Lo Santo Vangelio seconno Matteo 7

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹NON ghiudecate, pe nnon essere judecate.²Pecchè comme vuje avarrite judecato, sarrite judecate: ecco cchella mesura comme vuje mmesurate, ve mmesurarranno.³Pecchè vide la pagliuca dinto a ll'uocchio de lo frate tujo: e lo travo dint a ll'uocchio tujo non lo vide?⁴E ccomme dice a lo frate tujo: Lassamete caccià sta pagliuca da ll'uocchio? e vvide, ca no travo sta dinto a ll'uocchio tujo?⁵Fauzo, caccia primma lo travo da ll'uocchio tujo, e ttanno po vedarraje de caccià la pagliuca da ll' uocchio de lo frate tujo.⁶Non date a li cane le ccose sante: e nnon ghiettate le pperle voste nnante a li puorce, azzò non le scamazzano co li piede, e nnon se revotano a sbranarve.⁷Addimmannate, e a vvuje se darrà: cercate, ca trovarrite: tozzoliate, e a vvuje s'araparrà la porta.⁸Pecchè ognuno, ch'addimmanna, ave: e chi cerca, trova: e ss'arape la porta a cchi tozzoleja.⁹Chi nfra de vuje, si lo figlio sujo l'addimmanna loppane, le proje na preta?¹⁰O si addimmanna no pesce, le proje no serpe?¹¹Donca si vuje, che ssite cattive, sapite dà le bbone cose, ch'avite avute, a li figlie vuoste: quanto cchiù lo Patre vuosto, che sta ncielo, darrà lo bbene a cchille, che nce lo ccercano¹²Donca tutto chello, che vvuje volite, ca ll'uom mene ve facessero, e vvuje facitencello a lloro. Pecchè lloco sta la legge, e li profete.¹³Trasite pe la porta stretta: pecchè è llaria la porta, e ggranne la strata, che pporta a rrompere la noce de lo cuollo, e assaje so cchille, che nce traseno.¹⁴Quant'è stretta la porta, e ppeccerella la strata, che pporta a la vita: e ppoche so cchille, che la trovano!¹⁵Guardateve da li fauze profete, che ve veneno attuorno vestute comme a ppecorelle, e dda dinto so ttanta lupe affamate.¹⁶Da li frutte lloro li canuscite. E cche ! da le spine se coglie ll'uva, o le ffiche da li trivole?¹⁷Accossì ogne arbero buono fa buone frutte: e ll'arbero cattivo fa frutte cattive.¹⁸N'arbero buono non pò fà frutte cattive: e nn'ar bero cattivo non pò fà frutte buone.¹⁹Ogne arbero, che non fa buono frutto, se taglia, e sse jetta dinto a lo ffuoco.²⁰Donca da li frutte lloro li canuscite.²¹Non ttutte chille, che diceno, Signore, Signo, trasarranno dinto a lo regno de lo cielo: ma chi fa la volontà de lo Patre mio, che sta ncielo, chisto trasarrà dinto a lo regno de lo cielo.²²Quante me diciarranno, quanno sarrà chillo juorno: Signore, Signò, non simmo nuje, ch'avimmo nnevenato chello, ch'aveva a essere, a nnomme tujo, e ch'avimmo cacciate li demmuonie a nnomme tujo, e ch'avimmo fatte a nnomme tujo miracole assaje?²³E ttanno lle responnarraggio: Ca non v'aggio maje canosciute: jatevenne lontane da me, tutte vuje, che ffacite lo peccato.²⁴Ognuno, che ssente cheste pparole meje, e lle mette mpratteca, s'arrassomeglia a ll'ommo deritto, che ffravecaje la casa soja ncoppa a la preta,²⁵Evvenette a ddelluvià, e ascettero li sciumme, e sciosciajeno li viente, e ddettero nfaccia a cchella casa, e nnon cadette: pecchè steva chiantata ncoppa a la preta.²⁶E ognuno, che ssente cheste pparole meje, e nnon lle mette mpratteca, s'arrassomeglia a chillo sciaddeo, che ffravecaje la casa soja ncoppa a ll'arena:²⁷E vvenette a cchiovere, e ascettero li sciumme, e sciosciajeno li viente, e ddettero nfaccia a cchella casa, e essa cadette, e ffuje grossa la caduta soja.²⁸E ssuccedette, ca quanno Giesù aveva fenuto cheste pparole, le ggente restavano alloccute de la dottrina soja.²⁹Pecchè isso li mparava comme a cchi nn'ave l'autoretà, e nnon già comme a li Scribbe lloro, e a li Fariseje.