Genesi ܒܪܝܬܐ 45

¹ ܘܠܳܐ ܐܶܫܟܰܚ ܝܰܘܣܶܦ ܠܰܡܚܰܡܣܳܢܽܘ ܡܶܢ ܟܽܠ ܕܩܳܝܡܺܝܢ ܗܘܰܘ ܩܕܳܡܰܘܗܝ: ܘܶܐܡܰܪ ܐܰܦܶܩܘ ܠܟܽܠܢܳܫ ܡܶܢ ܠܘܳܬܝ: ܘܠܳܐ ܩܰܘܺܝ ܐ̱ܢܳܫ ܠܘܳܬܶܗ ܟܰܕ ܐܶܬܓܠܺܝ ܝܰܘܣܶܦ ܠܰܐܚܰܘ̈ܗܝ.

² ܘܰܐܪܺܝܡ ܩܳܠܶܗ ܒܰܒܟܳܬܳܐ: ܘܰܫܡܰܥܘ ܡܶܨܖ̈ܳܝܶܐ: ܘܶܐܫܬܡܰܥ ܒܶܝܬ ܦܶܪܥܽܘܢ.

³ ܘܶܐܡܰܪ ܝܰܘܣܶܦ ܠܰܐܚܰܘ̈ܗܝ: ܐܶܢܳܐ ܐ̱ܢܳܐ ܝܰܘܣܶܦ ܐܰܚܽܘܟܽܘܢ: ܥܕܰܟܺܝܠ ܐܳܒܝ ܚܰܝ ܗܽܘ: ܘܠܳܐ ܐܶܫܟܰܚܘ ܐܰܚܰܘ̈ܗܝ ܠܡܶܬܰܠ ܠܶܗ ܦܶܬܓܳܡܳܐ: ܡܶܛܽܠ ܕܰܕܚܶܠܘ ܡܶܢ ܩܕܳܡܰܘܗܝ.

⁴ ܘܶܐܡܰܪ ܝܰܘܣܶܦ ܠܰܐܚܰܘ̈ܗܝ: ܩܪܽܘܒܘ ܠܘܳܬܝ: ܘܰܩܪܶܒܘ ܠܘܳܬܶܗ: ܘܶܐܡܰܪ ܠܗܽܘܢ: ܐܶܢܳܐ ܐ̱ܢܳܐ ܝܰܘܣܶܦ ܐܰܚܽܘܟܽܘܢ: ܕܙܰܒܶܢܬܽܘܢܳܢܝ ܠܡܶܨܖ̈ܳܝܶܐ.

⁵ ܘܗܳܫܳܐ ܠܳܐ ܬܶܟܪܶܐ ܠܟܽܘܢ: ܘܠܳܐ ܢܶܬܒܐܶܫ ܒܥܰܝܢܰܝ̈ܟܽܘܢ ܕܙܰܒܶܢܬܽܘܢܳܢܝ ܠܗܳܪܟܳܐ: ܡܶܛܽܠ ܕܰܠܬܽܘܪܣܳܝܳܐ ܗܽܘ ܫܰܕܪܰܢܝ ܐܰ‌ܠܳܗܳܐ ܩܕܳܡܰܝܟܽܘܢ.

⁶ ܡܶܛܽܠ ܕܗܳܐ ܬܰܪܬܶܝܢ ܫܢܺܝ̈ܢ ܟܰܦܢܳܐ ܒܓܰܘܳܗ̇ ܕܰܐܪܥܳܐ: ܘܬܽܘܒ ܚܰܡܶܫ ܫܢܺܝ̈ܢ ܕܠܰܝܬ ܕܙܳܪܰܥ ܘܰܕܚܳܨܶܕ.

⁷ ܘܫܰܕܪܰܢܝ ܐܰ‌ܠܳܗܳܐ ܩܕܳܡܰܝܟܽܘܢ: ܠܰܡܣܳܡ ܠܟܽܘܢ ܫܰܪܟܳܢܳܐ: ܘܰܠܡܰܚܳܝܽܘ ܠܟܽܘܢ ܡܫܰܘܙܒܽܘܬܳܐ ܪܰܒܬܳܐ ܒܰܐܪܥܳܐ.

⁸ ܘܗܳܫܳܐ ܠܳܐ ܗܘܳܐ ܐܰܢ̱ܬܽܘܢ ܫܰܕܰܪܬܽܘܢܳܢܝ ܠܗܳܪܟܳܐ: ܐܶܠܳܐ ܐܰ‌ܠܳܗܳܐ: ܘܥܰܒܕܰܢܝ ܐܰܒܳܐ ܠܦܶܪܥܽܘܢ: ܘܡܳܪܳܐ ܥܰܠ ܟܽܠܶܗ ܒܰܝܬܶܗ: ܘܫܰܠܺܝܛܳܐ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ.

⁹ ܒܰܥܓܰܠ ܣܰܩܘ ܠܘܳܬܝ ܐܳܒܝ: ܘܶܐܡܰܪܘ ܠܶܗ: ܗܳܟܰܢܳܐ ܐܳܡܰܪ ܒܪܳܟ ܝܰܘܣܶܦ: ܥܰܒܕܰܢܝ ܐܰ‌ܠܳܗܳܐ ܡܳܪܳܐ ܥܰܠ ܟܽܠܳܗ̇ ܡܶܨܪܶܝܢ: ܚܽܘܬ ܠܘܳܬܝ ܘܠܳܐ ܬܶܫܬܰܘܚܰܪ.

¹⁰ ܘܬܶܒ ܒܰܐܪܥܳܐ ܕܓܶܫܳܢ: ܘܰܗܘܰܝܬ ܩܰܪܺܝܒ ܠܺܝ: ܐܰܢ̱ܬ ܘܰܒܢܰܝ̈ܟ ܘܰܒܢܰܝ̈ ܒܰܝܬܳܟ: ܘܥܳܢ̈ܳܟ ܘܬܰܘܖ̈ܰܝܟ ܘܟܽܠ ܕܺܐܝܬ ܠܳܟ.

¹¹ ܘܶܐܬܰܪܣܶܝܟܽܘܢ ܬܰܡܳܢ: ܡܶܛܽܠ ܕܬܽܘܒ ܚܰܡܶܫ ܫܢܺܝ̈ܢ ܩܰܝܳܡ ܟܰܦܢܳܐ: ܕܰܠܡܳܐ ܬܺܐܒܰܕ ܐܰܢ̱ܬ ܘܒܰܝܬܳܟ ܘܟܽܠ ܕܺܐܝܬ ܠܳܟ.

¹² ܘܗܳܐ ܥܰܝ̈ܢܰܝܟܽܘܢ ܚܳܙ̈ܝܳܢ: ܘܥܰܝ̈ܢܰܘܗܝ ܕܳܐܚܝ ܒܶܢܝܳܡܶܝܢ: ܕܦܽܘܡܝ ܡܰܡܠܶܠ ܥܰܡܟܽܘܢ.

¹³ ܘܚܰܘܰܘ ܠܳܐܒܝ ܟܽܠܶܗ ܐܺܝܩܳܪܝ ܕܰܒܡܶܨܪܶܝܢ: ܘܟܽܠ ܕܰܚܙܰܝܬܽܘܢ: ܘܣܰܪܗܶܒܘ ܐܰܚܶܬܘ ܠܳܐܒܝ ܠܗܳܪܟܳܐ:

¹⁴ ܘܰܢܦܰܠ ܥܰܠ ܨܰܘܪܶܗ ܕܒܶܢܝܳܡܶܝܢ ܐܰܚܽܘܗܝ: ܘܰܒܟܳܐ: ܘܒܶܢܝܳܡܶܝܢ ܒܟܳܐ ܥܰܠ ܨܰܘܪܶܗ.

¹⁵ ܘܢܰܫܶܩ ܠܟܽܠܗܽܘܢ ܐܰܚܰܘ̈ܗܝ: ܘܰܒܟܳܐ ܥܠܰܝܗܽܘܢ: ܘܒܳܬܰܪܟܶܢ ܡܰܠܶܠܘ ܐܰܚܰܘ̈ܗܝ ܥܰܡܶܗ.

¹⁶ ܘܩܳܠܳܐ ܐܶܫܬܡܰܥ ܒܶܝܬ ܦܶܪܥܽܘܢ ܕܳܐܡܪܺܝܢ: ܐܶܬܰܘ ܐܰܚܰܘ̈ܗܝ ܕܝܰܘܣܶܦ: ܘܰܫܦܰܪ ܦܶܬܓܳܡܳܐ ܒܥܰܝ̈ܢܰܝ ܦܶܪܥܽܘܢ ܘܰܒܥܰܝ̈ܢܰܝ ܥܰܒܕܰܘ̈ܗܝ.

¹⁷ ܘܶܐܡܰܪ ܦܶܪܥܽܘܢ ܠܝܰܘܣܶܦ: ܐܶܡܰܪ ܠܰܐܚܰܝ̈ܟ: ܗܳܟܰܢܳܐ ܥܒܶܕܘ: ܐܰܛܥܶܢܘ ܒܥܺܝܪܟܽܘܢ ܥܒܽܘܪܳܐ: ܘܙܶܠܘ ܐܰܘܒܶܠܘ ܠܰܐܪܥܳܐ ܕܰܟܢܰܥܢ.

¹⁸ ܘܰܕܒܰܪܘ ܠܰܐܒܽܘܟܽܘܢ: ܘܰܠܐ̱ܢܳܫܝ̈ ܒܳܬܰܝ̈ܟܽܘܢ ܘܰܐܝܬܰܘ ܠܘܳܬܝ: ܘܶܐܬܶܠ ܠܟܽܘܢ ܛܽܘܒܳܐ ܕܰܐܪܥܳܐ ܕܡܶܨܪܶܝܢ: ܘܰܐܟܽܘܠܘ ܫܽܘܡܢܳܗ̇ ܕܰܐܪܥܳܐ.

¹⁹ ܘܰܐܢ̱ܬ ܗܳܐ ܡܫܰܠܰܛ ܐܰܢ̱ܬ: ܐܶܡܰܪ ܠܰܐܚܰܝ̈ܟ: ܗܳܟܰܢܳܐ ܥܒܶܕܘ: ܕܒܰܪܘ ܠܟܽܘܢ ܡܶܢ ܐܰܪܥܳܐ ܕܡܶܨܪܶܝܢ ܥܶܓ̈ܠܳܬܳܐ ܠܢܶܫܰܝ̈ܟܽܘܢ ܘܠܺܝܩܰܪܬܟܽܘܢ: ܘܰܫܩܽܘܠܘ ܠܰܐܒܽܘܟܽܘܢ ܘܬܰܘ.

²⁰ ܘܥܰܝ̈ܢܰܝܟܽܘܢ ܠܳܐ ܢܚܽܘ̈ܣܳܢ ܥܰܠ ܡܳܐܢܰܝ̈ܟܽܘܢ: ܡܶܛܽܠ ܕܛܽܘܒܳܗ̇ ܕܟܽܠܳܗ̇ ܐܰܪܥܳܐ ܕܡܶܨܪܶܝܢ ܕܺܝܠܟܽܘܢ ܗܽܘ.

²¹ ܘܰܥܒܰܕܘ ܗܳܟܰܢܳܐ ܒܢܰܝ̈ ܝܺܣܪܳܐܶܝܠ: ܘܝܰܗܒ ܠܗܽܘܢ ܝܰܘܣܶܦ ܥܶܓ̈ܠܳܬܳܐ: ܥܰܠ ܡܶܠܰܬ ܦܽܘܡܶܗ ܕܦܶܪܥܽܘܢ: ܘܝܰܗܒ ܠܗܽܘܢ ܙܘܳܕ̈ܶܐ ܠܽܐܘܪܚܳܐ ܠܟܽܠܗܽܘܢ.

²² ܘܝܰܗܒ ܠܟܽܠ ܓܒܰܪ ܙܰܘܓܳܐ ܕܢܰܚ̈ܬܶܐ: ܘܰܠܒܶܢܝܳܡܶܝܢ ܝܰܗܒ ܬܠܳܬ ܡܳܐܐ ܕܟܶܣܦܳܐ: ܘܚܰܡܫܳܐ ܙܰܘܓܺܝ̈ܢ ܕܢܰܚ̈ܬܶܐ.

²³ ܘܠܰܐܒܽܘܗܝ ܫܰܕܰܪ ܗܳܟܰܢܳܐ: ܥܶܣܪܳܐ ܚܶܡܖ̈ܳܐ ܟܰܕ ܛܥܺܝܢܺܝܢ ܡܶܢ ܛܽܘܒܳܗ̇ ܕܰܐܪܥܳܐ ܕܡܶܨܪܶܝܢ: ܘܰܥܣܰܪ ܐܰܬܳܢܺܝ̈ܢ ܟܰܕ ܛܥܺܝ̈ܢܳܢ ܥܒܽܘܪܳܐ ܘܚܰܡܪܳܐ: ܘܰܙܘܳܕ̈ܶܐ ܠܰܐܒܽܘܗܝ ܠܽܐܘܪܚܳܐ.

²⁴ ܘܫܰܕܰܪ ܐܶܢܽܘܢ ܘܶܐܙܰܠܘ: ܘܶܐܡܰܪ ܠܗܽܘܢ: ܠܳܐ ܬܶܐܨܽܘܢ ܒܽܐܘܪܚܳܐ: ܘܰܣܠܶܩܘ ܡܶܢ ܡܶܨܪܶܝܢ: ܘܶܐܬܰܘ ܠܰܐܪܥܳܐ ܕܰܟܢܰܥܢ: ܠܘܳܬ ܝܰܥܩܽܘܒ ܐܰܒܽܘܗܽܘܢ.

²⁵ ܘܚܰܘܝܽܘܗܝ ܘܶܐܡܰܪܘ ܠܶܗ: ܥܕܰܟܺܝܠ ܝܰܘܣܶܦ ܚܰܝ: ܘܗܽܘܝܽܘ ܫܰܠܺܝܛ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ: ܘܰܐܗܡܺܝ ܒܠܶܒܶܗ ܡܶܛܽܠ ܕܠܳܐ ܗܰܝܡܶܢ ܐܶܢܽܘܢ.

²⁶ ܘܚܰܘܝܽܘܗܝ ܟܽܠܗܶܝܢ ܡ̈ܶܠܶܐ ܕܶܐܡܰܪ ܠܗܽܘܢ ܝܰܘܣܶܦ: ܘܰܚܙܳܐ ܝܰܥܩܽܘܒ ܥܶܓ̈ܠܳܬܳܐ ܕܫܰܕܰܪ ܝܰܘܣܶܦ ܠܡܶܫܩܠܶܗ: ܘܶܐܬܬܢܺܝܚܰܬ ܪܽܘܚܶܗ ܕܝܰܥܩܽܘܒ ܐܰܒܽܘܗܽܘܢ.

²⁷ ܘܶܐܡܰܪ: ܪܰܒܳܐ ܗܺܝ ܠܺܝ ܗܳܕܶܐ ܕܰܥܕܰܟܺܝܠ ܝܰܘܣܶܦ ܒܶܪܝ ܚܰܝ: ܐܺܙܰܠ ܐܶܚܙܶܝܘܗܝ ܥܰܕܠܳܐ ܐܶܡܽܘܬ.