Genesi ܒܪܝܬܐ 28

¹ ܘܰܩܪܳܐ ܐܺܝܣܚܳܩ ܠܝܰܥܩܽܘܒ: ܘܒܰܪܟܶܗ ܘܦܰܩܕܶܗ ܘܶܐܡܰܪ ܠܶܗ: ܠܳܐ ܬܶܣܰܒ ܐܰܢ̱ܬܬܳܐ ܡܶܢ ܒܢ̈ܳܬ ܟܢܰܥܢ.

² ܩܽܘܡ ܙܶܠ ܠܦܳܕܳܢ ܕܳܐܪܳܡ: ܠܒܶܝܬ ܒܬܽܘܐܶܝܠ ܐܰܒܽܘܗ̇ ܕܶܐܡܳܟ: ܘܣܰܒ ܠܳܟ ܡܶܢ ܬܰܡܳܢ ܐܰܢ̱ܬܬܳܐ: ܡܶܢ ܒܢ̈ܳܬ ܠܳܒܳܢ ܐܰܚܽܘܗ̇ ܕܶܐܡܳܟ.

³ ܐܺܝܠܫܰܕܰܝ ܢܒܰܪܟܳܟ: ܘܢܰܟܒܪܳܟ ܘܢܰܣܓܶܝܟ: ܘܬܶܗܘܶܐ ܠܟܶܢܫܳܐ ܕܥܰܡ̈ܡܶܐ.

⁴ ܘܢܶܬܶܠ ܠܳܟ ܒܽܘܪܟܬܶܗ ܕܰܐܒܪܳܗܳܡ: ܠܳܟ ܘܰܠܙܰܪܥܳܟ ܥܰܡܳܟ: ܘܢܰܘܪܬܳܟ ܐܰܪܥܳܐ ܕܡܰܥܡܪܳܟ ܕܝܰܗܒ ܐܰ‌ܠܳܗܳܐ ܠܰܐܒܪܳܗܳܡ.

⁵ ܘܫܰܕܪܶܗ ܐܺܝܣܚܳܩ ܠܝܰܥܩܽܘܒ: ܘܶܐܙܰܠ ܠܦܳܕܳܢ ܕܳܐܪܳܡ: ܠܘܳܬ ܠܳܒܳܢ ܒܰܪ ܒܬܽܘܐܶܝܠ ܐܳܪܳܡܳܝܳܐ: ܐܰܚܽܘܗ̇ ܕܪܰܦܩܰܐ ܐܶܡܶܗ ܕܝܰܥܩܽܘܒ ܘܰܕܥܺܝܣܽܘ.

⁶ ܘܰܚܙܳܐ ܥܺܝܣܽܘ ܕܒܰܪܟܶܗ ܐܺܝܣܚܳܩ ܠܝܰܥܩܽܘܒ ܐܰܚܽܘܗܝ: ܘܫܰܕܪܶܗ ܠܦܳܕܳܢ ܕܳܐܪܳܡ ܠܡܶܣܰܒ ܠܶܗ ܡܶܢ ܬܰܡܳܢ ܐܰܢ̱ܬܬܳܐ: ܟܰܕ ܒܰܪܟܶܗ ܘܦܰܩܕܶܗ ܘܶܐܡܰܪ ܠܶܗ: ܕܠܳܐ ܬܶܣܰܒ ܐܰܢ̱ܬܬܳܐ ܡܶܢ ܒܢ̈ܳܬ ܟܢܰܥܢ.

⁷ ܘܰܫܡܰܥ ܝܰܥܩܽܘܒ ܠܰܐܒܽܘܗܝ ܘܠܶܐܡܶܗ: ܘܶܐܙܰܠ ܠܦܳܕܳܢ ܕܳܐܪܳܡ.

⁸ ܘܰܚܙܳܐ ܥܺܝܣܽܘ ܕܒܺܝ̈ܫܳܢ ܒܢ̈ܳܬ ܟܢܰܥܢ ܒܥܰܝ̈ܢܰܝ ܐܺܝܣܚܳܩ ܐܰܒܽܘܗܝ.

⁹ ܘܶܐܙܰܠ ܥܺܝܣܽܘ ܠܘܳܬ ܐܺܝܫܡܳܥܺܝܠ: ܘܰܢܣܰܒ ܠܒܶܣܡܰܬ ܒܰܪܬ ܐܺܝܫܡܳܥܺܝܠ ܒܰܪ ܐܰܒܪܳܗܳܡ: ܚܳܬܶܗ ܕܰܢܒܺܝܽܘܬ ܥܰܠ ܢܶܫܰܘ̈ܗܝ ܠܶܗ ܐܰܢ̱ܬܬܳܐ.

¹⁰ ܓܶܠܝܳܢܳܐ ܕܥܰܠ ܝܰܥܩܽܘܒ. ܘܰܢܦܰܩ ܝܰܥܩܽܘܒ ܡܶܢ ܒܺܪ ܫܒܰܥ ܕܢܺܐܙܰܠ ܠܚܳܪܳܢ.

¹¹ ܘܰܦܓܰܥ ܒܰܐܬܪܳܐ ܘܒܳܬ ܬܰܡܳܢ: ܡܶܛܽܠ ܕܥܶܪܒܰܬ ܫܶܡܫܳܐ: ܘܰܢܣܰܒ ܡܶܢ ܟܺܐܦ̈ܶܐ ܕܰܐܬܪܳܐ ܘܣܳܡ ܐܶܣܳܕܰܘ̈ܗܝ: ܘܰܕܡܶܟ ܒܗܰܘ ܐܰܬܪܳܐ.

¹² ܘܰܚܙܳܐ ܒܚܶܠܡܶܗ: ܘܗܳܐ ܣܶܒܶܠܬܳܐ ܩܳܝܡܳܐ ܒܰܐܪܥܳܐ: ܘܪܺܝܫܳܗ̇ ܡܳܛܶܐ ܠܰܫܡܰܝܳܐ: ܘܗܳܐ ܡܰܠܰܐܟܰܘ̈ܗܝ ܕܰܐ‌ܠܳܗܳܐ ܣܳܠܩܺܝܢ ܘܢܳܚܬܺܝܢ ܒܳܗ̇.

¹³ ܘܗܳܐ ܡܳܪܝܳܐ ܩܳܐܶܡ ܠܥܶܠ ܡܶܢܳܗ̇: ܘܶܐܡܰܪ : ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܶܗ ܕܰܐܒܪܳܗܳܡ ܐܰܒܽܘܟ: ܘܰܐܠܳܗܶܗ ܕܺܐܝܣܚܳܩ. ܐܰܪܥܳܐ ܕܕܳܡܶܟ ܐܰܢ̱ܬ ܥܠܶܝܗ̇: ܠܳܟ ܐܶܬܠܺܝܗ̇ ܘܰܠܙܰܪܥܳܟ.

¹⁴ ܘܢܶܗܘܶܐ ܙܰܪܥܳܟ ܐܰܝܟ ܥܰܦܪܳܐ ܕܰܐܪܥܳܐ. ܘܬܶܣܓܶܐ ܠܡܰܕܢܚܳܐ: ܘܰܠܡܰܥܪܒܐ: ܘܰܠܓܰܪܒܝܳܐ: ܘܰܠܬܰܝܡܢܳܐ: ܘܢܶܬܒܰܖ̈ܟܰܢ ܒܳܟ ܟܽܠܗܶܝܢ ܫܰܖ̈ܒܳܬܳܐ ܕܰܐܪܥܳܐ: ܘܰܒܙܰܪܥܳܟ.

¹⁵ ܘܗܳܐ ܐܶܢܳܐ ܥܰܡܳܟ: ܘܶܐܛܪܳܟ ܠܰܐܝܟܳܐ ܕܬܺܐܙܰܠ: ܘܰܐܗܦܟܳܟ ܠܰܐܪܥܳܐ ܗܳܕܶܐ: ܘܠܳܐ ܐܶܫܒܩܳܟ ܥܕܰܡܳܐ ܕܶܐܥܒܶܕ ܡܶܕܶܡ ܕܶܐܡܪܶܬ ܠܳܟ.

¹⁶ ܘܶܐܬܬܥܺܝܪ ܝܰܥܩܽܘܒ ܡܶܢ ܫܶܢܬܶܗ: ܘܶܐܡܰܪ ܫܰܪܺܝܪܳܐܺܝܬ ܐܺܝܬ ܡܳܪܝܳܐ ܒܰܐܬܪܳܐ ܗܳܢܳܐ: ܘܶܐܢܳܐ ܠܳܐ ܝܶܕܥܶ݀ܬ.

¹⁷ ܘܰܕܚܶܠ ܝܰܥܩܽܘܒ ܕܶܚܠܬܳܐ ܪܰܒܬܳܐ: ܘܶܐܡܰܪ: ܡܳܐ ܕܚܺܝܠ ܗܽܘ ܐܰܬܪܳܐ ܗܳܢܳܐ ܝܰܘܡܳܢܳܐ: ܠܰܝܬܰܘܗܝ ܗܳܢܳܐ ܐܶܠܳܐ ܐܶܢ ܒܰܝܬܶܗ ܕܰܐ‌ܠܳܗܳܐ: ܘܗܳܢܰܘ ܬܰܪܥܳܗ̇ ܕܰܫܡܰܝܳܐ.

¹⁸ ܘܩܰܕܶܡ ܝܰܥܩܽܘܒ ܒܫܰܦܪܳܐ: ܘܰܢܣܰܒ ܟܺܐܦܳܐ ܕܣܳܡ ܐܶܣܳܕܰܘ̈ܗܝ: ܘܥܰܒܕܳܗ̇ ܩܳܝܶܡܬܳܐ: ܘܰܢܣܰܟ ܡܶܫܚܳܐ ܒܪܺܝܫܳܗ̇.

¹⁹ ܘܰܩܪܳܐ ܝܰܥܩܽܘܒ ܫܡܶܗ ܕܰܐܬܪܳܐ ܗܰܘ ܒܶܝܬ ܐܺܝܠ: ܒܪܰܡ ܠܽܘܙ ܫܡܶܗ ܗܘܳܐ ܠܰܐܬܪܳܐ ܗܰܘ ܡܶܢ ܩܕܺܝܡ.

²⁰ ܘܰܢܕܰܪ ܝܰܥܩܽܘܒ ܢܶܕܪܳܐ ܘܶܐܡܰܪ: ܐܶܢ ܢܶܗܘܶܐ ܐܰ‌ܠܳܗܳܐ ܥܰܡܝ: ܘܰܢܢܰܛܪܰܢܝ ܒܽܐܘܪܚܳܐ ܗܳܕܶܐ ܕܳܐܙܶܠ ܐ̱ܢܳܐ ܒܳܗ̇: ܘܢܶܬܶܠ ܠܺܝ ܠܰܚܡܳܐ ܠܡܶܐܟܰܠ ܘܰܠܒܽܘܫܳܐ ܠܡܶܠܒܰܫ.

²¹ ܘܶܐܗܦܽܘܟ ܒܰܫܠܳܡܳܐ ܠܒܶܝܬ ܐܳܒܝ: ܢܶܗܘܶܐ ܠܺܝ ܡܳܪܝܳܐ ܐܰ‌ܠܳܗܳܐ.

²² ܘܟܺܐܦܳܐ ܗܳܕܶܐ ܕܥܶܒܕܶܬ ܩܳܝܶܡܬܳܐ: ܬܶܗܘܶܐ ܒܰܝܬܶܗ ܕܰܐ‌ܠܳܗܳܐ. ܘܟܽܠ ܕܬܶܬܶܠ ܠܺܝ ܡܥܰܣܳܪܽܘ: ܐܶܥܰܣܰܪ ܠܳܟ.