Secondo libro delle Cronache ܕܒܪܝܡܝܢ 25

¹ ܒܪ ܥܣܪܝܢ ܗܘܐ ܘܚܡܫ ܫܢ̈ܝܢ ܐܡܘܨܝܐ ܟܕ ܩܡ ܒܡܠܟܘܬܐ ܘܥܣܪܝܢ ܘܬܫܥ ܫܢ̈ܝܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܝܗܘܥܕܢ ܡܢ ܐܘܪܫܠܡ

² ܘܥܒܕ ܕܫܦܝܪ ܩܕܡ ܡܪܝܐ ܒܠܚܘܕ ܠܐ ܒܠܒܐ ܫܠܡܐ

³ ܘܗܘܐ ܕܟܕ ܥܫܢܬ ܡܠܟܘܬܐ ܒܐܝܕܗ ܩܛܠ ܠܥܒ̣̈ܕܘܗܝ ܕܩܛܠܘ ܠܡܠܟܐ ܐܒܘܗܝ

⁴ ܘܠܒܢ̈ܝܗܘܢ ܕܩܛܘ̈ܠܐ ܠܐ ܩܛܠ ܡܛܠ ܕܗܟܢܐ ܟܬܝܒ ܒܣ̣ܦܪܐ ܕܢܡܘܣܗ ܕܡܘܫܐ ܕܦܩܕ ܡܪܝܐ ܘܐܡܪ ܕܠܐ ܢܡܘܬܘܢ ܐܒܗ̈ܐ ܥܠ ܐ̈ܦܝ ܒܢ̈ܝܐ ܘܒܢ̈ܝܐ ܠܐ ܢܡܘܬܘܢ ܥܠ ܐ̈ܦܝ ܐܒܗ̈ܐ ܐܢܫ ܒܚܛܗ̈ܘܗܝ ܢܡܘܬ

⁵ ܘܟܢܫ ܐܡܘܨܝܐ ܠܕܒܝܬ ܝܗܘܕܐ ܘܐܩܝܡ ܐܢܘܢ ܠܒܝܬ ܐܒܗ̈ܝܗܘܢ ܠܪ̈ܘܪܒܢܝ ܐ̈ܠܦܐ ܘܠܪ̈ܘܪܒܢܝ ܡܐܘ̈ܬܐ ܘܠܟܠܗ ܝܗܘܕܐ ܘܒܢܝܡܝܢ ܘܡܢܐ ܐܢܘܢ ܡܢ ܒܪ ܥܣܪܝܢ ܫܢ̈ܝܢ ܘܠܥܠ ܘܐܫܟܚ ܐܢܘܢ ܬܠܬܡܐܐ ܐܠܦܝ̈ܢ ܓܒܪ̈ܐ ܥܠܝ̈ܡܐ ܢ̇ܦܩ̈ܝ ܠܩܪܒܐ ܫ̇ܡ̈ܛܝ ܣܝ̈ܦܐ ܘܐ̇ܚ̈ܕܝ ܣܟܪ̈ܐ

⁶ ܘܐܓܪ ܡܢ ܐܝܣܪܝܠ ܡܐܐ ܐܠܦܝ̈ܢ ܓܒܪ̈ܐ ܓܢܒܪ̈ܝ ܚܝܠܐ ܒܡܐܐ ܟܟܪ̈ܝܢ ܕܟܣܦܐ

⁷ ܘܢܒܝܗ ܕܡܪܝܐ ܐܬܐ ܠܘܬܗ ܘܐܡܪ ܠܗ ܠܡܠܟܐ ܠܐ ܢܥܘܠ ܥܡܟ ܟܠܗ ܚܝܠܐ ܕܐܝܣܪܝܠ ܡܛܠ ܕܠܐ ܐܝܬ ܡܪܝܐ ܥܡ ܟܠܗ ܐܝܣܪܝܠ ܘܠܐ ܥܡ ܟܠܗܘܢ ܕܒܝܬ ܐܦܪܝܡ

⁸ ܡܛܠ ܕܐܢܬ ܥ̇ܐܠ ܠܡܥܒܕ ܩܪܒܐ ܪܘܪܒܐ ܪܡ̇ܐ ܠܟ ܡܪܝܐ ܩܕܡ ܒܥܠܕ̈ܒܒܝܟ ܡܛܠ ܕܠܐ ܫܒܚܬ ܠܡܪܝܐ ܕܗܘܝܘ ܥܕܘܪܐ ܘܡܪܝܡܢܐ

⁹ ܘܐܡܪ ܐܡܘܨܝܐ ܠܢܒܝܗ ܕܡܪܝܐ ܡܢܐ ܥܒܕܬ ܣܟܠܘܬܐ ܕܗܠܝܢ ܡܐܐ ܟܟܪ̈ܝܢ ܝܗܒܬ ܠܓܒܪ̈ܐ ܕܐܝܣܪܝܠ ܘܐܡܪ ܠܗ ܢܒܝܗ ܕܐܠܗܐ ܐܝܬ ܠܡܪܟ ܐܠܗܟ ܠܡܬܠ ܠܟ ܣܓܝ ܡܢ ܗܢܐ ܐܥܦܐ ܥܠ ܡܕܡ ܕܝܗܒܬ

¹⁰ ܘܦܪܫ ܐܢܘܢ ܐܡܘܨܝܐ ܠܓܒܪ̈ܐ ܕܐܬܘ ܠܘܬܗ ܡܢ ܕܒܝܬ ܐܦܪܝܡ ܠܡܐܙܠ ܠܕܘܟܬܗܘܢ ܘܐܬܬܩܦܬ ܚܡܬܗ ܛܒ ܒܕܒܝܬ ܐܝܣܪܝܠ ܘܐܗܦܟ ܐܢܘܢ ܠܕܘܟܬܗܘܢ ܒܚܡܬܐ ܕܪܘܓܙܗ

¹¹ ܘܐܡܘܨܝܐ ܐܬܓܒܪ ܘܕܒܪ ܥܡܗ ܘܐܙܠ ܠܢܚܠܐ ܕܡܠܚܐ ܘܩܛܠ ܘܚܪܒ ܠܒܢ̈ܝ ܛܘܪܐ ܕܓܒܠ ܥܣܪܐ ܐܠܦܝ̈ܢ

¹² ܘܥܣܪܐ ܐܠܦܝ̈ܢ ܟܕ ܚܝܝܢ ܐܚܕܘ ܐܢܘܢ ܒܢ̈ܝ ܝܗܘܕܐ ܘܐܝܬܝ ܐܢܘܢ ܠܪܝܫ ܟܐܦܐ ܘܟܠܗܘܢ ܐܬܘ ܟܕ ܐܣܝܪܝܢ ܒܫ̈ܫܠܬܐ

¹³ ܘܒܢ̈ܝ ܓܢܒܪ̈ܐ ܕܫܒܐ ܐܡܘܨܝܐ ܟܕ ܐܙܠ ܠܩܪܒܐ ܐܫܠܛ ܐܢܘܢ ܒܩܘܪ̈ܝܐ ܕܝܗܘܕܐ ܘܒܫܡܪ̈ܝܐ ܘܒܩܘܪ̈ܝܐ ܕܥܡ̈ܡܐ ܘܚܪܒܘ ܡܢܗܝܢ ܡܢ ܩܘܪ̈ܝܐ ܬܠܬܐ ܐܠܦܝ̈ܢ ܘܒܙܘ ܒܙܬܐ ܣܓܝܐܬܐ

¹⁴ ܘܗܘܐ ܡܢ ܒܬܪ ܕܐܬܐ ܐܡܘܨܝܐ ܟܕ ܗܦܟ ܠܡܚܪܒ ܠܐܕܘܡ̈ܝܐ ܐܝܬܝܘ ܠܗ ܐܠܗ̈ܐ ܕܒܢ̈ܝ ܛܘܪܐ ܕܓܒܠ ܘܐܩܝܡ ܐܢܘܢ ܩܕܡܘܗܝ ܘܩܕܡܝܗܘܢ ܣܓܕ ܘܠܗܘܢ ܐܣܩ ܩܛܪ̈ܘܩܐ ܕܒܣ̈ܡܐ

¹⁵ ܘܐܬܚܡܬ ܡܪܝܐ ܥܠ ܐܡܘܨܝܐ ܘܫܕܪ ܠܘܬܗ ܢܒܝܐ ܘܐܡܪ ܠܗ ܠܡܢܐ ܨܠܝܬ ܩܕܡ ܐܠܗ̈ܐ ܕܥܡ̈ܡܐ ܕܠܐ ܐܫܟܚܘ ܠܡܦܨܝܘ ܕܚܠܝ̈ܗܘܢ ܡܢ ܐܝܕ̈ܝܟ

¹⁶ ܘܗܘܐ ܕܟܕ ܡܠܠ ܥܡܗ ܢܒܝܐ ܐܡܪ ܠܗ ܣܓܕܬܐ ܕܩܝ̈ܣܐ ܠܡܠܟܐ ܐܬܝܗܒܬ ܘܦܪܩ ܠܗ ܢܒܝܐ ܡܢܗ ܘܐܡܪ ܠܗ ܘܝ ܠܟ ܕܗܐ ܐܬܡܠܟ ܥܠܝܟ ܡܪܝܐ ܡ̣ܠܟܐ ܒܝ̣ܫܐ ܠܡܘܒܕܘܬܟ ܘܠܐ ܫܡܥܬ ܒܩܠܝ

¹⁷ ܘܐܬܡܠܟ ܡܠܟܐ ܐܡܘܨܝܐ ܕܒܝܬ ܝܗܘܕܐ ܘܫܕܪ ܠܘܬ ܝܘܐܫ ܒܪ ܝܗܘܐܚܙ ܒܪ ܝܗܘ ܡܠܟܐ ܕܐܝܣܪܝܠ ܘܐܡܪ ܠܗ ܬܐ ܢܚܙܐ ܐ̈ܦܐ ܚܕ ܕܚܕ

¹⁸ ܘܫܕܪ ܝܗܘܐܫ ܡܠܟܐ ܕܐܝܣܪܝܠ ܠܘܬ ܐܡܘܨܝܐ ܡܠܟܐ ܕܝܗܘܕܐ ܘܐܡܪ ܠܗ ܚܘܚܐ ܕܐܝܬ ܒܠܒܢܢ ܫܕܪ ܠܘܬ ܐܪܙܐ ܕܐܝܬ ܒܠܒܢܢ ܘܐܡܪ ܠܗ ܗܒ ܒܪܬܟ ܠܒܪܝ ܐܢܬܬܐ ܘܥܒܪܬ ܚܝܘܬܐ ܕܐܝܬ ܒܠܒܢܢ ܘܕܫܬܗ ܠܚܘܚܐ

¹⁹ ܡܚܪܒ ܚܪܒܬ ܠܐܕܘܡ̈ܝܐ ܡܛܠ ܗܢܐ ܝܪܒ ܠܒܟ ܐܬܝܩܪ ܘܬܒ ܒܒܝܬܟ ܘܠܡܢܐ ܡܬܓܪܓ ܐܢܬ ܥܠ ܒܝ̣ܫܬܐ ܘܬܦܠ ܐܢܬ ܘܕܒܝܬ ܝܗܘܕܐ ܥܡܟ

²⁰ ܘܠܐ ܫܡܥ ܐܡܘܨܝܐ

²¹ ܘܣܠܩ ܝܘܐܫ ܡܠܟܐ ܕܐܝܣܪܝܠ ܘܣܠܩܘ ܘܚܙܘ ܐ̈ܦܐ ܚܕ ܕܚܕ ܒܒܝܬ ܫܡܫ ܩܪܝܬܐ ܕܐܝܬ ܒܬܚܘܡ ܐܪܥܐ ܕܒܝܬ ܝܗܘܕܐ

²³ ܘܐܚܕ ܝܗܘܐܫ ܡܠܟܐ ܕܐܝܣܪܝܠ ܠܐܡܘܨܝܐ ܡܠܟܐ ܕܝܗܘܕܐ ܒܒܝܬ ܫܡܫ ܩܪܝܬܐ ܘܐܝܬܝܘܗܝ ܠܐܘܪܫܠܡ ܘܬܪܥ ܒܫܘܪܐ ܕܐܘܪܫܠܡ ܡܢ ܬܪܥܐ ܕܐܦܪܝܡ ܥܕܡܐ ܠܬܪܥܐ ܕܙܘܝܬܐ ܐܪ̈ܒܥܡܐܐ ܐܡܝ̈ܢ

²⁴ ܘܢܣܒ ܟܣܦܐ ܘܕܗܒܐ ܘܡܐ̈ܢܐ ܕܐܫܬܟܚܘ ܒܒܝܬܗ ܕܡܪܝܐ ܥܡ ܡܐܢ̈ܘܗܝ ܕܥܘܒܪ ܐܕܘܡ ܘܠܐܘܨܪ̈ܐ ܕܒܝܬ ܡܠܟܐ ܘܠܡܐ̈ܢܐ ܕܒܝܬ ܡܠܟܐ ܘܠܡܐ̈ܢܐ ܕܕܗܒܐ ܘܗܦܟ ܠܫܡܪܝܢ

²⁵ ܘܚܝܐ ܐܡܘܨܝܐ ܒܪ ܝܘܐܫ ܡܠܟܐ ܕܝܗܘܕܐ ܡܢ ܒܬܪ ܕܡܝܬ ܝܗܘܐܫ ܒܪ ܝܗܘܐܚܙ ܡܠܟܐ ܕܐܝܣܪܝܠ ܚܡܫܥܣܪ̈ܐ ܫܢ̈ܝܢ

²⁶ ܘܫܪܟܐ ܕܦܬܓܡ̈ܘܗܝ ܕܐܡܘܨܝܐ ܩܕܡ̈ܝܐ ܘܐܚܪ̈ܝܐ ܗܐ ܗܢܘܢ ܟܬܝܒܝܢ ܥܠ ܣ̣ܦܪܐ ܕܡ̈ܠܟܐ ܕܝܗܘܕܐ ܘܕܐܝܣܪܝܠ

²⁷ ܘܡܢ ܒܬܪ ܕܥܒܪ ܐܡܘܨܝܐ ܡܢ ܕܚܠܬܗ ܕܡܪܝܐ ܐܬܢܟܠܘ ܥܠܘܗܝ ܥܒ̣̈ܕܘܗܝ ܢܟܠܐ ܒܐܘܪܫܠܡ ܘܥܪܩ ܠܠܟܝܫ ܘܫܕܪܘ ܒܬܪܗ ܠܠܟܝܫ ܘܩܛܠܘܗܝ ܬܡܢ

²⁸ ܘܫܩܠܘܗܝ ܥܒ̣̈ܕܘܗܝ ܥܠ ܪ̈ܟܫܐ ܘܩܒܪܘܗܝ ܥܡ ܐܒܗ̈ܬܗ ܒܩܪܝܬܐ ܕܕܘܝܕ