Secondo libro delle Cronache ܕܒܪܝܡܝܢ 1

¹ ܘܐܬܥܫܢ ܫܠܝܡܘܢ ܒܪܗ ܕܕܘܝܕ ܒܡܠܟܘܬܗ ܘܡܪܝܐ ܐܠܗܗ ܥܡܗ ܘܐܘܪܒܗ ܠܥܠ ܡܢ ܟܠܗܘܢ ܡ̈ܠܟܝܗ̇ ܕܐܪܥܐ

² ܘܐܡܪ ܫܠܝܡܘܢ ܠܟܠܗ ܐܝܣܪܝܠ ܠܪܘܪ̈ܒܢܐ ܕܐ̈ܠܦܐ ܘܕܡܐ̈ܘܬܐ ܘܠܕ̇ܝ̈ܢܐ ܘܠܟܠܗܘܢ ܪ̈ܘܪܒܢܐ ܪ̈ܝܫܐ ܕܐܒܗ̈ܬܐ

³ ܘܐܙܠ ܫܠܝܡܘܢ ܘܟܠ ܥܡܐ ܕܐܝܬ ܥܡܗ ܠܒܘܣܡܐ ܪܒܐ ܕܗܘܐ ܒܓܒܥܘܢ ܩܪܝܬܐ ܡܛܠ ܕܬܡܢ ܗܘܐ ܡܫܟܢܐ ܕܥܐܕܐ ܕܡܪܝܐ ܕܥܒܕ ܡܘܫܐ ܥܒ̣ܕܗ ܕܡܪܝܐ ܒܡܕܒܪܐ

⁴ ܠܘܩܒܠ ܩܒܘܬܗ ܕܡܪܝܐ ܘܐܣܩܗ̇ ܗܘܐ ܕܘܝܕ ܡܢ ܩܪܝܬܐ ܕܟܦܪ̈ܘܢܐ ܐܝܟܐ ܕܬܩܢ ܗܘܐ ܠܗ̇ ܕܘܝܕ ܕܘܟܬܐ ܡܛܠ ܕܢܩܫ ܗܘܐ ܠܗ̇ ܡܫܟܢܐ ܒܐܘܪܫܠܡ

⁵ ܘܡܕܒܚܐ ܕܢܚܫܐ ܕܥܒܕ ܗܘܐ ܒܨܠܝܐܝܠ ܒܪ ܐܘܪܝ ܒܪ ܚܘܪ ܣܝܡ ܗܘܐ ܩܕܡ ܡܫܟܢܐ ܕܡܪܝܐ ܘܬܒܥܗ ܗܘܐ ܫܠܝܡܘܢ ܘܟܘܠܗ̇ ܟܢܘܫܬܐ ܕܐܝܣܪܝܠ

⁶ ܘܐܣܩ ܗܘܐ ܬܡܢ ܫܠܝܡܘܢ ܥܠ ܡܕܒܚܐ ܕܢܚܫܐ ܕܩܕܡ ܡܪܝܐ ܕܐܝܬ ܗܘܐ ܒܡܫܟܢܐ ܕܥܐܕܐ ܘܩܪܒ ܥܠܘܗܝ ܥܠܘ̈ܬܐ ܐܠܦ

⁷ ܒܠܠܝܐ ܗ̇ܘ ܐܬܓܠܝ ܡܪܝܐ ܥܠ ܫܠܝܡܘܢ ܒܚܠܡܐ ܕܠܠܝܐ ܘܐܡܪ ܠܗ ܡܪܝܐ ܫܐܠ ܡܕܡ ܘܐܬܠ ܠܟ

⁸ ܘܐܡܪ ܫܠܝܡܘܢ ܠܡܪܝܐ ܐܢܬ ܥܒܕܬ ܥܡ ܕܘܝܕ ܐܒܝ ܚܣܕܐ ܪܒܐ ܘܐܩܝܡܬܢܝ ܠܝ ܒܡܠܟܘܬܐ ܡܢ ܒܬܪܗ

⁹ ܘܐܦ ܗܫܐ ܡܪܝܐ ܐܠܗܝ ܢܫܪ̈ܢ ܡܟܝܠ ܡܠܝ̈ܟ ܕܡܠܠܬ ܥܡ ܕܘܝܕ ܐܒܝ ܡܛܘܠ ܕܐܢܬ ܐܩܝܡܬܢܝ ܥܠ ܥܡܐ ܗܢܐ ܘܣܓܝ ܗܘ ܐܝܟ ܥܦܪܐ ܕܐܪܥܐ

¹⁰ ܘܐܦ ܗܫܐ ܚܟܡܬܐ ܘܝܕܥܬܐ ܗܒ ܠܝ ܕܐܗܘܐ ܥܐ̇ܠ ܘܢܦ̇ܩ ܒܪܫܗ ܕܥܡܐ ܗܢܐ ܡܛܠ ܕܡܢܘ ܡܫܟܚ ܠܡܕܢܗ ܠܥܡܟ ܗܢܐ ܥܡܐ

¹¹ ܘܐܡܪ ܡܪܝܐ ܠܫܠܝܡܘܢ ܚܠܦ ܕܗܘܬ ܗܕܐ ܒܪܥܝܢܟ ܘܠܐ ܫܐܠܬ ܠܟ ܢܟܣ̈ܐ ܘܐܝܩܪ̈ܐ ܘܠܐ ܢܦܫ̈ܬܐ ܕܒܥܠܕܒ̈ܒܝܟ ܘܠܐ ܫܐܠܬ ܠܟ ܝܘܡ̈ܬܐ ܣܓ̈ܝܐܐ ܕܬܚܐ ܒܗܘܢ ܘܫܐܠܬ ܠܟ ܚܟܡܬܐ ܘܝܕܥܬܐ ܕܬܕܘܢ ܠܥܡܝ ܕܐܩܝܡܬܟ ܒܡܠܟܘܬܐ ܥܠܘܗܝ

¹² ܘܐܦ ܡܕܡ ܕܠܐ ܫܐܠܬ ܝܗ̇ܒ ܐܢܐ ܠܟ ܚܟܡܬܐ ܘܝܕܥܬܐ ܘܥܘܬܪܐ ܘܢܟܣ̈ܐ ܘܐܝܩܪܐ ܕܠܐ ܗܘܐ ܐܟܘܬܟ ܒܡܠܟ̈ܐ ܟܠܗܘܢ ܕܩܡܘ ܩܕܡܝܟ ܘܒܬܪܟ ܠܐ ܢܩܘܡ ܐܟܘܬܟ

¹³ ܘܐܬܐ ܫܠܝܡܘܢ ܠܒܘܣܡܐ ܪܒܐ ܕܐܝܬ ܒܓܒܥܘܢ ܩܪܝܬܐ ܡܢ ܡܕܢܚܐ ܕܐܘܪܫܠܡ ܡܢ ܩܕܡ ܡܫܟܢܐ ܕܥܐܕܐ ܘܐܡܠܟ ܥܠ ܟܘܠܗ ܐܝܣܪܝܠ

¹⁴ ܘܟܢܫ ܫܠܝܡܘܢ ܙܘܓ̈ܐ ܘܦܪ̈ܫܐ ܘܗܘܘ ܠܗ ܐܠܦ ܘܐܪܒܥܡܐܐ ܙܘܓ̈ܝܢ ܘܬܪ̈ܥܣܪ ܐ̈ܠܦܝܢ ܦܪ̈ܫܝܢ ܘܐܩܝܡ ܐܢܘܢ ܠܙܘ̈ܓܐ ܒܩܘܪ̈ܝܐ ܘܡܢܗܘܢ ܗܘܘ ܥܡ ܡܠܟܐ ܒܐܘܪܫܠܡ

¹⁵ ܘܝܗܒ ܡܠܟܐ ܟܣܦܐ ܒܐܘܪܫܠܡ ܐܝܟ ܟܐܦ̈ܐ ܘܐܪ̈ܙܐ ܝܗܒ ܐܝܟ ܚܠܐ ܕܥܠ ܣܦܬ ܝܡܐ ܣܘܓܐܐ

¹⁶ ܘܙܒ̇ܢܝܢ ܗܘܘ ܪ̈ܟܫܐ ܠܫܠܝܡܘܢ ܡܢ ܡܨܪܝܢ ܘܡܢ ܡܕܝܢܬ ܐ̈ܦܠܝܐ ܬܓܪ̈ܘܗܝ ܕܡܠܟܐ ܘܡܢ ܡܕܝܢܬ ܐ̈ܦܠܝܐ ܒܕܡ̈ܝܐ

¹⁷ ܘܣ̇ܠܩܝܢ ܘܙ̇ܒܢܝܢ ܙܘܓܐ ܡܢ ܡܨܪܝܢ ܒܫܬܡܐܐ ܕܟܣܦܐ ܘܣܘܣܝܐ ܒܡܐܐ ܘܚܡܫܝܢ ܘܗܟܢܐ ܠܟܘܠ ܡ̈ܠܟܐ ܚ̈ܬܝܐ ܘܠܡ̈ܠܟܝ ܐܕܘܡ ܘܒܐܝܕ̈ܝܗܘܢ ܡܦܩܝܢ

¹⁸ ܘܐܡܪ ܫܠܝܡܘܢ ܠܡܒܢܐ ܒܝܬܐ ܠܫܡܗ ܕܡܪܝܐ ܘܒܝܬܐ ܕܡܠܟܘܬܗ