Genesi ܒܪܝܬܐ 11

¹ ܘܰܗܘܳܬ ܟܽܠܳܗ̇ ܐܰܪܥܳܐ ܠܶܫܳܢܳܐ ܚܰܕ ܘܡܰܡܠܠܳܐ ܚܰܕ.

² ܘܰܗܘܳܐ ܕܟܰܕ ܫܩܰܠܘ ܡܶܢ ܡܰܕܢܚܳܐ: ܐܶܫܟܰܚܘ ܦܩܰܥܬܳܐ ܒܰܐܪܥܳܐ ܕܣܶܢܥܳܪ: ܘܺܝܬܶܒܘ ܬܰܡܳܢ.

³ ܘܶܐܡܰܪܘ ܓܒܰܪ ܠܚܰܒܪܶܗ: ܬܰܘ ܢܰܪܡܶܐ ܠܶܒܢ̈ܶܐ: ܘܢܰܘܩܶܕ ܐܶܢܶܝܢ ܒܢܽܘܪܳܐ ܘܗܳܘܝܳܐ ܠܗܽܘܢ ܠܒܶܬܳܐ ܠܟܺܐܦܳܐ: ܘܣܰܝܕܳܐ ܗܳܘܶܐ ܠܗܽܘܢ ܠܰܡܠܳܛܳܐ.

⁴ ܘܶܐܡܰܪܘ: ܬܰܘ ܢܶܒܢܶܐ ܠܰܢ ܩܪܺܝܬܳܐ: ܘܡܰܓܕܠܳܐ ܕܪܺܝܫܶܗ ܒܰܫܡܰܝܳܐ: ܘܢܶܥܒܶܕ ܠܰܢ ܫܡܳܐ: ܕܰܠܡܳܐ ܢܶܬܒܰܕܰܪ ܥܰܠ ܐܰܦܰܝ̈ ܟܽܠܳܗ̇ ܐܰܪܥܳܐ.

⁵ ܘܰܢܚܶܬ ܡܳܪܝܳܐ ܠܡܶܚܙܳܐ ܩܪܺܝܬܳܐ: ܘܡܰܓܕܠܳܐ ܕܒܳܢܶܝܢ ܒܢܰܝ̈ܢܳܫܳܐ.

⁶ ܘܶܐܡܰܪ ܡܳܪܝܳܐ: ܗܳܐ ܥܰܡܳܐ ܚܰܕ: ܘܠܶܫܳܢܳܐ ܚܰܕ ܠܟܽܠܗܽܘܢ: ܘܗܳܟܰܢܳܐ ܐܶܬܚܰܫܰܒܘ ܠܡܶܥܒܰܕ: ܡܶܟܺܝܠ ܠܳܐ ܢܶܬܒܰܨܰܪ ܡܶܢܗܽܘܢ ܟܽܠܡܶܕܶܡ ܕܶܐܬܚܰܫܰܒܘ ܠܡܶܥܒܰܕ.

⁷ ܬܰܘ ܢܶܚܽܘܬ: ܘܰܢܦܰܠܶܓ ܬܰܡܳܢ ܠܶܫܳܢ̈ܶܐ: ܕܠܳܐ ܢܶܫܡܥܽܘܢ ܓܒܰܪ ܠܶܫܳܢ ܚܰܒܪܶܗ.

⁸ ܘܒܰܕܰܪ ܐܶܢܽܘܢ ܡܳܪܝܳܐ ܡܶܢ ܬܰܡܳܢ ܥܰܠ ܐܰܦܰܝ̈ ܐܰܪܥܳܐ: ܘܦܳܫܘ ܡܶܢ ܕܰܠܡܶܒܢܳܐ ܩܪܺܝܬܳܐ.

⁹ ܡܶܛܽܠ ܗܳܢܳܐ ܩܪܳܐ ܫܡܳܗ̇ ܒܳܒܶܝܠ: ܡܶܛܽܠ ܕܬܰܡܳܢ ܒܰܠܒܶܠ ܡܳܪܝܳܐ ܠܶܫܳܢ̈ܶܐ ܕܟܽܠܳܗ̇ ܐܰܪܥܳܐ: ܘܡܶܢ ܬܰܡܳܢ ܒܰܕܰܪ ܐܶܢܽܘܢ ܡܳܪܝܳܐ ܥܰܠ ܐܰܦܰܝ̈ ܟܽܠܳܗ̇ ܐܰܪܥܳܐ.

¹⁰ ܗܳܠܶܝܢ ܬܰܘܠܕ̈ܳܬܶܗ ܕܫܺܝܡ: ܫܺܝܡ ܒܰܪ ܡܳܐܐ ܫܢܺܝ̈ܢ ܐܰܘܠܶܕ ܠܰܐܪܦܰܟܫܰܪ: ܬܰܪܬܶܝܢ ܫܢܺܝ̈ܢ ܡܶܢ ܒܳܬܰܪ ܛܰܘܦܳܢܳܐ.

¹¹ ܘܰܚܝܳܐ ܫܺܝܡ ܡܶܢ ܒܳܬܰܪ ܕܰܐܘܠܶܕ ܠܰܐܪܦܰܟܫܰܪ : ܚܰܡܶܫܡܳܐܐ ܫܢܺܝ̈ܢ: ܘܰܐܘܠܶܕ ܒܢܰܝ̈ܐ ܘܰܒ̈ܢܳܬܳܐ.

¹² ܘܰܐܪܦܰܟܫܰܪ ܚܝܳܐ ܬܠܳܬܺܝܢ ܘܚܰܡܶܫ ܫܢܺܝ̈ܢ: ܘܰܐܘܠܶܕ ܠܫܳܠܳܚ.

¹³ ܘܰܚܝܳܐ ܐܰܪܦܰܟܫܰܪ ܡܶܢ ܒܳܬܰܪ ܕܰܐܘܠܶܕ ܠܫܳܠܳܚ: ܐܰܪܒܰܥܡܳܐܐ ܘܰܬܠܳܬ ܫܢܺܝ̈ܢ: ܘܰܐܘܠܶܕ ܒܢܰܝ̈ܐ ܘܰܒ̈ܢܳܬܳܐ.

¹⁴ ܘܰܚܝܳܐ ܫܳܠܳܚ ܬܠܳܬܺܝܢ ܫܢܺܝ̈ܢ ܘܰܐܘܠܶܕ ܠܥܳܒܳܪ.

¹⁵ ܘܰܚܝܳܐ ܫܳܠܳܚ ܡܶܢ ܒܳܬܰܪ ܕܰܐܘܠܶܕ ܠܥܳܒܳܪ: ܐܰܪܒܰܥܡܳܐܐ ܘܰܬܠܳܬ ܫܢܺܝ̈ܢ: ܘܰܐܘܠܶܕ ܒܢܰܝ̈ܐ ܘܰܒ̈ܢܳܬܳܐ.

¹⁶ ܘܰܚܝܳܐ ܥܳܒܳܪ ܬܠܳܬܺܝܢ ܘܰܐܪܒܰܥ ܫܢܺܝ̈ܢ: ܘܰܐܘܠܶܕ ܠܦܳܠܳܓ.

¹⁷ ܘܰܚܝܳܐ ܥܳܒܳܪ ܡܶܢ ܒܳܬܰܪ ܕܰܐܘܠܶܕ ܠܦܳܠܳܓ: ܐܰܪܒܰܥܡܳܐܐ ܘܰܬܠܳܬܺܝܢ ܫܢܺܝ̈ܢ: ܘܰܐܘܠܶܕ ܒܢܰܝ̈ܳܐ ܘܰܒܢ̈ܳܬܳܐ.

¹⁸ ܘܰܚܝܳܐ ܦܳܠܳܓ ܬܠܳܬܺܝܢ ܫܢܺܝ̈ܢ: ܘܰܐܘܠܶܕ ܠܰܐܪܥܽܘ.

¹⁹ ܘܰܚܝܳܐ ܦܳܠܳܓ ܡܶܢ ܒܳܬܰܪ ܕܰܐܘܠܶܕ ܠܰܐܪܥܽܘ: ܡܰܐܬܶܝܢ ܘܰܬܫܰܥ ܫܢܺܝ̈ܢ: ܘܰܐܘܠܶܕ ܒܢܰܝ̈ܐ ܘܰܒ̈ܢܳܬܳܐ.

²⁰ ܘܰܚܝܳܐ ܐܰܪܥܽܘ ܬܠܳܬܺܝܢ ܘܬܰܪܬܶܝܢ ܫܢܺܝ̈ܢ: ܘܰܐܘܠܶܕ ܠܰܣܪܽܘܓ.

²¹ ܘܰܚܝܳܐ ܐܰܪܥܽܘ ܡܶܢ ܒܳܬܰܪ ܕܰܐܘܠܶܕ ܠܰܣܪܽܘܓ ܡܰܐܬܶܝܢ ܘܰܫܒܰܥ ܫܢܺܝ̈ܢ: ܘܰܐܘܠܶܕ ܒܢܰܝ̈ܐ ܘܰܒ̈ܢܳܬܳܐ.

²² ܘܰܚܝܳܐ ܣܳܪܽܘܓ ܬܠܳܬܺܝܢ ܫܢܺܝ̈ܢ ܘܰܐܘܠܶܕ ܠܢܳܚܽܘܪ.

²³ ܘܰܚܝܳܐ ܣܳܪܽܘܓ ܡܶܢ ܒܳܬܰܪ ܕܰܐܘܠܶܕ ܠܢܳܚܽܘܪ: ܡܰܐܬܶܝܢ ܫܢܺܝ̈ܢ: ܘܰܐܘܠܶܕ ܒܢܰܝ̈ܐ ܘܰܒ̈ܢܳܬܳܐ.

²⁴ ܘܰܚܝܳܐ ܢܳܚܽܘܪ ܥܶܣܪܺܝܢ ܘܰܬܫܰܥ ܫܢܺܝ̈ܢ: ܘܰܐܘܠܶܕ ܠܬܳܪܳܚ.

²⁵ ܘܰܚܝܳܐ ܢܳܚܽܘܪ ܡܶܢ ܒܳܬܰܪ ܕܰܐܘܠܶܕ ܠܬܳܪܳܚ: ܡܳܐܐ ܘܰܬܫܰܥܶܣܖ̈ܶܐ ܫܢܺܝ̈ܢ: ܘܰܐܘܠܶܕ ܒܢܰܝ̈ܐ ܘܰܒ̈ܢܳܬܳܐ.

²⁶ ܘܰܚܝܳܐ ܬܳܪܳܚ ܫܰܒܥܺܝܢ ܘܚܰܡܶܫ ܫܢܺܝ̈ܢ: ܘܰܐܘܠܶܕ ܠܰܐܒܪܰܡ: ܘܰܠܢܳܚܽܘܪ: ܘܰܠܗܳܪܳܢ.

²⁷ ܗܳܠܶܝܢ ܬܰܘܠܕ̈ܳܬܶܗ ܕܬܳܪܳܚ: ܬܳܪܳܚ ܐܰܘܠܶܕ ܠܰܐܒܪܰܡ: ܘܰܠܢܳܚܽܘܪ: ܘܰܠܗܳܪܳܢ. ܘܗܳܪܳܢ ܐܰܘܠܶܕ ܠܠܽܘܛ.

²⁸ ܘܡܺܝܬ ܗܳܪܳܢ ܒܚܰܝܰܝ̈ ܬܳܪܳܚ ܐܰܒܽܘܗܝ: ܒܰܐܪܥܳܐ ܕܶܐܬܺܝܠܶܕ ܒܳܗ̇: ܒܽܐܘܪ ܕܟܰܠܕ̈ܳܝܶܐ.

²⁹ ܘܰܢܣܰܒܘ ܠܗܽܘܢ ܐܰܒܪܰܡ ܘܢܳܚܽܘܪ ܢܶܫ̈ܶܐ: ܫܶܡ ܐܰܢ̱ܬܬܶܗ ܕܰܐܒܪܰܡ ܣܰܪܰܝ: ܘܫܶܡ ܐܰܢ̱ܬܬܶܗ ܕܢܳܚܽܘܪ ܡܶܠܟܳܐ ܒܰܪܬ ܗܳܪܳܢ: ܐܰܒܽܘܗ̇ ܕܡܶܠܟܳܐ : ܘܰܐܒܽܘܗ̇ ܕܰܐܣܟܳܐ.

³⁰ ܘܰܗܘܳܬ ܣܰܪܰܝ ܥܩܰܪܬܳܐ: ܘܠܳܐ ܗܳܘܶܝܢ ܠܳܗ̇ ܒܢܰܝ̈ܳܐ.

³¹ ܘܰܕܒܰܪ ܬܳܪܳܚ ܠܰܐܒܪܰܡ ܒܪܶܗ: ܘܰܠܠܽܘܛ ܒܰܪ ܗܳܪܳܢ ܒܰܪ ܒܪܶܗ: ܘܰܠܣܰܪܰܝ ܟܰܠܬܶܗ ܐܰܢ̱ܬܰܬ ܐܰܒܪܰܡ ܒܪܶܗ: ܘܰܢܦܰܩ ܥܰܡܗܽܘܢ ܡܶܢ ܐܽܘܪ ܕܟܰܠܕ̈ܳܝܶܐ ܠܡܺܐܙܰܠ ܠܰܐܪܥܳܐ ܕܰܟܢܰܥܢ: ܘܶܐܬܰܘ ܥܕܰܡܳܐ ܠܚܳܪܳܢ: ܘܺܝܬܶܒܘ ܬܰܡܳܢ.

³² ܘܰܗܘܰܘ ܝܰܘ̈ܡܳܬܶܗ ܕܬܳܪܳܚ ܡܰܐܬܶܝܢ ܘܚܰܡܶܫ ܫܢܺܝ̈ܢ: ܘܡܺܝܬ ܬܳܪܳܚ ܒܚܳܪܳܢ.