Giosuè 12

¹ Hi sunt reges, quos percusserunt filii Israel et possederunt terram eorum trans Iordanem ad solis ortum, a torrente Arnon usque ad montem Hermon et omnem orientalem plagam Arabae.

² Sehon rex Amorraeorum, qui habitavit in Hesebon, dominatus est ab Aroer, quae sita est super ripam torrentis Arnon, et a media parte vallis et in dimidia parte Galaad usque ad torrentem Iaboc, qui est terminus filiorum Ammon;

³ et in Araba usque ad mare Chenereth in oriente et usque ad mare Arabae, quod est mare Salsissimum, ad orientalem plagam in via, quae ducit Bethiesimoth, et in australi parte, quae iacet ad radices Phasga.

⁴ Terminus Og regis Basan de reliquiis Raphaim, qui habitavit in Astharoth et in Edrai,

⁵ et dominatus est in monte Hermon et in Salcha atque in universa Basan usque ad terminos Gesuri et Maachathi et in dimidia parte Galaad usque ad terminos Sehon regis Hesebon.

⁶ Moyses famulus Domini et filii Israel percusserunt eos; tradiditque terram eorum Moyses in possessionem Rubenitis et Gaditis et dimidiae tribui Manasse.

⁷ Hi sunt reges terrae, quos percussit Iosue et filii Israel trans Iordanem ad occidentalem plagam, a Baalgad in campo Libani usque ad montem Calvum, qui ascendit in Seir; tradiditque eam Iosue in possessionem tribubus Israel, singulis partes suas,

⁸ tam in montanis quam in Sephela, in Araba et in declivibus et in solitudine ac in Nageb; Hetthaeus fuit et Amorraeus, Chananaeus et Pherezaeus, Hevaeus et Iebusaeus:

⁹ rex Iericho unus, rex Hai, quae est ex latere Bethel, unus,

¹⁰ rex Ierusalem unus, rex Hebron unus,

¹¹ rex Ierimoth unus, rex Lachis unus,

¹² rex Eglon unus, rex Gazer unus,

¹³ rex Dabir unus, rex Gader unus,

¹⁴ rex Horma unus, rex Arad unus,

¹⁵ rex Lobna unus, rex Odollam unus,

¹⁶ rex Maceda unus, rex Bethel unus,

¹⁷ rex Thapphua unus, rex Opher unus,

¹⁸ rex Aphec unus, rex Saron unus,

¹⁹ rex Madon unus, rex Asor unus,

²⁰ rex Semeron unus, rex Achsaph unus,

²¹ rex Thanach unus, rex Mageddo unus,

²² rex Cedes unus, rex Iecnaam Carmeli unus,

²³ rex Dor et provinciae Dor unus, rex gentium Galgal unus,

²⁴ rex Thersa unus: omnes reges triginta unus.