Salmi ܡܙܡܘܪܐ 66

¹ܫܒܚܘ ܠܐܠܗܐ ܟܠܗ̇ ܐܪܥܐ²ܙܡܪܘ ܠܐܝܩܪܐ ܕܫܡܗ ܙܡܪܘ ܠܐܝܩܪܐ ܕܬܫܒܘܚܬܗ³ܐܡܪܘ ܠܐܠܗܐ ܡܐ ܕܚܝ̈ܠܝܢ ܥܒ̈ܕܝܟ ܒܣܘܓܐܐ ܕܥܘܫܢܟ ܢܬܟܬܒܘܢ ܠܟ ܒܥ̈ܠܕܒܒܝܟ⁴ܒܟܠܗ̇ ܐܪܥܐ ܢܣܓܕܘܢ ܠܟ ܘܢܙܡܪܘܢ ܠܟ ܘܢܫܒܚܘܢ ܠܫܡܟ ܠܥܠܡܝܢ⁵ܘܢܐܡܪܘܢ ܬܘ ܚܙܘ ܥܒ̈ܕܘܗܝ ܕܐܠܗܐ. ܕܣ̈ܓܝܐܢ ܬܕܡܪ̈ܬܗ ܥܠ ܒܢܝ̈ ܐܢܫܐ⁶ܕܗܦܟ ܝܡܐ ܠܝܒܫܐ ܘܠܢܗܪܐ ܥܒܪܘܗܝ ܡܢ ܪܓܠ ܬܡܢ ܢܚܕܐ ܒܗ⁷ܡܢ ܕܫܠܝܛ ܒܓܢܒܪܘܬܗ ܠܥܠܡ ܥܝܢ̈ܘܗܝ ܒܥܡ̈ܡܐ ܚܝܪ̈ܢ ܘܡܪ̈ܘܕܐ ܠܐ ܢܬܬܪܝܡܘܢ ܠܥܠܡ⁸ܒܪܟܘ ܥܡ̈ܡܐ ܠܐܠܗܐ. ܘܫܡܥ ܩܠܐ ܕܫܘܒܚܗ⁹ܕܣܡ ܢܦܫܢ ܒܚ̈ܝܐ ܘܠܐ ܝܗܒ ܪܓܠܢ ܠܙܘܥܬܐ¹⁰ܡܛܠ ܕܒܚܪܬܢ ܐܠܗܐ ܘܒܩܝܬܢ ܐܝܟ ܕܒܩܝܢ ܠܣܐܡܐ¹¹ܐܥܠܬܢ ܒܡܨܝܕܬܐ ܘܥܒܕܬ ܐܘܠܨܢܐ ܒܚ̈ܨܝܢ¹²ܐܪܟܒܬ ܒܪܢܫܐ ܥܠ ܪܝܫܢ ܐܥܠܬܢ ܒܢܘܪܐ ܘܒܡ̈ܝܐ ܘܐܦܩܬܢ ܠܐܪܘܚܬܐ¹³ܐܬܐ ܠܒܝܬܟ ܒܐܝܩܪܐ ܘܐܦܪܥܟ ܢܕܪ̈ܝ¹⁴ܡܕܡ ܕܦܬܚ ܣ̈ܦܘܬܝ ܒܡܡܠܠܗ ܕܦܘܡܝ ܒܐܘܠܨܢܐ¹⁵ܝܩ̈ܕܐ ܫܡ̈ܝܢܐ ܐܣܩ ܠܟ ܥܡ ܣܘܬܐ ܕܕܟܪ̈ܐ ܘܐܥܒܕ ܬܘܪ̈ܐ ܘܓܕܝ̈ܐ¹⁶ܬܘ ܫܡܥܘ ܘܐܫܬܥܐ ܠܟܘܢ ܟܠܟܘܢ ܥܒ̈ܕܘܗܝ ܕܐܠܗܐ ܡܕܡ ܕܥܒܕ ܠܢܦܫܝ¹⁷ܒܦܘܡܝ ܩܪܝܬܗ ܘܥܢܢܝ ܘܪܡܪܡܬܗ ܒܠܫܢܝ¹⁸ܥܘܠܐ ܐܢ ܚܙܝܬ ܒܠܒܝ ܠܐ ܬܦܪܩܢܝ ܡܪܝܐ¹⁹ܗܝܕܝܢ ܫܡܥ ܐܠܗܐ ܩܠܐ ܕܒܥܘܬܝ²⁰ܒܪܝܟ ܗܘ ܡܪܝܐ ܕܠܐ ܐܥܒܪ ܨܠܘܬܝ ܘܛܝܒܘܬܗ ܡܢܝ

Cambia Bibbia

Confronta con un'altra Bibbia

Versetti esaminati