Secondo libro delle Cronache ܕܒܪܝܡܝܢ 36

¹ܘܕܒܪܘ ܥܡܐ ܕܐܪܥܐ ܠܝܗܘܐܚܙ ܒܪ ܝܘܫܝܐ ܘܐܩܝܡܘܗܝ ܒܡܠܟܘܬܐ ܒܬܪ ܐܒܘܗܝ ܒܐܘܪܫܠܡ²ܒܪ ܥܣܪ̈ܝܢ ܗܘܐ ܘܬܠܬ ܫܢ̈ܝܢ ܝܗܘܐܚܙ ܟܕ ܩܡ ܒܡܠܟܘܬܐ ܘܬܠܬܐ ܝܪ̈ܚܝܢ ܐܡܠܟ ܒܐܘܪܫܠܡ³ܘܐܥܒܪܗ ܡܠܟܐ ܕܡܨܪܝܢ⁴ܘܐܩܝܡ ܠܐܠܝܩܝܡ ܐܚܘܗܝ ܥܠ ܕܒܝܬ ܝܗܘܕܐ ܘܥܠ ܥܡܘܪ̈ܝܗ̇ ܕܐܘܪܫܠܡ ܘܫܡܝ ܫܡܗ ܝܘܝܩܝܡ ܘܠܝܗܘܐܚܙ ܐܚܘܗܝ ܕܒܪ ܦܪܥܘܢ ܚܓܝܪܐ ܘܐܘܒܠܗ ܠܡܨܪܝܢ ܘܡܝܬ ܬܡܢ⁵ܒܪ ܥܣܪܝܢ ܘܚܡܫ ܫܢ̈ܝܢ ܝܘܝܩܝܡ ܟܕ ܩܡ ܒܡܠܟܘܬܐ ܘܚܕܥܣܪܐ ܫܢ̈ܝܢ ܐܡܠܟ ܒܐܘܪܫܠܡ ܘܥܒܕ ܕܒܝܫ ܩܕܡ ܡܪܝܐ ܐܠܗܗ⁶ܥܠܘܗܝ ܣܠܩ ܢܒܘܟܕܢܨܪ ܡܠܟܐ ܕܒܒܠ ܘܐܣܪܗ ܒܫܫ̈ܠܬܐ ܠܡܘܒܠܘܬܗ ܠܒܒܠ⁷ܘܡܢ ܟܘܠܗܘܢ ܡܐ̈ܢܝ ܒܝܬܐ ܐܝܬܝ ܢܒܘܟܕܢܨܪ ܠܒܒܠ ܘܝܗܒ ܐܢܘܢ ܒܗܝܟܠܗ ܒܒܒܠ⁸ܘܫܪܟܐ ܕܦܬܓܡܘ̈ܗܝ ܕܝܘܝܩܝܡ ܘܣܢܝ̈ܬܐ ܕܥܒܕ ܗܐ ܗ̈ܢܝܢ ܟܬܝ̈ܒܢ ܥܠ ܣܦ̣ܪ̈ܐ ܕܡ̈ܠܟܐ ܕܐܝܣܪܝܠ ܘܕܝܗܘܕܐ ܘܐܡܠܟ ܝܘܝܟܝܢ ܒܪܗ ܒܬܪܗ⁹ܒܪ ܬܡܢܥܣܪܐ ܗܘܐ ܫܢ̈ܝܢ ܝܘܝܟܝܢ ܟܕ ܩܡ ܒܡܠܟܘܬܐ ܘܡܐܐ ܝܘܡ̈ܝܢ ܐܡܠܟ ܒܐܘܪܫܠܡ ܘܥܒܕ ܕܒܝ̣ܫ ܩܕܡ ܡܪܝܐ¹⁰ܘܠܚܪܬܗ̇ ܕܫܢܬܐ ܫܕܪ ܥܠܘܗܝ ܢܒܘܟܕܢܨܪ ܡܠܟܐ ܕܒܒܠ ܘܐܝܬܝܗ ܠܒܒܠ ܠܗ ܘܠܡܐ̈ܢܝ ܪܓܬܐ ܕܗܘܘ ܒܒܝܬܗ ܕܡܪܝܐ ܘܐܩܝܡ ܠܨܕܩܝܐ ܕܕܗ ܒܡܠܟܘܬܐ ܥܠ ܝܗܘܕܐ ܘܥܠ ܐܘܪܫܠܡ¹¹ܒܪ ܥܣܪ̈ܝܢ ܗܘܐ ܘܚܕܐ ܫܢ̈ܝܢ ܨܕܩܝܐ ܟܕ ܩܡ ܒܡܠܟܘܬܐ ܘܚܕܥܣܪܐ ܫܢ̈ܝܢ ܐܡܠܟ ܒܐܘܪܫܠܡ¹²ܘܥܒܕ ܕܒܝ̣ܫ ܩܕܡ ܡܪܝܐ ܐܠܗܗ ܘܠܐ ܕܚܠ ܡܢ ܐܪܡܝܐ ܢܒܝܐ ܕܡܬܢܒܐ ܗܘܐ ܐܝܟ ܕܡܢ ܦܘܡܗ ܕܡܪܝܐ¹³ܘܐܦ ܥܠ ܢܒܘܟܕܢܨܪ ܡܪܕ ܕܝܡܐ ܗܘܐ ܠܗ ܒܫܡܗ ܕܡܪܝܐ ܘܩܫܝ ܩܕܠܗ ܘܩܫܝ ܠܒܗ ܘܠܐ ܨܒܐ ܠܡܨܠܝܘ ܩܕܡ ܡܪܝܐ ܐܠܗܐ ܕܐܝܣܪܝܠ¹⁴ܘܐܦ ܩܫܝ̈ܫܐ ܕܟܗ̈ܢܐ ܘܕܠܘ̈ܝܐ ܘܕܥܡܐ ܐܣܓܝܘ ܠܡܟܕܒܘ ܟܕܒܘܬܐ ܐܝܟ ܟܠܗܘܢ ܥ̇ܒ̈ܕܐ ܕܥܡ̈ܡܐ ܘܛܡܐܘ ܒܝܬܗ ܕܡܪܝܐ ܩܕܝܫܐ ܕܒܐܘܪܫܠܡ¹⁵ܘܫܕܪ ܡܪܝܐ ܐܠܗܐ ܕܐܒܗ̈ܝܗܘܢ ܥܠܝܗܘܢ ܒܐܝܕܐ ܕܡܠܐܟ̈ܘܗܝ ܡܩܕܡܝܢ ܘܡܚܫܟܝܢ ܡܛܠ ܕܚܣ ܥܠ ܥܡܗ ܘܥܠ ܥ̈ܢܐ ܕܓܒܐ¹⁶ܘܗܘܘ ܓܚ̇ܟܝܢ ܥܠ ܡܠܐܟ̈ܘܗܝ ܕܡܪܝܐ ܘܡܒܣܪܝܢ ܥܠ ܡܠܝ̈ܗܘܢ ܘܓܚ̇ܟܝܢ ܥܠ ܢܒܝܘ̈ܗܝ ܥܕܡܐ ܕܣܠܩܬ ܚܡܬܗ ܕܡܪܝܐ ܒܥܡܗ ܥܕܡܐ ܠܐܝܟܐ ܕܠܐ ܗܘܬ ܠܗܘܢ ܐܣܝܘ¹⁷ܘܐܣܩ ܥܠܝܗܘܢ ܠܡܠܟܐ ܕܟܠܕ̈ܝܐ ܘܩܛܠ ܥܠܝܡ̈ܝܗܘܢ ܒܚܪܒܐ ܒܝܬ ܡܩܕܫܗܘܢ ܘܠܐ ܚܣ ܥܠ ܓܕܘܕ̈ܐ ܘܥܠ ܒܬܘ̈ܠܬܐ ܘܥܠ ܩܫܝ̈ܫܐ ܐܦ ܠܐ ܥܠ ܝܢ̇ܩ̈ܝ ܚܠܒܐ ܟܠܗܘܢ ܐܫܠܡ ܒܐܝܕܗ¹⁸ܘܟܘܠ ܡܐ̈ܢܝ ܒܝܬܗ ܕܡܪܝܐ ܪ̈ܘܪܒܐ ܘܕܩܕ̈ܩܐ ܘܓܙܐ ܕܒܝܬܗ ܕܡܪܝܐ ܘܓܙܐ ܕܡܠܟܐ ܘܕܫܠܝܛܢ̈ܘܗܝ ܟܠܗ ܐܘܒܠ ܠܒܒܠ¹⁹ܘܐܘܩܕܗ ܠܒܝܬܗ ܕܡܪܝܐ ܘܥܩܪ ܫܘܪ̈ܝܗ̇ ܕܐܘܪܫܠܡ ܘܟܠܗܝܢ ܣܚܪ̈ܬܗ̇ ܐܘܩܕ ܒܢܘܪܐ ܘܟܠ ܡܐ̈ܢܐ ܕܪܓܬܐ ܚܒܠ²⁰ܘܐܦܩ ܒܫܒܝܐ ܠܐܝܠܝܢ ܕܦܠܛܘ ܡܢ ܚܪܒܐ ܠܒܒܠ ܘܗܘܘ ܠܗ ܥܒ̣̈ܕܐ ܘܠܒܢ̈ܘܗܝ ܥܕܡܐ ܠܐܝܟܐ ܕܐܫܠܡ ܡܠܟܘܬܐ ܠܦܪ̈ܣܝܐ²¹ܕܬܫܠܡ ܡܠܬܗ ܕܡܪܝܐ ܕܡܠܠ ܗܘܐ ܐܪܡܝܐ ܢܒܝܐ ܥܕܡܐ ܕܬܬܢܝܚ ܐܪܥܐ ܒܫܒ̈ܝܗ̇ ܟܠ ܝܘܡ̈ܬܐ ܕܬܨܕܐ ܠܡܫܠܡ ܫܒܥܝܢ ܫܢ̈ܝܢ²²ܒܫܢܬ ܚܕܐ ܠܟܘܪܫ ܡܠܟܐ ܦܪܣܝܐ ܕܬܫܠܡ ܡܠܬܗ ܕܡܪܝܐ ܒܦܘܡܗ ܕܐܪܡܝܐ ܢܒܝܐ ܐܥܝܪ ܡܪܝܐ ܪܘܚܗ ܕܟܘܪܫ ܡܠܟܐ ܦܪܣܝܐ ܘܐܥܒܪ ܩܠܐ ܒܟܠܗ̇ ܡܠܟܘܬܗ ܘܐܦ ܒܟܬܒܐ ܐܡܝܪ ܗܘܐ ܫܡܗ²³ܗܟܢܐ ܐܡ̇ܪ ܟܘܪܫ ܡܠܟܐ ܦܪܣܝܐ ܟܘܠ ܡܠܟܘ̈ܬܐ ܕܐܪܥܐ ܝܗܒ ܠܝ ܡܪܝܐ ܐܠܗܐ ܕܫܡܝܐ ܘܗܘ ܦܩܕ ܥܠܝ ܕܐܒܢܐ ܠܗ ܒܝܬܐ ܒܐܘܪܫܠܡ ܕܒܝܗܘܕ ܡܢܘ ܐܝܬ ܒܟܘܢ ܡܢ ܟܠܗ ܥܡܐ ܕܡܪܝܐ ܐܠܗܗ ܨ̇ܒܐ ܒܗ ܢܣܩ ܢܐܬܐ ܠܘܬܝ

Cambia Bibbia

Confronta con un'altra Bibbia

Versetti esaminati