---

¹ALEPH. Ego vir videns paupertatem meam
in virga indignationis eius.
²ALEPH. Me minavit et adduxit
in tenebras et non in lucem.
³ALEPH. Tantum in me vertit et convertit
manum suam tota die.
⁴BETH. Consumpsit pellem meam et carnem meam,
contrivit ossa mea.
⁵BETH. Aedificavit in gyro meo
et circumdedit me felle et labore.
⁶BETH. In tenebrosis collocavit me
quasi mortuos sempiternos.
⁷GHIMEL. Circumaedificavit adversum me, ut non egrediar,
aggravavit compedem meum.
⁸GHIMEL. Sed et cum clamavero et rogavero,
exclusit orationem meam.
⁹GHIMEL. Conclusit vias meas lapidibus quadris,
semitas meas subvertit. ¹⁰DALETH. Ursus insidians factus est mihi,
leo in absconditis. ¹¹DALETH. Semitas meas subvertit et confregit me,
posuit me desolatam. ¹²DALETH. Tetendit arcum suum et posuit me
quasi signum ad sagittam. ¹³HE. Misit in renibus meis
filias pharetrae suae. ¹⁴HE. Factus sum in derisum omni populo meo,
canticum eorum tota die. ¹⁵HE. Replevit me amaritudinibus,
inebriavit me absinthio. ¹⁶VAU. Et fregit in glarea dentes meos,
depressit me cinere. ¹⁷VAU. Et repulsa est a pace anima mea,
oblitus sum bonorum. ¹⁸VAU. Et dixi: “ Periit splendor meus et spes mea a Domino ”. ¹⁹ZAIN. Recordare paupertatis et peregrinationis meae,
absinthii et fellis.
²⁰ZAIN. Memoria memor est
et tabescit in me anima mea.
²¹ZAIN. Haec recolam in corde meo,
ideo sperabo.
²²HETH. Misericordiae Domini, quia non sumus consumpti,
quia non defecerunt miserationes eius.
²³HETH. Novae sunt omni mane,
magna est fides tua.
²⁴HETH. “ Pars mea Dominus, dixit anima mea;
propterea exspectabo eum ”.
²⁵TETH. Bonus est Dominus sperantibus in eum,
animae quaerenti illum.
²⁶TETH. Bonum est praestolari cum silentio
salutare Domini.
²⁷TETH. Bonum est viro, cum portaverit
iugum ab adulescentia sua.
²⁸IOD. Sedebit solitarius et tacebit,
cum istud imponitur ei.
²⁹IOD. Ponet in pulvere os suum,
si forte sit spes.
³⁰IOD. Dabit percutienti se maxillam,
saturabitur opprobriis.
³¹CAPH. Quia non repellet in sempiternum
Dominus.
³²CAPH. Quia si afflixit, et miserebitur
secundum multitudinem misericordiarum suarum.
³³CAPH. Non enim humiliat ex corde suo
et affligit filios hominum.
³⁴LAMED. Conterere sub pedibus suis
omnes vinctos terrae.
³⁵LAMED. Declinare iudicium viri
in conspectu vultus Altissimi.
³⁶LAMED. Pervertere hominem in iudicio suo,
num Dominus haec ignorat?
³⁷MEM. Quis est iste, qui dixit, et factum est?
Dominus non iussit?
³⁸MEM. Ex ore Altissimi nonne egrediuntur
et mala et bona?
³⁹MEM. Quid murmurabit homo vivens,
vir pro peccatis suis?
⁴⁰NUN. “ Scrutemur vias nostras et quaeramus
et revertamur ad Dominum.
⁴¹NUN. Levemus corda nostra cum manibus
ad Dominum in caelos.
⁴²NUN. Nos inique egimus et rebelles fuimus;
idcirco tu inexorabilis fuisti.
⁴³SAMECH. Operuisti in furore et percussisti nos;
occidisti nec pepercisti.
⁴⁴SAMECH. Opposuisti nubem tibi,
ne transeat oratio.
⁴⁵SAMECH. In eradicationem et abiectionem posuisti nos
in medio populorum.
⁴⁶PHE. Aperuerunt super nos os suum
omnes inimici nostri.
⁴⁷PHE. Formido et fovea facta est nobis,
vastatio et contritio ”.
⁴⁸PHE. Rivos aquarum deducit oculus meus
in contritione filiae populi mei.
⁴⁹AIN. Oculus meus lacrimas effundit nec tacet,
eo quod non sit requies.
⁵⁰AIN. Donec respiciat et videat
Dominus de caelis.
⁵¹AIN. Oculus meus affligit animam meam
prae cunctis filiabus urbis meae.
⁵²SADE. Venatione venati sunt me quasi avem
inimici mei gratis.
⁵³SADE. Perdiderunt in lacu vitam meam
et iecerunt lapides super me.
⁵⁴SADE. Inundaverunt aquae super caput meum,
dixi: “ Perii ”.
⁵⁵COPH. Invocavi nomen tuum, Domine,
de profunditate lacus.
⁵⁶COPH. Vocem meam audisti: “ Ne avertas
aurem tuam a singultu meo et clamoribus ”.
⁵⁷COPH. Appropinquasti in die, quando invocavi te,
dixisti: “ Ne timeas ”.
⁵⁸RES. Iudicasti, Domine, causam animae meae,
redemisti vitam meam.
⁵⁹RES. Vidisti, Domine, afflictionem meam;
iudica iudicium meum.
⁶⁰RES. Vidisti omnem furorem eorum, universas cogitationes eorum adversum me.
⁶¹SIN. Audisti opprobrium eorum, Domine,
omnes cogitationes eorum adversum me.
⁶²SIN. Labia insurgentium mihi et meditationes eorum
adversum me tota die.
⁶³SIN. Sessionem eorum et resurrectionem eorum vide;
ego sum psalmus eorum.
⁶⁴THAU. Reddes eis vicem, Domine,
iuxta opera manuum suarum.
⁶⁵THAU. Dabis eis duritiam cordis,
exsecrationem tuam.
⁶⁶THAU. Persequeris in furore et conteres eos
sub caelis tuis, Domine.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc