Genesi ܒܪܝܬܐ 39

¹ ܘܰܠܝܰܘܣܶܦ ܐܰܚܬܽܘܗܝ ܡܶܕܝܰܢܳܝ̈ܶܐ ܠܡܶܨܪܶܝܢ: ܘܙܰܒܢܶܗ ܦܽܘܛܺܝܦܰܪ ܡܗܰܝܡܢܳܐ ܪܰܒ ܕܰܚ̈ܫܶܐ ܕܦܶܪܥܽܘܢ: ܓܰܒܪܳܐ ܡܶܨܪܳܝܳܐ: ܡܶܢ ܐܺܝܕܳܐ ܕܥܰܖ̈ܰܒܳܝܶܐ ܕܰܐܚܬܽܘܗܝ ܠܬܰܡܳܢ.

² ܘܰܗܘܳܐ ܡܳܪܝܳܐ ܥܰܡ ܝܰܘܣܶܦ: ܘܰܗܘܳܐ ܓܰܒܪܳܐ ܡܰܨܠܰܚ ܒܶܝܬ ܡܳܪܶܗ ܡܶܨܪܳܝܳܐ.

³ ܘܰܚܙܳܐ ܡܳܪܶܗ ܕܡܳܪܝܳܐ ܥܰܡܶܗ: ܘܟܽܠ ܕܥܳܒܶܕ ܡܳܪܝܳܐ ܡܰܨܠܰܚ ܒܺܐܝܕܶܗ.

⁴ ܘܶܐܫܟܰܚ ܝܰܘܣܶܦ ܖ̈ܰܚܡܶܐ ܒܥܰܝܢܰܘ̈ܗܝ ܘܫܰܡܫܶܗ: ܘܰܐܫܠܛܶܗ ܥܰܠ ܒܰܝܬܶܗ: ܘܟܽܠ ܕܺܐܝܬ ܠܶܗ ܝܰܗܒ ܒܺܐܝܕܰܘ̈ܗܝ.

⁵ ܘܰܗܘܳܐ ܡܶܢ ܙܰܒܢܳܐ ܕܰܐܫܠܛܶܗ ܥܰܠ ܒܰܝܬܶܗ: ܘܥܰܠ ܟܽܠ ܕܺܐܝܬ ܠܶܗ: ܒܰܪܶܟ ܡܳܪܝܳܐ ܠܒܰܝܬܶܗ ܕܡܶܨܪܳܝܳܐ ܡܶܛܽܠ ܝܰܘܣܶܦ: ܘܰܗܘܳܬ ܒܽܘܪܟܬܶܗ ܕܡܳܪܝܳܐ ܒܟܽܠ ܕܺܐܝܬ ܠܶܗ ܒܒܰܝܬܳܐ ܘܰܒܚܰܩܠܳܐ.

⁶ ܘܰܫܒܰܩ ܟܽܠ ܡܶܕܶܡ ܕܺܐܝܬ ܠܶܗ ܒܝܰܕ ܝܰܘܣܶܦ: ܘܠܳܐ ܝܺܕܰܥ ܥܰܡܶܗ ܡܶܕܶܡ: ܐܶܠܳܐ ܐܶܢ ܠܰܚܡܳܐ ܕܳܐܟܶܠ ܗܘܳܐ: ܘܝܰܘܣܶܦ ܫܰܦܺܝܪ ܗܘܳܐ ܚܶܙܘܶܗ ܘܝܳܐܶܐ ܩܽܘܒܠܠܶܗ.

⁷ ܘܰܗܘܳܐ ܡܶܢ ܒܳܬܰܪ ܦܶܬܓܳܡ̈ܶܐ ܗܳܠܶܝܢ: ܐܰܪܡܝܰܬ ܐܰܢ̱ܬܰܬ ܡܳܪܶܗ ܥܰܝܢܳܗ̇ ܥܰܠ ܝܰܘܣܶܦ: ܘܶܐܡܪܰܬ ܠܶܗ: ܕܡܰܟ ܥܰܡܝ.

⁸ ܘܠܳܐ ܨܒܳܐ: ܘܶܐܡܰܪ ܠܰܐܢ̱ܬܰܬ ܡܳܪܶܗ: ܗܳܐ ܡܳܪܝ ܠܳܐ ܝܳܕܰܥ ܥܰܡܝ ܡܳܢܳܐ ܐܺܝܬ ܒܒܰܝܬܶܗ: ܘܟܽܠ ܕܺܐܝܬ ܠܶܗ ܐܰܫܠܶܛ ܒܺܐܝ̈ܕܰܝ.

⁹ ܘܠܰܝܬ ܕܪܰܒ ܒܒܰܝܬܳܐ ܗܳܢܳܐ ܡܶܢܝ: ܘܠܳܐ ܚܣܰܟ ܡܶܢܝ ܡܕܶܡ: ܐܶܠܳܐ ܐܶܢ ܠܶܟܝ ܕܰܐܢ̱ܬܬܶܗ ܐܰܢ̱ܬܝ: ܘܰܐܝܟܰܢܳܐ ܐܶܥܒܶܕ ܒܺܝܫܬܳܐ ܗܳܕܶܐ ܪܰܒܬܳܐ: ܘܶܐܚܛܶܐ ܠܰܐܠܳܗܳܐ.

¹⁰ ܘܟܰܕ ܐܳܡܪܳܐ ܗܘܳܬ ܠܶܗ ܟܽܠܝܽܘܡ: ܘܠܳܐ ܫܳܡܰܥ ܗܘܳܐ ܠܳܗ̇: ܠܡܶܕܡܰܟ ܠܘܳܬܳܗ̇ ܘܰܠܡܶܗܘܳܐ ܥܰܡܳܗ̇.

¹¹ ܘܰܗܘܳܐ ܒܚܰܕ ܡܶܢ ܝܰܘ̈ܡܳܬܳܐ: ܘܥܰܠ ܝܰܘܣܶܦ ܠܒܰܝܬܳܐ ܠܡܶܥܒܰܕ ܥܒܳܕܳܐ: ܘܠܰܝܬ ܐ̱ܢܳܫ ܡܶܢ ܐ̱ܢܳܫܰܝ̈ ܒܰܝܬܳܐ ܬܰܡܳܢ ܒܒܰܝܬܳܐ.

¹² ܘܶܐܚܰܕܬܶܗ ܒܰܠܒܫܶܗ: ܘܶܐܡܪܰܬ ܠܶܗ: ܕܡܰܟ ܥܰܡܝ: ܘܫܰܒܩܶܗ ܠܒܳܫܶܗ ܒܺܐܝܕܶܝ̈ܗ̇ ܘܰܥܪܰܩ ܢܦܰܩ ܠܶܗ ܠܫܽܘܩܳܐ.

¹³ ܘܰܗܘܳܐ ܕܟܰܕ ܚܙܳܬ ܕܫܰܒܩܶܗ ܠܒܳܫܶܗ ܒܺܐܝܕܶܝ̈ܗ̇: ܘܰܥܪܰܩ ܠܫܽܘܩܳܐ.

¹⁴ ܩܪܳܬ ܠܐ̱ܢܳܫܰܝ̈ ܒܰܝܬܳܗ̇ ܘܶܐܡܪܰܬ ܠܗܽܘܢ: ܚܙܰܘ ܕܰܐܝܬܺܝ ܠܰܢ ܥܰܒܕܳܐ ܥܶܒܪܳܝܳܐ ܠܡܶܓܚܰܟ ܥܠܰܝܢ: ܥܰܠ ܥܠܰܝ ܠܡܶܕܡܰܟ ܥܰܡܝ: ܘܰܩܥܺܝܬ ܒܩܳܠܳܐ ܪܳܡܳܐ.

¹⁵ ܘܟܰܕ ܫܡܰܥ ܕܰܐܪܺܝܡܶܬ ܩܳܠܝ ܘܰܩܥܺܝܬ: ܫܰܒܩܶܗ ܠܒܳܫܶܗ ܒܺܐܝܕܰܝ̈: ܘܰܥܪܰܩ ܢܦܰܩ ܠܶܗ ܠܫܽܘܩܳܐ.

¹⁶ ܘܣܳܡܬܶܗ ܠܒܳܫܶܗ ܠܘܳܬܳܗ̇: ܥܕܰܡܳܐ ܕܥܰܠ ܡܳܪܶܗ ܠܒܰܝܬܳܐ.

¹⁷ ܘܶܐܡܪܰܬ ܠܶܗ ܐܰܝܟ ܡ̈ܶܠܶܐ ܗܳܠܶܝܢ: ܥܰܠ ܥܠܰܝ ܥܰܒܕܳܐ ܥܶܒܪܳܝܳܐ ܕܰܐܝܬܺܝܬ ܠܰܢ ܠܰܡܓܰܚܳܟܽܘ ܒܰܢ.

¹⁸ ܘܟܰܕ ܐܰܪܺܝܡܶܬ ܩܳܠܝ ܘܰܩܥܺܝܬ: ܫܰܒܩܶܗ ܠܒܳܫܶܗ ܒܺܐܝܕܰܝ̈: ܘܰܥܪܰܩ ܢܦܰܩ ܠܶܗ ܠܫܽܘܩܳܐ.

¹⁹ ܘܟܰܕ ܫܡܰܥ ܡܳܪܶܗ ܡܶܠܶܝ̈ܗ̇ ܕܰܐܢ̱ܬܬܶܗ ܕܶܐܡܪܰܬ ܠܶܗ: ܕܰܐܝܟ ܡ̈ܶܠܶܐ ܗܳܠܶܝܢ ܥܒܰܕ ܠܺܝ ܥܰܒܕܳܟ: ܐܶܬܚܰܡܰܬ ܪܽܘܓܙܶܗ.

²⁰ ܘܕܰܒܪܶܗ ܡܳܪܶܗ ܘܰܐܪܡܝܶܗ ܒܶܝܬ ܐܰܣܺܝܖ̈ܶܐ: ܐܰܬܰܪ ܕܰܐܣܺܝܖ̈ܰܝ ܡܰܠܟܳܐ ܐܰܣܺܝܪܺܝܢ ܗܘܰܘ: ܘܰܗܘܳܐ ܬܰܡܳܢ ܒܶܝܬ ܐܰܣܺܝܖ̈ܶܐ.

²¹ ܘܰܗܘܳܐ ܡܳܪܝܳܐ ܥܰܡ ܝܰܘܣܶܦ: ܘܰܐܪܡܺܝ ܥܠܰܘܗ̱ܝ ܚܶܣܕܳܐ: ܘܝܰܗܒܶܗ ܠܖ̈ܰܚܡܶܐ ܒܥܰܝ̈ܢܰܝ ܪܰܒܒܶܝܬ ܐܰܣܺܝܖ̈ܶܐ.

²² ܘܰܐܫܠܶܡ ܪܰܒܒܶܝܬ ܐܰܣܺܝܖ̈ܶܐ ܒܝܰܕ ܝܰܘܣܶܦ ܟܽܠܗܽܘܢ ܐܰܣܺܝܖ̈ܶܐ ܕܰܒܒܶܝܬ ܐܰܣܺܝܖ̈ܶܐ: ܘܟܽܠ ܕܥܳܒܕܺܝܢ ܗܘܰܘ ܬܰܡܳܢ: ܗܽܘ ܥܳܒܶܕ ܗܘܳܐ.

²³ ܘܪܰܒܒܶܝܬ ܐܰܣܺܝܖ̈ܶܐ ܠܳܐ ܚܳܙܶܐ ܗܘܳܐ ܡܶܕܶܡ ܒܺܐܝܕܶܗ: ܡܶܛܽܠ ܕܡܳܪܝܳܐ ܗܘܳܐ ܥܰܡܶܗ: ܘܟܽܠ ܡܶܕܶܡ ܕܥܳܒܶܕ ܗܘܳܐ ܡܳܪܝܳܐ ܡܰܨܠܰܚ.