Genesi ܒܪܝܬܐ 43

¹ ܘܟܰܦܢܳܐ ܥܫܶܢ ܒܰܐܪܥܳܐ.

² ܘܟܰܕ ܓܰܡܰܪܘ ܠܡܶܐܟܰܠ ܥܒܽܘܪܳܐ ܕܰܐܝܬܺܝܘ ܡܶܢ ܡܶܨܪܶܝܢ: ܐܶܡܰܪ ܠܗܽܘܢ ܝܰܥܩܽܘܒ ܐܰܒܽܘܗܽܘܢ: ܚܽܘܬܘ ܡܽܘܪܘ ܠܰܢ ܩܰܠܺܝܠ ܥܒܽܘܪܳܐ.

³ ܐܶܡܰܪ ܠܶܗ ܝܺܗܽܘܕܳܐ ܡܣܰܗܳܕܽܘ ܣܰܗܶܕ ܒܰܢ ܓܰܒܪܳܐ ܘܶܐܡܰܪ: ܠܳܐ ܬܶܚܙܽܘܢ ܐܰܦܰܝ̈: ܐܶܠܳܐ ܟܰܕ ܐܰܚܽܘܟܽܘܢ ܥܰܡܟܽܘܢ.

⁴ ܕܶܐܢ ܡܫܰܕܰܪ ܐܰܢ̱ܬ ܠܰܐܚܽܘܢ ܥܰܡܰܢ: ܢܶܚܽܘܬ ܘܰܢܡܽܘܪ ܠܰܢ ܥܒܽܘܪܳܐ.

⁵ ܘܶܐܢ ܠܳܐ ܡܫܰܕܰܪ ܐܰܢ̱ܬ: ܠܳܐ ܢܳܚܬܺܝܢܰܢ: ܡܶܛܽܠ ܕܓܰܒܪܳܐ ܐܶܡܰܪ ܠܰܢ: ܕܠܳܐ ܬܶܚܙܽܘܢ ܐܰܦܰܝ̈: ܐܶܠܳܐ ܟܰܕ ܐܰܚܽܘܟܽܘܢ ܥܰܡܟܽܘܢ.

⁶ ܐܶܡܰܪ ܠܗܽܘܢ ܝܺܣܪܳܐܶܝܠ ܐܰܒܽܘܗܽܘܢ: ܠܡܳܢܳܐ ܐܰܒܐܶܫܬܽܘܢ ܠܺܝ: ܘܚܰܘܺܝܬܽܘܢ: ܠܓܰܒܪܳܐ ܐܶܢ ܐܺܝܬ ܠܟܽܘܢ ܐܰܚܳܐ.

⁷ ܘܶܐܡܰܪܘ: ܡܫܰܐܳܠܽܘ ܫܰܐܶܠ ܓܰܒܪܳܐ ܥܠܰܝܢ ܘܥܰܠ ܫܰܪܒܬܰܢ ܘܶܐܡܰܪ: ܥܕܰܟܺܝܠ ܐܰܒܽܘܟܽܘܢ ܚܰܝ: ܘܺܐܝܬ ܠܟܽܘܢ ܐܰܚܳܐ: ܘܚܰܘܺܝܢܳܝܗܝ ܡܶܛܽܠ ܡ̈ܶܠܶܐ ܗܳܠܶܝܢ: ܡܶܕܰܥ ܝܳܕܥܺܝܢ ܗܘܰܝܢ ܕܳܐܡܰܪ ܠܰܢ ܐܰܚܶܬܘ ܠܰܐܚܽܘܟܽܘܢ.

⁸ ܘܶܐܡܰܪ ܝܺܗܽܘܕܳܐ ܠܺܝܣܪܳܐܶܝܠ ܐܰܒܽܘܗܝ: ܫܰܕܰܪ ܛܰܠܝܳܐ ܥܰܡܰܢ: ܘܰܢܩܽܘܡ ܘܢܺܐܙܰܠ ܘܢܺܚܶܐ ܘܠܳܐ ܢܡܽܘܬ: ܐܳܦ ܚܢܰܢ: ܐܳܦ ܐܰܢ̱ܬ: ܐܳܦ ܝܺܩܰܪܬܰܢ.

⁹ ܐܶܢܳܐ ܥܳܪܶܒ ܐ̱ܢܳܐ ܒܶܗ: ܡܶܢ ܐܺܝ̈ܕܰܝ ܬܒܰܥܳܝܗܝ: ܐܶܢ ܠܳܐ ܐܰܝܬܶܝܘܗܝ ܠܳܟ: ܘܰܐܩܺܝܡܺܝܘܗܝ ܩܕܳܡܰܝܟ: ܐܶܚܛܶܐ ܠܳܐܒܝ ܟܽܠܗܽܘܢ ܝܰܘ̈ܡܳܬܳܐ.

¹⁰ ܘܳܐܦ ܐܶܠܽܘܠܳܐ ܐܶܫܬܰܘܚܰܪܢ: ܟܒܰܪ ܕܶܝܢ ܗܦܰܟܢ ܕܬܰܪܬܶܝܢ ܙܰܒܢܺܝ̈ܢ.

¹¹ ܘܶܐܡܰܪ ܠܗܽܘܢ ܝܺܣܪܳܐܶܝܠ ܐܰܒܽܘܗܽܘܢ: ܐܶܢ ܗܳܟܰܢܳܐ ܗܽܘ: ܗܳܕܶܐ ܥܒܶܕܘ: ܣܰܒܘ ܡܶܢ ܛܽܘܒܳܗ̇ ܕܰܐܪܥܳܐ ܒܡܳܐܢܰܝ̈ܟܽܘܢ: ܘܰܐܚܶܬܘ ܠܓܰܒܪܳܐ ܩܽܘܪܒܳܢܳܐ: ܩܰܠܺܝܠ ܨܰܪܘܳܐ: ܘܩܰܠܺܝܠ ܕܶܒܫܳܐ: ܘܰܖ̈ܗܶܛܢܶܐ: ܘܠܳܛܡ̈ܶܐ: ܘܒܶܛܡ̈ܶܐ: ܘܫܶܓܖ̈ܶܐ.

¹² ܘܟܶܣܦܳܐ ܐܰܥܦܳܐ ܣܰܒܘ ܒܺܐܝ̈ܕܰܝܟܽܘܢ: ܘܟܶܣܦܳܐ ܕܰܗܦܰܟ ܒܦܽܘܡ ܛܰܥܢܰܝ̈ܟܽܘܢ: ܐܰܗܦܶܟܘ ܒܺܐܝ̈ܕܰܝܟܽܘܢ: ܕܰܠܡܳܐ ܛܽܘܥܝܰܝ ܗܺܝ.

¹³ ܘܠܰܐܚܽܘܟܽܘܢ ܕܒܰܪܘ: ܘܩܽܘܡܘ ܘܰܗܦܽܘܟܘ ܠܘܳܬ ܓܰܒܪܳܐ.

¹⁴ ܘܺܐܝܠܫܰܕܰܝ ܢܶܬܶܠܟܽܘܢ ܠܖ̈ܰܚܡܶܐ ܩܕܳܡ ܓܰܒܪܳܐ: ܘܰܢܫܰܕܰܪ ܥܰܡܟܽܘܢ ܠܰܐܚܽܘܟܽܘܢ ܐ̱ܚܪܺܢܳܐ ܘܰܠܒܶܢܝܳܡܶܝܢ: ܘܶܐܢܳܐ ܐܰܝܟ ܕܓܰܙܺܝܬ ܓܰܙܺܝܬ.

¹⁵ ܘܰܢܣܰܒܘ ܓܰܒܖ̈ܶܐ ܩܽܘܪܒܳܢܳܐ ܗܳܢܳܐ: ܘܰܐܥܦܳܐ ܕܟܶܣܦܳܐ ܢܣܰܒܘ ܒܺܐܝ̈ܕܰܝܗܽܘܢ: ܘܰܕܒܰܪܘ ܥܰܡܗܽܘܢ ܠܒܶܢܝܳܡܶܝܢ: ܘܩܳܡܘ ܘܰܢܚܶܬܘ ܠܡܶܨܪܶܝܢ: ܘܩܳܡܘ ܩܕܳܡ ܝܰܘܣܶܦ.

¹⁶ ܘܰܚܙܳܐ ܝܰܘܣܶܦ ܥܰܡܗܽܘܢ ܠܒܶܢܝܳܡܶܝܢ: ܘܶܐܡܰܪ ܠܪܰܒ ܒܰܝܬܶܗ: ܐܰܥܶܠ ܓܰܒܖ̈ܶܐ ܠܒܰܝܬܳܐ: ܘܟܽܘܣ ܢܶܟܣܬܳܐ ܘܬܰܩܶܢ: ܡܶܛܽܠ ܕܥܰܡܝ ܐܳܟܠܺܝܢ ܓܰܒܖ̈ܶܐ ܒܛܰܗܪܳܐ.

¹⁷ ܘܰܥܒܰܕ ܥܰܒܕܳܐ ܐܰܝܟ ܕܶܐܡܰܪ ܝܰܘܣܶܦ: ܘܰܐܥܶܠ ܐܶܢܽܘܢ ܠܓܰܒܖ̈ܶܐ ܠܒܶܝܬ ܝܰܘܣܶܦ.

¹⁸ ܘܰܕܚܶܠܘ ܟܰܕ ܡܰܥܠܺܝܢ ܠܗܽܘܢ ܠܒܶܝܬ ܝܰܘܣܶܦ: ܘܶܐܡܰܪܘ: ܡܶܛܽܠ ܟܶܣܦܳܐ ܕܰܗܦܰܟ ܒܛܰܥ̈ܢܰܝܢ ܒܩܰܕܡܳܝܬܳܐ ܡܰܥܠܺܝܢ ܠܰܢ: ܠܡܶܬܪܰܘܪܳܒܽܘ ܥܠܰܝܢ: ܘܰܠܡܶܬܢܟܳܠܽܘ ܥܠܰܝܢ: ܕܢܶܥܒܕܽܘܢܳܢ ܥܰܒ̈ܕܶܐ: ܘܰܠܚܶܡܖ̈ܰܢ.

¹⁹ ܘܰܩܪܶܒܘ ܠܘܳܬ ܓܰܒܪܳܐ ܪܰܒ ܒܰܝܬܶܗ ܕܝܰܘܣܶܦ: ܘܡܰܠܶܠܘ ܥܰܡܶܗ ܒܬܰܪܥܳܐ ܕܒܰܝܬܳܐ.

²⁰ ܘܶܐܡܰܪܘ ܠܶܗ: ܒܳܥܶܝܢܰܢ ܡܳܪܰܢ: ܡܶܚܰܬ ܢܚܶܬܢ ܒܩܰܕܡܳܝܬܳܐ ܠܰܡܡܳܪ ܥܒܽܘܪܳܐ.

²¹ ܘܟܰܕ ܐܶܙܰܠܢ ܠܒܶܝܬ ܒܰܘܬܳܐ: ܦܬܰܚܢ ܛܰܥܢܰܝ̈ܢ: ܘܗܳܐ ܟܶܣܦܶܗ ܕܓܰܒܪܳܐ ܒܦܽܘܡ ܛܰܥܢܶܗ: ܟܶܣܦܰܢ ܒܡܰܬܩܳܠܶܗ ܐܰܗܦܶܟܢܳܝܗܝ ܒܺܐܝܕܰܢ.

²² ܘܟܶܣܦܳܐ ܐ̱ܚܪܺܢܳܐ ܐܰܚܶܬܢ ܒܺܐܝܕܰܢ ܠܰܡܡܳܪ ܥܒܽܘܪܳܐ: ܘܠܳܐ ܝܺܕܰܥܢ ܡܰܢܽܘ ܣܳܡ ܟܶܣܦܰܢ ܒܦܽܘܡ ܛܰܥܢܰܝ̈ܢ.

²³ ܐܳܡܰܪ ܠܗܽܘܢ: ܫܠܳܡ ܠܟܽܘܢ: ܠܳܐ ܬܶܕܚܠܽܘܢ: ܐܰܠܳܗܟܽܘܢ ܐܰ‌ܠܳܗܳܐ ܕܰܐܒܽܘܟܽܘܢ ܣܳܡ ܠܟܽܘܢ ܣܺܝܡܬܳܐ ܒܛܰܥܢܰܝ̈ܟܽܘܢ: ܟܶܣܦܟܽܘܢ ܥ̣ܰܠ ܠܘܳܬܝ: ܘܰܐܦܶܩ ܠܘܳܬܗܽܘܢ ܠܫܶܡܥܽܘܢ.

²⁴ ܘܰܐܥܶܠ ܥܰܒܕܳܐ ܓܰܒܖ̈ܶܐ ܠܒܶܝܬ ܝܰܘܣܶܦ: ܘܝܰܗܒ ܡܰܝ̈ܳܐ ܘܰܐܫܺܝܓܘ ܖ̈ܶܓܠܰܝܗܽܘܢ: ܘܰܐܪܡܺܝ ܟܶܣܬܳܐ ܠܰܒܥܺܝܪܗܽܘܢ.

²⁵ ܘܬܰܩܶܢܘ ܓܰܒܖ̈ܶܐ ܩܽܘܪܒܳܢܳܐ: ܟܰܕ ܥܳܐܶܠ ܝܰܘܣܶܦ ܒܛܰܗܪܳܐ: ܡܶܛܽܠ ܕܰܫܡܰܥ ܕܬܰܡܳܢ ܐܳܟܠܺܝܢ ܠܰܚܡܳܐ.

²⁶ ܘܥ̣ܰܠ ܝܰܘܣܶܦ ܠܒܰܝܬܳܐ: ܘܰܐܝܬܺܝܘ ܠܶܗ ܩܽܘܪܒܳܢܳܐ ܕܒܺܐܝ̈ܕܰܝܗܽܘܢ ܠܒܰܝܬܳܐ: ܘܰܣܓܶܕܘ ܠܶܗ ܥܰܠ ܐܰܪܥܳܐ.

²⁷ ܘܫܰܐܶܠ ܒܰܫܠܡܗܽܘܢ ܘܶܐܡܰܪ ܠܗܽܘܢ: ܫܠܳܡ ܗܽܘ ܐܰܒܽܘܟܽܘܢ ܣܳܒܳܐ ܕܶܐܡܰܪܬܽܘܢ ܠܺܝ : ܥܕܰܟܺܝܠ ܚܰܝ ܗܽܘ.

²⁸ ܘܶܐܡܰܪܘ ܫܠܳܡ ܗܽܘ ܥܰܒܕܳܟ ܐܰܒܽܘܢ: ܘܶܐܡܰܪܘ ܠܶܗ ܥܕܰܟܺܝܠ ܚܰܝ ܗܽܘ: ܘܰܩܥܶܕܘ ܘܰܣܓܶܕܘ.

²⁹ ܘܰܐܪܺܝܡ ܥܰܝ̈ܢܰܘܗܝ ܘܰܚܙܳܐ ܠܒܶܢܝܳܡܶܝܢ ܐܰܚܽܘܗܝ ܒܰܪ ܐܶܡܶܗ: ܘܶܐܡܰܪ ܠܗܽܘܢ: ܗܳܢܰܘ ܐܰܚܽܘܟܽܘܢ ܙܥܽܘܪܳܐ: ܕܶܐܡܰܪܬܽܘܢ ܠܺܝ: ܘܶܐܡܰܪ: ܐܰ‌ܠܳܗܳܐ ܢܪܰܚܶܡ ܥܠܰܝܟ ܒܶܪܝ.

³⁰ ܘܶܐܣܬܰܪܗܰܒ ܝܰܘܣܶܦ ܡܶܛܽܠ ܕܓܳܠܘ ܖ̈ܰܚܡܰܘܗܝ ܥܰܠ ܐܰܚܽܘܗܝ: ܘܰܒܥܳܐ ܠܡܶܒܟܳܐ: ܘܥܰܠ ܠܬܰܘܳܢܳܐ ܘܰܒܟܳܐ ܬܰܡܳܢ.

³¹ ܘܰܐܫܺܝܓ ܐܰܦܰܘ̈ܗܝ: ܘܰܢܦܰܩ ܘܚܰܡܣܶܢ: ܘܶܐܡܰܪ ܕܰܢܣܺܝܡܽܘܢ ܠܰܚܡܳܐ.

³² ܘܣܳܡܘ ܠܶܗ ܒܰܠܚܽܘܕܰܘܗܝ: ܘܰܠܗܽܘܢ ܒܰܠܚܽܘܕܰܝܗܽܘܢ: ܘܰܠܡܶܨܖ̈ܳܝܶܐ ܕܳܐܟܠܺܝܢ ܥܰܡܶܗ ܒܰܠܚܽܘܕܰܝܗܽܘܢ: ܡܶܛܽܠ ܕܠܳܐ ܡܶܫܟܚܺܝܢ ܡܶܨܖ̈ܳܝܶܐ ܠܡܶܐܟܰܠ ܠܰܚܡܳܐ ܥܰܡ ܥܶܒܖ̈ܳܝܶܐ: ܡܶܛܽܠ ܕܛܰܡܽܐܘܬܳܐ ܗ̱ܝ ܠܡܶܨܖ̈ܳܝܶܐ.

³³ ܘܶܐܣܬܡܶܟܘ ܩܕܳܡܰܘܗܝ: ܩܰܫܺܝܫܳܐ ܐܰܝܟ ܩܰܫܺܝܫܽܘܬܶܗ: ܘܰܙܥܽܘܪܳܐ ܐܰܝܟ ܙܥܽܘܪܽܘܬܶܗ: ܘܰܬܡܰܗܘ ܓܰܒܖ̈ܶܐ ܓܒܰܪ ܒܚܰܒܪܶܗ.

³⁴ ܘܰܫܩܰܠܘ ܠܗܽܘܢ ܫܩ̈ܳܠܶܐ ܡܶܢ ܩܕܳܡܰܘܗܝ: ܘܰܣܓܺܝ ܫܩܳܠܶܗ ܕܒܶܢܝܳܡܶܝܢ ܡܶܢ ܫܩ̈ܳܠܶܐ ܕܟܽܠܗܽܘܢ: ܚܰܡܶܫ ܡܢܰܘ̈ܳܢ: ܘܶܐܫܬܺܝܘ ܘܰܪܘܺܝܘ ܥܰܡܶܗ.