Lo Santo Vangelio seconno Matteo 22

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹E GIESÙ accommenzaje da capo a pparlà co lloro pe pparabbola, dicenno:²Lo regno de lo cielo è ssimmele a no rre, che ffacette lo sposalizio de lo figlio sujo.³Emmannaje li serviture suoje a cchiamma li mmitate pe lo sposalizio, e nnon voleveno venì.⁴Nce mannaje cierte aute serviture, dicenno: Dicite a li mmitate: Ecco ca aggio apparicchiato lo taffio, se so scannate le vvitelle, e li pulle ngrassate se so accise; tutto è llesto: venite a lo sposalizio.⁵E cchille non se nne ncarricajeno: e ss'avviajeno chi a lo casino, e cchi pe le ffacenne soje:⁶Cierte aute fremmajeno li serviture, e ddoppo d'averle ditto no sacco de mmale parole ll' accedettero.⁷Lo rre quanno lo ssentette, se mpestaje: e mmannanno li sordate, sterminaje li mmicidiarie, e ffacette abbruscià la cetà lloro.⁸Tanno dicette a li serviture suoje: Lo sposalizio è ppronto, ma li mmitate non ne fujeno degne.⁹Addonca faciteve a li pontune de le strate, e cchi trovate trovate, chiammatele a li festine.¹⁰E asciute li cortiggiane pe le vvie, ammazzam morrajeno tutte chille, che ttrovajeno, buone e ccattive: e la festa de lo sposalizio fuje zeppa de banchettiante.¹¹Po trasette lo rre a vvedė li commitate, e vvedette, ca nc'era n'ommo, che nnon steva vestuto co lo vestito de sposalizio.¹²E lle dicette: Amico, comme te si nficcato cca mmiezo non tenenno lo vestito de festa? A cchillo le scennette la lengua ncanna.¹³Tanno dicette lo rre a li serviente: Attaccatelo pe le mmane e ppe li piede a la pecorina, e gghiettatelo dinto a lo scuretorio de fora: llà nce sarrà cchianto, e zzerrià de diente.¹⁴Pocca assaje so li chiammate, ma poche li scivete.¹⁵Tanno jennosenne li Fariseje, facettero no con cistoro p'arravogliarlo dinto a le pparole.¹⁶E lle mannano li discipole lloro nzieme co ccierte Errodiane, dicenno: Masto, nuje sapimmo, ca tu sì ssincero, e nzigne la strata de Ddio a ttenore de la veretà, e nnon te piglie penziero de nisciuno: pocca tu non guarde nfaccia a ll'uommene:¹⁷Di mo a nnuje, a tte che te pare, è ppremmesso si o no de pavà lo cienzo a Ccesare?¹⁸Ma Giesù canoscenno la nfamità lloro, responnette: Bizzuoche fauze, pecchè mme tentate?¹⁹Mostateme la moneta de lo cienzo. E ll'appre sentajeno no piezzo.²⁰E Giesù lle dicette: De chi è sta capa e sta scrizzione, che nce sta ncoppa?²¹E cchille responnettero: E dde Cesare. E ttanno Giesù: Addonca date a Ccesare le ccose, che sso de Cesare: e ddate a Ddio le ccose, che sso de Ddio.²²Sentenno chesto restajeno de stucco, e llassannolo se nne jettero.²³Lo stesso juorno se ll'accostajeno li Sadduceje, che nnon ce credono a la resurrezzione: e lo nterrocajeno,²⁴Dicenno: Masto, Mosè dicette: Si quarcuno more senza figlie, ca lo frate se sposa la cainata, e rresusceta la razza de lo frate sujo.²⁵Ora nc' erano nfra de nuje sette frate: e lo primmo, nzoratose, morette: e nnon avenno figlie, lassaje la mogliera a lo frate sujo.²⁶Accossi lo secunno, e lo terzo pe nzi a lo settemo.²⁷A llurdemo de tutte purzì la femmena s'arre cettaje.²⁸Ora mo quanno resuscetarranno, la femmena a cchi de li sette sarrà mmogliera? pecchè tutte quante la tenettero.²⁹Ma Giesù responnette: State scarze de notizie, non sapenno nè la Scrittura, nè la potenzia de Ddio.³⁰Pecchè quanno se resuscetarrà, non ce sarrà cchiù chi se nzora, nè cchi se mmarita: ma sarranno comme a ll' angiole de Ddio ncielo.³¹Ma ncoppa a la resurrezzione de li muorte, vuje non avite leggiuto chello, che ve fuje ditto da Ddio, quanno ve dicette:³²Io so lo Ddio d'Abbramo, lo Ddio d'Aisacco, lo Ddio de Giacobbe? Isso non è Ddio de li muorte, ma de li vive.³³E ssentenno chesto la folla, restaje alloccuta pe la dottrina soja.³⁴Ma li Fariseje sentenno, ca Giesù aveva ammarrata la vocca a li Sadduceje, s'aunettero nfra lloro:³⁵E uno de lloro dottore de la legge, pe ttentarlo, ll'addimmannaje:³⁶Masto, qual è lo commannamiento gruosso de la legge?³⁷Giesù le dicette: Ama a lo Signore Ddio tujo co ttutto lo core tujo, co ttutta ll'anema toja, co ttutto lo penziero tujo.³⁸Chisto è lo cchiù ggruosso, e lo primmo commannamiento.³⁹Lo secunno po é ssimmele a cchisto: Ama a lo prossemo tujo, comme a tte stesso.⁴⁰Dinto a sti duje commannamiente nce sta tutta la legge, e li profete.⁴¹Emmente li Fariseje stevano raunate, Giesù ll'ad dimmannaje,⁴²Dicenno: A vvuje che ve pare de lo Cristo? de chi è ffiglio? Le responneno: De Ddavide.⁴³Isso lle dicette: E ccomme Ddavide nvesione роlo chiamma Signore, dicenno:⁴⁴Dicette lo Signore a lo Signore mio: Assettate a la deritta mia, pe nzi a quanno non veco li nemmice tuoje pe scannetiello sotto a li piede tuoje?⁴⁵Si donca Ddavide lo chiamma Signore, comm'è, ca l'è ffiglio?⁴⁶E nnisciuno poteva pepetià: nè nce fuje da chella jurnata chi avesse avuto coraggio de spiarle cchiù nniente.