Genesi ܒܪܝܬܐ 4

¹ ܘܳܐܕܳܡ ܚܟܰܡ ܠܚܰܘܳܐ ܐܰܢ̱ܬܬܶܗ: ܘܒܶܛܢܰܬ ܘܝܶܠܕܰܬ ܠܩܳܐܺܝܢ: ܘܶܐܡܪܰܬ ܩܢܺܝ݀ܬ ܓܰܒܪܳܐ ܠܡܳܪܝܳܐ.

² ܘܰܐܘܣܦܰܬ ܠܡܺܐܠܰܕ ܠܰܐܚܽܘܗܝ ܗܳܒܶܝܠ: ܘܰܗܘܳܐ ܗܳܒܶܝܠ ܪܳܥܶܐ ܥܳܢ̈ܳܐ: ܘܩܳܐܺܝܢ ܗܘܳܐ ܦܳܠܰܚ ܒܰܐܪܥܳܐ.

³ ܘܰܗܘܳܐ ܡܶܢ ܒܳܬܰܪ ܝܰܘ̈ܡܳܬܳܐ: ܘܰܐܝܬܺܝ ܩܳܐܺܝܢ ܡܶܢ ܦܺܐܖ̈ܶܐ ܕܰܐܪܥܶܗ ܩܽܘܪܒܳܢܳܐ ܠܡܳܪܝܳܐ.

⁴ ܘܗܳܒܶܝܠ ܐܰܝܬܺܝ ܐܳܦ ܗܽܘ ܡܶܢ ܒܽܘܟܪܳܐ ܕܥܳܢ̈ܶܗ: ܘܡܶܢ ܫܰܡܺܝܢܰܝ̈ܗܽܘܢ: ܘܶܐܨܛܒܺܝ ܡܳܪܝܳܐ ܒܗܳܒܶܝܠ ܘܰܒܩܽܘܪܒܳܢܶܗ.

⁵ ܘܰܒܩܳܐܺܝܢ ܘܰܒܩܽܘܪܒܳܢܶܗ ܠܳܐ ܐܶܨܛܒܺܝ: ܘܶܐܬܒܐܶܫ ܠܩܳܐܺܝܢ ܛܳܒ: ܘܶܐܬܟܡܰܖ̈ܝ ܐܰܦܰܘ̈ܗܝ.

⁶ ܘܶܐܡܰܪ ܡܳܪܝܳܐ ܠܩܳܐܺܝܢ: ܠܡܳܢܳܐ ܐܶܬܒܐܶܫ ܠܳܟ ܘܰܠܡܳܢܳܐ ܐܶܬܟܡܰܖ̈ܝ ܐܰܦܰܝ̈ܟ.

⁷ ܗܳܐ ܐܶܢ ܬܶܫܦܰܪ ܩܰܒܠܶܬ: ܘܶܐܢ ܠܳܐ ܬܶܫܦܰܪ: ܥܰܠ ܐܰܪܥܳܐ ܚܛܳܗܳܐ ܪܒܺܝܥ: ܐܰܢ̱ܬ ܬܶܬܦܢܶܐ ܠܘܳܬܶܗ: ܘܗܽܘ ܢܶܫܬܰܠܰܛ ܒܳܟ.

⁸ ܘܶܐܡܰܪ ܩܳܐܺܝܢ ܠܗܳܒܶܝܠ ܐܰܚܽܘܗܝ: ܢܶܪܕܶܐ ܠܰܦܩܰܥܬܳܐ: ܘܰܗܘܳܐ ܟܰܕ ܗܶܢܽܘܢ ܒܚܰܩܠܳܐ: ܩܳܡ ܩܳܐܺܝܢ ܥܰܠ ܐܰܚܽܘܗܝ ܗܳܒܶܝܠ ܘܩܰܛܠܶܗ.

⁹ ܘܶܐܡܰܪ ܡܳܪܝܳܐ ܠܩܳܐܺܝܢ: ܐܰܝܟܰܘ ܗܳܒܶܝܠ ܐܰܚܽܘܟ: ܘܶܐܡܰܪ ܠܳܐ ܝܳܕܰܥ ܐ̱ܢܳܐ: ܢܳܛܽܘܪܶܗ ܐ̱ܢܳܐ ܓܶܝܪ ܕܳܐܚܝ.

¹⁰ ܘܶܐܡܰܪ ܠܶܗ ܡܳܪܝܳܐ: ܡܳܢܳܐ ܥܒܰܕܬ: ܩܳܠܳܐ ܕܰܕܡܶܗ ܕܰܐܚܽܘܟ ܓܳܥܶܐ ܠܘܳܬܝ ܡܶܢ ܐܰܪܥܳܐ.

¹¹ ܡܶܟܺܝܠ ܠܺܝܛ ܐܰܢ̱ܬ ܡܶܢ ܐܰܪܥܳܐ: ܕܦܶܬܚܰܬ ܦܽܘܡܳܗ̇ ܘܩܰܒܠܰܬ ܕܡܶܗ ܕܰܐܚܽܘܟ ܡܶܢ ܐܺܝܕܰܝ̈ܟ.

¹² ܟܰܕ ܬܶܦܠܽܘܚ ܒܰܐܪܥܳܐ: ܠܳܐ ܬܰܘܣܶܦ ܕܬܶܬܶܠ ܠܳܟ ܚܰܝܠܳܗ̇: ܙܳܐܰܥ ܘܢܳܐܶܕ ܬܶܗܘܶܐ ܒܰܐܪܥܳܐ.

¹³ ܘܶܐܡܰܪ ܩܳܐܺܝܢ ܠܡܳܪܝܳܐ ܪܰܒܳܐ ܗ̱ܝ ܣܰܟܠܽܘܬܝ ܡܶܢ ܕܰܠܡܶܫܒܰܩ.

¹⁴ ܗܳܐ ܐܰܦܶܩܬܳܢܝ ܝܰܘܡܳܢܳܐ ܡܶܢ ܐܰܦܰܝ̈ ܐܰܪܥܳܐ: ܘܡܶܢ ܩܕܳܡܰܝܟ ܐܶܬܛܫܶܐ: ܘܶܐ݀ܗܘܶܐ ܙܳܐܰܥ ܘܢܳܐܶܕ ܒܰܐܪܥܳܐ: ܘܟܽܠ ܡܰܢ ܕܢܶܫܟܚܰܢܝ ܢܶܩܛܠܰܢܝ.

¹⁵ ܘܶܐܡܰܪ ܠܶܗ ܡܳܪܝܳܐ: ܠܳܐ ܗܳܟܰܢܳܐ ܟܽܠ ܩܳܛܽܘܠܳܐ ܕܩܳܐܺܝܢ ܚܰܕ ܒܫܰܒܥܳܐ ܢܶܬܦܪܰܥ ܘܣܳܡ ܡܳܪܝܳܐ ܐܳܬܳܐ ܒܩܳܐܺܝܢ: ܕܠܳܐ ܢܶܩܛܠܺܝܘܗܝ ܟܽܠ ܡܰܢ ܕܡܶܫܟܰܚ ܠܶܗ.

¹⁶ ܘܰܢܦܰܩ ܩܳܐܺܝܢ ܡܶܢ ܩܕܳܡ ܡܳܪܝܳܐ: ܘܺܝܬܶܒ ܒܰܐܪܥܳܐ ܕܢܽܘܕ: ܡܶܢ ܡܰܕܢܚܳܗ̇ ܕܰܥܕܶܢ.

¹⁷ ܡܶܢ ܩܳܐܺܝܢ ܥܕܡܳܐ ܠܰܐܢܽܘܫ: ܘܰܚܟܰܡ ܩܳܐܺܝܢ ܠܰܐܢ̱ܬܬܶܗ: ܘܒܶܛܢܰܬ ܘܝܶܠܕܰܬ ܠܰܚܢܽܘܟ: ܘܰܗܘܳܐ ܒܳܢܶܐ ܩܪܺܝܬܳܐ: ܘܰܩܪܳܐ ܫܡܳܗ̇ ܕܰܩܪܺܝܬܳܐ ܥܰܠ ܫܶܡ ܒܪܶܗ ܚܢܽܘܟ.

¹⁸ ܘܶܐܬܺܝܠܶܕ ܠܰܚܢܽܘܟ ܥܺܝܕܳܪ: ܘܥܺܝܕܳܪ ܐܰܘܠܶܕ ܠܰܡܰܚܳܘܐܶܝܠ: ܘܰܡܰܚܳܘܐܶܝܠ ܐܰܘܠܶܕ ܠܡܰܬܽܘܫܶܝܠ: ܘܡܰܬܽܘܫܶܝܠ ܐܰܘܠܶܕ ܠܠܰܡܰܟ.

¹⁹ ܘܠܰܡܰܟ ܢܣܰܒ ܠܶܗ ܬܰܪܬܶܝܢ ܢܶܫܺܝ̈ܢ: ܫܡܳܗ̇ ܕܰܚܕܳܐ ܥܰܕܳܐ: ܘܰܫܡܳܗ̇ ܕܰܐ̱ܚܪܺܬܳܐ ܨܰܠܳܐ.

²⁰ ܘܝܶܠܕܰܬ ܥܰܕܳܐ ܠܝܳܒܶܠ: ܗܽܘ ܗܘܳܐ ܐܰܒܳܐ ܠܥܳܡܖ̈ܰܝ ܡܰܫܟܢܳܐ: ܘܩܳܢܝܰܝ̈ ܩܶܢܝܳܢܳܐ.

²¹ ܘܰܫܡܳܐ ܕܰܐܚܽܘܗܝ ܝܽܘܒܶܠ: ܗܽܘ ܗܘܳܐ ܐܰܒܳܐ ܠܟܽܠ ܕܰܐܚܺܝܕ ܩܺܝܬܳܪܳܐ ܘܟܶܢܳܪܳܐ.

²² ܘܨܰܠܳܐ ܐܳܦ ܗܺܝ ܝܶܠܕܰܬ ܠܬܽܘܒܰܩܠܺܝܢ ܐܽܘܡܳܢ ܒܟܽܠ ܥܒܳܕ ܕܰܢܚܳܫܳܐ ܘܰܕܦܰܪܙܠܳܐ: ܘܚܳܬܶܗ ܕܬܽܘܒܰܩܠܺܝܢ ܢܰܥܡܳܐ.

²³ ܘܶܐܡܰܪ ܠܰܡܟ ܠܢܶܫܰܘ̈ܗܝ ܥܰܕܳܐ ܘܨܰܠܳܐ: ܫܡܰܥܶܝ̈ܢ ܩܳܠܝ ܢܶܫܰܝ̈ ܠܰܡܰܟ: ܨܽܘܬܶܝ̈ܢ ܠܡܺܐܡܰܪܝ: ܡܶܛܽܠ ܕܓܰܒܪܳܐ ܩܶܛܠܶܬ ܒܨܽܘܠ̈ܦܳܬܝ: ܘܛܰܠܝܳܐ ܒܫܽܘܩܦܰܝ̈.

²⁴ ܡܶܛܽܠ ܕܚܰܕ ܒܫܰܒܥܳܐ ܢܶܬܦܪܰܥ ܩܳܐܺܝܢ: ܘܠܰܡܟ ܠܫܰܒܥܺܝܢ ܘܫܰܒܥܳܐ.

²⁵ ܘܰܚܟܰܡ ܐܳܕܳܡ ܬܽܘܒ ܠܚܰܘܳܐ ܐܰܢ̱ܬܬܶܗ: ܘܒܶܛܢܰܬ ܘܝܶܠܕܰܬ ܒܪܳܐ: ܘܰܩܪܳܬ ܫܡܶܗ ܫܺܝܬ: ܡܶܛܽܠ ܕܝܰܗܒ ܠܺܝ ܐܰ‌ܠܳܗܳܐ ܙܰܪܥܳܐ ܐ̱ܚܪܺܢܳܐ: ܚܠܳܦ ܗܳܒܶܝܠ ܕܩܰܛܠܶܗ ܩܳܐܺܝܢ.

²⁶ ܘܰܠܫܺܝܬ ܐܳܦ ܠܶܗ ܐܶܬܺܝܠܶܕ ܠܶܗ ܒܪܳܐ: ܘܰܩܪܳܐ ܫܡܶܗ ܐܰܢܽܘܫ. ܗܳܝܕܶܝܢ ܫܰܪܺܝ ܠܡܶܩܪܳܐ ܒܰܫܡܶܗ ܕܡܳܪܝܳܐ.