Esodo 26

¹ Habitaculum vero ita facies: decem cortinas de bysso re torta et hyacintho ac purpura coccoque cum cherubim opere polymito facies.

² Longitudo cortinae unius habebit viginti octo cubitos, latitudo quattuor cubitorum erit. Unius mensurae fient universae cortinae.

³ Quinque cortinae sibi iungentur mutuo, et aliae quinque nexu simili cohaerebunt.

⁴ Ansulas hyacinthinas in latere facies cortinae unius in extremitate iuncturae et similiter facies in latere cortinae extremae in iunctura altera.

⁵ Quinquaginta ansulas facies in cortina una et quinquaginta ansulas facies in summitate cortinae, quae est in iunctura altera, ita insertas, ut ansa contra ansam veniat.

⁶ Facies et quinquaginta fibulas aureas, quibus cortinarum vela iungenda sunt, ut unum habitaculum fiat.

⁷ Facies et saga cilicina undecim pro tabernaculo super habitaculum.

⁸ Longitudo sagi unius habebit triginta cubitos et latitudo quattuor; aequa erit mensura sagorum omnium.

⁹ E quibus quinque iunges seorsum et sex sibi mutuo copulabis, ita ut sextum sagum in fronte tecti duplices.

¹⁰ Facies et quinquaginta ansas in ora sagi ultimi iuncturae unius et quinquaginta ansas in ora sagi iuncturae alterius.

¹¹ Facies et quinquaginta fibulas aeneas, quibus iungantur ansae, ut unum ex omnibus tabernaculum fiat.

¹² Quod autem superfuerit in sagis, quae parantur tecto, id est unum sagum, quod amplius est, ex medietate eius operies posteriora habitaculi;

¹³ et cubitus ex una parte pendebit, et alter ex altera, qui plus est in longitudine sagorum tabernaculi utrumque latus habitaculi protegens.

¹⁴ Facies et operimentum aliud pro tabernaculo de pellibus arietum rubricatis et super hoc rursum aliud operimentum de pellibus delphini.

¹⁵ Facies et tabulas stantes habitaculi de lignis acaciae,

¹⁶ quae singulae denos cubitos in longitudine habeant et in latitudine singulos ac semissem.

¹⁷ In tabula una duo pedes fient, quibus tabula alteri tabulae conectatur; atque in hunc modum cunctae tabulae habitaculi parabuntur.

¹⁸ Quarum viginti erunt in latere meridiano, quod vergit ad austrum;

¹⁹ quibus quadraginta bases argenteas fundes, ut binae bases singulis pedibus singularum tabularum subiciantur.

²⁰ In latere quoque secundo habitaculi, quod vergit ad aquilonem, viginti tabulae erunt,

²¹ quadraginta habentes bases argenteas; binae bases singulis tabulis supponentur.

²² Ad occidentalem vero plagam in tergo habitaculi facies sex tabulas;

²³ et rursum alias duas, quae in angulis erigantur, post tergum habitaculi.

²⁴ Eruntque geminae a deorsum usque sursum in compaginem unam; ita erit duabus istis, pro duabus angulis erunt.

²⁵ Et erunt simul tabulae octo, bases earum argenteae sedecim, duabus basibus per unam tabulam supputatis.

²⁶ Facies et vectes de lignis acaciae, quinque ad continendas tabulas in uno latere habitaculi

²⁷ et quinque alios in altero et eiusdem numeri in tergo ad occidentalem plagam;

²⁸ vectis autem medius transibit per medias tabulas a summo usque ad summum.

²⁹ Ipsasque tabulas deaurabis et fundes eis anulos aureos, per quos vectes tabulata contineant, quos operies laminis aureis.

³⁰ Et eriges habitaculum iuxta exemplar, quod tibi in monte monstratum est.

³¹ Facies et velum de hyacintho et purpura coccoque et bysso retorta, opere polymito, cum cherubim intextis.

³² Quod appendes in quattuor columnis de lignis acaciae, quae ipsae quidem deauratae erunt et habebunt uncos aureos, sed bases argenteas.

³³ Inseres autem velum subter fibulas, intra quod pones arcam testimonii et quo sanctum et sanctum sanctorum dividentur.

³⁴ Pones et propitiatorium super arcam testimonii in sancto sanctorum

³⁵ mensamque extra velum et contra mensam candelabrum in latere habitaculi meridiano; mensa enim stabit in parte aquilonis.

³⁶ Facies et velum in introitu tabernaculi de hyacintho et purpura coccoque et bysso retorta opere plumarii.

³⁷ Et quinque columnas deaurabis lignorum acaciae, ante quas ducetur velum, quarum erunt unci aurei et bases aeneae.