Lettera agli Ebrei 2

¹ Propterea abundantius oportet observare nos ea, quae audivi mus, ne forte praeterfluamus.

² Si enim, qui per angelos dictus est, sermo factus est firmus, et omnis praevaricatio et inoboedientia accepit iustam mercedis retributionem,

³ quomodo nos effugiemus, si tantam neglexerimus salutem? Quae, cum initium accepisset enarrari per Dominum, ab eis, qui audierunt, in nos confirmata est,

⁴ contestante Deo signis et portentis et variis virtutibus et Spiritus Sancti distributionibus secundum suam voluntatem.

⁵ Non enim angelis subiecit orbem terrae futurum, de quo loquimur.

⁶ Testatus est autem in quodam loco quis dicens:
“ Quid est homo, quod memor es eius,
aut filius hominis, quoniam visitas eum?

⁷ Minuisti eum paulo minus ab angelis,
gloria et honore coronasti eum,

⁸ omnia subiecisti sub pedibus eius ”.
In eo enim quod ei omnia subiecit, nihil dimisit non subiectibile ei. Nunc autem necdum videmus omnia subiecta ei;

⁹ eum autem, qui paulo minus ab angelis minoratus est, videmus Iesum propter passionem mortis gloria et honore coronatum, ut gratia Dei pro omnibus gustaverit mortem.

¹⁰ Decebat enim eum, propter quem omnia et per quem omnia, qui multos filios in gloriam adduxit, ducem salutis eorum per passiones consummare.

¹¹ Qui enim sanctificat et qui sanctificantur, ex uno omnes; propter quam causam non erubescit fratres eos vocare

¹² dicens:
“ Nuntiabo nomen tuum fratribus meis,
in medio ecclesiae laudabo te”;

¹³ et iterum: “ Ego ero fidens in eum ”;
et iterum: “ Ecce ego et pueri, quos mihi dedit Deus ”.

¹⁴ Quia ergo pueri communicaverunt sanguini et carni, et ipse similiter participavit iisdem, ut per mortem destrueret eum, qui habebat mortis imperium, id est Diabolum,

¹⁵ et liberaret eos, qui timore mortis per totam vitam obnoxii erant servituti.

¹⁶ Nusquam enim angelos apprehendit, sed semen Abrahae apprehendit.

¹⁷ Unde debuit per omnia fratribus similari, ut misericors fieret et fidelis pontifex in iis,
quae sunt ad Deum, ut repropitiaret delicta populi;

¹⁸ in quo enim passus est ipse tentatus, po tens est eis, qui tentantur, auxiliari.