Genesi ܒܪܝܬܐ 37

¹ ܘܺܝܬܶܒ ܝܰܥܩܽܘܒ ܒܰܐܪܥܳܐ ܕܡܰܥܡܪܶܗ ܕܰܐܒܽܘܗܝ: ܒܰܐܪܥܳܐ ܕܰܟܢܰܥܢ.

² ܘܗܳܠܶܝܢ ܬܰܘ̈ܠܕܳܬܶܗ ܕܝܰܥܩܽܘܒ: ܝܰܘܣܶܦ ܒܰܪ ܫܒܰܥܶܣܖ̈ܶܐ ܫܢܺܝ̈ܢ: ܪܳܥܶܐ ܗܘܳܐ ܥܰܡ ܐܰܚܰܘ̈ܗܝ ܥܳܢ̈ܳܐ: ܘܗܽܘ ܪܳܒܶܐ ܗܘܳܐ ܥܰܡ ܒܢܰܝ̈ ܒܰܠܗܳܐ ܘܥܰܡ ܒܢܰܝ̈ ܙܰܠܦܳܐ ܢܶܫܰܘ̈ܗܝ ܕܰܐܒܽܘܗܝ: ܘܰܐܝܬܺܝ ܝܰܘܣܶܦ ܛܶܒܗܽܘܢ ܒܺܝܫܳܐ ܠܰܐܒܽܘܗܽܘܢ.

³ ܘܺܝܣܪܳܐܶܝܠ ܪܳܚܶܡ ܗܘܳܐ ܠܶܗ ܠܝܰܘܣܶܦ ܝܰܬܺܝܪ ܡܶܢ ܟܽܠܗܽܘܢ ܒܢܰܘ̈ܗܝ: ܡܶܛܽܠ ܕܒܰܪ ܣܰܝܒܽܘܬܳܐ ܗܘܳܐ ܠܶܗ: ܘܰܥܒܰܕ ܠܶܗ ܟܽܘܬܺܝܢܳܐ ܕܦܶܕ̈ܝܳܬܳܐ.

⁴ ܘܰܚܙܰܘ ܐܰܚܰܘ̈ܗܝ ܕܠܶܗ ܪܳܚܶܡ ܗܘܳܐ ܐܰܒܽܘܗܽܘܢ ܝܰܬܺܝܪ ܡܶܢ ܟܽܠܗܽܘܢ: ܘܰܣܢܰܐܗܝ ܘܠܳܐ ܐܶܫܟܰܚܘ ܠܰܡܡܰܠܳܠܽܘ ܥܰܡܶܗ ܫܠܳܡܳܐ.

⁵ ܘܰܚܠܰܡ ܝܰܘܣܶܦ ܚܶܠܡܳܐ: ܘܚܰܘܝܶܗ ܠܰܐܚܰܘ̈ܗܝ: ܘܰܐܘܣܶܦܘ ܠܡܶܣܢܝܶܗ.

⁶ ܘܶܐܡܰܪ ܠܗܽܘܢ: ܫܡܰܥܘ ܚܶܠܡܳܐ ܗܳܢܳܐ ܕܚܶܠܡܶܬ.

⁷ ܗܳܐ ܚܢܰܢ ܐܳܣܪܺܝܢ ܚܢܰܢ ܟܰܦ̈ܶܐ ܒܓܰܘ ܚܰܩܠܳܐ: ܘܗܳܐ ܩܳܡܰܬ ܟܰܦܝ ܘܶܐܙܕܰܩܦܰܬ: ܘܗܳܐ ܚܳܕܖ̈ܳܢ ܟܰܦܰܝ̈ܟܽܘܢ ܘܣܳܓ̈ܕܳܢ ܠܟܰܦܝ.

⁸ ܘܶܐܡܰܪܘ ܠܶܗ ܐܰܚܰܘ̈ܗܝ: ܡܰܡܠܳܟܽܘ ܡܰܡܠܶܟ ܐܰܢ̱ܬ ܥܠܰܝܢ: ܐܰܘ ܡܶܫܬܰܠܳܛܽܘ ܡܶܫܬܰܠܰܛ ܐܰܢ̱ܬ ܒܰܢ: ܘܰܐܘܣܶܦܘ ܬܽܘܒ ܠܡܶܣܢܝܶܗ ܥܰܠ ܚܶܠܡܰܘ̈ܗܝ ܘܥܰܠ ܦܶܬܓܳܡܰܘ̈ܗܝ.

⁹ ܘܰܚܠܰܡ ܬܽܘܒ ܚܶܠܡܳܐ ܐ̱ܚܪܺܢܳܐ ܘܶܐܫܬܰܥܝܶܗ ܠܰܐܚܰܘ̈ܗܝ: ܘܶܐܡܰܪ ܠܗܽܘܢ: ܗܳܐ ܚܶܠܡܳܐ ܚܶܠܡܶܬ ܬܽܘܒ: ܘܗܳܐ ܫܶܡܫܳܐ ܘܣܰܗܪܳܐ ܘܰܚܕܰܥܣܰܪ ܟܰܘ̈ܟܒܺܝܢ ܣܳܓܕܺܝܢ ܠܺܝ.

¹⁰ ܘܶܐܫܬܰܥܺܝ ܠܰܐܒܽܘܗܝ ܘܠܰܐܚܰܘ̈ܗܝ ܘܰܟܐܳܐ ܒܶܗ ܐܰܒܽܘܗܝ ܘܶܐܡܰܪ ܠܶܗ: ܡܳܢܰܘ ܚܶܠܡܳܐ ܗܳܢܳܐ ܕܰܚܠܰܡܬ: ܡܶܐܬܳܐ ܢܺܐܬܶܐ ܐܶܢܳܐ ܘܶܐܡܳܟ ܘܰܐܚܰܝ̈ܟ ܠܡܶܣܓܰܕ ܠܳܟ ܥܰܠ ܐܰܪܥܳܐ.

¹¹ ܘܛܰܢܘ ܒܶܗ ܐܰܚܰܘ̈ܗܝ: ܘܰܐܒܽܘܗܝ ܢܳܛܰܪ ܗܘܳܐ ܦܶܬܓܳܡ̈ܶܐ.

¹² ܘܶܐܙܰܠܘ ܐܰܚܰܘ̈ܗܝ ܕܝܰܘܣܶܦ: ܠܡܶܪܥܳܐ ܥܳܢ̈ܳܐ ܕܰܐܒܽܘܗܽܘܢ ܒܰܫܟܺܝܡ.

¹³ ܘܶܐܡܰܪ ܝܺܣܪܳܐܶܝܠ ܠܝܰܘܣܶܦ: ܗܳܐ ܐܰܚܰܝ̈ܟ ܪܳܥܶܝܢ ܒܰܫܟܺܝܡ: ܬܳܐ ܐܶܫܰܕܪܳܟ ܠܘܳܬܗܽܘܢ: ܘܶܐܡܰܪ ܠܶܗ ܗܳܐ ܐܶܢܳܐ.

¹⁴ ܘܶܐܡܰܪ ܠܶܗ ܐܰܒܽܘܗܝ: ܙܶܠ ܚܙܺܝ ܫܠܳܡܳܐ ܕܰܐܚܰܝ̈ܟ ܘܰܫܠܳܡܳܐ ܕܥܳܢ̈ܳܐ: ܘܰܐܬܺܝܒܰܝܢܝ ܦܶܬܓܳܡܳܐ: ܘܫܰܕܪܶܗ ܝܰܥܩܽܘܒ ܡܶܢ ܥܽܘܡܩܳܐ ܕܚܶܒܪܽܘܢ: ܘܶܐܬܳܐ ܠܰܫܟܺܝܡ.

¹⁵ ܘܶܐܫܟܚܶܗ ܓܰܒܪܳܐ ܟܰܕ ܛܳܥܶܐ ܒܚܰܩܠܳܐ: ܘܫܰܐܠܶܗ ܓܰܒܪܳܐ ܗܰܘ ܘܶܐܡܰܪ ܠܶܗ: ܡܳܢܳܐ ܒܳܥܶܐ ܐܰܢ̱ܬ.

¹⁶ ܘܶܐܡܰܪ: ܠܰܐܚܰܝ̈ ܒܳܥܶܐ ܐ̱ܢܳܐ: ܚܰܘܳܢܝ ܐܰܝܟܳܐ ܪܳܥܶܝܢ.

¹⁷ ܐܶܡܰܪ ܠܶܗ ܓܰܒܪܳܐ: ܫܩܰܠܘ ܠܗܽܘܢ ܡܶܟܳܐ: ܘܫܶܡܥܶ݀ܬ ܕܳܐܡܪܺܝܢ ܢܺܐܙܰܠ ܠܕܳܘܬܳܢ: ܘܶܐܙܰܠ ܝܰܘܣܶܦ ܒܳܬܰܪ ܐܰܚܰܘ̈ܗܝ: ܘܶܐܫܟܰܚ ܐܶܢܽܘܢ ܒܕܳܘܬܳܢ.

¹⁸ ܘܰܚܙܰܐܗܝ ܡܶܢ ܪܽܘܚܩܳܐ: ܘܥܰܕܠܳܐ ܢܶܬܩܰܪܰܒ ܠܘܳܬܗܽܘܢ: ܡܶܬܚܰܫܒܺܝܢ ܗܘܰܘ ܥܠܰܘܗ̱ܝ ܠܡܶܩܛܠܶܗ.

¹⁹ ܘܶܐܡܰܪ ܓܒܰܪ ܠܰܐܚܽܘܗܝ: ܗܳܐ ܚܳܠܶܡ ܚܶܠ̈ܡܶܐ ܗܰܘ ܐܳܬܶܐ.

²⁰ ܬܰܘ ܢܶܩܛܠܺܝܘܗܝ ܘܢܰܪܡܶܝܘܗܝ ܒܚܰܕ ܡܶܢ ܓܽܘ̈ܒܶܐ: ܘܢܺܐܡܰܪ ܕܚܰܝܽܘܬܳܐ ܒܺܝܫܬܳܐ ܐܶܟܰܠܬܶܗ: ܘܢܶܚܙܶܐ ܡܳܢܳܐ ܗܳܘܶܐ ܠܚܶܠܡܰܘ̈ܗܝ.

²¹ ܘܰܫܡܰܥ ܪܽܘܒܺܝܠ: ܘܦܰܨܝܶܗ ܡܶܢ ܐܺܝ̈ܕܰܝܗܽܘܢ.

²² ܘܶܐܡܰܪ ܠܗܽܘܢ: ܠܳܐ ܢܶܩܛܽܘܠ ܢܰܦܫܳܐ: ܘܶܐܡܰܪ ܠܗܽܘܢ ܪܽܘܒܺܝܠ: ܠܳܐ ܬܶܐܫܕܽܘܢ ܕܡܳܐ: ܐܰܪܡܰܐܗܝ ܒܓܽܘܒܳܐ ܗܳܢܳܐ ܕܰܒܡܰܕܒܪܳܐ: ܘܺܐܝܕܳܐ ܠܳܐ ܬܰܘܫܛܽܘܢ ܒܶܗ: ܕܰܢܦܰܨܶܝܘܗܝ ܡܶܢ ܐܺܝ̈ܕܰܝܗܽܘܢ ܘܢܰܗܦܟܺܝܘܗܝ ܠܰܐܒܽܘܗܝ.

²³ ܘܟܰܕ ܐܶܬܳܐ ܝܰܘܣܶܦ ܠܘܳܬ ܐܰܚܰܘ̈ܗܝ: ܐܰܫܠܚܽܘܗܝ ܟܽܘܬܺܝܢܳܐ ܕܦܶܕ̈ܝܳܬܳܐ ܕܰܠܒܺܝܫ ܗܘܳܐ.

²⁴ ܘܢܰܣܒܽܘܗܝ ܘܰܐܪܡܺܝܘܗܝ ܒܓܽܘܒܳܐ: ܘܓܽܘܒܳܐ ܣܪܺܝܩ ܗܘܳܐ ܘܠܰܝܬ ܒܶܗ ܡܰܝ̈ܳܐ.

²⁵ ܘܺܝܬܶܒܘ ܠܡܶܐܟܰܠ ܠܰܚܡܳܐ: ܘܰܐܪܺܝܡܘ ܥܰܝ̈ܢܰܝܗܽܘܢ ܘܚܳܙܶܝܢ: ܘܗܳܐ ܫܝܳܪܬܳܐ ܕܥܰܖ̈ܰܒܳܝܶܐ ܐܳܬܝܳܐ ܡܶܢ ܓܶܠܥܳܕ: ܘܓܰܡ̈ܠܰܝܗܽܘܢ ܛܥܺܝܢܺܝܢ ܖ̈ܗܶܛܢܶܐ: ܘܨܰܪܘܳܐ ܘܒܶܛ̈ܡܶܐ: ܘܳܐܙܺܠ̱ܝܢ ܠܡܰܘܒܳܠܽܘ ܠܡܶܨܪܶܝܢ.

²⁶ ܘܶܐܡܰܪ ܝܺܗܽܘܕܳܐ ܠܰܐܚܰܘ̈ܗܝ: ܡܳܢܳܐ ܝܽܘܬܪܳܢܳܐ ܕܢܶܩܛܽܘܠ ܠܰܐܚܽܘܢ: ܘܰܢܟܰܣܶܐ ܕܡܶܗ.

²⁷ ܬܰܘ ܢܙܰܒܢܺܝܘܗܝ ܠܥܰܖ̈ܰܒܳܝܶܐ: ܘܺܐܝܕܰܢ ܠܳܐ ܬܶܗܘܶܐ ܒܶܗ: ܡܶܛܽܠ ܕܰܐܚܽܘܢ ܗ̱ܘ ܘܒܶܣܪܰܢ: ܘܰܫܡܰܥܘ ܡܶܢܶܗ ܐܰܚܰܘ̈ܗܝ.

²⁸ ܘܰܥܒܰܪܘ ܓܰܒܖ̈ܶܐ ܬܰܓܳܖ̈ܶܐ ܡܶܕܝܰܢܳܝ̈ܶܐ: ܘܰܢܓܰܕܘ ܐܰܣܩܽܘܗܝ ܠܝܰܘܣܶܦ ܡܶܢ ܓܽܘܒܳܐ: ܘܙܰܒܢܽܘܗܝ ܠܝܰܘܣܶܦ ܠܥܰܖ̈ܰܒܳܝܶܐ ܒܥܶܣܪܺܝܢ ܕܟܶܣܦܳܐ: ܘܰܐܝܬܝܽܘܗܝ ܠܡܶܨܪܶܝܢ.

²⁹ ܘܰܗܦܰܟ ܪܽܘܒܺܝܠ ܠܓܽܘܒܳܐ: ܘܗܳܐ ܠܰܝܬ ܒܶܗ ܝܰܘܣܶܦ: ܘܨܰܪܺܝ ܠܒܽܘܫܰܘ̈ܗܝ.

³⁰ ܘܰܗܦܰܟ ܠܘܳܬ ܐܰܚܰܘ̈ܗܝ: ܘܶܐܡܰܪ ܠܗܽܘܢ: ܛܰܠܝܳܐ ܐܰܝܟܰܐ ܗ̱ܘ: ܘܶܐܢܳܐ ܠܰܐܝܟܳܐ ܐܳܙܶܠ ܐ̱ܢܳܐ.

³¹ ܘܢܰܣܒܽܘܗ̇ ܠܟܽܘܬܺܝܢܳܐ ܕܝܰܘܣܶܦ: ܘܰܢܟܰܣܘ ܨܺܦܪܳܝܳܐ ܕܥܶܙ̈ܶܐ: ܘܦܰܠܦܠܽܘܗ̇ ܠܟܽܘܬܺܝܢܳܐ ܒܰܕܡܶܗ.

³² ܘܫܰܕܪܽܘܗ̇ ܠܟܽܘܬܺܝܢܳܐ ܕܦܶܕ̈ܝܳܬܳܐ ܘܰܐܝܬܝܽܘܗ̇ ܠܰܐܒܽܘܗܽܘܢ: ܘܶܐܡܰܪܘ: ܗܳܕܶܐ ܐܶܫܟܰܚܢ: ܐܶܫܬܰܘܕܰܥ ܟܽܘܬܺܝܢܳܐ: ܐܶܢ ܕܰܒܪܳܟ ܗ̱ܝ ܐܰܘ ܠܳܐ.

³³ ܘܶܐܫܬܰܘܕܥܳܗ̇ ܘܶܐܡܰܪ: ܟܽܘܬܺܝܢܳܐ ܕܒܶܪܝ ܗ̱ܝ: ܚܰܝܽܘܬܳܐ ܒܺܝܫܬܳܐ ܐܶܟܰܠܬܶܗ: ܡܶܬܒܰܪ ܬܒܺܝܪ ܝܰܘܣܶܦ ܒܶܪܝ.

³⁴ ܘܨܰܪܺܝ ܝܰܥܩܽܘܒ ܠܒܽܘܫܰܘ̈ܗܝ: ܘܶܐܣܰܪ ܣܰܩܳܐ ܒܚܰܨܰܘ̈ܗܝ: ܘܶܐܬܐܒܶܠ ܥܰܠ ܒܪܶܗ ܝܰܘ̈ܡܳܬܳܐ ܣܰܓܺܝ̈ܐܶܐ.

³⁵ ܘܩܳܡܘ ܟܽܠܗܽܘܢ ܒܢܰܘ̈ܗܝ: ܘܟܽܠܗܶܝܢ ܒܢ̈ܳܬܶܗ ܠܰܡܒܰܝܳܐܽܘܬܶܗ: ܘܠܳܐ ܨܒܳܐ ܠܡܶܬܒܰܝܳܐܽܘ: ܘܶܐܡܰܪ: ܐܶܚܽܘܬ ܥܰܠ ܒܶܪܝ ܟܰܕ ܐܰܒܺܝܠ ܐ̱ܢܳܐ ܠܰܫܝܽܘܠ: ܘܰܒܟܳܝܗܝ ܐܰܒܽܘܗܝ.

³⁶ ܘܡܶܕܝܰܢܳܝ̈ܶܐ ܙܰܒܢܽܘܗܝ ܒܡܶܨܪܶܝܢ ܠܦܽܘܛܺܝܦܰܪ ܡܗܰܝܡܢܳܐ: ܪܰܒ ܕܰܚ̈ܫܶܐ ܕܦܶܪܥܽܘܢ.