Genesi ܒܪܝܬܐ 2

¹ ܘܰܫܠܶܡܘ ܫܡܰܝܳܐ ܘܰܐܪܥܳܐ: ܘܟܽܠܶܗ ܚܰܝܠܗܽܘܢ.

² ܘܫܰܠܶܡ ܐܰ‌ܠܳܗܳܐ ܒܝܰܘܡܳܐ ܫܬܺܝܬܳܝܳܐ ܥܒܳܕܰܘ̈ܗܝ ܕܰܥܒܰܕ: ܘܶܐܬܬܢܺܝܚ ܒܝܰܘܡܳܐ ܫܒܺܝܥܳܝܳܐ ܡܶܢ ܟܽܠܗܽܘܢ ܥܒܳܕܰܘ̈ܗܝ ܕܰܥܒܰܕ.

³ ܘܒܰܪܶܟ ܐܰ‌ܠܳܗܳܐ ܠܝܰܘܡܳܐ ܫܒܺܝܥܳܝܳܐ: ܘܩܰܕܫܶܗ: ܡܶܛܽܠ ܕܒܶܗ ܐܶܬܬܢܺܝܚ ܡܶܢ ܟܽܠܗܽܘܢ ܥܒܳܕܰܘ̈ܗܝ ܕܰܒܪܳܐ ܐܰ‌ܠܳܗܳܐ ܠܡܶܥܒܰܕ.

⁴ ܗܳܠܶܝܢ ܬܰܘ̈ܠܕܳܬܳܐ ܕܰܫܡܰܝܳܐ ܘܕܰܐܪܥܳܐ ܟܰܕ ܐܶܬܒܪܺܝܘ: ܒܝܰܘܡܳܐ ܕܰܥ̣ܒܰܕ ܡܳܪܝܳܐ ܐܰ‌ܠܳܗܳܐ ܫܡܰܝܳܐ ܘܰܐܪܥܳܐ.

⁵ ܘܟܽܠܗܽܘܢ ܐܺܝ̈ܠܳܢܶܐ ܕܚܰܩܠܳܐ ܥܕܰܟܺܝܠ ܠܳܐ ܗܘܰܘ ܒܰܐܪܥܳܐ: ܘܟܽܠܶܗ ܥܶܣܒܳܐ ܕܚܰܩܠܳܐ ܥܕܰܟܺܝܠ ܠܳܐ ܝܺܥܳܐ: ܡܶܛܽܠ ܕܠܳܐ ܐܰܚܶܬ ܡܳܪܝܳܐ ܐܰ‌ܠܳܗܳܐ ܡܶܛܪܳܐ ܥܰܠ ܐܰܦܰܝ̈ ܐܰܪܥܳܐ: ܘܳܐܕܳܡ ܠܰܝܬ ܠܡܶܦܠܰܚ ܒܰܐܪܥܳܐ.

⁶ ܘܡܰܒܽܘܥܳܐ ܣܳܠܶܩ ܗܘܳܐ ܡܶܢ ܐܰܪܥܳܐ: ܘܡܰܫܩܶܐ ܗܘܳܐ ܠܟܽܠ ܐܰܦܰܝ̈ ܐܰܪܥܳܐ.

⁷ ܘܰܓܒܰܠ ܡܳܪܝܳܐ ܐܰ‌ܠܳܗܳܐ ܠܳܐܕܳܡ ܥܰܦܪܳܐ ܡܶܢ ܐܳܕܰܡܬܳܐ: ܘܰܢ̣ܦܰܚ ܒܰܐܦܰܘ̈ܗܝ ܢܫܰܡܬܳܐ ܕܚܰܝ̈ܶܐ: ܘܰܗܘܳܐ ܐܳܕܳܡ ܠܰܢܦܶܫ ܚܰܝܳܐ.

⁸ ܘܰܢ̣ܨܰܒ ܡܳܪܝܳܐ ܐܰ‌ܠܳܗܳܐ ܦܰܪܕܰܝܣܳܐ ܒܰܥܕܶܢ ܡܶܢ ܩܕܺܝܡ: ܘܣܳܡ ܬܰܡܳܢ ܠܳܐܕܳܡ ܕܰܓܒܰܠ.

⁹ ܘܰܐܘܥܺܝ ܡܳܪܝܳܐ ܐܰ‌ܠܳܗܳܐ ܡܶܢ ܐܰܪܥܳܐ ܟܽܠ ܐܺܝܠܳܢ ܕܰܪܓܺܝܓ ܠܡܶܚܙܳܐ: ܘܫܰܦܺܝܪ ܠܡܶܐܟܰܠ: ܘܺܐܝܠܳܢܳܐ ܕܚܰܝ̈ܶܐ ܒܰܡܨܰܥܬܶܗ ܕܦܰܪܕܰܝܣܳܐ: ܘܺܐܝܠܳܢܳܐ ܕܺܝܕܰܥܬܳܐ ܕܛܳܒܬܳܐ ܘܰܕܒܺܝܫܬܳܐ.

¹⁰ ܘܢܰܗܪܳܐ ܢܳܦܶܩ ܗܘܳܐ ܡܶܢ ܥܕܶܢ ܠܡܰܫܩܳܝܽܘܬܶܗ ܠܦܰܪܕܰܝܣܳܐ. ܘܡܶܢ ܬܰܡܳܢ ܦܳܪܶܫ ܘܰܗܘܳܐ ܠܰܐܪܒܥܳܐ ܖ̈ܺܫܺܝܢ.

¹¹ ܫܡܶܗ ܕܚܰܕ ܦܺܝܫܽܘܢ: ܗܰܘ ܕܚܳܕܰܪ ܠܟܽܠܳܗ̇ ܐܰܪܥܳܐ ܕܰܚܘܺܝܠܳܐ: ܕܬܰܡܳܢ ܕܰܗܒܳܐ.

¹² ܘܕܰܗܒܳܗ̇ ܕܰܐܪܥܳܐ ܗܳܝ ܛܳܒ. ܬܰܡܳܢ ܒܶܖ̈ܽܘܠܶܐ ܘܟ̈ܺܐܦܶܐ ܕܒܶܖ̈ܽܘܠܶܐ.

¹³ ܘܰܫܡܶܗ ܕܢܰܗܪܳܐ ܬܶܢܝܳܢܳܐ ܓܺܝܚܽܘܢ: ܗܰܘ ܕܚܳܕܰܪ ܠܟܽܠܳܗ̇ ܐܰܪܥܳܐ ܕܟܽܘܫ.

¹⁴ ܘܰܫܡܶܗ ܕܢܰܗܪܳܐ ܕܰܬܠܳܬܳܐ ܕܶܩܠܰܬ: ܗܰܘ ܕܳܐܙܶܠ ܠܽܘܩܒܰܠ ܐܳܬܽܘܪ. ܘܢܰܗܪܳܐ ܕܰܐܪܒܥܳܐ ܗܽܘ ܦܪܳܬ.

¹⁵ ܘܰܕܒܰܪ ܡܳܪܝܳܐ ܐܰ‌ܠܳܗܳܐ ܠܳܐܕܳܡ: ܘܫܰܒܩܶܗ ܒܦܰܪܕܰܝܣܳܐ ܕܰܥܕܶܢ: ܕܢܶܦܠܚܺܝܘܗܝ ܘܢܶܛܪܺܝܘܗܝ.

¹⁶ ܘܰܦܩܶܕ ܡܳܪܝܳܐ ܐܰ‌ܠܳܗܳܐ ܠܳܐܕܳܡ ܘܶܐܡܰܪ ܠܶܗ: ܡܶܢ ܟܽܠܗܽܘܢ ܐܺܝ̈ܠܳܢܶܐ ܕܰܒܦܰܪܕܰܝܣܳܐ ܡܶܐܟܰܠ ܬܶܐܟܽܘܠ.

¹⁷ ܘܡܶܢ ܐܺܝܠܳܢܳܐ ܕܺܝܕܰܥܬܳܐ ܕܛܳܒܬܳܐ ܘܰܕܒܺܝܫܬܳܐ ܠܳܐ ܬܶܐܟܽܘܠ ܡܶܢܶܗ. ܡܶܛܽܠ ܕܰܒܝܰܘܡܳܐ ܕܬܶܐܟܽܘܠ ܡܶܢܶܗ: ܡܰܘܬܳܐ ܬܡܽܘܬ.

¹⁸ ܘܶܐܡܰܪ ܡܳܪܝܳܐ ܐܰ‌ܠܳܗܳܐ: ܠܳܐ ܫܰܦܺܝܪ ܕܢܶܗܘܶܐ ܐܳܕܳܡ ܒܰܠܚܽܘܕܰܘܗܝ: ܐܶܥܒܶܕ ܠܶܗ ܡܥܰܕܪܳܢܳܐ ܐܰܟܘܳܬܶܗ.

¹⁹ ܘܰܓܒܰܠ ܡܳܪܝܳܐ ܐܰ‌ܠܳܗܳܐ ܡܶܢ ܐܰܪܥܳܐ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ: ܘܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ: ܘܰܐܝܬܺܝ ܐܶܢܽܘܢ ܠܘܳܬ ܐܳܕܳܡ: ܕܢܶܚܙܶܐ ܡܳܢܳܐ ܩܳܪܶܐ ܠܗܽܘܢ. ܘܟܽܠ ܕܰܩܪܳܐ ܠܗܽܘܢ ܐܳܕܳܡ ܢܰܦܫܳܐ ܚܰܝܬܳܐ: ܗܰܘ ܗ̱ܘ̣ ܫܡܶܗ.

²⁰ ܘܰܩܪܳܐ ܐܳܕܳܡ ܫܡܳܗ̈ܶܐ ܠܟܽܠܳܗ̇ ܒܥܺܝܪܳܐ: ܘܰܠܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ: ܘܰܠܟܽܠܳܗ̇ ܚܰܝܽܘܬܳܐ ܕܕܰܒܪܳܐ: ܘܠܳܐܕܳܡ ܠܳܐ ܐܶܫܬܰܟܚ ܠܶܗ ܡܥܰܕܪܳܢܳܐ ܐܰܟܘܳܬܶܗ.

²¹ ܘܰܐܪܡܺܝ ܡܳܪܝܳܐ ܐܰ‌ܠܳܗܳܐ ܫܶܠܝܳܐ ܥܰܠ ܐܳܕܳܡ ܘܰܕܡܶܟ: ܘܰܢܣܰܒ ܚܕܳܐ ܡܶܢ ܐܶܠܥܰܘ̈ܗܝ: ܘܰܐܘܚܶܕ ܒܶܣܪܳܐ ܚܠܳܦܶܝܗ̇.

²² ܘܬܰܩܶܢ ܡܳܪܝܳܐ ܐܰ‌ܠܳܗܳܐ ܐܶܠܥܳܐ ܕܰܢ̣ܣܰܒ ܡܶܢ ܐܳܕܳܡ ܠܰܐܢ̱ܬܬܳܐ: ܘܰܐܝܬܝܳܗ̇ ܠܳܐܕܳܡ.

²³ ܘܶܐܡܰܪ ܐܳܕܳܡ: ܗܳܢܳܐ ܙܰܒܢܳܐ ܓܰܪܡܳܐ ܡܶܢ ܓܰܖ̈ܡܰܝ: ܘܒܶܣܪܳܐ ܡܶܢ ܒܶܣܪܝ: ܗܳܕܶܐ ܬܶܬܩܪܶܐ ܐܰܢ̱ܬܬܳܐ: ܡܶܛܽܠ ܕܡܶܢ ܓܰܒܪܳܐ ܢܣܺܝܒܳܐ.

²⁴ ܡܶܛܽܠ ܗܳܢܳܐ ܢܶܫܒܽܘܩ ܓܰܒܪܳܐ ܠܰܐܒܽܘܗܝ ܘܠܶܐܡܶܗ: ܘܢܶܩܰܦ ܠܰܐܢ̱ܬܬܶܗ. ܘܢܶܗܘܽܘܢ ܬܖ̈ܰܝܗܽܘܢ ܚܰܕ ܒܣܰܪ.

²⁵ ܘܰܗܘܰܘ ܬܖ̈ܰܝܗܽܘܢ ܥܰܖ̈ܛܶܠܳܝܺܝܢ: ܐܳܕܳܡ ܘܰܐܢ̱ܬܬܶܗ ܘܠܳܐ ܒܳܗܬܺܝܢ.