Paralipomenon I 26

¹Divisiones autem ianitorum.
De Coritis: Meselemia filius Core de filiis Abiasaph.²Filii Meselemiae: Zacharias primogenitus, Iedihel secundus, Zabadias tertius, Iathanael quartus,³Elam quintus, Iohanan sextus, Elioenai septimus.⁴Filii autem Obededom: Semeias primogenitus, Iozabad secundus, Ioah tertius, Sachar quartus, Nathanael quintus,⁵Ammiel sextus, Issachar septimus, Phollathi octavus, quia benedixit illi Deus.⁶Semeiae autem filio eius nati sunt filii praefecti familiarum suarum, erant enim viri fortissimi;⁷filii ergo Semeiae: Othni et Raphael et Obed, Elzabad, fratres eius viri fortissimi, Eliu quoque et Samachias;⁸omnes hi de filiis Obededom, ipsi et filii et fratres eorum fortissimi ad ministrandum sexaginta duo de Obededom.⁹Porro Meselemiae filii et fratres eorum robustissimi decem et octo.
¹⁰De Hosa autem, de filiis Merari, erant filii: Semri princeps — non enim fuerat primogenitus, et idcirco posuerat eum pater eius in principem —¹¹Helcias secundus, Tabelias tertius, Zacharias quartus; omnes hi filii et fratres Hosa tredecim.
¹²Hae divisiones ianitorum: secundum capita virorum habebant ministeria sicut et fratres eorum ad ministrandum in domo Domini.¹³Missae sunt ergo sortes ex aequo et parvis et magnis per familias suas in unamquamque portarum.¹⁴Cecidit igitur sors orientalis Selemiae; porro Zachariae filio eius consiliario prudentissimo et erudito sortito obtigit plaga septentrionalis;¹⁵Obededom vero australis, et filiis eius horreum;¹⁶Sephim et Hosa occidentalis iuxta portam Sallecheth apud viam ascensionis. Custodia iuxta custodiam:¹⁷ad orientem per diem sex et ad aquilonem quattuor per diem, atque ad meridiem similiter in die quattuor et pro horreo bini et bini,¹⁸pro Parbar quoque ad occidentem quattuor in via, duo pro Parbar.¹⁹Hae sunt divisiones ianitorum filiorum Core et Merari.
²⁰Porro Levitae fratres eorum super thesauros domus Dei ac thesauros rerum consecratarum.²¹De filiis Ladan Gersonitae principes familiarum Ladan Gersonitae erant Iahielitae.²²Filii Iahiel et Zetham et Ioel fratrum eius erant super thesauros domus Domini.²³De Amramitis et Isaaritis et Hebronitis et Ozielitis:²⁴Subael filius Gersam filii Moysi praepositus thesauris.²⁵Fratres quoque eius Eliezer, cuius filius Rohobia et huius filius Iesaias; et huius filius Ioram, huius quoque filius Zechri et huius filius Selemith.²⁶Ipse Selemith et fratres eius super omnes thesauros rerum consecratarum, quas sanctificavit David rex et principes familiarum et tribuni et centuriones et duces exercitus²⁷de bellis et manubiis proeliorum, quas consecraverant ad sustentandum templum Domini.²⁸Et universa, quae consecraverant Samuel videns et Saul filius Cis et Abner filius Ner et Ioab filius Sarviae, omnia donaria sacra erant sub manu Selemith et fratrum eius.
²⁹De Isaaritis vero erant Chonenias et filii eius ad opera forinsecus super Israel praefecti et iudices.³⁰Porro de Hebronitis Hasabias et fratres eius viri strenui mille septingenti erant magistratus Israel trans Iordanem contra occidentem in cunctis operibus Domini et in ministerium regis;³¹Hebronitarum autem princeps fuit Ieria secundum cognationes et familias eorum. Quadragesimo anno regni David recensiti sunt et inventi viri fortes in Iazer Galaad³²fratresque eius viri strenui duo milia septingenti principes familiarum; praeposuit autem eos David rex Rubenitis et Gadditis et dimidio tribus Manasse in omne ministerium Dei et regis.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati