Salmi ܡܙܡܘܪܐ 44

²ܐܠܗܐ ܫܡܥܢܢ ܒܐ̈ܕܢܝܢ ܐܦ ܐ̈ܒܗܝܢ ܐܫܬܥܝܘ ܠܢ ܡܕܡ ܕܥܒܕܬ ܒܝ̈ܘܡܝܗܘܢ ܒܝܘܡ̈ܬܐ ܩܕܡ̈ܝܐ³ܐܝܕܟ ܐܘܒܕܬ ܠܥܡ̈ܡܐ ܘܢܨܒܬ ܐܢܘܢ ܘܐܒܐܫܬ ܠܡ̈ܠܟܘܬܐ ܘܫܪܪܬ ܐܢܘܢ⁴ܡܛܠ ܕܠܐ ܗܘܐ ܒܚܪܒܗܘܢ ܝܪܬܘ ܐܪܥܐ ܐܦ ܠܐ ܕܪܥܗܘܢ ܦܪܩ ܐܢܘܢ ܐܠܐ ܝܡܝܢܟ ܘܕܪܥܟ ܘܢܘܗܪܐ ܕܐ̈ܦܝܟ ܕܨܒܝܬ ܒܗܘܢ⁵ܐܢܬ ܗܘ ܐܠܗܐ ܡܠܟܝ ܕܦܩܕܬ ܥܠ ܦܘܪܩܢܗ ܕܝܥܩܘܒ⁶ܒܟ ܢܕܩܪ ܠܒ̈ܥܠܕܒܒܝܢ ܘܡܛܠ ܫܡܟ ܢܕܘܫ ܠܣܢܐ̈ܝܢ⁷ܡܛܠ ܕܠܐ ܗܘܐ ܥܠ ܩܫ̈ܬܬܢ ܬܟܝܠܝܢܢ ܐܦ ܠܐ ܥܠ ܙܝܢܢ ܕܢܦܪܩܢ⁸ܐܢܬ ܗܘ ܦܪܩܬܢ ܡܢ ܣܢܐ̈ܝܢ ܘܐܒܗܬܬ ܠܒ̈ܥܠܕܒܒܝܢ⁹ܫܒܚܢܟ ܐܠܗܐ ܟܘܠܗ ܝܘܡܐ ܘܠܫܡܟ ܠܥܠܡ ܢܘܕܐ¹⁰ܗܫܐ ܛܥܝܬܢ ܘܐܒܗܬܬܢ ܘܠܐ ܢܦܩ ܐܢܬ ܒܚܝܠܢ¹¹ܐܠܐ ܐܗܦܟܬܢ ܠܒܣܬܪܢ ܘܒܙܘܢ ܒ̈ܥܠܕܒܒܝܢ¹²ܝܗܒܬܢ ܐܝܟ ܥܢܐ ܠܡܐܟܘܠܬܐ ܘܒܕܪܬܢ ܒܝܬ ܥܡ̈ܡܐ¹³ܙܒܢܬ ܠܥܡܟ ܕܠܐ ܕܡ̈ܝܐ ܘܠܐ ܐܣܓܝܬ ܚܘܠܦܗܘܢ¹⁴ܥܒܕܬܢ ܚܣܕܐ ܠܫܒ̈ܒܝܢ ܡܘܝܩܐ ܘܒܘܙܚܐ ܠܐܝܠܝܢ ܕܚܕܪܝܢ ܐܢܘܢ¹⁵ܥܒܕܬܢ ܠܡܬܠܐ ܒܝܬ ܥܡ̈ܡܐ ܘܢܝܕܐ ܕܪܝܫܐ ܒܐ̈ܡܘܬܐ¹⁶ܘܟܠܗ ܝܘܡܐ ܒܗܬܬܝ ܩܕܡܝ ܗܝ ܘܒܗܬܬܐ ܕܐ̈ܦܝ ܟܣܝܬܢܝ¹⁷ܡܢ ܩܠܐ ܕܡܚܣܕ ܘܡܓܕܦ ܘܡܢ ܩܕܡ ܒܥܠܕܒܒܐ ܕܡܬܢܩܡ¹⁸ܗܠܝܢ ܟܠܗܝܢ ܓܕܫ ܠܢ ܘܠܐ ܛܥܝܢܟ ܘܠܐ ܕܓܠܢܢ ܒܩܝܡܟ¹⁹ܘܠܐ ܗܦܟܢ ܠܒܣܬܪܢ ܘܠܐ ܐܗܦܟܢ ܫܒܝ̈ܠܝܢ ܡܢ ܐܘܪܚܟ²⁰ܡܛܠ ܕܡܟܟܬܢ ܒܐܬܪܐ ܬܢܝܢܐ ܘܟܣܝܬܢ ܒ̈ܛܠܠܝ ܡܘܬܐ²¹ܘܠܐ ܛܥܝܢ ܫܡܗ ܕܐܠܗܢ ܘܠܐ ܦܫܛܢ ܐ̈ܝܕܝܢ ܠܘܬ ܐ̈ܠܗܐ ܢܘܟܪ̈ܝܐ²²ܐܠܗܐ ܗܘ ܒܨܐ ܠܗ̇ ܠܗܕܐ ܡܛܠ ܕܗܘ ܝܕܥ ܡܚܫ̈ܒܬܗ ܕܠܒܐ²³ܡܛܠܬܟ ܐܬܩܛܠܢ ܟܠ ܝܘܡ ܘܐܬܚܫܒܢ ܐܝܟ ܥܢܐ ܠܢܟܣܬܐ²⁴ܐܬܬܥܝܪ ܘܠܐ ܬܕܡܟ ܡܪܝܐ ܥܗܕܝܢ ܘܠܐ ܬܛܥܝܢ²⁵ܘܠܐ ܬܗܦܟ ܐ̈ܦܝܟ ܡܢܢ ܘܠܐ ܬܛܥܐ ܡܘܟܟܢ ܘܐ̈ܘܠܨܢܝܢ²⁶ܡܛܠ ܕܡܟܬ ܥܠ ܥܦܪܐ ܢܦܫܢ ܘܕܒܩܬ ܟܪܣܢ ܠܐܪܥܐ²⁷ܩܘܡ ܥܕܪܝܢܝ ܘܦܪܘܩܝܢܝ ܡܛܠ ܪ̈ܚܡܝܟ

Cambia Bibbia

Confronta con un'altra Bibbia

Versetti esaminati