Secondo libro delle Cronache ܕܒܪܝܡܝܢ 15

¹ܘܥܙܪܝܐ ܒܪ ܥܙܘܪ ܫܪܬ ܥܠܘܗܝ ܪܘܚܐ ܡܢ ܩܕܡ ܡܪܝܐ²ܘܢܦܩ ܩܕܡ ܐܣܐ ܘܐܡܪ ܠܗ ܫܡܥܝܢܝ ܐܣܐ ܘܟܠܗ ܝܗܘܕܐ ܘܒܢܝܡܝܢ ܡܪܝܐ ܥܡܟܘܢ ܗܘ ܠܥܠܡ ܥܠܡܝܢ ܐܢ ܬܒܥܘܢܝܗܝ ܢܫܬܟܚ ܠܟܘܢ ܘܐܢ ܬܫܒܩܘܢܗ ܢܫܒܘܩܟܘܢ³ܝܘܡ̈ܬܐ ܣܓ̈ܝܐܐ ܠܐܝܣܪܝܠ ܕܠܐ ܦܠܚܘ ܠܐܠܗܗܘܢ ܒܩܘܫܬܐ ܘܠܐ ܩܒܠܘ ܡܢ ܟܗܢܝ̈ܗܘܢ ܘܠܐ ܫܡܥܘ ܢܡܘ̈ܣܝܗܘܢ ܘܐܫܬܠܡܘ ܠܐܝܕܐ ܕܒܥܠܕ̈ܒܒܐ⁴ܘܟܕ ܥܩܬ ܠܗܘܢ ܨܠܝܘ ܩܕܡ ܡܪܝܐ ܐܠܗܐ ܕܐܝܣܪܝܠ ܘܒܥܐܘܗܝ ܘܐܫܬܟܚ ܠܗܘܢ⁵ܘܒܙ̈ܒܢܬܐ ܗܠܝܢ ܩܕܡܝ̈ܬܐ ܟܕ ܠܐܠܗܢ ܠܐ ܕܚ̇ܠܝܢ ܗܘܝܢ ܠܐ ܐܝܬ ܗܘܐ ܫܠܡ ܠܐ ܠܡ̇ܢ ܕܢ̇ܦܩ ܘܠܐ ܠܡ̇ܢ ܕܥ̇ܐܠ ܡܛܠ ܕܒܝ̣ܫܬܐ ܪܒܬܐ ܐܬܬ ܗܘܬ ܥܠ ܟܠܗܘܢ ܥܡܘܪ̈ܝܗ̇ ܕܐܪܥܐ⁶ܘܐܬܒܕܪܢ ܒܟܠ ܥܡ ܘܥܡ ܘܒܝܢܬ ܩܘܪ̈ܝܐ ܘܒܝܢܬ ܡܕܝ̈ܢܬܐ ܡܛܠ ܕܫܒܩܢ ܗܘܝܢ ܠܡܪܝܐ ܐܠܗܢ ܘܠܐ ܨ̇ܒܝܢ ܗܘܝܢ ܠܡܫܡܥ ܒܩܠܐ ܕܥܒ̣ܕܘ̈ܗܝ ܢܒ̈ܝܐ⁷ܘܐܦ ܗܘ ܦܪܥܢ ܐܓܪܐ ܕܥܒ̇ܕ̈ܝܢ⁸ܘܟܕ ܫܡܥ ܐܣܐ ܦܬܓ̈ܡܐ ܗܠܝܢ ܕܥܙܪܝܐ ܒܪ ܥܙܘܪ ܢܒܝܐ ܐܬܥܫܢ ܘܐܥܒܪ ܨܠܡ̈ܐ ܡܢ ܟܠܗ̇ ܐܪܥܐ ܕܝܗܘܕܐ ܘܕܒܢܝܡܝܢ ܘܡܢ ܩܘܪ̈ܝܐ ܕܐܚܕ ܒܐܪܥܐ ܕܐܦܪܝܡ ܘܚܕܬ ܡܕܒܚܐ ܕܡܪܝܐ ܕܗܘܐ ܩܕܡ ܣܪܘܓܐ⁹ܘܟܢܫ ܟܠܗܘܢ ܕܒܝܬ ܝܗܘܕܐ ܘܒܢ̈ܝ ܒܢܝܡܝܢ ܘܡܢ ܩܘܪ̈ܝܐ ܕܐܚܕ ܒܐܪܥܐ ܕܐܦܪܝܡ ܘܓܝܘܪ̈ܐ ܕܒܗܘܢ ܡܢ ܕܒܝܬ ܐܦܪܝܡ ܘܡܢ ܕܒܝܬ ܡܢܫܐ ܘܡܢ ܕܒܝܬ ܫܡܥܘܢ ܡܛܠ ܕܐܬܟܢܫܘ ܘܐܬܘ ܠܘܬܗ ܡܢ ܕܒܝܬ ܐܝܣܪܝܠ ܣܘܓܐܐ ܟܕ ܚܙܘ ܕܡܪܝܐ ܐܠܗܗ ܥܡܗ¹⁰ܘܐܬܟܢܫܘ ܒܐܘܪܫܠܡ ܒܝܪܚܐ ܬܠܝܬܝܐ ܒܫܢܬ ܚܡܫܥܣܪܐ ܕܡܠܟܘܬܗ ܕܐܣܐ¹¹ܘܕܒܚܘ ܠܡܪܝܐ ܕܒܚ̈ܐ ܒܝܘܡܐ ܗ̇ܘ ܡܢ ܒܙܬܐ ܕܐܝܬܝܘ ܬܘܪ̈ܐ ܫܒܥܡܐܐ ܘܥ̈ܢܐ ܫܬܐ ܐܠܦܝ̈ܢ¹²ܘܐܝܡܘ ܡܘܡ̈ܬܐ ܕܢܨܠܘܢ ܩܕܡ ܡܪܝܐ ܐܠܗܐ ܕܐܒܗ̈ܝܗܘܢ ܒܟܠܗ ܠܒܗܘܢ ܘܒܟܠܗ̇ ܢܦܫܗܘܢ¹³ܘܟܠ ܡ̇ܢ ܕܠܐ ܢܨܠܐ ܩܕܡ ܡܪܝܐ ܐܠܗܐ ܕܐܝܣܪܝܠ ܢܡܘܬ ܡܢ ܙܥܘܪܐ ܘܥܕܡܐ ܠܪܒܐ ܘܡܢ ܓܒܪ̈ܐ ܘܥܕܡܐ ܠܢܫ̈ܐ¹⁴ܘܐܝܡܘ ܠܡܪܝܐ ܒܩܠܐ ܪܡܐ ܒܩܪ̈ܢܬܐ ܟܦܝ̈ܦܬܐ ܘܦܫܝ̈ܛܬܐ¹⁵ܘܚܕܝܘ ܟܠܗܘܢ ܕܒܝܬ ܝܗܘܕܐ ܥܠ ܛܒܐ ܗܢܐ ܕܫܡܥܘ ܡܛܠ ܕܡܢ ܟܠܗ ܠܒܗܘܢ ܒܥܐܘܗܝ ܘܡܢ ܟܠܗ̇ ܢܦܫܗܘܢ ܨܠܝܘ ܩܕܡܘܗܝ ܘܐܫܬܟܚ ܠܗܘܢ ܘܦܨܝ ܐܢܘܢ ܡܢ ܟܠ ܒܥ̈ܠܝ ܬܚ̈ܘܡܝܗܘܢ¹⁶ܘܐܦ ܠܡܥܟܐ ܐܡܗ ܕܐܣܐ ܐܥܒܪܗ̇ ܡܢ ܡܠܟܘܬܗ̇ ܥܠ ܕܥܒܕܬ ܥܐܕܐ ܠܨܠܡ̈ܝܗ̇ ܘܦܣܩ ܐܣܐ ܠܨܠܡ̈ܝܗ̇ ܘܐܘܩܕ ܐܢܘܢ ܒܢܚܠܐ ܕܩܕܪܘܢ¹⁷ܘܡܕܒ̈ܚܐ ܠܐ ܦܪܩܘ ܡܢ ܐܝܣܪܝܠ ܒܪܡ ܠܒܗ ܕܐܣܐ ܫܠܡ ܗܘܐ ܠܕܚܠܬܗ ܕܡܪܝܐ ܐܠܗܗ ܟܠܗܘܢ ܝܘܡ̈ܬܐ ܕܚܝܘ̈ܗܝ¹⁸ܘܐܝܬܝ ܩܘܕ̈ܫܐ ܕܐܒܘܗܝ ܘܩܘ̈ܕܫܘܗܝ ܠܒܝܬܗ ܕܡܪܝܐ ܟܣܦܐ ܘܕܗܒܐ ܘܡܐ̈ܢܐ¹⁹ܘܩܪܒܐ ܗܘܐ ܒܫܢܬ ܬܠܬܝܢ ܘܚܡܫ ܕܡܠܟܘܬܗ ܕܐܣܐ

Cambia Bibbia

Confronta con un'altra Bibbia

Versetti esaminati