El santo Evangelio secondo Matio 16

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹FARISEI, e i Saducei xe andai a catarlo per stuce garlo: e i l'ha pregà de farghe veder dei miracoli dal cielo.²E lu ga risposto: Vualtri disè de sera: Che farà bon tempo, perchè el cielo buta rosso.³E de matina: Ancuo sarà un gran temporal, perchè el cielo scuro se fa rosso.⁴Vu savè donca capir le cambianze del cielo: e no sé capaci po de capir i segnali dei tempi? Razza bricona e bastarda la cerca un miracolo: e no i ghe ne farà altri, che quelo de Giona profeta. E voltandoghe a costori le spale, el li ga là impiantai.⁵E i so Apostoli passando de là dal lago, i s'avea desmentegà de tor su del pan.⁶E Gesù ga dito: Tegni averti i ochi, e vardeve dal levà dei Farisei e dei Saducei.⁷E i stava pensierosi, e drento de lori i diseva: No gavemo tolto gnanca del pan.⁸Gesù, che li ga capii, el ga dimandà: Per cossa steu drento de vualtri cussì pensierosi, zente de poca fede, perchè no gavè un poco de pan?⁹Nometè ancora pensier, nè ve recorde dei cinque paneti per i cinque miera de omeni, e quante misure ghe n'avè rancura?¹⁰Nè gnanca dei sete paneti per i quatro miera de omeni, e quante sportele, che ghe n'avè sunà suso?¹¹E no intendè, che mi no v'ho minga dito per l'afar del pan: Che ve vardè dal levà dei Farisei e dei Saducei?¹²Alora si che i ga intendesto, che nol gaveva minga dito de vardarse dal leva del pan, ma de quel, che insegna i Farisei e i Saducei.¹³Gesù po col ga tirà da le bande de Cesarea de Filipo el ga domandà ai so Apostoli: Chi dise i omeni, che sia el Fio de l' omo?¹⁴Lori ga risposto: Ghe xe chi dise, chel xe Zuane Batista, chi lo vol Elia, chi se pensa, ch'el sia Geremia, o qualchedun altro dei profeti.¹⁵Gesù ga replicà: E vualtri chi diseu, che mi sia?¹⁶Simon Piero ga risposto: Ti ti xe Cristo, fio de Dio vivo.¹⁷E Gesù cussì ga parlà: Ti xe beato, Simon Bar Jona: perchè no te ga fato saver chi so, nè la carne, nè gnanca el sangue, ma nome che mio Pare, che xe là in cielo.¹⁸E mi adesso digo a ti, che ti xe Piero, e sora de sta piera tirerò su la mia chiesa, e la baterà duro anca contro le porte de l'inferno.¹⁹E a ti te darò la chiave del regno, che xe in cielo. E quele cosse, che ti gaverà ligà sora la tera, le sarà ligae anca in cielo: e quele cose, che ti gaverà dessolae sora la tera, le sarà dessolae anca in cielo.²⁰El ga ordenà ai so Apostoli, che no i disesse gnente a nissun, che lu fusse Gesù Cristo.²¹Da quela volta in qua Gesù ga scomenzà a in segnarghe ai so Apostoli, in chemaniera bisognava, che lu andasse a Gerusaleme, che là el patisse tante cosse dai vechi, e dai Scribi, e dai capurioni dei preti, e ch'el fusse anca morto, e el ressussitasse el terzo zorno.²²E Piero chiapandolo da parte, el ga scomenzà a lamentarse disendoghe: Signor, no sarà mai dito vero, che te nassa a ti una cossa simile.²³E voltà da Piero, el ga dito: Marchia via da mi, diavolo; ti me xe de scandalo: perchè no ti ga el saver de Dio, ma quelo dei omeni.²⁴Alora Gesù ga dito ai so Apostoli: Chi vol vegnir co mi, bisogna, che el se desmentega de lu; el ga da tor su la crose, e regnirme drio.²⁵Perché chi gaverà vogia de salvar la so anema, la perderà: e chi perderà la so anema per amor mio, la catarà.²⁶Cossa ghe conta a l'omo de guadagnar tuto el mondo, se po el perde l'anema? Cossa daralo l'omo per l'anema soa?²⁷El Fio de l'omo vegnirà in tela gloria de so Pare coi so anzoli: e alora el ghe darà el soo a tuti secondo che i s'averà portà in sta tera.²⁸In verità ve digo, che fra colori, che xe qua adesso, ghe xe de queli, che no morirà, avanti che i'veda el Fio de l'omo meter el pie drento del so regno.