El santo Evangelio secondo Matio 3

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹IN sto tempo xe vegnuo Zuane el Batista a predicar in tel deserto de la Giudea,²Disendo: Fè penitenza: perchè el xe qua arente el regno dei cieli.³Perchè questo xe l'omo, che gaveva parlà el profeta Isaia, col ga dito: Ose de chi ciga in tel deserto: Preparè la strada del Signor: fè dreti i so trozi.⁴Lu istesso po Zuane gaveva indosso un abito de pelo de cameli, e una cintura de pele ligada ai so fianchi: e nol magnava altro che cavalete, e miel selvadego.⁵Alora andava da lu Gerusaleme, e tuta la Giudea, e tuto el paese atorno del Giordano;⁶Ei gera batizai da lu in tel Giordano, confessai i so pecai.⁷Ma col ga visto a vegnir a batizarse da lu tanti Farisei, e Saducei, el ga dito a lori: Razza de vipere, chi ve ga insegnà a scampar da la colera futura?⁸Fè donca fruto degno de penitenza.⁹E no vogiè dir drento de vu: Gavemo Abramo per pare. Perché ve digo mi, che Dio xe potente de far saltar fora da ste piere dei fioi de Abramo.¹⁰Perchè za la manera la xe messa su la raise dei alberi. Se gh'è donca un albero che no fazza fruto bon, el sarà tagià, e butà in tel fogo.¹¹Mi certo ve batizo co l' aqua per la penitenza: ma quelo, che vegnirà dopo de mi, xe de mipiù forte: mi no so degno de portar le so scarpe: lu ve batizerà co lo Spirito santo, e col fogo.¹²Lu ga la pala in tela so man: e el neterà ben la so ara, e el rancurerà el so formento in graner; ma el bruserà po le pagie co un fogo, che no se poderá mai destuar.¹³Alora xe arivà Gesù da la Galilea sul Giordano da Zuane, perchè el lo batizasse.¹⁴Ma Zuane no voleva minga, disendo: Mi go bisogno de vegnir batizà da ti, e invece ti vien ti da mi?¹⁵Ma Gesù ga risposto: Lassa far per adesso: perchè cussì ne sta ben de servir a tuta la giustizia. E alora el ga lassa.¹⁶Gesù col xe sta batizà el xe vegnuo subito fora de l'aqua. E eco là che i cieli se ga averto: e el ga visto el Spirito de Dio a calar zoso cofà una colomba, e puzarse sora de la so testa.¹⁷E una ose eco là vegnua da l' alto, che ga dito: Questo xe el mio fio, quelo che ghe vogio tanto ben, e che de averlo me so tanto compiasso.