El santo Evangelio secondo Matio 6

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹BADE' de no far le vostre opere bone in fazza dei omeni, per la rason de esser visti da lori: perché se no no gavarè premio da vostro Pare, che xe in cielo.²Co ti farà donca carità, no star a sonar la tromba davanti de ti, come che fa i santochi in tele sinagoghe, e in tele piazze, per esser incensai dai omeni: ve digo in verità, che costori i ga ricevesto el so tantunque.³Ma co ti farà carità, varda che la to manzanca no sapia quel, che fa la dreta.⁴Fa in maniera che la to carità sia sconta, e to Pare, che vede in scondon, el te darà lu el contracambio.⁵E co preghè, no fè come i chietini, che ga vogia de meterse a far orazion in tele sinagoghe e in cao de le strade, perchè i omeni li veda pulito: mi ve digo in verità, che costori ga ricevesto la so paga secondo el fin, che i gaveva in testa.⁶Ma ti, co ti disi le orazion, fate drento de la to camera, sara la porta, e prega to Pare, che nissun senta: e to Pare, che vede in scondon, te darà quel, che ti te meriti.⁷No star a doperar tante parole co ti preghi, come che fa quei, che no ga fede. Perchè lori crede d'esser ascoltai nome che per la so batola.⁸No stė a andarghe drio. Perchè vostro Pare el sa, prima che ve mete a farghe una domanda, de cossa che gavè bisogno.⁹Vu donca preghè cussì: Pare nostro, che ti xe in cielo: sia el to nome santificà.¹⁰Vegna el to regno. La to volontà se fazza, come in cielo, cussì anca in tera.¹¹Dane anca ancuo el pan de ogni zorno per nostro sustentamento.¹²E perdonine i nostri debiti, che anca nualtri ghe li perdonemo ai nostri debitori.¹³E no lassar, che caschemo in pericoli. Mascampine dal mal. E che la sia cussì.¹⁴Perchè se vu perdone ai omeni le insolenze, che i v’ha fato: anca vostro Pare in cielo ve perdonerà i stra pazzi, che gavè fato a lu.¹⁵Ma se vu no perdonè ai omeni le so magagne: gnanca vostro Pare no ve perdonerà minga le vostre.¹⁶Co dezunè po, no stè a farve filai morti cofà i chietini. Perchè costori i se desfigura in viso a posta, per dar da intender ai omeni, che i dezuna. Ve digo in verità, che costori xe stai pagai de la so monea.¹⁷Ma ti, co ti dezuni, metite i profumi in testa, e la vite ben el viso:¹⁸Cussì el to dezun no sarà conossuo nome che dai omeni, ma anca da to Pare, che xe in cielo, e che sta in secreto: e lu, che vede in scondon, te risarcirà pulito.¹⁹No cerchè de rancurar, e de far musina de tesori in sto mondo: che el ruzene, e i vermi vegnirà a consumarli: e i ladri li caverà da sototera per robarveli.²⁰Invece procurè de ingrumar tesori in cielo: che lassuso no gh'è ruzene, nè gnanca vermi, che li magna, nè ghe xe ladri, che ve li scava da la tera per portarveli via.²¹Perchè dove ghe se el to tesoro, là ghexe el to cuor.²²La lume del to corpo xe el to ochio. Se el to ochio xe chiaro cofà quelo de la colomba: tuto el to corpo sarà iluminà.²³Ma se el to ochio gavesse dei difeti: tuto el to corpo sarave a scuro. Se donca la luse, che xe co ti, de venta scura come la note: quanto no ga da esser grande le tenebre?²⁴Nissun pol servir a do paroni: perchè o el sentirà odio per uno, e el ghe vorà ben a quel altro: o el gaverà ataco per el primo, e gnente de stima per el secondo. No pode servir a Dio, e ai bezzi.²⁵Ve digo donca, no ve stè a tor afano per magnar, nè per torve i abiti da coverzerve el corpo. La vita no la val forsi più de la roba da magnar: e el corpo più del vestiario?²⁶Butè un ochio ai osei de l' aria: lori no i semena, nè i rancura, nè gnanca i pol impenir i graneri: e vostro Pare, che se in cielo ghe dà da magnar. Forsi no sé vualtri assae più de lori?²⁷Ma chi xe po de vu, che co tuto el so cervelo el possa zontar a la so figura la mesura de un'onza?²⁸E per cossa ve toleu afano per el vestiario? Pensè come che cresse i zegi in tel campo: lori no laora, e no i fila.²⁹Adesso mi ve digo, che gnanca Salomon co tuta la so grandezza xe sta mai vestio cofà uno de sti fiori.³⁰Se donca Dio veste cussì in grando l'erba del campo, che ancuo ghe xe, e doman la xe shampia, e butada sul fogo: quanto più vualtri zente de scarsa fede?³¹No stè dunque a afanarve, chiacolando: Cossa magneremio, o cossa beveremio, o de cossa se vestiremio?³²Lasseghe sti pensieri ai zentili, che no ghe crede a Dio. Adesso vostro Pare sa, che de tute ste cosse vu gavè bisogno.³³Cerchè donca prima de tuto el regno de Dio e la so giustizia: e tute ste cosse le gavarè de soranelo.³⁴No stè a darve pensier per doman. El zorno de doman gaverà el pensier da so posta. Ogni zorno ga el so afano che basta.