El santo Evangelio secondo Matio 7

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹NO stė a giudicar vualtri, perchè no nassa, che siè invece giudicai.²Perchè segondo el vostro pensar, sarè tratai anca vualtri: e col brazzoler, che gavarè misurà, sarè anca vu altri misurai.³Per cossa ti vardi ti una pagieta in te l’ochio de to fradelo: e no ti pensi al travo, che ti ga ti in tel to ochio?⁴Come farastu a dirghe a to fradelo: Lassa, che te cava da l' ochio el tocheto de pagia, co ti ga ti un travo drento del to ochio?⁵Chietin, cavite prima da l'ochio el travo, e po ti varderà de tor via quel fiatin de pagia, che ghe xe in tel ochio de to fradelo.⁶No ste a butar le cosse sante ai cani: no buté le vostre zogie per tera, dove che xe i porcei, perchè no nassa che i le schizza co i so zampini, e che i se ve volta contro per farve in tochi.⁷Dimande, e i ve darà tuto: cerchè, e caterè: baté a la porta, e ve sarà averto.⁸Perchè tuti chidomanda, riceve: e chi cerca, cata: e ghe sarà averto a quelo, che bate.⁹E chi ghe xe tra vualtri, che co so fio ghe domanda un toco de pan, el ghe sporza invece una piera?¹⁰Eco el ghe domanderà un poco de pesse, chi sarà, che ghe daga una bissa?¹¹Se donca vualtri, che sè cativi, savè donar ai vostri fioi de le cosse bone, che ve xe donae: cossa no farà de più vostro Pare, che xe in cielo? El ghe acorderà tuto el ben sicuro a colori, che ghe lo domanda.¹²Fè donca ai omeni tuto quelo, che volè, che lori fazza co vualtri. Perchè cussì vol la lege e i profeti.¹³Andè, drento per la porta streta: perchè xe larga la porta e xe comoda la strada, che conduse a rovinarse, ei xe assae quei, che vien drento per sta porta.¹⁴No ve podè pensar co picola che xe la porta, e streta la strada, che mena al paradiso: e co pochi che xe colori, che la cata.¹⁵Vardeve dai profeti falsi, che ve vien davanti vestii da piegore, ma che de drento i xe lovi, che des lubia.¹⁶Li gavarė da conosser dai fruti, che i farà. Se tol forsi ua dai spini, o fighi dai triboli?¹⁷Cussi i alberi boni fa nasser dei fruti de sugo: ma i alberi cativi no i da altro che fruti magri, e senza saor.¹⁸Un albero bon no ghe caso, ch'el fazza fruti cativi: e un albero cativo, ch ' el fazza fruti boni.¹⁹Tutte le piante, che no porta un fruto da poderse gustar, se ga da tagiarle, e butarle sora del fogo.²⁰Vu donca le conosserè dai fruti, che le farà.²¹No minga tuti colori, cheme dise: Paron, Paron, i vegnirà drento del regno in cielo: ma chi fa quelo, che vol mio Pare, che se in cielo, questo qua si che l'entrerà in tel regno in cielo.²²Assae ghe sarà, che me diga in quel zorno: Paron, Paron, no gavemo nu pensà, dito, e scrito in tel to nome quel, che gavea da vegnir, e no gavemo nu in nome de ti frustà i diavoli, e no gavemo nu in nome too fato tanti miracoli?²³E mi alora ghe dirò a costori: No ve go conossui gnanca un fià: andè via da mi tuti vualtri, che gave fato de le baronae massa grosse.²⁴Quel omo, che ascolta le mie parole, e fa come che elle ghe insegna, el ghe somegierà a l'omo de giudizio, che ga impiantà la so casa su la piera:²⁵Xe vegnua zozo la piova, i fiumi xe andai per sora, ga supià el vento, e el ga batuo la casa da tute le bande, e no la xe andada zoso: perchè la gera impiantada su le piere.²⁶L'omo, che sente ste mie parole, e nol le dopera, el ghe somegierà a l'omo sioco, che ga tirà su la so casa sora del sabion.²⁷Xe vegnua abasso la piova, i fiumi ga roto, ga supià el vento da tute le bande, la casa la s' ha indebolio, e la xe andada in tun gran sconquasso.²⁸Co Gesù ga finio sti discorsi, quei chiapi de zente s'ha stupio de sentir, che el la saveva cussì longa.²⁹Lu ghe insegnava, perchè el podeva farlo, e no minga come che fava i so Scribi, e Farisei.