Lo Santo Vangelio seconno Matteo 23

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹TANNO Giesù parlaje a la folla, e a li discipole suoje,²Dicenno: Ncoppa a lo purpeto de Mosè se nce so assettate li Scribbe, e li Fariseje.³Onne tutto chello, che starranno pe ddirve, mettitelo mpratteca e ffacitelo: ma non facite affatto chello, che fanno lloro: lloro so bbuone a cchiacchiarià, ma niente metteno mpratteca.⁴Pocca auneno pise gruosse assaje, che nnon se ponno portà, e nne carrecano le spalle de ll' uommene: ma lloro non ce metteno manco no dito li smovere.⁵Po fanno tutte ll' opere lloro p' essere vedute da ll'uommene: pecchè schiejeno quanto cchiù pponno le ddevozziune, e allongano le ffrange.⁶E vvonno li primme poste a le ccene, e li primme scanne dinto a le ssinagoche,⁷E li vasamane nchiazza, e essere chiammate maste da la gente.⁸Vuje po non gghiate trovanno d'essere chiammate maste. Pocca uno è lo Masto vuosto, e ttutte vuje aute site frate.⁹E nnon chiammate patre vuosto ạ nnisciuno ncoppa a sta terra: pocca uno è lo Patre vuosto, che sta ncielo.¹⁰Nė ve facite chiammà maste: pecchè lo sulo Masto vuosto è Ccristo.¹¹Chi è cchiù a mmaggiore nfra de vuje, sarrà servitore vuosto.¹²Ca chi vo ji ngrannezza, sarrà abbasciato: e chi va terra terra, sarrà aizato a le stelle.¹³Ma guaje a vvuje, o Scribbe e Ffariseje santuocchie: ca nzerrate nfaccia a ll'uommene lo regno de lo cielo. Pecchè non ce trasite vuje, e nnon date canzo de trasirce a cchille, che stanno pe ttrasì.¹⁴Guaje a vvuje Scribbe e Ffariseje bizzuoche: che ve magnate le ccase de le vvedole, recetanno orazziune longhe longhe: pe cchesto avarrite na pena cchiù ggrossa.¹⁵Guaje a vvuje, Scribbe e Ffariseje trellegne: che ccorrite lo mare e la terrape ffarve no sequace: e ffatto che ss'è, ll ' arreducite figlio de lo nfierno doje vote cchiù dde vuje.¹⁶Guaje a vvuje, capepuopole cecate, che ddicite: Chiunche jura pe lo tempio, è ccosa de nchiasto: ma chi jura pe ll'oro de lo tempio, tanno è ttenuto.¹⁷Smocche, e ccecate: Pocca qual è cchiù ccosa a mmaggiore, ll'oro, o la cchiesia, che ssantifeca ll' oro?¹⁸E cchi avesse jurato pe ll'autare, non è nniente: ma chi ha jurato pe lo rialo, che sta ncoppa a ll' autare, chillo è ttenuto.¹⁹Cecate: Qual è cchiù ccosa a mmaggiore, lo rialo, o ll'autare, che ssantifeca lo rialo?²⁰Addonca chi jura pe ll'autare, jura pe isso, e ppe ttutte le ccose, che nce stanno ncoppa.²¹E cchiunche jura pe lo tempio, jura pe isso, e ppe cchillo, che nce sta dinto.²²E cchi jura pe lo cielo, jura pe lo trono de Ddio, eppe cchillo, che nce sta assettato ncoppa.²³Guaje a vvuje, Scribbe e Ffariseje bizzuoche fauze: che ppavate la decema de ll'amenta, de ll'aneto e dde lo cimmino, e vve jettasteve arreto a le spalle lo cchiù assenziale de la legge, zzoè la justizia, la misericordia, e la fede. Ste ccose abbesognava fà, senza lassà chell'aute.²⁴Capepuopole cecate, che scolate no moschillo, e ppo v'agliottite no camelo.²⁵Guaje a yvuje Scribbe e Ffariseje santeficete, che ppulizzate chello, che nce sta da fora a lo bicchiere e a lo piatto: che ppo da dinto site zippe d'arruobbe, e dde zozzimma.²⁶Farisejo cecato, annetta primma chello, che nce sta da dinto a lo bicchiere e a lo piatto, azzò sia pulito purzì chello, che sta da fora.²⁷Guaje a vvuje, Scribbe e Ffariseje cuolle stuorte: che ssite tale e quale a le ssebbeture janchiate, che dda forapareno belle a ll'uommene, ma da dinto so cchiene d'ossa de muorte, e dď ogne ffracetumma.²⁸Accossi vuje aute, da fora parite buone a ll' uom mene: ma ncuorpo site chine de bizzocaria fauza e dde birbonaria.²⁹Guaje a vvuje, Scribbe e Ffariseje fauze devote, che ffravecate li sebburche a li profete, e aparate le ttombe de li juste,³⁰E ddicite: Si fossemo state a li tiempe de li patre nuoste, non sarriemo state cuomprice lloro pe losango de li profete.³¹Accossì facite testemmonia contra a vvuje stesse, ca site figlie de chille, ch'accedettero li profete.³²E vvuje mettite ll'accoppatura a la mesura de li patre vuoste.³³Serpiente, jennimma de vipere, comme scanzarrite la connanna de lo nfierno?³⁴Pe cchesto io ve manno li profete, li sapute, e li scribbe, e mmiezo a lloro jarrite accidenno, e mmettenno ncroce, e ffraggellanno dinto a le ssinagoche voste, secutannole da paese a ppaese:³⁵Azzò cche ve scenne ncuollo tutto lo de li sangojuste, che ffuje sparzo ncoppa a la terra, da lo sango d'Abbele ommo justo nzi a cchillo de Zaccaria figlio de Bbarrachia, ch'accedisteve nfra lo tempio e ll'autare.³⁶Accossi è ve dico, ca tutto chesto venarrà ncuollo a cchesta razza presente.³⁷Gierusalemme, Gierusalemme, ch'accide li profete, ch'a bbotte de vrecce ammasune chille, che sso mmannate addò te, quanta vote aggio voluto aunà li figlie tuoje comme la voccola auna li pulicine suoje sotto a le scelle, e ttu non voliste?³⁸Ecco ca ve sarrà llassata la casa comme a no desierto.³⁹Evve dico, ca non me vedarrite d'ogge nnante, nzi ca non dicite: Beneditto sia chi vene a nnomme de lo Signore.