Lo Santo Vangelio seconno Matteo 6

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹ABBADATE de non fà ll' opere bone voste nnante a ll' uommene, p' essere vedute da lloro: si no, non nn'avarrite la pava da lo Patre vuosto, che sta ncielo.²Donca quanno faje la lemmosena, non ghji sunanno la trommetta nnante a tte, comme fanno li fauze devote pe le ssinagoche, e ppe le cchiazze, pe nn'avè annore da ll' uommene: accossi è ve dico, ch'ànn' avuta la pava lloro.³Ma quanno tu faje la lemmosena, la mano manca toja non à dda sapè chello, che ffa la deritta:⁴La lemmosena toja à dda essere annascuso, e lo Patre tujo, che gguarda dinto a lo scuro, te la rennarrà.⁵E quanno priate, non facite comme a li fauze devote, ch'ànno appiacere de stà a pprià dinto a le ssinagoche e ppe li pontune de le cchiazze, p'essere vedute da ll'uommene: accossì è ve dico, ch'ànn'avuta la pava lloro.⁶Tu po, quanno faje orazzione, trasetenne dinto a la cammarella toja, nzerra la porta, e ppreja lo Patre tujo nzecreto: e lo Patre tujo, che vvede dinto a lo secreto, te lo rennarrà.⁷Prianno po, non facite parole assaje, comme a li ncredule. Pecchè se penzano, ca parlanno assaje songo ntise.⁸Non arit'a essere comme a lloro. Pecchè lo Patre vuosto sape chello, che vv'abbesogna, primma che nce lo ccercate.⁹Donca vuje priate accossì: Patre nuosto, che staje ncielo: sia beneditto lo nomme tujo.¹⁰Venga lo regno tujo. Sia fatta la volontà ttoja, comme ncielo, accossi nterra.¹¹Dance ogge lo ppane nuosto, ch'è dde gran su stanzia.¹²E pperdona a nnuje li diebbete nuoste, comme nuje perdonammo a li debbeture nuoste.¹³Ennon ce fà piglià da la tentazzione. Ma sarvance da lo mmale. Accossi ssia.¹⁴Pecchè si vuje perdonate a ll'uommene le mmancanze lloro: lo Patre vuosto, che sta ncielo perdonarrà a vvuje li peccate vuoste.¹⁵Si po non perdonate a ll' uommene: manco lo Patre vuosto ve perdonarrà li peccate vuoste.¹⁶Quanno facite lo diuno, non ve facite brutte comme a li fauze devote. Pecchè chiste cca se sfiurano la faccia, ffà avvede a ll' uommene, ca fanno lo diuno. Accossi peè ve dico, ch'ànno avuta la pava lloro.¹⁷Tu po, quanno faje lo diuno, miettete lo ggrasso ncapo, e llavate la faccia,¹⁸Azzò non faje vedè a ll'uommene, ca staje diuno, ma a lo Patre tujo, che sta annascuso: e lo Patre tujo, che vvede nzecreto, te lo rennarrà.¹⁹Non ve jate acchiettanno tresore ncoppa a la terra: addò la ruzzimma, e li vierme se li mmagnano: e addò li mariuole li scavano, e sse l'arrobbano.²⁰Acchiettateve li tresore ncielo: addò non ce sta ruzzimma, nè vvierme, che se li mmagnano, e addò non ce so mmariuole, che li scavano, e sse l'arrobbano.²¹Pecchè addò sta lo tresore tujo, llà pure sta lo core tujo.²²La lucerna de lo cuorpo tujo è ll'uocchio tujo. Si ll' uocchio tujo è cchiaro: tutto lo cuorpo tujo sarrà lucente.²³Si po ll' uocchio tujo è ccattivo: tutto lo cuorpo tujo sarrà scuro. Donca, si lo lume, che ttu tiene, è scuro: che scuretorio à dda essere tutto lo riesto?²⁴Nisciuno pò servi a dduje patrune: pecchè o non potarrà vedè a uno, e vvorrà bbene a ll'auto: o se tenarrà a lo primmo, e llassarrà lo secunno. Non potite servi a Ddio, e a le rricchezze.²⁵Pe cchesto ve dico de non avè penziero, nè ppe la vita vosta comme avè da magna, nè ppe lo cuorpo vuosto comme trová a vvestirve. La vita non è na cosa cchiù ggrossa de lo mmagnà: e lo cuorpo non è cchiù dde li vestite?²⁶Guardate a ll' aucielle de lo cielo, che nnon mmenano la semmenta, non se pigliano le spiche, e nnon aunano lo ggrano dinto a li magazzene: e lo Patre vuosto de lo cielo lle dá a ccampà. E vvuje non site cchiù dde loro?²⁷Ma chi de vuje penzanno pò fà crescere de no palmo la statura soja?²⁸E ppecchè state mpenziero pe li vestite? Guardate comme cresceno li ggiglie de la campagna: e ppure non faticano, e nnon filano.²⁹Io po ve dico, ca manco Salamone co ttutta la grolia soja fuje vestuto comme a uno de sti sciure.³⁰Si Ddio veste accossi lo ffieno de la campagna, che mmo nce sta, e ddimane se jetta dinto a lo furno: quanto cchiù a vvuje gente de poca fede?³¹Non state donca mpenziero, dicenno: Che ccosa magnammo, che bbevimmo, comme nce vestimmo?³²Pecchè chiste so li penziere de li ncredule. Ora lo Patre vuosto de lo cielo sape, ca vuje avite necessità de tutte ste ccose.³³Jate cercanno primma de tutto lo regno de Ddio e la justizia soja: e ttutte ste ccose ve venarranno appriesso.³⁴Donca non state mpenziero pe la jurnata de di mane. Pecchè la jurnata de dimane avarrà lo penziero sujo. A ogne gghiuorno abbasta la malignità ssoja.