Secondo libro delle Cronache ܕܒܪܝܡܝܢ 7

¹ ܘܟܕ ܓܡܪ ܫܠܝܡܘܢ ܠܡܨܠܝܘ ܢܘܪܐ ܢܚܬܬ ܡܢ ܫܡܝܐ ܘܐܟܠܬ ܥܠܘ̈ܬܐ ܘܕܒ̈ܚܐ ܘܐܝܩܪܐ ܕܫܟܝܢܬܗ ܕܡܪܝܐ ܐܬܡܠܝ ܒܝܬܐ

² ܘܠܐ ܡܫܟܚܝܢ ܗܘܘ ܟܗ̈ܢܐ ܠܡܥܠ ܠܒܝܬܗ ܕܡܪܝܐ ܡܛܠ ܕܐܬܡܠܝ ܠܗ ܒܝܬܐ ܐܝܩܪ ܫܟܝܢܬܗ ܕܡܪܝܐ

³ ܘܟܠ ܒܢ̈ܝ ܐܝܣܪܝܠ ܚܙ̇ܝܢ ܗܘܘ ܟܕ ܢܚܬܬ ܢܘܪܐ ܘܐܝܩܪ ܫܟܝܢܬܗ ܕܡܪܝܐ ܐܬܡܠܝ ܒܝܬܐ ܘܢܦܠܘ ܥܠ ܐܦܝ̈ܗܘܢ ܥܠ ܐܪܥܐ ܥܠ ܪ̈ܨܝܦܬܐ ܘܣܓܕܘ ܘܐܡ̇ܪܝܢ ܓܒܪ ܠܚܒܪܗ ܐܘܕܘ ܠܡܪܝܐ ܕܛܒ ܗܘ ܘܠܥܠܡ ܛܝܒܘܬܗ

⁴ ܘܡܠܟܐ ܘܟܘܠܗ ܥܡܐ ܡܕܒܚܝܢ ܕܒܚ̈ܐ ܠܡܪܝܐ

⁵ ܘܕܒܚ ܡܠܟܐ ܫܠܝܡܘܢ ܕܒܚܬܐ ܬܘܪ̈ܐ ܥܣܪܝܢ ܘܬܪܝܢ ܐ̈ܠܦܝܢ ܘܥܢܐ ܡܐܐ ܘܥܣܪܝܢ ܐ̈ܠܦܝܢ ܘܚܕܬܘ ܒܝܬܗ ܕܡܪܝܐ ܡܠܟܐ ܫܠܝܡܘܢ ܘܟܠܗ ܥܡܐ

⁶ ܘܟܗ̈ܢܐ ܩ̇ܝܡܝܢ ܗܘܘ ܥܠ ܬܫܡܫܬܗܘܢ ܘܠܘ̈ܝܐ ܒܡܐ̈ܢܐ ܕܬܫܒ̈ܚܬܐ ܡܫܒܚܝܢ ܗܘܘ ܩܕܡ ܡܪܝܐ ܘܗܟܢܐ ܐܡ̇ܪܝܢ ܗܘܘ ܒܬܫܒܚ̈ܬܗܘܢ ܐܘܕܘ ܠܡܪܝܐ ܕܛܒ ܗܘ ܘܠܥܠܡ ܛܝܒܘܬܗ ܒܬܫܒܚ̈ܬܐ ܕܕܘܝܕ ܘܟܗ̈ܢܐ ܡܫܒܚܝܢ ܗܘܘ ܒܩܪ̈ܢܬܐ ܟܦܝ̈ܦܬܐ ܘܦܫܝ̈ܛܬܐ ܘܟܠܗ ܥܡܐ ܕܐܝܣܪܝܠ ܩܐ̇ܡ

⁷ ܘܩܕܫ ܫܠܝܡܘܢ ܓܘܗ̇ ܕܕܪܬܐ ܕܐܝܬ ܩܕܡ ܒܝܬܗ ܕܡܪܝܐ ܡܛܠ ܕܐܣܩ ܠܬܡܢ ܕܒܚ̈ܐ ܘܬܪܒܐ ܕܫܠܡ̈ܐ ܡܛܠ ܕܡܕܒܚܐ ܕܢܚܫܐ ܕܥܒܕ ܫܠܝܡܘܢ ܙܥܘܪ ܗܘܐ ܘܠܐ ܡܫܟܚ ܗܘܐ ܠܡܣܝܒܪܘ ܕܒܚ̈ܐ ܘܢܫܝܦܐ ܘܬܪܒܐ ܕܫ̈ܠܡܐ

⁸ ܘܥܒܕ ܫܠܝܡܘܢ ܒܗ ܒܙܒܢܐ ܗ̇ܘ ܥܐܕܐ ܫܒܥܐ ܝܘܡ̈ܝܢ ܘܟܠܗ ܐܝܣܪܝܠ ܥܡܗ ܟܢܘܫ̈ܬܐ ܪ̈ܘܪܒܬܐ ܡܢ ܐܢܛܝܘܟ ܘܥܕܡܐ ܠܢܚܠܐ ܕܡܨܪܝܢ ܩܕܡ ܡܪܝܐ ܐܠܗܢ

⁹ ܫܒܥܐ ܝܘܡ̈ܝܢ ܕܥܐܕܐ ܘܫܒܥܐ ܝܘܡ̈ܝܢ ܕܚܘܕܬܗ ܕܒܝܬܐ ܗܠܝܢ ܘܗܠܝܢ ܗܘܐ ܚܘܫܒܢܗܘܢ ܐܪܒܬܥܣܪ ܝܘܡ̈ܝܢ

¹⁰ ܘܒܝܘܡܐ ܕܟܣܐܐ ܒܗ ܒܝܪܚܐ ܕܬܫܪܝ ܫܕܪ ܡܠܟܐ ܠܥܡܐ ܘܒܪܟܘ ܠܡܠܟܐ ܥܡܐ ܘܐܙܠܘ ܠܩܘܪ̈ܝܗܘܢ ܟܕ ܚ̇ܕܝܢ ܘܛܒ ܠܒܗܘܢ ܘܡܘܕܝܢ ܘܡܫܒܚܝܢ ܥܠ ܟܠܗܝܢ ܛܒ̈ܬܐ ܕܥܒܕ ܡܪܝܐ ܠܕܘܝܕ ܥܒ̣ܕܗ ܘܠܫܠܝܡܘܢ ܒܪܗ ܘܠܐܝܣܪܝܠ ܥܡܗ

¹¹ ܘܗܘܐ ܕܟܕ ܫܠܡ ܡܠܟܐ ܫܠܝܡܘܢ ܠܡܒܢܐ ܒܝܬܗ ܕܡܪܝܐ ܘܠܒܝܬܐ ܕܡܠܟܐ ܘܟܠܡܕܡ ܕܡܬܪܥܐ ܗܘܐ ܫܠܝܡܘܢ ܠܡܥܒܕ ܒܒܝܬܗ ܕܡܪܝܐ ܘܒܒܝܬܗ ܕܡܠܟܐ ܡܟܫܪ ܗܘܐ

¹² ܘܐܬܓܠܝ ܡܪܝܐ ܥܠ ܫܠܝܡܘܢ ܒܠܠܝܐ ܗ̇ܘ ܘܐܡܪ ܠܗ ܫܡܥܬ ܨܠܘܬܟ ܘܓܒܝܬ ܕܘܟܬܐ ܗܕܐ ܠܝ ܠܒܝܬܐ ܕܕܒܚܬܐ

¹³ ܐܢ ܐܨܒܐ ܐܟܠܐ ܫܡܝܐ ܘܠܐ ܢܚܘܬ ܡܛܪܐ ܘܐܢ ܐܨܒܐ ܐܦܩܘܕ ܥܠ ܩܡܨܐ ܘܢܐܟܠܝܗ̇ ܠܐܪܥܐ ܘܐܢ ܐܨܒܐ ܐܓܪܐ ܡܘܬܢܐ ܒܥܡܝ

¹⁴ ܘܢܬܬܒܪܘܢ ܥܡܝ ܕܐܬܩܪܝ ܫܡܝ ܥܠܝܗܘܢ ܘܢܨܠܘܢ ܘܢܒܥܘܢ ܡܢ ܩܕܡܝ ܘܢܗܦܟܘܢ ܡܢ ܐܘܪ̈ܚܬܗܘܢ ܒܝ̣̈ܫܬܐ ܘܐܢܐ ܐܫܡܥ ܡܢ ܫܡܝܐ ܘܐܫܒܘܩ ܠܚܛܗ̈ܝܗܘܢ ܘܐܣܐ ܐܪܥܗܘܢ

¹⁵ ܘܐܦ ܗܫܐ ܥ̈ܝܢܝ ܢܗ̈ܘܝܢ ܦܬܝ̈ܚܢ ܘܐܕ̈ܢܝ ܨܝ̈ܬܢ ܠܨܠܘܬܐ ܕܕܘܟܬܐ ܗܕܐ

¹⁶ ܘܐܦ ܗܫܐ ܓܒܝܬ ܠܝ ܒܝܬܐ ܗܢܐ ܕܬܗܘܐ ܒܗ ܫܟܝܢܬܝ ܠܥܠܡ ܢܗܘܘܢ ܥܒܕ̈ܝ ܫܦܝܪ̈ܐ ܘܨܒܝ̈ܢܝ ܡܬܥܒܕܝܢ ܒܓܘܗ ܟܠܗܘܢ ܝܘ̈ܡܬܐ

¹⁷ ܘܐܢܬ ܐܢܗܘ ܕܬܗܠܟ ܩܕܡܝ ܐܝܟܢܐ ܕܗܠܟ ܕܘܝܕ ܐܒܘܟ ܒܬܡܝܡܘܬܐ ܕܠܒܐ ܘܒܬܪܝܨܘܬܐ ܠܡܥܒܕ ܟܠܡܕܡ ܕܦܩܕܬܟ ܘܦܘ̈ܩܕܢܝ ܘܢܡܘ̈ܣܝ ܬܛܪ

¹⁸ ܐܫܪܝܘܗܝ ܟܘܪܣܝܐ ܕܡܠܟܘܬܟ ܠܥܠܡ ܐܝܟ ܕܝܡܝܬ ܠܕܘܝܕ ܐܒܘܟ ܘܐܡܪܬ ܠܗ ܕܠܐ ܢܥܢܕ ܠܟ ܒܪܐ ܡܢ ܩܕܡܝ ܕܩܐ̇ܡ ܥܠ ܡܠܟܘܬܐ ܕܐܝܣܪܝܠ

¹⁹ ܘܐܢ ܡܗܦܟ ܬܗܦܟܘܢ ܐܢܬܘܢ ܘܒܢܝ̈ܟܘܢ ܡܢ ܐܘܪܚܝ ܘܠܐ ܬܛܪܘܢ ܦܘܩ̈ܕܢܝ ܘܢܡܘ̈ܣܝ ܕܝܗܒܬ ܩܕܡܝܟܘܢ ܘܬܦܠܚܘܢ ܠܦܬܟܪ̈ܐ ܕܥܡ̈ܡܐ ܘܬܣܓܕܘܢ ܠܗܘܢ

²⁰ ܐܒܕܪܟܘܢ ܡܢ ܐܪܥܐ ܕܝܗܒܬ ܠܟܘܢ ܘܒܝܬܐ ܗܢܐ ܕܩܕܫܬ ܠܫܡܝ ܐܥܩܪܝܘܗܝ ܡܢ ܩܕܡܝ ܘܢܗܘܐ ܐܝܣܪܝܠ ܠܡܬܠܐ ܘܠܬܫܥܝܬܐ ܒܝܬ ܟܠܗܘܢ ܥܡܡ̈ܐ

²¹ ܘܒܝܬܐ ܗܢܐ ܢܗܘܐ ܚ̇ܪܒ ܘܟܠ ܡ̇ܢ ܕܢܥܒܪ ܥܠܘܗܝ ܢܩܘܡ ܘܢܢܝܕ ܪܝܫܗ ܘܢܢܝܦ ܒܐܝܕܗ ܘܢܐܡܪܘܢ ܡܛܠ ܡܢܐ ܥܒܕ ܡܪܝܐ ܗܟܢܐ ܠܩܪܝܬܐ ܗܕܐ ܪܒܬܐ ܘܠܒܝܬܐ ܗܢܐ

²² ܘܢܐܡܪܘܢ ܥܠ ܕܫܒܩܘ ܕܝܬܩܐ ܕܡܪܝܐ ܐܠܗܐ ܕܐܒܗ̈ܬܗܘܢ ܕܐܦܩ ܐܢܘܢ ܡܢ ܐܪܥܐ ܕܡܨܪܝܢ ܘܐܙܠܘ ܕܚܠܘ ܠܐܠܗ̈ܐ ܕܥܡ̈ܡܐ ܘܦܠܚܘ ܐܢܘܢ ܘܣܓܕܘ ܠܗܘܢ ܡܛܠ ܗܢܐ ܐܝܬܝ ܡܪܝܐ ܥܠܝܗܘܢ ܒܝܫ̈ܬܐ ܗܠܝܢ