Lo Santo Vangelio seconno Matteo 15

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹TANNO se ll'accostajeno da Gierusalemme cierte Scribbe, e ccierte Fariseje, e lle dicettero:²Comm'è, ca li discipole tuoje se votteno arreto a le spalle li ditte de ll'anziane? ca non se lavano le mmane quanno magnano lo ppane.³Ma isso lle responnette: E vvuje pure comm'è; ca ve vottate arreto a le spalle lo commannamiento de Ddio p'ammore de chello, che nce ànno lassato ditto? Pecchè Ddio à ditto:⁴Onora a lo patre e a la mamma, e: Cchi mmaledice a lo patre, o a la mamma à dd'avè la pena de morte.⁵Ma vuje aute dicite: Ognuno pò dicere a lo patre, o a la mamma: Ogne rrialo portato da me, farrà bbene pure a tte:⁶E nnon ajutarrà a lo patre sujo, o a la mamma soja: e accossi p'ammore de chello, che v'ànno lassato ditto, vuje non nn'avite fatto niente de lo commannamiento de Ddio.⁷Fauze devote, v'annevenaje buono Isaia, dicenno:⁸Chisto popolo me dà annore co la vocca: ma lo core lloro sta lontano da me.⁹Pe ssenza raggione riguardano a mme, quanno mparano dottrina e commannamiente d'uommene.¹⁰E ddoppo che se chiammaje la folla, le dicette: Sentite, e ntennite.¹¹Non è cchello, che ttrase pe la vocca, che sporca ll'ommo: ma chello, ch' esce da la vocca, chesto è, cche sporca ll'ommo.¹²Tanno li discipole suoje accostannose, le dicettero: Saje, ca li Fariseje, sentenno sto trascurzo, se nne so scannalezzate?¹³Ma isso responnette: Ogne cchianta, che nnon è stata pastenata da lo Patre mio de lo cielo, sarrà sradecata.¹⁴Lassatele sta a lloro: so ccecate, e pportano cecate. Si po no cecato porta n'auto cecato, tutte e dduje cadeno dinto a lo fuosso.¹⁵Tanno Pietro responnenno, le dicette: Fance canoscere chesta parabbola.¹⁶Ma isso dicette: Vuje pure site ancora senza cerviello?¹⁷Non capite, ca tutto chello, che ttrase pe la vocca, va dinto a la panza, e sse caccia dinto a la latrina?¹⁸Ma chelle ccose, che esceno da la vocca, esceno da lo core, e ccheste sporcano ll' omino.¹⁹Pecchè da lo core esceno li male penziere, li mmecidie, li mbruoglie co le mmaretate, e cco le zzitelle, ll'arruobbe, le ffauze testemmonia, le gghiastemme.²⁰Cheste so le ccose, che sporcano ll'ommo. Ma lo mmagnà senza lavarse le mmane, non sporca ll ommo.²¹E asciuto da llà Giesù se nne jette da la bbanna de Tiro e dde Sidone.²²E eccote na femmena cananea asciuta da chille contuorne strillava, dicennole: Signò, figlio de Ddavide, agge compassione de me: la figlia mia è bbona ncojetata da lo demmonio.²³Ma isso non le responnette nisciuna parola. Eli discipole suoje accostannose lo priavano, e lle dice veno: Mannane a cchesta: ca nce va alluccanno appriesso.²⁴Ma isso responnette: Io so stato mannato schitto pe le ppecore sperdute de la casa de Straele.²⁵Ma chella venette, e ll'adoraje, dicenno: Signo, ajutame.²⁶Lo quale responnenno dicette: Non va buono de piglià lo ppane de li figlie, e gghiettarlo a li cane.²⁷Ma essa dicette: Sissignore: pecchè pure li canille se magnano le mmolliche, che vvanno nterra da la tavola de li patrune lloro.²⁸Tanno Giesù responnenno, le dicette: Bella femmena mia, la fede toja è ggranne: te sia fatto chello, che ttu vuoje. E dda chillo momento la figlia soja fuje sanata.²⁹E ddoppo che se nne partette da llà Giesù, jette rente a lo mare de Galilea: e ssagliuto ncoppa a no monte, llà se steva assettato.³⁰E sse ll'accostaje na grossa folla de popolo, che pportava co essa mute, cecate, zuoppe, struppiate, e assaje aute malate: e li gghiettajeno a li piede suoje, e li ssanaje:³¹De manera ca la folla ne rummaneva stunata, vedenno, ca li mute parlavano, li zuoppe cammenavano, e li cecate nce vedeveno: e nne devano grolia a lo Ddio de Straele.³²Ma Giesù, chiammatese li discipole suoje, lle dicette: Aggio piatà de sta folla, che dda tre gghiuorne secuta a starse co mmico, e nnon ave che mmagnà: e nnon ne li vvoglio mannà arreto diune, pecchè ponno cade de famma pe la via.³³E li discipole le dicettero: Da ddo pigliammo tanto pane dinto a no desierto, pe ssazzià tutta chesta folla?³⁴E Giesù lle dicette: Quanta panielle tenite? E llo ro responnettero: Sette, e ccierte piscetielle.³⁵E isso commannaje a la folla d'assettarse pe nterra.³⁶E ppiglianno chille sette panielle, e chille pisce, e rrengrazzianno, li spezzaje, e li ddette a li discipole suoje, e li discipole li ddettero a lo popolo.³⁷E ttutte magnajeno, e sse sazziajeno. E dde le tuozze rummase, n'aunajeno sette sporte chiene.³⁸Chille po, che mmagnajeno erano quattomilia uommene, senza li peccerille e le ffeminene.³⁹Emmannatane la folla, sagliette dinto a na var chetta: e gghiette pe li contuorne de Maggedan.