Genesi ܒܪܝܬܐ 6

¹ ܘܰܗܘܳܐ ܕܟܰܕ ܫܰܪܺܝܘ ܒܢܰܝ̈ܢܳܫܳܐ ܠܡܶܣܓܳܐ ܥܰܠ ܐܰܦܰܝ̈ ܐܰܪܥܳܐ: ܘܰܒ̈ܢܳܬܳܐ ܐܶܬܺܝܠܶܕ̈ܝ ܠܗܽܘܢ: ܚܙܰܘ ܒܢܰܝ̈ ܐܰܠܽܘܗܺܝܡ ܠܰܒ̈ܢܳܬ ܐ̱ܢܳܫ̈ܳܐ ܕܫܰܦܺܝܖ̈ܳܢ ܐܶܢܶܝܢ.

² ܘܰܢܣܰܒܘ ܐܶܢܶܝܢ ܠܗܽܘܢ ܢܶܫ̈ܶܐ ܡܶܢ ܟܽܠ ܕܰܓܒܰܘ.

³ ܘܶܐܡܰܪ ܡܳܪܝܳܐ: ܠܳܐ ܬܶܥܡܰܪ ܪܽܘܚܝ ܒܐ̱ܢܳܫ̈ܳܐ ܠܥܳܠܰܡ: ܡܶܛܽܠ ܕܒܶܣܪܳܐ ܗ̱ܘ: ܘܢܶܗܘܽܘܢ ܝܰܘ̈ܡܳܬܶܗ ܡܳܐܐ ܘܥܶܣܪܺܝܢ ܫܢܺܝ̈ܢ.

⁴ ܘܓܰܢ̱ܒܳܖ̈ܶܐ ܗܘܰܘ ܒܰܐܪܥܳܐ: ܒܝܰܘ̈ܡܳܬܳܐ ܗܳܢܽܘܢ ܘܳܐܦ ܡܶܢ ܒܳܬܰܪܟܶܢ: ܡܶܛܽܠ ܕܥܰܠ ܒܢܰܝ̈ ܐܰܠܽܘܗܺܝܡ ܥܰܠ ܒܢ̈ܳܬ ܐ̱ܢܳܫ̈ܳܐ: ܘܺܝܠܶܕ̈ܝ ܠܗܽܘܢ ܓܰܢ̱ܒܳܖ̈ܶܐ ܕܡܶܢ ܥܳܠܰܡ ܓܰܢ̱ܒܳܖ̈ܶܐ ܕܰܫܡܳܗ̈ܳܬܳܐ.

⁵ ܘܰܚܙܳܐ ܡܳܪܝܳܐ ܕܣܶܓܝܰܬ ܒܺܝܫܬܳܐ ܒܰܐܪܥܳܐ: ܘܟܽܠ ܝܰܨܪܳܐ ܕܡܰܚܫܰܒܬܳܐ ܕܠܶܒܶܗ ܒܺܝܫ ܒܟܽܠܝܽܘܡ.

⁶ ܘܶܐܬܬܘܰܚ ܡܳܪܝܳܐ ܥܰܠ ܕܰܥ̣ܒܰܕ ܠܳܐܕܳܡ ܒܰܐܪܥܳܐ: ܘܟܶܪܝܰܬ ܒܠܶܒܶܗ.

⁷ ܘܶܐܡܰܪ ܡܳܪܝܳܐ ܐܶܥܛܶܐ ܠܰܒܢܰܝ̈ܢܳܫܳܐ ܕܰܒܪܺܝܬ ܡܶܢ ܐܰܦܰܝ̈ ܐܰܪܥܳܐ: ܡܶܢ ܒܢܰܝ̈ܢܳܫܳܐ ܘܰܥܕܰܡܳܐ ܠܰܒܥܺܝܪܳܐ: ܘܰܥܕܰܡܳܐ ܠܪܰܚܫܳܐ: ܘܰܥܕܰܡܳܐ ܠܦܳܪܰܚܬܳܐ ܕܰܫܡܰܝܳܐ: ܡܶܛܽܠ ܕܶܐܬܬܰܘܚܶܬ ܕܥܶܒܕܶܬ ܐܶܢܽܘܢ.

⁸ ܘܢܽܘܚ ܐܶܫܟܰܚ ܖ̈ܰܚܡܶܐ ܒܥܰܝ̈ܢܰܝ ܡܳܪܝܳܐ.

⁹ ܘܗܳܠܶܝܢ ܬܰܘܠܕ̈ܳܬܶܗ ܕܢܽܘܚ: ܢܽܘܚ ܓܒܰܪ ܙܰܕܺܝܩ ܘܬܰܡܺܝܡ ܗܘܳܐ ܒܕܳܖ̈ܰܘܗܝ: ܘܰܫܦܰܪ ܢܽܘܚ ܠܰܐܠܳܗܳܐ.

¹⁰ ܘܰܐܘܠܶܕ ܢܽܘܚ ܬܠܳܬܳܐ ܒܢܺܝ̈ܢ: ܠܫܺܝܡ: ܘܰܠܚܰܡ: ܘܰܠܝܰܦܬ.

¹¹ ܘܶܐܬܚܰܒܠܰܬ ܐܰܪܥܳܐ ܩܕܳܡ ܐܰ‌ܠܳܗܳܐ: ܘܶܐܬܡܰܠܝܰܬ ܐܰܪܥܳܐ ܥܰܘܠܳܐ.

¹² ܘܰܚܙܳܐ ܐܰ‌ܠܳܗܳܐ ܠܰܐܪܥܳܐ ܕܶܐܬܚܰܒܠܰܬ: ܡܶܛܽܠ ܕܚܰܒܶܠ ܟܽܠ ܒܣܰܪ ܐܽܘܪܚܶܗ ܥܰܠ ܐܰܪܥܳܐ.

¹³ ܘܶܐܡܰܪ ܐܰ‌ܠܳܗܳܐ ܠܢܽܘܚ: ܩܶܨܳܐ ܕܟܽܠ ܒܣܰܪ ܥܰܠ ܩܕܳܡܰܝ: ܡܶܛܽܠ ܕܶܐܬܡܰܠܝܰܬ ܐܰܪܥܳܐ ܥܰܘܠܳܐ ܡܶܢ ܩܕܳܡܰܝܗܽܘܢ: ܗܳܐ ܡܚܰܒܶܠ ܐ̱ܢܳܐ ܠܗܽܘܢ ܥܰܡ ܐܰܪܥܳܐ.

¹⁴ ܛܽܘܝܳܒܳܐ: ܥܒܶܕ ܠܳܟ ܩܺܒܽܘܬܳܐ ܕܩܰܝܣܳܐ ܕܥܰܪܩܳܐ: ܡܶܕܝܳܖ̈ܶܐ ܥܒܶܕܶܝܗ̇ ܠܩܺܒܽܘܬܳܐ: ܘܫܽܘܥܶܝܗ̇ ܡܶܢ ܠܒܰܪ ܘܡܶܢ ܠܓܰܘ ܒܟܽܘܦܪܳܐ.

¹⁵ ܘܗܳܟܰܢܳܐ ܥܒܶܕܶܝܗ̇: ܬܠܳܬܡܳܐܐ ܐܰܡܺܝ̈ܢ ܐܽܘܪܟܳܗ̇ ܕܩܺܒܽܘܬܳܐ: ܘܚܰܡܫܺܝܢ ܐܰܡܺܝ̈ܢ ܦܬܳܝܳܗ̇: ܘܰܬܠܳܬܺܝܢ ܐܰܡܺܝ̈ܢ ܪܰܘܡܳܗ̇.

¹⁶ ܘܰܙܘܺܝܕ̈ܢܶܐ ܥܒܶܕ ܠܩܺܒܽܘܬܳܐ: ܘܥܰܠ ܐܰܡܳܐ ܣܰܝܟܶܝܗ̇ ܡܶܢ ܠܥܶܠ: ܘܬܰܪܥܳܗ̇ ܕܩܺܒܽܘܬܳܐ ܒܣܶܛܪܳܗ̇ ܥܒܶܕ: ܡܶܕܝܳܪܳܐ ܬܰܚܬܳܝܳܐ: ܘܬܶܢܝܳܢܳܐ: ܘܰܬܠܺܝܬܳܝܳܐ: ܥܒܶܕܶܝܗ̇.

¹⁷ ܘܶܐܢܳܐ ܗܳܐ ܡܰܝܬܶܐ ܐ̱ܢܳܐ ܛܰܘܦܳܢܳܐ ܕܡܰܝ̈ܳܐ ܥܰܠ ܐܰܪܥܳܐ: ܠܰܡܚܰܒܳܠܽܘ ܟܽܠ ܒܣܰܪ ܕܺܐܝܬ ܒܶܗ ܪܽܘܚܳܐ ܕܚܰܝ̈ܶܐ ܡܶܢ ܬܚܶܝܬ ܫܡܰܝܳܐ: ܘܟܽܠ ܕܒܰܐܪܥܳܐ ܗ̱ܘ ܢܣܽܘܦ.

¹⁸ ܘܰܐܩܺܝܡ ܩܝܳܡܝ ܥܰܡܳܟ: ܘܬܶܥܽܘܠ ܠܩܺܒܽܘܬܳܐ ܐܰܢ̱ܬ ܘܰܒܢܰܝ̈ܟ: ܘܰܐܢ̱ܬܬܳܟ: ܘܢܶܫ̈ܶܐ ܕܰܒܢܰܝ̈ܟ ܥܰܡܳܟ.

¹⁹ ܘܡܶܢ ܟܽܠ ܕܚܰܝ ܡܶܢ ܟܽܠ ܒܣܰܪ: ܬܪܶܝܢ ܬܪܶܝܢ ܐܰܥܶܠ ܠܩܺܒܽܘܬܳܐ ܠܡܰܚܳܝܽܘ ܥܰܡܳܟ: ܕܶܟܖ̈ܶܐ ܘܢܶܩ̈ܒܳܬܳܐ ܢܶܗܘܽܘܢ.

²⁰ ܘܡܶܢ ܦܳܪܰܚܬܳܐ ܠܓܶܢܣܳܗ̇: ܘܡܶܢ ܒܥܺܝܪܳܐ ܠܓܶܢܣܳܗ̇ ܘܡܶܢ ܟܽܠ ܪܰܚܫܳܐ ܕܰܐܪܥܳܐ ܠܓܶܢܣܰܘ̈ܗܝ: ܬܪܶܝܢ ܬܪܶܝܢ ܡܶܢ ܟܽܠ ܢܶܥܠܽܘܢ ܥܰܡܳܟ ܠܡܶܚܳܐ.

²¹ ܘܰܐܢ̱ܬ ܣܰܒ ܠܳܟ ܡܶܢ ܟܽܠ ܡܶܐܟܠܳܐ ܕܡܶܬܶܐܟܶܠ: ܘܰܚܡܽܘܠ ܠܘܳܬܳܟ: ܘܢܶܗܘܶܐ ܠܳܟ ܘܰܠܗܽܘܢ ܠܡܶܐܟܽܘܠܬܳܐ.

²² ܘܰܥܒܰܕ ܢܽܘܚ ܟܽܠ ܕܦܰܩܕܶܗ ܐܰ‌ܠܳܗܳܐ: ܗܳܟܰܢܳܐ ܥܒܰܕ.