚܳܠܳܐ ܕܥܰܠ ܣܶܦܬܶܗ ܕܝܰܡܳܐ: ܘܢܺܐܪܰܬ ܙܰܪܥܳܟ ܐܰܖ̈ܥܳܬܳܐ ܕܰܒܥܶܠܕܒܳܒܰܘ̈ܗܝ.

¹⁸ ܘܢܶܬܒܰܪܟܽܘܢ ܒܙܰܪܥܳܟ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ: ܚܠܳܦ ܕܰܫܡܰܥܬ ܒܩܳܠܝ.

¹⁹ ܘܰܗܦܰܟ ܐܰܒܪܳܗܳܡ ܠܘܳܬ ܥܠܰܝܡܰܘ̈ܗܝ: ܘܩܳܡܘ ܘܶܐܙܰܠܘ ܐܰܟܚܕܳܐ ܠܒܺܪ ܫܒܰܥ. ܘܺܝܬܶܒ ܐܰܒܪܳܗܳܡ ܒܒܺܪ ܫܒܰܥ.

²⁰ ܘܰܗܘܳܐ ܡܶܢ ܒܳܬܰܪ ܦܶܬܓܳܡ̈ܶܐ ܗܳܠܶܝܢ: ܘܶܐܬܚܰܘܺܝ ܠܰܐܒܪܳܗܳܡ ܘܶܐܡܰܪ ܠܶܗ: ܗܳܐ ܝܶܠܕܰܬ ܡܶܠܟܳܐ ܐܳܦ ܗܺܝ ܒܢܰܝ̈ܳܐ ܠܢܳܚܽܘܪ ܐܰܚܽܘܟ.

²¹ ܠܥܽܘܨ ܒܽܘܟܪܶܗ ܘܰܠܒܽܘܙ ܐܰܚܽܘܗܝ: ܘܠܰܩܡܽܘܐܶܝܠ ܐܰܒܽܘܗܝ ܕܳܐܪܳܡ.

²² ܘܰܠܟܳܣܳܪ: ܘܰܠܚܰܙܽܘ. ܘܰܠܦܰܠܪܰܫ: ܘܰܠܝܰܪܠܰܦ: ܘܠܰܒܬܽܘܐܶܝܠ.

²³ ܘܰܒܬܽܘܐܶܝܠ ܐܰܘܠܶܕ ܠܪܰܦܩܰܐ: ܬܡܳܢܝܳܐ ܗܳܠܶܝܢ ܝܶܠܕܰܬ ܡܶܠܟܳܐ ܠܢܳܚܽܘܪ ܐܰܚܽܘܗܝ ܕܰܐܒܪܳܗܳܡ.

²⁴ ܘܰܕܪܽܘܟܬܶܗ ܫܡܳܗ̇ ܪܽܘܡܳܐ: ܘܝܶܠܕܰܬ ܐܳܦ ܗܺܝ ܠܛܳܒܳܚ: ܘܰܠܓܳܚܳܡ: ܘܰܠܬܰܚܳܫ: ܘܰܠܡܰܥܟܳܐ.