Secondo libro delle Cronache ܕܒܪܝܡܝܢ 31

¹ ܘܟܕ ܫܠܡܘ ܗܠܝܢ ܟܠܗܝܢ ܢܦܩܘ ܟܘܠܗ ܥܡܐ ܕܐܝܣܪܝܠ ܕܐܫܬܟܚܘ ܠܩܘܪ̈ܝܐ ܕܒܝܬ ܝܗܘܕܐ ܘܬܒܪܘ ܩܝ̈ܡܬܐ ܘܬܒܪܘ ܢܡܪ̈ܐ ܘܥܩܪܘ ܒܘܡܣ̈ܐ ܘܥܩܪܘ ܥ̈ܠܘܬܐ ܕܐܝܬ ܒܝܗܘܕܐ ܘܒܒܢܝܡܝܢ ܘܒܐܦܪܝܡ ܘܒܡܢܫܐ ܥܕܡܐ ܠܐܝܟܐ ܕܗܦܟܘ ܐܝܣܪܝܠ ܘܐܬܘ ܟܠܗܘܢ ܠܝܪܬܘܬܗܘܢ ܘܥܠܘ ܒܫܠܡܐ ܠܩܘܪ̈ܝܗܘܢ

² ܘܐܩܝܡ ܚܙܩܝܐ ܡܛܪܬܐ ܕܟܗ̈ܢܐ ܘܕܠܘ̈ܝܐ ܥܠ ܡܛܪ̈ܬܗܘܢ ܓܒܪܐ ܐܝܟ ܦܘܠܚܢܗ ܠܟܗ̈ܢܐ ܘܠܠܘ̈ܝܐ ܘܠܥ̈ܠܘܬܐ ܘܠܫܠܡ̈ܐ ܠܡܫܡܫܘ ܘܠܡܘܕܝܘ ܘܠܡܫܒܚܘ ܒܬܪܥܐ ܕܡܪܝܐ

³ ܘܝܗܒ ܡܠܟܐ ܡܢ ܢܟܣ̈ܘܗܝ ܥܠܘ̈ܬܐ ܕܬܘܪ̈ܐ ܕܨܦܪܐ ܘܕܪܡܫܐ ܘܥܠܘ̈ܬܐ ܕܫܒ̈ܐ ܘܕܪܝܫ ܝܪ̈ܚܐ ܘܕܥ̈ܐܕܐ ܘܐܡܪ ܠܥܡܐ ܐܝܟܢܐ ܕܟܬܝܒ ܒܢܡܘܣܗ ܕܡܪܝܐ

⁴ ܘܐܡܪ ܠܐܝܣܪܝܠ ܕܥ̇ܡܪܝܢ ܒܐܘܪܫܠܡ ܠܡܬܠ ܙܕܩܐ ܕܟܗ̈ܢܐ ܘܕܠܘ̈ܝܐ ܡܛܠ ܕܚܝܠ ܐܢܘܢ ܒܢܡܘܣܗ ܕܡܪܝܐ

⁵ ܘܟܕ ܣܓܝ ܦܬܓܡܐ ܥܠ ܐܝܣܪܝܠ ܡܝܬܝܢ ܗܘܘ ܪ̈ܫܝܬܐ ܕܥܒܘܪܐ ܘܕܚܡܪܐ ܘܕܡܫܚܐ ܘܡܢ ܚܝܘ̈ܬܗܘܢ ܘܡܢ ܥ̈ܠܠܬܐ ܕܚܩܠܐ ܘܚܕ ܡܢ ܥܣܪܐ ܡܝܬܝܢ ܗܘܘ ܣܓܝ

⁶ ܘܒܢ̈ܝ ܐܝܣܪܝܠ ܘܝܗܘܕܐ ܕܝ̇ܬܒܝܢ ܗܘܘ ܒܩܘܪ̈ܝܐ ܕܝܗܘܕܐ ܘܐܦ ܗܢܘܢ ܡܝܬܝܢ ܗܘܘ ܚܕ ܡܢ ܥܣܪܐ ܡܥܣܪ̈ܐ ܡܝܬܝܢ ܗܘܘ ܘܡܩܪܒܝܢ ܗܘܘ ܠܡܪܝܐ ܐܠܗܗܘܢ ܡܝܬܝܢ ܗܘܘ ܪ̈ܫܝܬܐ ܥܠ ܪ̈ܫܝܬܐ ܕܥܒܘܪܐ ܘܕܚܡܪܐ ܘܕܡܫܚܐ ܘܡܢ ܚܝܘ̈ܬܗܘܢ ܘܡܢ ܥ̈ܠܠܬܐ ܕܚܩܠܐ ܘܚܕ ܡܢ ܥܣܪܐ ܡܝܬܝܢ ܗܘܘ ܘܡܩܕܫܝܢ ܗܘܘ ܠܡܪܝܐ ܐܠܗܗܘܢ

⁷ ܘܒܝܪܚܐ ܕܬܠܬܐ ܐܫܬܟܚܬ ܪܫܝܬܐ ܣܘܓܐܐ ܕܛܒ ܘܒܝܪܚܐ ܕܫܒܥܐ

⁸ ܢܣܒ ܚܙܩܝܐ ܘܦܠܓܗ̇ ܠܟܗ̈ܢܐ ܘܠܠܘ̈ܝܐ ܘܚܙܐ ܚܙܩܝܐ ܘܪ̈ܘܪܒܢܐ ܠܪܫܝܬܐ ܗ̇ܝ ܕܟܗ̈ܢܐ ܕܣܓܝܬ ܛܒ ܘܒܪܟܘ ܠܡܪܝܐ ܘܨܠܝܘ ܥܠ ܐܝܣܪܝܠ

⁹ ܘܨܠܝ ܚܙܩܝܐ ܥܠ ܟܗ̈ܢܐ ܘܥܠ ܠܘ̈ܝܐ ܥܠ ܪܫܝܬܐ ܕܣܓܝܬ

¹⁰ ܘܐܡܪ ܠܗ ܠܥܙܪܝܐ ܟܗܢܐ ܪܒܐ ܡܢ ܕܒܝܬ ܨܕܘܩ ܘܐܡܪ ܠܗ ܫܪܝܐ ܗܝ ܠܟܘܢ ܪܫܝܬܐ ܗܕܐ ܠܡܐܟܠ ܡܛܠ ܕܠܒܝܬܗ ܕܡܪܝܐ ܥܠܬ ܐܟܘܠܘ ܘܣܒܥܘ ܘܕܝ̇ܬܪ ܡܢܗ̇ ܗܒܘ ܠܡܣ̈ܟܢܐ ܘܠܒ̇ܝ̈ܫܐ ܡܛܠ ܕܡܪܝܐ ܒܪܟ ܠܥܡܗ ܘܝܗܒ ܠܗܘܢ ܗܢܐ ܣܘܓܐܐ ܘܕܝ̇ܬܪ ܝܗܒܘ ܠܥܡܐ ܕܐܝܣܪܝܠ ܟܠܗ

¹¹ ܘܐܡܪ ܚܙܩܝܐ ܠܡܛܝܒܘ ܕܪ̈ܐ ܒܒܝܬܗ ܕܡܪܝܐ ܘܛܝܒܘ

¹² ܘܐܝܬܝܘ ܪܫܝܬܐ ܚܕ ܡܢ ܥܣܪ̈ܐ ܘܩܘܕ̈ܫܐ ܒܗܝܡܢܘܬܐ ܘܥܠܝܗܘܢ ܐܝܬ ܗܘܘ ܫܠܝ̈ܛܐ ܟܢܥܝܐ ܠܘܝܐ ܘܫܡܥܝ ܐܚܘܗܝ ܬܢܝܢܐ

¹³ ܘܢܚܐܝܠ ܘܥܘܙܝܐ ܘܢܚܬ ܘܥܫܐܝܠ ܘܝܪܡܘܬ ܘܝܘܙܒܪ ܘܐܠܝܠ ܘܣܡܟܝܐ ܘܡܬܚ ܘܒܢܝܐ ܘܫܡܥܝܐ ܐܚܘܗܝ ܗܠܝܢ ܟܠܗܘܢ ܫܠܝܛܝܢ ܗܘܘ ܥܠ ܐܝܕܐ ܕܟܢܥܝܐ ܐܝܟ ܫܘܠܛܢܐ ܕܚܙܩܝܐ ܡܠܟܐ ܘܥܙܪܝܐ ܪܒܝܬܗ ܕܡܪܝܐ

¹⁴ ܘܩܪܝܐ ܒܪ ܝܡܢܐ ܠܘܝܐ ܢܛ̇ܪ ܬܪܥܐ ܡܕܢܚܝܐ ܫܠܝܛ ܗܘܐ ܥܠ ܩܘܪ̈ܒܢܐ ܕܡܪܝܐ ܘܥܠ ܩܕܘܫ ܩܘܕ̈ܫܐ

¹⁵ ܘܠܗ ܡܫܠܡܝܢ ܗܘܘ ܥܕܘܢ ܘܒܢܝܡܝܢ ܘܝܫܘܥ ܘܫܡܥܝܐ ܘܐܡܪܝܐ ܘܫܟܢܝܐ ܒܩܘܪ̈ܝܐ ܕܟܗ̈ܢܐ ܒܗܝܡܢܘܬܐ ܠܡܬܠ ܠܐܚܝ̈ܗܘܢ ܦܠܓܘ̈ܬܐ ܠܪܒܐ ܐܝܟ ܙܥܘܪܐ

¹⁶ ܠܒܪ ܡܢ ܕܙ̇ܕܩ ܠܕܟܪܐ ܡܢ ܒܪ ܬܠܬ ܫܢ̈ܝܢ ܘܠܥܠ ܠܟܠ ܡ̇ܢ ܕܥܐ̇ܠ ܠܒܝܬܗ ܕܡܪܝܐ ܚܘܫܒܢ ܝܘܡ ܒܝܘܡܗ ܠܦܘܠܚܢܗܘܢ ܒܡܛܪ̈ܬܗܘܢ ܒܦܠܓܘ̈ܬܗܘܢ

¹⁷ ܘܡܫܚܐ ܘܚ̇ܡܪܐ ܡܬܝܗܒ ܠܟ̈ܗܢܐ ܘܠܠܘ̈ܝܐ ܠܒܝܬ ܐܒܗ̈ܝܗܘܢ ܡܢ ܒܪ ܥܣܪܝܢ ܫܢ̈ܝܢ ܘܠܥܠ ܒܡܛܪ̈ܬܗܘܢ ܒܦܠܓܘ̈ܬܗܘܢ

¹⁸ ܘܡܫܚܐ ܡܬܝܗܒ ܠܢܦܛܪ̈ܝܗܘܢ ܘܠܢܫ̈ܝܗܘܢ ܘܠܒܢ̈ܝܗܘܢ ܘܠܒܢ̈ܬܗܘܢ ܘܠܟܠ ܥܡܐ ܕܐܝܣܪܝܠ ܕܒܗܝܡܢܘܬܐ ܡܬܩܕܫܝܢ ܗܘܘ ܡܛܠ ܕܩܕܝܫܝܢ ܗܘܘ

¹⁹ ܒܢܘ̈ܗܝ ܕܐܗܪܘܢ ܟܗܢܐ ܩܕܝܫ ܗܘܐ ܒܣܪܗܘܢ ܘܠܘܬ ܢܫ̈ܐ ܠܐ ܡܬܩܪܒܝܢ ܗܘܘ ܘܡܬܟܪܟܝܢ ܗܘܘ ܒܟܠ ܩܪܐ ܘܩܪܐ ܓܒܪ̈ܐ ܐܝܠܝܢ ܕܝܕܝܥܝܢ ܫܡܗ̈ܝܗܘܢ ܕܢܬܠܘܢ ܙܕܩܐ ܠܟܠ ܕܟܪܐ ܕܐܝܬ ܒܟܗ̈ܢܐ ܘܠܟܠܗܝܢ ܫܪ̈ܒܬܐ ܕܠܘ̈ܝܐ

²⁰ ܘܥܒܕ ܗܟܢܐ ܚܙܩܝܐ ܒܟܠܗ ܝܗܘܕܐ ܘܥܒܕ ܕܛܒ ܘܕܫܦܝܪ ܘܗܠܟ ܒܩܘܫܬܐ ܩܕܡ ܡܪܝܐ

²¹ ܒܟܘܠܗܘܢ ܥܒ̇ܕ̈ܘܗܝ ܕܫܪܝ ܗܘܐ ܠܡܥܒܕ ܒܒܝܬܗ ܕܡܪܝܐ ܘܒܢܡܘܣܐ ܘܒܦܘܩܕܢܐ ܠܡܬܒܥ ܠܐܠܗܗ ܒܟܠܗ ܠܒܗ ܘܥܒܕ ܘܐܟܫܪ