Numeri 2

¹Locutusque est Dominus ad Moysen et Aaron dicens:²“ Singuli per turmas, signa atque vexilla et domos patrum suorum castrametabuntur filii Israel per gyrum tabernaculi conventus.
³Ad orientem Iudas figet tentoria per turmas exercitus sui, fuitque princeps filiorum eius Naasson filius Aminadab;⁴et eius summa pugnantium septuaginta quattuor milia sescenti.⁵Iuxta eum castrametabuntur de tribu Issachar, quorum princeps fuit Nathanael filius Suar;⁶et omnis numerus pugnatorum eius quinquaginta quattuor milia quadringenti.⁷In tribu Zabulon princeps fuit Eliab filius Helon;⁸et numerus exercitus pugnatorum eius quinquaginta septem milia quadringenti.⁹Universi, qui in castris Iudae annumerati sunt, fuerunt centum octoginta sex milia quadringenti, et per turmas suas primi egredientur.
¹⁰Vexillum castrorum Ruben ad meridianam plagam erit, secundum exercitus eorum; princeps Elisur filius Sedeur;¹¹et cunctus exercitus pugnatorum eius, qui numerati sunt, quadraginta sex milia quingenti.¹²Iuxta eum castrametabuntur de tribu Simeon, quorum princeps fuit Salamiel filius Surisaddai;¹³et cunctus exercitus pugnatorum eius, qui numerati sunt, quinquaginta novem milia trecenti.¹⁴In tribu Gad princeps fuit Eliasaph filius Deuel;¹⁵et cunctus exercitus pugnatorum eius, qui numerati sunt, quadraginta quinque milia sescenti quinquaginta.¹⁶Omnes, qui recensiti sunt in castris Ruben, centum quinquaginta milia et mille quadringenti quinquaginta, per turmas suas in secundo loco proficiscentur.
¹⁷Levabitur deinde tabernaculum conventus, castra Levitarum in medio castrorum, quomodo erigetur ita et deponetur; singuli per loca et vexilla sua proficiscentur.
¹⁸Ad occidentalem plagam erit vexillum castrorum filiorum Ephraim per turmas suas, quorum princeps fuit Elisama filius Ammiud;¹⁹cunctus exercitus pugnatorum eius, qui numerati sunt, quadraginta milia quingenti.²⁰Et cum eis tribus filiorum Manasse, quorum princeps fuit Gamaliel filius Phadassur;²¹cunctusque exercitus pugnatorum eius, qui numerati sunt, triginta duo milia ducenti.²²In tribu filiorum Beniamin princeps fuit Abidan filius Gedeonis;²³et cunctus exercitus pugnatorum eius, qui recensiti sunt, triginta quinque milia quadringenti.²⁴Omnes, qui numerati sunt in castris Ephraim, centum octo milia centum, per turmas suas tertii proficiscentur.
²⁵Ad aquilonis partem stabit vexillum castrorum filiorum Dan secundum exercitus suos, quorum princeps fuit Ahiezer filius Ammisaddai;²⁶cunctus exercitus pugnatorum eius, qui numerati sunt, sexaginta duo milia septingenti.²⁷Iuxta eum figet tentoria tribus Aser, quorum princeps fuit Phegiel filius Ochran;²⁸cunctus exercitus pugnatorum eius, qui numerati sunt, quadraginta milia et mille quingenti.²⁹De tribu filiorum Nephthali princeps fuit Ahira filius Enan;³⁰cunctus exercitus pugnatorum eius quinquaginta tria milia quadringenti.³¹Omnes, qui numerati sunt in castris Dan, fuerunt centum quinquaginta septem milia sescenti, et novissimi proficiscentur secundum vexilla sua ”.
³²Hic numerus filiorum Israel, per domos patrum suorum omnes recensiti secundum exercitus suos, sescenta tria milia quingenti quinquaginta.³³Levitae autem non sunt numerati inter filios Israel; sic enim praeceperat Dominus Moysi.
³⁴Feceruntque filii Israel iuxta omnia, quae mandaverat Dominus: castrametati sunt per vexilla sua et profecti per tribus ad domos patrum suorum.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati