Deuteronomio ܬܢܝܢ ܢܡܘܣܐ 1

¹ ܘܗܳܠܶܝܢ ܦܶܬܓܳܡ̈ܶܐ ܕܶܐܡܰܪ ܡܽܘܫܶܐ ܠܟܽܠܶܗ ܝܺܣܪܳܐܶܝܠ ܒܥܶܒܪܳܐ ܕܝܽܘܪܕܢܳܢ ܒܡܰܕܒܪܳܐ. ܒܥܰܪܳܒܳܐ ܠܽܘܩܒܰܠ ܣܽܘܦ. ܒܶܝܬ ܦܰܪܰܢ. ܘܒܶܝܬ ܬܳܦܶܠ ܘܠܶܒܢܳܢ. ܘܚܰܨܪܽܘܬ ܘܕܺܝܙܰܗܰܒ.

² ܡܰܪܕܶܐ ܚܕܰܥܣܰܪ ܝܰܘܡܺܝ̈ܢ ܡܶܢ ܚܽܘܪܺܝܒ ܠܛܽܘܪܳܐ ܕܣܳܥܺܝܪ. ܘܰܥܕܰܡܳܐ ܠܰܪܩܶܡ ܕܓܰܐܝܳܐ.

³ ܘܰܗܘܳܐ ܒܰܫܢܰܬ ܐܰܪܒܥܺܝܢ. ܒܝܰܪܚܳܐ ܕܰܚܕܰܥܣܰܪ ܒܚܰܕ ܒܝܰܪܚܳܐ. ܡܰܠܶܠ ܡܽܘܫܶܐ ܥܰܡ ܒܢܰܝ̈ ܝܺܣܪܳܐܶܝܠ. ܟܽܠܡܶܕܶܡ ܕܦܰܩܕܶܗ ܡܳܪܝܳܐ ܥܠܰܝܗܽܘܢ.

⁴ ܡܶܢ ܒܳܬܰܪ ܕܰܩܛܰܠ ܠܣܺܝܚܽܘܢ ܡܰܠܟܳܐ ܕܳܐܡܽܘܖ̈ܳܝܶܐ. ܕܝܳܬܶܒ ܗܘܳܐ ܒܚܶܫܒܽܘܢ. ܘܰܠܥܽܘܓ ܡܰܠܟܳܐ ܕܡܰܬܢܺܝܢ. ܕܝܳܬܶܒ ܗܘܳܐ ܒܥܰܣܬܪܽܘܬ. ܘܒܰܐܪܕܥܺܝ.

⁵ ܒܥܶܒܪܳܐ ܕܝܽܘܪܕܢܳܢ. ܒܰܐܪܥܳܐ ܕܡܽܘܐܳܒ. ܫܰܪܺܝ ܡܽܘܫܶܐ ܡܦܰܫܶܩ ܢܳܡܽܘܣܳܐ ܗܳܢܳܐ. ܘܳܐܡܰܪ.

⁶ ܡܳܪܝܳܐ ܐܰܠܳܗܰܢ ܐܶܡܰܪ ܠܰܢ ܒܚܽܘܪܺܝܒ. ܣܰܓܺܝ ܠܟܽܘܢ ܕܺܝܬܶܒܬܽܘܢ ܒܛܽܘܪܳܐ ܗܳܢܳܐ.

⁷ ܐܶܬܦܢܰܘ ܘܰܫܩܽܘܠܘ ܠܟܽܘܢ. ܘܥܽܘܠܘ ܠܛܽܘܪܳܐ ܕܳܐܡܽܘܖ̈ܳܝܶܐ. ܘܰܠܟܽܠ ܚܕܳܖ̈ܰܘܗܝ. ܠܥܳܪܳܒܳܐ. ܘܰܠܛܽܘܪܳܐ. ܘܠܰܫܦܳܠܳܐ. ܘܰܠܬܰܝܡܢܳܐ. ܘܠܰܣܦܳܖ̈ܰܝ ܝܰܡܳܐ. ܐܰܪܥܳܐ ܕܰܟܢܰܥܢܳܝ̈ܶܐ. ܘܠܶܒܢܳܢ ܥܕܰܡܳܐ ܠܢܰܗܪܳܐ ܪܰܒܳܐ ܢܰܗܪܳܐ ܦܪܳܬ.

⁸ ܚܙܰܘ ܕܝܶܗܒܶܬ ܩܕܳܡܰܝܟܽܘܢ ܐܰܪܥܳܐ. ܥܽܘܠܘ ܘܺܝܪܰܬܘ ܐܰܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܟܽܘܢ. ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ. ܠܡܶܬܰܠ ܠܗܽܘܢ ܘܰܠܙܰܪܥܗܽܘܢ ܒܳܬܰܪܗܽܘܢ.

⁹ ܘܶܐܡܪܶܬ ܠܟܽܘܢ ܒܶܗ ܒܙܰܒܢܳܐ ܗܰܘ. ܠܳܐ ܡܶܫܟܰܚ ܐ̱ܢܳܐ ܒܰܠܚܽܘܕܰܝ ܕܶܐܣܰܝܒܰܪܟܽܘܢ.

¹⁰ ܡܳܪܝܳܐ ܐܰܠܳܗܟܽܘܢ ܐܰܣܓܺܝܟܽܘܢ. ܘܺܐܝܬܰܝܟܽܘܢ ܝܰܘܡܳܢܳܐ ܣܽܘܓܳܐܐ ܐܰܝܟ ܟܰܘ̈ܟܒܶܐ ܕܰܫܡܰܝܳܐ.

¹¹ ܡܳܪܝܳܐ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ. ܢܰܘܣܶܦ ܥܠܰܝܟܽܘܢ ܐܰܟܘܳܬܟܽܘܢ ܐܳܠܶܦ ܙܰܒܢܺܝ̈ܢ. ܘܰܢܒܰܪܶܟܟܽܘܢ ܐܰܝܟܰܢܳܐ ܕܶܐܡܰܪ ܠܟܽܘܢ.

¹² ܐܰܝܟܰܢܳܐ ܗܳܟܺܝܠ ܡܶܫܟܰܚ ܐ̱ܢܳܐ ܕܶܐܣܰܝܒܰܪ ܒܰܠܚܽܘܕܰܝ ܝܺܩܰܪܬܟܽܘܢ. ܘܛܰܥܢܟܽܘܢ. ܘܕܺܝܢܰܝ̈ܟܽܘܢ.

¹³ ܓܒܰܘ ܠܟܽܘܢ ܓܰܒܖ̈ܶܐ ܕܚܰܟܺܝܡܺܝܢ. ܘܣܰܟܽܘܠܬܳܢܺܝܢ. ܘܺܝܕܺܝܥܺܝܢ ܠܫܰܒܛܰܝ̈ܟܽܘܢ. ܘܰܐܩܺܝܡ ܐܶܢܽܘܢ ܒܪܺܝܫܟܽܘܢ.

¹⁴ ܘܰܥܢܰܝܬܽܘܢ ܘܶܐܡܰܪܬܽܘܢ ܠܺܝ. ܫܰܦܺܝܪ ܦܶܬܓܳܡܳܐ ܕܶܐܡܰܪܬ ܠܡܶܥܒܰܕ.

¹⁵ ܘܕܶܒܪܶܬ ܖ̈ܺܝܫܶܐ ܕܫܰܒܛܰܝ̈ܟܽܘܢ ܓܰܒܖ̈ܶܐ ܚܰܟܺܝ̈ܡܶܐ ܘܺܝܕܺܝ̈ܥܶܐ. ܘܥܶܒܕܶܬ ܐܶܢܽܘܢ ܖ̈ܺܝܫܶܐ ܥܠܰܝܟܽܘܢ. ܖ̈ܺܝܫܰܝ ܐܰܠܦ̈ܶܐ. ܘܖ̈ܺܝܫܰܝ ܡܰܐܘ̈ܳܬܳܐ. ܘܖ̈ܺܝܫܰܝ ܚܰܡܫܺܝܢ. ܘܖ̈ܺܝܫܰܝ ܥܶܣܪܳܐ. ܘܣܳܦܖ̈ܶܐ ܠܫܰܒܛܰܝ̈ܟܽܘܢ.

¹⁶ ܘܦܰܩܕܶܬ ܠܕܰܝܳܢܰܝ̈ܟܽܘܢ ܒܙܰܒܢܳܐ ܗܰܘ. ܘܶܐܡܪܶܬ ܠܗܽܘܢ. ܗܘܰܝܬܽܘܢ ܫܳܡܥܺܝܢ ܒܶܝܬ ܐܰܚܰܝ̈ܟܽܘܢ. ܘܕܳܝܢܺܝܢ ܩܽܘܫܬܳܐ ܒܶܝܬ ܓܰܒܪܳܐ ܠܰܐܚܽܘܗܝ. ܘܰܠܬܰܘܬܳܒܶܗ.

¹⁷ ܠܳܐ ܬܶܣܒܽܘܢ ܒܰܐܦ̈ܶܐ ܒܕܺܝܢܳܐ. ܠܰܙܥܽܘܪܳܐ ܐܰܝܟ ܪܰܒܳܐ ܗܘܰܝܬܽܘܢ ܫܳܡܥܺܝܢ. ܠܳܐ ܬܕܚܠܽܘܢ ܡܶܢ ܩܕܳܡ ܓܰܒܪܳܐ. ܡܶܛܽܠ ܕܕܺܝܢܳܐ ܕܰܐܠܳܗܰܐ ܗ̱ܘ. ܘܦܶܬܓܳܡܳܐ ܕܗܳܘܶܐ ܩܫܶܐ ܡܶܢܟܽܘܢ. ܩܰܪܒܽܘܗܝ ܠܘܳܬܝ ܘܶܐܫܡܥܺܝܘܗܝ.

¹⁸ ܘܦܰܩܶܕܬܟܽܘܢ ܒܙܰܒܢܳܐ ܗܰܘ ܟܽܠ ܦܶܬܓܳܡ̈ܶܐ. ܕܬܶܥܒܕܽܘܢ.

¹⁹ ܘܰܫܩܠܰܢ ܡܶܢ ܚܽܘܪܺܝܒ ܘܗܰܠܶܟܢ ܒܟܽܠܶܗ ܗܰܘ ܡܰܕܒܪܳܐ ܪܰܒܳܐ ܘܰܕܚܺܝܠܳܐ. ܕܰܚܙܰܝܬܽܘܢ ܒܰܐܪܥܳܐ ܕܛܽܘܪܳܐ ܕܳܐܡܽܘܖ̈ܳܝܶܐ ܐܰܝܟ ܕܦܰܩܕܰܢ ܡܳܪܝܳܐ ܐܰܠܳܗܰܢ. ܘܶܐܬܰܝܢ ܥܕܰܡܳܐ ܠܰܪܩܶܡ ܕܓܰܐܝܳܐ.

²⁰ ܘܶܐܡܪܶܬ ܠܟܽܘܢ. ܐܶܬܰܝܬܽܘܢ ܥܕܰܡܳܐ ܠܛܽܘܪܳܐ ܕܳܐܡܽܘܖ̈ܳܝܶܐ. ܕܡܳܪܝܳܐ ܐܰܠܳܗܰܢ ܝܰܗܒ ܠܰܢ.

²¹ ܚܙܰܘ ܕܝܰܗܒ ܡܳܪܝܳܐ ܐܰܠܳܗܟܽܘܢ ܩܕܳܡܰܝܟܽܘܢ ܐܰܪܥܳܐ. ܣܰܩܘ ܘܺܝܪܰܬܘ ܐܰܪܥܳܐ. ܐܰܝܟܰܢܳܐ ܕܶܐܡܰܪ ܠܟܽܘܢ ܡܳܪܝܳܐ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ. ܠܳܐ ܬܶܕܚܠܽܘܢ. ܘܠܳܐ ܬܶܬܪܰܗܒܽܘܢ.

²² ܘܰܩܪܶܒܬܽܘܢ ܠܘܳܬܝ ܟܽܠܟܽܘܢ. ܘܶܐܡܰܪܬܽܘܢ. ܢܫܰܕܰܪ ܓܰܒܖ̈ܶܐ ܩܕܳܡܰܝܢ ܘܢܶܓܫܽܘܢ ܠܰܢ ܐܰܪܥܳܐ. ܘܢܶܬܠܽܘܢ ܠܰܢ ܦܶܬܓܳܡܳܐ. ܘܰܢܚܰܘܢܳܢ ܐܽܘܪܚܳܐ ܕܢܺܐܙܰܠ ܒܳܗ̇. ܘܩܽܘܖ̈ܝܳܐ ܕܢܶܥܽܘܠ ܠܗܶܝܢ.

²³ ܘܰܫܦܰܪ ܦܶܬܓܳܡܳܐ ܒܥܰܝܢܰܝ̈. ܘܕܶܒܪܶܬ ܡܶܢܟܽܘܢ ܬܪܶܥܣܰܪ ܓܰܒܖ̈ܺܝܢ. ܚܰܕ ܚܰܕ ܓܰܒܪܳܐ ܡܶܢ ܫܰܒܛܳܐ.

²⁴ ܘܶܐܬܦܢܺܝܘ ܘܰܣܠܶܩܘ ܠܛܽܘܪܳܐ. ܘܰܣܠܶܩܘ ܥܕܰܡܳܐ ܠܢܰܚܠܳܐ ܕܰܣܓܽܘܠܳܐ. ܘܓܰܫܽܘܗ̇ ܠܰܐܪܥܳܐ.

²⁵ ܘܰܢܣܰܒܘ ܒܺܐܝܕܰܝ̈ܗܽܘܢ ܡܶܢ ܦܺܐܖ̈ܶܐ ܕܰܐܪܥܳܐ. ܘܰܐܝܬܺܝܘ ܠܰܢ. ܘܰܐܬܺܝܒܽܘܢ ܦܶܬܓܳܡܳܐ. ܘܶܐܡܰܪܘ ܠܰܢ. ܛܳܒܳܐ ܗ̱ܝ ܐܰܪܥܳܐ ܕܝܳܗܶܒ ܠܰܢ ܡܳܪܝܳܐ ܐܰܠܳܗܰܢ.

²⁶ ܘܠܳܐ ܨܒܰܝܬܽܘܢ ܠܡܶܣܰܩ. ܐܶܠܳܐ ܡܰܪܡܰܪܬܽܘܢ ܡܶܠܰܬ ܦܽܘܡܶܗ ܕܡܳܪܝܳܐ ܐܰܠܳܗܰܢ.

²⁷ ܘܰܪܛܶܢܬܽܘܢ ܡܶܢ ܡܰܫܟܢܰܝ̈ܟܽܘܢ. ܘܶܐܡܰܪܬܽܘܢ. ܡܶܛܽܠ ܕܣܳܢܶܐ ܗܽܘ ܠܰܢ ܡܳܪܝܳܐ ܐܰܦܩܰܢ ܡܶܢ ܐܰܪܥܳܐ ܕܡܶܨܪܶܝܢ. ܕܢܰܫܠܡܰܢ ܒܺܐܝܕܳܐ ܕܳܐܡܽܘܖ̈ܳܝܶܐ ܕܢܰܘܒܕܰܢ.

²⁸ ܠܰܐܝܟܳܐ ܣܳܠܩܺܝܢܰܢ. ܐܰܚܰܝ̈ܢ ܬܒܰܪܘ ܠܶܒܰܢ. ܘܶܐܡܰܪܘ ܠܰܢ. ܕܥܰܡܳܐ ܪܰܒ ܘܪܳܡ ܘܥܰܫܺܝܢ ܡܶܢܰܢ. ܘܩܽܘܖ̈ܝܳܐ ܪܰܘܖ̈ܒܳܢ ܘܰܟܖ̈ܺܝܟܳܢ ܥܕܰܡܳܐ ܠܰܫܡܰܝܳܐ. ܐܳܦ ܒܢܰܝ̈ ܓܰܢ̱ܒܳܖ̈ܶܐ. ܚܙܰܝܢ ܬܰܡܳܢ.

²⁹ ܘܶܐܡܪܶܬ ܠܟܽܘܢ. ܠܳܐ ܬܶܕܚܠܽܘܢ ܘܠܳܐ ܬܙܽܘܥܽܘܢ ܡܶܢܗܽܘܢ.

³⁰ ܡܳܪܝܳܐ ܐܰܠܳܗܟܽܘܢ ܐܳܙܶܠ ܩܕܳܡܰܝܟܽܘܢ. ܘܗܽܘ ܡܶܬܟܰܬܰܫ ܚܠܳܦܰܝܟܽܘܢ. ܐܰܝܟ ܟܽܠ ܕܰܥܒܰܕ ܥܰܡܟܽܘܢ ܒܡܶܨܪܶܝܢ ܠܥܺܢܰܝ̈ܟܽܘܢ.

³¹ ܘܰܒܡܰܕܒܪܳܐ ܕܰܚܙܰܝܬܽܘܢ. ܕܬܰܪܣܺܝܟܽܘܢ ܡܳܪܝܳܐ ܐܰܠܳܗܟܽܘܢ. ܐܰܝܟ ܕܰܡܬܰܪܣܶܐ ܓܰܒܪܳܐ ܠܰܒܪܶܗ. ܒܟܽܠܳܗ̇ ܐܰܪܥܳܐ ܕܶܐܙܰܠܬܽܘܢ. ܥܕܰܡܳܐ ܕܶܐܬܰܝܬܽܘܢ ܠܰܐܬܪܳܐ ܗܳܢܳܐ.

³² ܘܰܒܦܶܬܓܳܡܳܐ ܗܳܢܳܐ ܠܳܐ ܡܗܰܝܡܢܺܝܢ ܐ̱ܢܬܽܘܢ ܒܡܳܪܝܳܐ ܐܰܠܳܗܟܽܘܢ .

³³ ܕܳܐܙܶܠ ܩܕܳܡܰܝܟܽܘܢ ܒܽܐܘܪܚܳܐ ܠܡܰܬܩܳܢܽܘ ܠܟܽܘܢ ܐܰܬܪܳܐ ܕܬܶܫܪܽܘܢ ܒܶܗ. ܒܢܽܘܪܳܐ ܒܠܺܠܝܳܐ ܚܰܘܺܝܟܽܘܢ ܐܽܘܪܚܳܐ ܕܬܺܐܙܽܠܘܢ ܒܳܗ̇. ܘܒܳܥܢܳܢܳܐ ܒܺܐܝܡܳܡܳܐ.

³⁴ ܘܰܫܡܰܥ ܡܳܪܝܳܐ ܩܳܠܳܐ ܕܡܶܠܰܝ̈ܟܽܘܢ. ܘܰܪܓܶܙ ܘܺܝܡܳܐ ܘܶܐܡܰܪ.

³⁵ ܕܠܳܐ ܢܶܚܙܽܘܢ ܚܰܕ ܡܶܢ ܓܰܒܖ̈ܶܐ ܗܳܠܶܝܢ ܕܳܪܳܐ ܗܳܢܳܐ ܒܺܝܫܳܐ. ܐܰܪܥܳܐ ܛܳܒܬܳܐ ܕܺܝܡܺܝܬ ܠܡܶܬܰܠ ܠܰܐܒܳܗܰܝ̈ܗܽܘܢ.

³⁶ ܐܶܠܳܐ ܐܶܢ ܟܳܠܳܒ ܒܰܪ ܝܽܘܦܢܳܐ. ܗܽܘ ܢܶܚܙܶܝܗ̇ ܘܠܶܗ ܐܶܬܶܠ ܐܰܪܥܳܐ ܕܗܰܠܶܟ ܒܳܗ̇. ܘܠܰܒܢܰܘ̈ܗܝ. ܚܠܳܦ ܕܫܰܡܠܺܝ ܒܳܬܰܪ ܡܳܪܝܳܐ.

³⁷ ܘܳܐܦ ܥܠܰܝ ܪܓܶܙ ܡܳܪܝܳܐ ܡܶܛܽܠܳܬ̣ܟܽܘܢ. ܘܶܐܡܰܪ ܠܺܝ: ܕܳܐܦ ܐܰܢ̱ܬ ܠܳܐ ܬܶܥܽܘܠ ܠܬܰܡܳܢ.

³⁸ ܐܶܠܳܐ ܐܶܢ ܝܶܫܽܘܥ ܒܰܪܢܽܘܢ ܕܩܳܐܶܡ ܩܕܳܡܰܝܟ. ܗܽܘ ܢܶܥܽܘܠ ܠܬܰܡܳܢ. ܠܶܗ ܚܰܝܶܠ. ܡܶܛܽܠ ܕܗܽܘ ܢܰܘܪܬܺܝܗ̇ ܠܺܝܣܪܳܐܶܝܠ.

³⁹ ܘܺܝܩܰܪܬܟܽܘܢ ܕܶܐܡܰܪܬܽܘܢ ܠܒܶܙܬܳܐ ܬܶܗܘܶܐ. ܘܰܒܢܰܝ̈ܟܽܘܢ ܕܠܳܐ ܝܺܕܰܥܘ ܝܰܘܡܳܢܳܐ ܛܳܒܬܳܐ ܘܒܺܝܫܬܳܐ. ܗܶܢܽܘܢ ܢܺܐܪܬܽܘܢܳܗ̇.

⁴⁰ ܘܰܐܢ̱ܬܽܘܢ ܐܶܬܦܢܰܘ ܠܟܽܘܢ. ܘܰܫܩܽܘܠܘ ܠܡܰܕܒܪܳܐ ܠܽܐܘܪܚܳܐ ܕܝܰܡܳܐ ܕܣܽܘܦ.

⁴¹ ܘܰܥܢܰܝܬܽܘܢ ܘܶܐܡܰܪܬܽܘܢ ܠܺܝ. ܚܛܰܝܢ ܩܕܳܡ ܡܳܪܝܳܐ ܐܰܠܳܗܰܢ. ܚܢܰܢ ܢܶܣܰܩ ܘܢܶܬܟܰܬܰܫ ܐܰܝܟ ܕܦܰܩܕܰܢ ܡܳܪܝܳܐ ܐܰܠܳܗܰܢ. ܘܶܐܙܕܰܝܰܢܬܽܘܢ ܓܒܰܪ ܒܡܳܐܢܰܝ̈ ܩܪܳܒܶܗ. ܘܶܐܬܓܰܪܰܓܬܽܘܢ ܠܡܶܣܰܒ ܠܛܽܘܪܳܐ.

⁴² ܘܶܐܡܰܪ ܠܺܝ ܡܳܪܝܳܐ. ܐܶܡܰܪ ܠܗܽܘܢ. ܠܳܐ ܬܶܣܩܽܘܢ ܘܠܳܐ ܬܶܬܟܰܬܫܽܘܢ. ܡܶܛܽܠ ܕܠܳܐ ܗܘܺܝܬ ܒܰܝܢܳܬܟܽܘܢ. ܕܠܳܐ ܬܶܬܰܒܪܽܘܢ ܩܕܳܡ ܒܥܶܠܕܒܳܒܰܝ̈ܟܽܘܢ.

⁴³ ܘܶܐܡܪܶܬ ܠܟܽܘܢ ܘܠܳܐ ܫܡܰܥܬܽܘܢ. ܘܡܰܪܡܰܪܬܽܘܢ ܡܶܠܰܬ ܦܽܘܡܶܗ ܕܡܳܪܝܳܐ. ܘܰܐܡܪܰܚܬܽܘܢ ܘܰܣܠܶܩܬܽܘܢ ܠܛܽܘܪܳܐ.

⁴⁴ ܘܰܢܦܰܩܘ ܐܳܡܽܘܖ̈ܳܝܶܐ ܕܥܳܡܪܺܝܢ ܒܛܽܘܪܳܐ ܗܰܘ ܠܽܐܘܪܥܟܽܘܢ. ܘܪܰܕܦܽܘܟܽܘܢ ܐܰܝܟ ܕܶܒܽܘܖ̈ܶܐ ܡܬܰܢܢ̈ܶܐ. ܘܛܰܪܕܽܘܟܽܘܢ ܡܶܢ ܣܰܥܺܝܪ ܘܰܥܕܰܡܳܐ ܠܚܶܪܡܳܐ.

⁴⁵ ܘܺܝܬܶܒܬܽܘܢ ܘܰܒܟܰܝܬܽܘܢ ܩܕܳܡ ܡܳܪܝܳܐ. ܘܠܳܐ ܫܡܰܥ ܡܳܪܝܳܐ ܒܩܳܠܟܽܘܢ ܘܠܳܐ ܨܳܬܟܽܘܢ.

⁴⁶ ܘܺܝܬܶܒܬܽܘܢ ܒܰܪܩܶܡ ܝܰܘ̈ܡܳܬܳܐ ܣܰܓܺܝ̈ܐܶܐ. ܐܰܝܟ ܝܰܘ̈ܡܳܬܳܐ ܕܺܝܬܶܒܬܽܘܢ.