Jó 38

VULGATA	NOVA VULGATA
1 Respondens autem Dominus Job de turbine, dixit :	1 Respondens autem Dominus Iob de turbine dixit:
2 Quis est iste involvens sententias sermonibus imperitis ?	2 “ Quis est iste obscurans consilium sermonibus imperitis?
3 Accinge sicut vir lumbos tuos : interrogabo te, et responde mihi.	3 Accinge sicut vir lumbos tuos; interrogabo te, et edoce me.
4 Ubi eras quando ponebam fundamenta terræ ? indica mihi, si habes intelligentiam.	4 Ubi eras, quando ponebam fundamenta terrae? Indica mihi, si habes intellegentiam.
5 Quis posuit mensuras ejus, si nosti ? vel quis tetendit super eam lineam ?	5 Quis posuit mensuras eius, si nosti? Vel quis tetendit super eam lineam?
6 Super quo bases illius solidatæ sunt ? aut quis demisit lapidem angularem ejus,	6 Super quo bases illius solidatae sunt? Aut quis demisit lapidem angularem eius,
7 cum me laudarent simul astra matutina, et jubilarent omnes filii Dei ?	7 cum clamarent simul astra matutina, et iubilarent omnes filii Dei?
8 Quis conclusit ostiis mare, quando erumpebat quasi de vulva procedens ;	8 Quis conclusit ostiis mare, quando erumpebat quasi de visceribus procedens,
9 cum ponerem nubem vestimentum ejus, et caligine illud quasi pannis infantiæ obvolverem ?	9 cum ponerem nubem vestimentum eius et caligine illud quasi fascia obvolverem?
10 Circumdedi illud terminis meis, et posui vectem et ostia,	10 Definivi illud terminis meis et posui vectem et ostia
11 et dixi : Usque huc venies, et non procedes amplius, et hic confringes tumentes fluctus tuos.	11 et dixi: Usque huc venies et non procedes amplius et hic confringes tumentes fluctus tuos.
12 Numquid post ortum tuum præcepisti diluculo, et ostendisti auroræ locum suum ?	12 Numquid in diebus tuis praecepisti diluculo et assignasti aurorae locum suum,
13 Et tenuisti concutiens extrema terræ, et excussisti impios ex ea ?	13 et, cum extrema terrae teneres, excussi sunt impii ex ea?
14 Restituetur ut lutum signaculum, et stabit sicut vestimentum :	14 Vertetur in lutum signatum et stabit sicut vestimentum.
15 auferetur ab impiis lux sua, et brachium excelsum confringetur.	15 Cohibetur ab impiis lux sua, et brachium excelsum confringetur.
16 Numquid ingressus es profunda maris, et in novissimis abyssi deambulasti ?	16 Numquid ingressus es scaturigines maris et in novissimis abyssi deambulasti?
17 Numquid apertæ sunt tibi portæ mortis, et ostia tenebrosa vidisti ?	17 Numquid apertae sunt tibi portae mortis, et ostia tenebrosa vidisti?
18 Numquid considerasti latitudinem terræ ? indica mihi, si nosti, omnia :	18 Numquid considerasti latitudinem terrae? Indica mihi, si nosti omnia:
19 in qua via lux habitet, et tenebrarum quis locus sit :	19 In qua via lux habitet, et tenebrarum quis locus sit;
20 ut ducas unumquodque ad terminos suos, et intelligas semitas domus ejus.	20 ut ducas unumquodque ad terminos suos et intellegas semitas domus eius?
21 Sciebas tunc quod nasciturus esses, et numerum dierum tuorum noveras ?	21 Novisti, nam tunc natus eras, et numerus dierum tuorum multus!
22 Numquid ingressus es thesauros nivis, aut thesauros grandinis aspexisti,	22 Numquid ingressus es thesauros nivis aut thesauros grandinis aspexisti,
23 quæ præparavi in tempus hostis, in diem pugnæ et belli ?	23 quae praeparavi in tempus angustiae, in diem pugnae et belli?
24 Per quam viam spargitur lux, dividitur æstus super terram ?	24 Per quam viam spargitur lux, diffunditur ventus urens super terram?
25 Quis dedit vehementissimo imbri cursum, et viam sonantis tonitrui,	25 Quis dedit vehementissimo imbri cursum et viam fulmini tonanti,
26 ut plueret super terram absque homine in deserto, ubi nullus mortalium commoratur ;	26 ut plueret super terram absque homine, in deserto, ubi nullus mortalium commoratur,
27 ut impleret inviam et desolatam, et produceret herbas virentes ?	27 ut impleret inviam et desolatam et produceret herbas in terra arida?
28 Quis est pluviæ pater ? vel quis genuit stillas roris ?	28 Quis est pluviae pater, vel quis genuit stillas roris?
29 De cujus utero egressa est glacies ? et gelu de cælo quis genuit ?	29 De cuius sinu egressa est glacies, et pruinam de caelo quis genuit?
30 In similitudinem lapidis aquæ durantur, et superficies abyssi constringitur.	30 In similitudinem lapidis aquae durantur, et superficies abyssi constringitur.
31 Numquid conjungere valebis micantes stellas Pleiadas, aut gyrum Arcturi poteris dissipare ?	31 Numquid coniungere valebis nexus stellarum Pleiadum aut funiculum Arcturi poteris solvere?
32 Numquid producis luciferum in tempore suo, et vesperum super filios terræ consurgere facis ?	32 Numquid produces Coronam in tempore suo et Ursam cum filiis ducis tu?
33 Numquid nosti ordinem cæli, et pones rationem ejus in terra ?	33 Numquid nosti leges caeli et pones scripturam eius in terra?
34 Numquid elevabis in nebula vocem tuam, et impetus aquarum operiet te ?	34 Numquid elevabis in nebula vocem tuam, et impetus aquarum operiet te?
35 Numquid mittes fulgura, et ibunt, et revertentia dicent tibi : Adsumus ?	35 Numquid mittes fulgura, et ibunt et dicent tibi: “Adsumus!”?
36 Quis posuit in visceribus hominis sapientiam ? vel quis dedit gallo intelligentiam ?	36 Quis posuit in visceribus ibis sapientiam, vel quis dedit gallo intellegentiam?
37 Quis enarrabit cælorum rationem ? et concentum cæli quis dormire faciet ?	37 Quis recensebit nubes in sapientia, et utres caeli quis declinabit,
38 Quando fundebatur pulvis in terra, et glebæ compingebantur ?	38 quando funditur pulvis in solidum, et glebae compinguntur?
39 Numquid capies leænæ prædam, et animam catulorum ejus implebis,	39 Numquid capies leaenae praedam et animam catulorum eius implebis,
40 quando cubant in antris, et in specubus insidiantur ?	40 quando cubant in antris et in specubus insidiantur?
41 Quis præparat corvo escam suam, quando pulli ejus clamant ad Deum, vagantes, eo quod non habeant cibos ?	41 Quis praeparat corvo escam suam, quando pulli eius clamant ad Deum vagantes, eo quod non habeant cibos?