Hebraeos 3

¹Unde, fratres sancti, vocationis caelestis participes, considerate apostolum et pontificem confessionis nostrae Iesum,²qui fidelis est ei, qui fecit illum, sicut et Moyses in tota domo illius.³Amplioris enim gloriae iste prae Moyse dignus est habitus, quanto ampliorem honorem habet quam domus, qui fabricavit illam.⁴Omnis namque domus fabricatur ab aliquo; qui autem omnia fabricavit, Deus est.⁵Et Moyses quidem fidelis erat in tota domo eius tamquam famulus in testimonium eorum, quae dicenda erant,⁶Christus vero tamquam Filius super domum illius; cuius domus sumus nos, si fiduciam et gloriationem spei retineamus.
⁷Quapropter, sicut dicit Spiritus Sanctus:
“ Hodie, si vocem eius audieritis,
⁸nolite obdurare corda vestra sicut in exacerbatione,
secundum diem tentationis in deserto,
⁹ubi tentaverunt me patres vestri in probatione
et viderunt opera mea¹⁰quadraginta annos. Propter quod infensus fui generationi huic et dixi: Semper errant corde.
Ipsi autem non cognoverunt vias meas;
¹¹sicut icut iuravi in ira mea:
Non introibunt in requiem meam ”.
¹²Videte, fratres, ne forte sit in aliquo vestrum cor malum incredulitatis discedendi a Deo vivo,¹³sed adhortamini vosmetipsos per singulos dies, donec illud “ hodie ” vocatur, ut non obduretur quis ex vobis fallacia peccati;¹⁴participes enim Christi effecti sumus, si tamen initium substantiae usque ad finem firmum retineamus,¹⁵dum dicitur:
“ Hodie, si vocem eius audieritis,
nolite obdurare corda vestra quemadmodum in illa exacerbatione ”.
¹⁶Qui sunt enim qui audientes exacerbaverunt? Nonne universi, qui profecti sunt ab Aegypto per Moysen?¹⁷Quibus autem infensus fuit quadraginta annos? Nonne illis, qui peccaverunt, quorum membra ceciderunt in deserto?¹⁸Quibus autem iuravit non introire in requiem ipsius, nisi illis, qui increduli fuerunt?¹⁹Et videmus quia non potuerunt introire propter incredulitatem.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati