Salmi ܡܙܡܘܪܐ 37

¹ܠܐ ܬܚܣܡ ܒܪ̈ܫܝܥܐ ܘܠܐ ܬܛܢ ܒܥܒ̈ܕܝ ܥܘܠܐ²ܡܛܠ ܕܐܝܟ ܓ̈ܠܐ ܒܥܓܠ ܝܒܫܝܢ ܘܐܝܟ ܝܘܪܩܐ ܕܥܣܒܐ ܚܡܝܢ³ܣܒܪ ܒܐܠܗܐ ܘܥܒܕ ܛܒܬܐ ܥܡܪ ܒܐܪܥܐ ܘܒܥܝ ܗܝܡܢܘܬܐ⁴ܣܒܪ ܒܡܪܝܐ ܘܢܬܠ ܠܟ ܫܐ̈ܠܬܗ ܕܠܒܟ⁵ܬܪܘܨ ܩܕܡ ܡܪܝܐ ܐܘܪܚܟ ܘܣܒܪ ܒܗ ܘܗܘ ܥܒܕ⁶ܘܡܦܩ ܐܝܟ ܢܘܗܪܐ ܙܕܝܩܘܬܟ ܘܕܝܢ̈ܝܟ ܐܝܟ ܛܗܪܐ⁷ܒܥܝ ܡܢ ܡܪܝܐ ܘܨܠܐ ܩܕܡܘܗܝ ܘܠܐ ܬܚܣܡ ܒܓܒܪܐ ܕܥܒܕ ܥܘܠܐ ܘܡܨܠܚܐ ܐܘܪܚܗ⁸ܐܬܬܢܝܚ ܡܢ ܚܡܬܐ ܘܐܬܬܢܝܚ ܡܢ ܪܘܓܙܐ ܘܠܐ ܬܚܣܡ ܠܡܥܒܕ ܒܝܫܬܐ⁹ܡܛܠ ܕܒܝ̈ܫܐ ܣܝܦܝܢ ܘܐܝܠܝܢ ܕܡܣܒܪܝܢ ܒܡܪܝܐ ܝܪܬܝܢ ܐܪܥܐ¹⁰ܒܙܒܢܐ ܙܥܘܪܐ ܒܥܐ ܐܢܬ ܠܗ ܠܪܫܝܥܐ ܘܠܝܬܘܗܝ ܘܚܐܪ ܐܢܬ ܒܕܘܟܬܗ ܘܠܐ ܡܫܬܟܚ¹¹ܘܡܣ̈ܟܢܐ ܝܪܬܝܢ ܐܪܥܐ ܘܡܬܒܣܡܝܢ ܒܫܠܡܐ ܣܓܝܐܐ¹²ܡܬܚܡܬ ܪܫܝܥܐ ܥܠ ܙܕܝܩܐ ܘܡܚܪܩ ܫ̈ܢܘܗܝ ܥܠܘܗܝ¹³ܘܡܪܝܐ ܢܓܚܟ ܥܠܘܗܝ ܡܛܠ ܕܝܕܥ ܕܡܛܐ ܝܘܡܗ¹⁴ܣܝܦܐ ܫܡܛܘ ܪ̈ܫܝܥܐ ܘܡܬܚܘ ܩܫܬܐ ܕܢܩܛܠܘܢ ܠܡܣ̈ܟܢܐ ܘܠܒܝܫ̈ܐ ܘܠܐܝܠܝܢ ܕܬܪ̈ܝܨܢ ܐܘܪ̈ܚܬܗܘܢ¹⁵ܣܝܦܗܘܢ ܢܥܘܠ ܒܠܒܗܘܢ ܘܩܫܬ̈ܬܗܘܢ ܢܬܬܒܪ̈ܢ¹⁶ܦܩܚ ܩܠܝܠ ܠܙܕܝܩܐ ܡܢ ܩܢܝܢܐ ܣܓܝܐܐ ܕܪ̈ܫܝܥܐ¹⁷ܡܛܘܠ ܕܕܪ̈ܥܝܗܘܢ ܕܪ̈ܫܝܥܐ ܢܬܬܒܪܘܢ ܡܣܡܟ ܠܙܕܝܩ̈ܐ ܡܪܝܐ¹⁸ܘܝܕܥ ܡܪܝܐ ܝܘܡ̈ܬܗܘܢ ܕܬܡܝ̈ܡܐ ܘܝܪܬܘܬܗܘܢ ܠܥܠܡ ܬܗܘܐ¹⁹ܘܠܐ ܢܒܗܬܘܢ ܒܫܥܬܐ ܒܝܫܬܐ ܘܒܝ̈ܘܡܬܐ ܕܟܦܢܐ ܢܣܒܥܘܢ²⁰ܡܛܠ ܕܪ̈ܫܝܥܐ ܐܒܕܝܢ ܘܒ̈ܥܠܕܒܒܘܗܝ ܕܡܪܝܐ ܡ̈ܦܛܡܐ ܓܡܪܝܢ ܘܐܝܟ ܬܢܢܐ ܣܝܦܝܢ²¹ܝܙܦ ܪܫܝܥܐ ܘܠܐ ܦܪܥ ܘܙܕܝܩܐ ܡܪܚܡ ܘܝܗܒ²²ܡܛܠ ܕܒܪ̈ܝܟܘܗܝ ܕܡܪܝܐ ܝܪܬܝܢ ܐܪܥܐ ܘܠܝ̈ܛܘܗܝ ܢܣܘܦܘܢ²³ܡܢ ܩܕܡ ܡܪܝܐ ܡܬܩ̈ܢܢ ܗ̈ܠܟܬܗ ܕܓܒܪܐ ܘܐܘܪܚܗ ܗܘ ܡܬܩܢ²⁴ܡܛܠ ܕܐܢ ܢܦܠ ܠܐ ܡܗܪ ܕܡܪܝܐ ܐܚܝܕ ܒܐܝܕܗ²⁵ܛܠܐ ܗܘܝܬ ܘܣܒܬ ܘܠܐ ܚܙܝܬ ܙܕܝܩܐ ܕܐܫܬܒܩ ܐܦ ܠܐ ܙܪܥܗ ܕܒܥܐ ܠܚܡܐ²⁶ܐܠܐ ܟܠܗ ܝܘܡܐ ܡܪܚܡ ܘܡܘܙܦ ܘܙܪܥܗ ܡܬܒܪܟ²⁷ܥܒܪ ܡܢ ܒܝܫܬܐ ܘܥܒܕ ܛܒܬܐ ܐܬܬܢܝܚ ܠܥܠܡ²⁸ܡܛܠ ܕܡܪܝܐ ܕܝܢܐ ܪܚܡ ܘܠܐ ܫܒܩ ܠܙܕܝܩ̈ܘܗܝ ܐܠܐ ܠܥܠܡ ܡܢܛܪ ܠܗܘܢ ܘܙܪܥܗܘܢ ܕܪ̈ܫܝܥܐ ܡܘܒܕ²⁹ܘܙܕܝܩ̈ܐ ܝܪܬܝܢ ܐܪܥܐ ܘܫܪܝܢ ܥܠܝܗ̇ ܠܥܠܡ³⁰ܚܟܡܬܐ ܪܢܐ ܦܘܡܗ ܕܙܕܝܩܐ ܘܠܫܢܗ ܡܡܠܠ ܕܝܢܐ³¹ܢܡܘܣܗ ܕܐܠܗܐ ܒܠܒܗ ܘܠܐ ܙܝܥ̈ܢ ܕܘܪ̈ܟܬܗ³²ܡܣܟܐ ܪܫܝܥܐ ܠܙܕܝܩܐ ܘܒܥܐ ܠܡܩܛܠܗ³³ܘܡܪܝܐ ܠܐ ܢܫܒܩܝܘܗܝ ܒܐ̈ܝܕܘܗܝ ܐܠܐ ܢܚܝܒܝܘܗܝ ܒܕܝܢܐ³⁴ܣܒܪ ܒܡܪܝܐ ܘܛܪ ܐܘܪܚܗ ܘܢܪܝܡܟ ܠܡܐܪܬ ܐܪܥܐ ܡܐ ܕܣܝܦܝܢ ܪ̈ܫܝܥܐ ܬܚܙܐ³⁵ܡܛܠ ܕܚܙܝܬ ܪ̈ܫܝܥܐ ܕܡܫܬܒܗܪܝܢ ܘܡܬܬܪܝܡܝܢ ܐܝܟ ܐ̈ܝܠܢܐ ܕܥܒܐ³⁶ܟܕ ܥܒܪܬ ܠܝܬܘܗܝ ܘܒܥܝܬܗ ܘܠܐ ܐܫܟܚܬܗ³⁷ܛܪ ܬܡܝܡܘܬܐ ܘܓܒܝ ܬܪܝܨܘܬܐ ܡܛܠ ܕܐܝܬ ܚܪܬܐ ܛܒܬܐ ܠܓܒܪ̈ܐ ܕܫܠܡܐ³⁸ܘܚ̈ܛܝܐ ܢܣܘܦܘܢ ܐܝܟ ܚܕܐ ܘܚܪܬܐ ܕܪ̈ܫܝܥܐ ܠܐܒܕܢܐ³⁹ܦܪܘܩܐ ܕܙܕܝܩ̈ܐ ܡܪܝܐ ܡܥܕܪ ܠܗܘܢ ܒܙܒܢܐ ܕܥܩܬܐ⁴⁰ܡܥܕܪ ܠܗܘܢ ܡܪܝܐ ܘܡܦܨܐ ܠܗܘܢ ܘܡܦܨܐ ܠܗܘܢ ܡܢ ܪ̈ܫܝܥܐ ܘܦܪܩ ܠܗܘܢ ܡܛܠ ܕܣܒܪܘ ܒܗ

Cambia Bibbia

Confronta con un'altra Bibbia

Versetti esaminati