Secondo libro delle Cronache ܕܒܪܝܡܝܢ 19

¹ ܘܗܦܟ ܝܗܘܫܦܛ ܠܐ̈ܦܝ ܪܡܫܐ ܠܒܝܬܗ ܒܫܠܡܐ ܠܐܘܪܫܠܡ

² ܘܢܦܩ ܠܐܘܪܥܗ ܒܪ ܚܢܢ ܚܙܝܐ ܘܐܡܪ ܠܡܠܟܐ ܝܗܘܫܦܛ ܠܡܥܕܪܘ ܠܪܫܝܥܐ ܐܙܠܬ ܘܠܣ̈ܢܐܘܗܝ ܕܡܪܝܐ ܪܚܡܬ ܡܛܘܠ ܗܢܐ ܪܓܙ ܡܪܝܐ ܥܠܝܟ

³ ܐܠܐ ܡܗܝܡܢ ܐܢܐ ܕܦܬܓ̈ܡܐ ܛܒ̈ܐ ܐܫܬܡܥܘ ܡܢܟ ܡܛܠ ܕܕܡܐ ܙܟܝܐ ܠܐ ܐܫܕܬ ܒܐܪܥܐ ܘܐܬܩܢܬ ܠܒܟ ܠܡܨܠܝܘ ܩܕܡ ܡܪܝܐ ܒܩܘܫܬܐ

⁴ ܘܝܬܒ ܝܗܘܫܦܛ ܒܐܘܪܫܠܡ ܘܗܦܟ ܘܢܦܩ ܡܢ ܒܪܫܒܥ ܡܕܝܢܬܐ ܘܡܛܝ ܠܛܘܪܐ ܕܐܦܪܝܡ ܘܐܗܦܟ ܐܢܘܢ ܠܡܕܚܠ ܩܕܡ ܡܪܝܐ ܐܠܗܐ ܕܐܒܗ̈ܬܗܘܢ

⁵ ܘܐܩܝܡ ܕܝ̈ܢܐ ܒܐܪܥܐ ܒܟܠܗܝܢ ܩܘܪ̈ܝܐ ܕܝܗܘܕܐ ܥܫܝ̈ܢܬܐ ܘܒܩܘܪ̈ܝܐ ܓܢܒܪ̈ܬܐ

⁶ ܘܐܡܪ ܠܕ̇ܝ̈ܢܐ ܚܙܘ ܡܢܐ ܥ̇ܒܕܝܢ ܐܢܬܘܢ ܕܠܐ ܗܘܐ ܠܒܢ̈ܝ ܐܢܫܐ ܕܝ̇ܢܝܢ ܐܢܬܘܢ ܐܠܐ ܠܡܪܝܐ ܐܠܗܢ ܘܐܬܥܫܢܘ ܘܕܘܢܘ ܕܝ̣ܢܐ ܕܩܘܫܬܐ ܘܢܗܘܐ ܡܪܝܐ ܥܡܟܘܢ ܠܥܠܡ

⁷ ܘܛܪܘ ܘܥܒܕܘ ܡܛܠ ܕܠܝܬ ܩܕܡ ܡܪܝܐ ܐܠܗܢ ܥܘ̣ܠܐ ܘܡܣܒ ܒܐ̈ܦܐ ܘܩܘܒܠܐ ܕܫܘܚܕܐ

⁸ ܘܐܦ ܒܐܘܪܫܠܡ ܐܩܝܡ ܝܗܘܫܦܛ ܡܢ ܠܘ̈ܝܐ ܘܡܢ ܟܗ̈ܢܐ ܘܡܢ ܪ̈ܝܫܐ ܕܐܒܗ̈ܬܐ ܕܒܢ̈ܝ ܐܝܣܪܝܠ ܠܕܝ̣ܢܐ ܕܡܪܝܐ ܘܗܦܟ ܠܐܘܪܫܠܡ

⁹ ܘܦܩܕ ܐܢܘܢ ܘܐܡܪ ܠܗܘܢ ܗܟܢܐ ܬܥܒܕܘܢ ܠܕܚܠܬܗ ܕܡܪܝܐ ܒܗܝܡܢܘܬܐ ܘܒܠܒܐ ܫܠܡܐ

¹⁰ ܟܠ ܕܝ̣ܢܐ ܕܐܬ̇ܐ ܠܘܬܟܘܢ ܡܢ ܐܚܝ̈ܟܘܢ ܕܝܬ̇ܒܝܢ ܒܩܘܪ̈ܝܟܘܢ ܒܝܬ ܕܡܐ ܠܕܡܐ ܘܒܝܬ ܢܡܘܣܐ ܠܦܘܩܕܢܐ ܘܠܕܝ̣ܢܐ ܘܬܙܗܪܘܢ ܐܢܘܢ ܕܠܐ ܢܚܘܒܘܢ ܩܕܡ ܡܪܝܐ ܘܢܪܓܙ ܥܠܝܗܘܢ ܘܥܠ ܐܚܝ̈ܗܘܢ ܗܟܢܐ ܬܥܒܕܘܢ ܘܠܐ ܬܚܘܒܘܢ

¹¹ ܘܗܐ ܐܩܝܡܬ ܥܠܝܟܘܢ ܟܗ̈ܢܐ ܕܢܕܘܢܘܢ ܕܝ̣ܢܐ ܕܩܘܫܬܐ ܘܕܝ̣ܢܐ ܕܗܝܡܢܘܬܐ ܐܝܟ ܦܘܩܕܢܗ ܕܡܪܝܐ ܘܙܟܪܝܐ ܒܪ ܫܡܥܝܐ ܚܘܝ ܠܟܠܗܘܢ ܕܒܝܬ ܝܗܘܕܐ ܟܘܠܗܘܢ ܦܘܩܕ̈ܢܘܗܝ ܕܡܠܟܐ ܘܚܘܝ ܠܣ̇ܦܪ̈ܐ ܘܠܠܘ̈ܝܐ ܘܟܠ ܡܕܡ ܩܕܡܝܗܘܢ ܬܢܝ ܘܐܡܪ ܠܗܘܢ ܐܬܥܫܢܘ ܘܥܒܕܘ ܘܢܗܘܐ ܡܪܝܐ ܒܥܕܪܟܘܢ ܠܥܠܡ