Secondo libro delle Cronache ܕܒܪܝܡܝܢ 5

¹ܘܫܠܡܬ ܟܠܗ̇ ܥܒܝܕܬܐ ܕܥܒܕ ܫܠܝܡܘܢ ܒܒܝܬܗ ܕܡܪܝܐ ܘܐܝܬܝ ܫܠܝܡܘܢ ܩܘ̈ܕܫܐ ܕܕܘܝܕ ܐܒܘܗܝ ܟܣܦܐ ܘܕܗܒܐ ܘܡܐ̈ܢܐ ܟܢܫ ܐܢܘܢ ܘܐܥܠ ܩܦܣ ܐܢܘܢ ܒܝܬ ܓܙܐ ܕܡܪܝܐ²ܗܝܕܝܢ ܟܢܫ ܗܘܐ ܫܠܝܡܘܢ ܟܘܠܗܘܢ ܩܫܝ̈ܫܐ ܕܐܝܣܪܝܠ ܪ̈ܝܫܝ ܫܒ̈ܛܐ ܘܪ̈ܘܪܒܢܝ ܐܒܗ̈ܬܐ ܕܒ̈ܢܝ ܐܝܣܪܐܝܠ ܘܐܬܘ ܠܘܬ ܡܠܟܐ ܫܠܝܡܘܢ ܠܐܘܪܫܠܡ ܠܡܣܩܘ ܠܩܒܘܬܐ ܕܐܝܬ ܒܗ̇ ܕܝܬܩܐ ܕܡܪܝܐ ܡܢ ܩܪܝܬܗ ܕܕܘܝܕ ܕܗܝ ܗܝ ܨܗܝܘܢ³ܘܐܬܟܢܫܘ ܘܐܬܘ ܠܘܬ ܡܠܟܐ ܫܠܝܡܘܢ ܠܐܘܪܫܠܡ ܒܝܪܚܐ ܕܐܒܐ ܒܥܐܕܐ ܕܡ̈ܛܠܐ ܗܘ ܝܪܚܐ ܫܒܝܥܝܐ⁴ܘܐܬܘ ܟܠܗܘܢ ܩܫܝ̈ܫܐ ܕܐܝܣܪܝܠ ܘܫܩܠܘ ܟܗ̈ܢܐ ܠܩܒܘܬܐ⁵ܘܐܣܩܘܗ̇ ܠܩܐܒܘܬܗ ܕܡܪܝܐ ܘܠܡܫܟܢܐ ܕܥܐܕܐ ܘܠܟܠܗܘܢ ܡܐܢ̈ܝ ܩܘܕܫܐ ܕܗܘܘ ܒܡܫܟܢܐ ܘܐܣܩܘ ܐܢܘܢ ܟܗ̈ܢܐ ܘܠܘ̈ܝܐ⁶ܘܡܠܟܐ ܫܠܝܡܘܢ ܘܟܠܗ ܥܡܐ ܕܐܬܛܝܒܘ ܩܝ̇ܡܝܢ ܩܕܡ ܩܒܘܬܐ ܘܡܕܒܚܝܢ ܥ̈ܢܐ ܘܬܘܪ̈ܐ ܕܠܐ ܡܬܡܢܝܢ ܘܠܐ ܡܬܚܫܒܝܢ ܡܢ ܣܘܓܗܘܢ⁷ܘܐܝܬܝܘ ܟܗ̈ܢܐ ܠܩܒܘܬܐ ܕܡܪܝܐ ܘܣܡܘܗ̇ ܠܩܒܘܬܐ ܒܕܘܟܬܗ̇ ܒܝܬ ܩܕܘܫ ܩܘܕ̈ܫܐ ܬܚܝܬ ܟܢܦܝ̈ܗܘܢ ܕܟܪ̈ܘܒܐ⁸ܘܗܘܘ ܟܪ̈ܘܒܐ ܦܪܝܣܝܢ ܥܠ ܕܘܟܬܗ̇ ܕܩܒܘܬܐ ܘܡܟܣܝܢ ܗܘܘ ܟܪ̈ܘܒܐ ܥܠ ܩܒܘܬܐ ܘܥܠ ܩܘ̈ܦܝܗ̇ ܡܢ ܠܥܠ⁹ܘܗܘܘ ܐܪܝܟܝܢ ܩܘ̈ܦܝܗ̇ ܘܡܬܚܙܝܢ ܗܘܘ ܪ̈ܫܝܗܘܢ ܡܢ ܬܚܝܬ ܩܒܘܬܐ ܠܓܘܗ ܕܒܝܬܐ ܘܠܐ ܡܬܚܙܝܢ ܗܘܘ ܠܒܪ ܘܗܘܘ ܬܡܢ ܥܕܡܐ ܠܝܘܡܢܐ¹⁰ܠܐ ܐܝܬ ܒܩܒܘܬܐ ܐܠܐ ܐܢ ܬܪܬܝܢ ܠܘܚ̈ܐ ܕܟܐܦܐ ܕܣܡ ܬܡܢ ܡܘܫܐ ܕܐܚܬ ܡܢ ܛܘܪܐ ܕܣܝܢܝ ܗܝ ܗܝ ܕܝܬܩܐ ܕܝܗܒ ܡܪܝܐ ܠܒ̈ܢܝ ܐܝܣܪܝܠ ܟܕ ܢܦܩܘ ܡܢ ܐܪܥܐ ܕܡܨܪܝܢ¹¹ܘܗܘܐ ܕܟܕ ܢܦܩܘ ܟܗ̈ܢܐ ܡܢ ܒܝܬ ܬܫܡܫܬܐ ܡܛܠ ܕܟܠܗܘܢ ܟܗ̈ܢܐ ܕܐܫܬܟܚܘ ܬܡܢ ܥܠܘ ܠܒܝܬ ܬܫܡܫܬܐ¹⁴ܘܠܐ ܐܫܟܚܘ ܟܗ̈ܢܐ ܠܡܩܡ ܘܠܡܫܡܫܘ ܡܢ ܩܕܡ ܥܢܢܐ ܡܛܠ ܕܐܬܡܠܝ ܒܝܬܗ ܕܡܪܝܐ ܡܢ ܙܝܘܐ ܕܫܟܝܢܬܗ

Cambia Bibbia

Confronta con un'altra Bibbia

Versetti esaminati