Genesi ܒܪܝܬܐ 32

¹ ܘܳܐܦ ܝܰܥܩܽܘܒ ܐܶܙܰܠ ܠܽܐܘܪܚܶܗ: ܘܰܦܓܰܥܘ ܒܶܗ ܡܰܠܰܐܟܰܘ̈ܗܝ ܕܰܐ‌ܠܳܗܳܐ.

² ܘܶܐܡܰܪ ܝܰܥܩܽܘܒ ܟܰܕ ܚܙܳܐ ܐܶܢܽܘܢ: ܡܰܫܪܺܝܬܳܐ ܗܺܝ ܕܰܐ‌ܠܳܗܳܐ ܗܳܕܶܐ: ܘܰܩܪܳܐ ܫܡܶܗ ܕܰܐܬܪܳܐ ܗܰܘ ܡܰܚܢܺܝܡ.

³ ܘܫܰܕܰܪ ܝܰܥܩܽܘܒ ܐܺܝܙܓܰܕ̈ܶܐ ܩܕܳܡܰܘܗܝ ܠܘܳܬ ܥܺܝܣܽܘ ܐܰܚܽܘܗܝ: ܠܰܐܪܥܳܐ ܕܣܳܥܺܝܪ: ܠܚܰܩܠܳܐ ܕܰܐܕܽܘܡ.

⁴ ܘܰܦܩܰܕ ܐܶܢܽܘܢ ܘܶܐܡܰܪ ܠܗܽܘܢ: ܗܳܟܰܢܳܐ ܬܺܐܡܪܽܘܢ ܠܡܳܪܝ ܥܺܝܣܽܘ: ܗܳܟܰܢܳܐ ܐܳܡܰܪ ܥܰܒܕܳܟ ܝܰܥܩܽܘܒ: ܥܰܡ ܠܳܒܳܢ ܥܶܡܪܶܬ: ܘܰܐܘܚܪܶܬ ܥܕܰܡܳܐ ܠܝܰܘܡܳܢܳܐ.

⁵ ܘܰܗܘܰܘ ܠܺܝ ܬܰܘܖ̈ܶܐ: ܘܚܶܡܖ̈ܳܐ: ܘܥܳܢ̈ܳܐ ܘܥܰܒ̈ܕܶܐ: ܘܰܐܡ̈ܗ̈ܳܬܳܐ: ܘܫܰܕܪܶܬ ܠܰܡܚܰܘܳܝܽܘ ܠܡܳܪܝ ܕܶܐܫܟܰܚ ܖ̈ܰܚܡܶܐ ܒܥܰܝ̈ܢܰܝܟ.

⁶ ܘܰܗܦܰܟܘ ܐܺܝܙܓܰܕ̈ܶܐ ܠܘܳܬ ܝܰܥܩܽܘܒ: ܘܶܐܡܰܪܘ ܠܶܗ: ܐܶܙܰܠܢ ܠܘܳܬ ܥܺܝܣܽܘ ܐܰܚܽܘܟ: ܘܗܳܐ ܐܳܦ ܗܽܘ ܐܳܬܶܐ ܠܽܐܘܪܥܳܟ: ܘܰܐܪܒܰܥܡܳܐܐ ܓܰܒܖ̈ܺܝܢ ܥܰܡܶܗ.

⁷ ܘܰܕܚܶܠ ܝܰܥܩܽܘܒ: ܘܥܳܩܰܬ ܠܶܗ ܛܳܒ: ܘܦܰܠܶܓ ܥܰܡܳܐ ܕܥܰܡܶܗ: ܘܥܳܢ̈ܳܐ : ܘܬܰܘܖ̈ܶܐ: ܘܓܰܡ̈ܠܶܐ: ܠܬܰܪܬܶܝܢ ܡܰܫܖ̈ܝܳܢ.

⁸ ܘܶܐܡܰܪ ܝܰܥܩܽܘܒ: ܐܶܢ ܢܺܐܬܶܐ ܥܺܝܣܽܘ ܐܳܚܝ ܥܰܠ ܡܰܫܪܺܝܬܳܐ ܚܕܳܐ ܘܢܶܚܪܒܺܝܗ̇: ܡܰܫܪܺܝܬܳܐ ܕܡܶܫܬܰܚܪܳܐ ܡܶܬܦܰܠܛܳܐ.

⁹ ܘܨܰܠܺܝ ܝܰܥܩܽܘܒ ܘܶܐܡܰܪ: ܐܰܠܳܗܶܗ ܕܳܐܒܝ ܐܰܒܪܳܗܳܡ: ܐܰܠܳܗܶܗ ܕܳܐܒܝ ܐܺܝܣܚܳܩ: ܡܳܪܝܳܐ ܕܶܐܡܰܪ ܠܺܝ ܗܦܽܘܟ ܠܰܐܪܥܳܐ ܕܰܐܒܗܰܝ̈ܟ: ܘܰܠܬܰܘ̈ܠܕܳܬܳܟ: ܘܰܐܛܐܶܒ ܠܳܟ.

¹⁰ ܒܨܺܝܪ ܐ̱ܢܳܐ ܡܶܢ ܟܽܠܗܶܝܢ ܛܰܝܒܽܘ̈ܳܬܳܟ: ܘܡܶܢ ܟܽܠܳܗ̇ ܩܽܘܫܬܳܐ ܕܰܥܒܰܕܬ ܥܰܡ ܥܰܒܕܳܟ: ܡܶܛܽܠ ܕܰܒܚܽܘܛܪܝ ܥܶܒܪܶܬ ܝܽܘܪܕܢܳܢ ܗܳܢܳܐ: ܘܗܳܫܳܐ ܗܘܺܝܬ ܠܬܰܪܬܶܝܢ ܡܰܫܖ̈ܝܳܢ.

¹¹ ܦܰܨܳܢܝ ܡܶܢ ܐܺܝܕܰܘ̈ܗܝ ܕܥܺܝܣܽܘ ܐܳܚܝ: ܡܶܛܽܠ ܕܕܳܚܶܠ ܐ̱ܢܳܐ ܡܶܢܶܗ: ܕܰܠܡܳܐ ܢܺܐܬܶܐ ܘܢܶܡܚܶܝܢܝ: ܐܶܡܳܐ ܥܰܡ ܒܢܶܝ̈ܗ̇.

¹² ܘܰܐܢ̱ܬ ܐܶܡܰܪܬ ܕܡܰܛܐܳܒܽܘ ܐܰܛܐܶܒ ܠܳܟ: ܘܶܐܥܒܶܕ ܙܰܪܥܳܟ ܐܰܝܟ ܚܳܠܳܐ ܕܝܰܡܳܐ ܕܠܳܐ ܡܶܬܡܢܶܐ ܡܶܢ ܣܽܘܓܶܐܗ.

¹³ ܘܒܳܬ ܬܰܡܳܢ ܒܠܺܠܝܳܐ ܗܰܘ: ܘܰܢܣܰܒ ܡܶܢ ܡܶܕܶܡ ܕܰܐܝܬܺܝ ܒܺܐܝܕܶܗ ܩܽܘܪܒܳܢܳܐ ܠܥܺܝܣܽܘ ܐܰܚܽܘܗܝ.

¹⁴ ܥܶܙ̈ܶܐ ܡܰܐܬܶܝܢ: ܘܬܰܝܫ̈ܶܐ ܥܶܣܪܺܝܢ: ܢܩܰܘ̈ܳܬܳܐ ܡܰܐܬܶܝܢ: ܘܕܶܟܖ̈ܶܐ ܥܶܣܪܺܝܢ.

¹⁵ ܓܰܡ̈ܠܶܐ ܡܰܝܢ̈ܩܳܬܳܐ ܘܰܒܢܰܝ̈ܗܶܝܢ ܬܠܳܬܺܝܢ: ܬܰܘܖ̈ܳܬܳܐ ܐܰܪܒܥܺܝܢ: ܘܬܰܘܖ̈ܶܐ ܥܶܣܪܳܐ: ܐܰܬܳܢ̈ܶܐ ܥܶܣܪܺܝܢ: ܘܥܺܝ̈ܠܶܐ ܥܶܣܪܳܐ.

¹⁶ ܘܝܰܗ̱ܒ ܒܺܐܝܕܳܐ ܕܥܰܒܕܰܘ̈ܗܝ: ܓܙܳܪܳܐ ܓܙܳܪܳܐ ܒܰܠܚܽܘܕ: ܘܶܐܡܰܪ ܠܥܰܒܕܰܘ̈ܗܝ: ܥܒܰܪܘ ܩܕܳܡܰܝ: ܘܰܪܘܰܚܬܳܐ ܥܒܶܕܘ ܒܶܝܬ ܓܙܳܪܳܐ ܠܰܓܙܳܪܳܐ.

¹⁷ ܘܰܦܩܰܕ ܠܩܰܕܡܳܝܳܐ ܘܶܐܡܰܪ ܠܶܗ: ܕܟܰܕ ܢܶܦܓܰܥ ܒܳܟ ܥܺܝܣܽܘ ܐܳܚܝ: ܘܰܢܫܰܐܠܳܟ ܘܢܺܐܡܰܪ ܠܳܟ: ܕܡܰܢ ܐܰܢ̱ܬ: ܘܠܰܐܝܟܳܐ ܐܳܙܶܠ ܐܰܢ̱ܬ: ܘܰܕܡܰܢ ܗܳܠܶܝܢ ܕܰܩܕܳܡܰܝܟ.

¹⁸ ܐܶܡܰܪ ܠܶܗ ܕܥܰܒܕܳܟ ܝܰܥܩܽܘܒ: ܩܽܘܪܒܳܢܳܐ ܕܫܰܕܰܪ ܠܡܳܪܝ ܥܺܝܣܽܘ: ܘܗܳܐ ܐܳܦ ܗܽܘ ܐܳܬܶܐ ܒܳܬܪܰܢ.

¹⁹ ܘܰܦܩܰܕ ܠܬܶܢܝܳܢܳܐ: ܘܳܐܦ ܠܰܬܠܺܝܬܳܝܳܐ: ܘܳܐܦ ܠܟܽܠ ܕܳܐܙܺܠܝܢ ܒܳܬܰܪ ܓܙܳܪܳܐ ܠܡܺܐܡܰܪ: ܐܰܝܟ ܦܶܬܓܳܡܳܐ ܗܳܢܳܐ: ܬܺܐܡܪܽܘܢ ܠܥܺܝܣܽܘ ܡܳܐ ܕܶܐܫܟܰܚܬܽܘܢܳܝܗܝ.

²⁰ ܘܬܺܐܡܪܽܘܢ ܠܶܗ: ܕܗܳܐ ܐܳܦ ܥܰܒܕܳܟ ܝܰܥܩܽܘܒ ܒܳܬܪܰܢ: ܡܶܛܽܠ ܕܶܐܡܰܪ ܕܰܐܢܺܝܚ ܪܽܘܓܙܶܗ ܒܩܽܘܪܒܳܢܳܐ ܕܳܐܙܶܠ ܩܕܳܡܰܝ: ܘܒܳܬܰܪܟܶܢ ܐܶܚܙܶܐ ܐܰܦܰܘ̈ܗܝ: ܟܒܰܪ ܢܶܣܰܒ ܒܰܐܦܰܝ̈.

²¹ ܘܰܥܒܰܪ ܩܽܘܪܒܳܢܳܐ ܩܕܳܡܰܘܗܝ: ܘܗܽܘ ܒܳܬ ܒܠܺܠܝܳܐ ܗܰܘ ܒܡܰܫܪܺܝܬܳܐ.

²² ܘܩܰܕܶܡ ܒܠܺܠܝܳܐ: ܘܰܕܒܰܪ ܬܰܪܬܶܝܢ ܢܶܫܰܘ̈ܗܝ ܘܬܰܪܬܶܝܢ ܐܰܡܗ̈ܳܬܶܗ: ܘܰܚܕܰܥܣܰܪ ܒܢܰܘ̈ܗܝ: ܘܰܐܥܒܰܪ ܐܶܢܽܘܢ ܠܡܰܕܒܪܳܐ ܕܝܳܒܳܩ.

²³ ܘܰܕܒܰܪ ܐܶܢܽܘܢ ܘܰܐܥܒܰܪ ܐܶܢܽܘܢ ܢܰܚܠܳܐ: ܘܰܐܥܒܰܪ ܟܽܠ ܕܺܐܝܬ ܠܶܗ.

²⁴ ܘܦܳܫ ܝܰܥܩܽܘܒ ܒܰܠܚܽܘܕܰܘܗܝ: ܘܶܐܬܟܰܬܰܫ ܓܰܒܪܳܐ ܥܰܡܶܗ: ܥܕܰܡܳܐ ܕܰܣܠܶܩ ܫܰܦܪܳܐ.

²⁵ ܘܰܚܙܳܐ ܕܠܳܐ ܡܶܬܡܨܶܐ ܚܰܝܠܶܗ: ܘܰܩܪܶܒ ܠܰܚܪܽܘܬܶܗ: ܘܰܫܢܳܬ ܚܪܽܘܬܶܗ ܕܝܰܥܩܽܘܒ ܟܰܕ ܐܶܬܟܰܬܰܫ ܥܰܡܶܗ.

²⁶ ܘܶܐܡܰܪ ܠܶܗ: ܫܰܕܰܪܰܝܢܝ ܡܶܛܽܠ ܕܰܣܠܶܩ ܫܰܦܪܳܐ: ܘܶܐܡܰܪ ܠܳܐ ܐܶܫܰܕܪܳܟ: ܐܶܠܳܐ ܐܶܢ ܒܰܪܶܟܬܳܢܝ.

²⁷ ܘܶܐܡܰܪ ܠܶܗ: ܐܰܝܟܰܢܳܐ ܫܡܳܟ: ܘܶܐܡܰܪ: ܝܰܥܩܽܘܒ.

²⁸ ܐܶܡܰܪ ܠܶܗ: ܠܳܐ ܢܶܬܩܪܶܐ ܬܽܘܒ ܫܡܳܟ ܝܰܥܩܽܘܒ: ܐܶܠܳܐ ܝܺܣܪܳܐܶܝܠ: ܡܶܛܽܠ ܕܶܐܫܬܰܪܰܪܬ ܥܰܡ ܡܰܠܰܐܟܳܐ: ܘܥܰܡ ܓܰܒܪܳܐ: ܘܶܐܬܡܨܺܝܬ ܚܰܝܠܳܐ.

²⁹ ܘܫܰܐܠܶܗ ܝܰܥܩܽܘܒ ܘܶܐܡܰܪ: ܚܰܘܳܢܝ ܫܡܳܟ: ܐܶܡܰܪ ܠܶܗ: ܠܡܳܢܳܐ ܫܳܐܶܠ ܐܰܢ̱ܬ ܥܰܠ ܫܶܡܝ: ܘܒܰܪܟܶܗ ܬܰܡܳܢ.

³⁰ ܘܰܩܪܳܐ ܝܰܥܩܽܘܒ ܫܡܶܗ ܕܰܐܬܪܳܐ ܗܰܘ ܦܢܽܘܐܶܝܠ: ܡܶܛܽܠ ܕܰܚܙܺܝ݀ܬ ܡܰܠܰܐܟܳܐ ܐܰܦܺܝ̈ܢ ܠܽܘܩܒܰܠ ܐܰܦܺܝ̈ܢ: ܘܶܐܬܦܰܨܝܰܬ ܢܰܦܫܝ.

³¹ ܘܕܶܢܚܶܬ ܠܶܗ ܫܶܡܫܳܐ ܟܰܕ ܥܒܰܪ ܠܰܦܢܽܘܐܶܝܠ: ܘܗܽܘ ܡܰܣܡܶܐ ܗܘܳܐ ܡܶܢ ܚܪܽܘܬܶܗ.

³² ܡܶܛܽܠ ܗܳܢܳܐ ܠܳܐ ܐܳܟܠܺܝܢ ܒܢܰܝ̈ ܝܺܣܪܳܐܶܝܠ ܓܝܳܕܳܐ ܕܓܶܢܫܝܳܐ ܕܒܰܚܪܽܘܬܳܐ ܕܥܰܛܡܳܐ ܥܕܰܡܳܐ ܠܝܰܘܡܳܢܳܐ: ܡܶܛܽܠ ܕܰܐܩܪܶܒ ܠܰܚܪܽܘܬܳܐ ܕܥܰܛܡܶܗ ܕܝܰܥܩܽܘܒ ܠܓܶܢܫܝܳܐ.