Salmi ܡܙܡܘܪܐ 119

¹ܛܘܒܝܗܘܢ ܠܐܝܠܝܢ ܕܕܠܐ ܡܘܡ ܐܢܘܢ ܒܐܘܪܚܐ ܘܡܗܠܟܝܢ ܒܢܡܘܣܗ ܕܡܪܝܐ²ܛܘܒܝܗܘܢ ܠܐܝܠܝܢ ܕܢܛܪܝܢ ܣܗܕܘܬܗ ܘܒܟܠܗ ܠܒܗܘܢ ܒܥܝܢ ܠܗ³ܠܐ ܥܒܕܘ ܥܘܠܐ ܘܗܠܟܘ ܒܐܘܪ̈ܚܬܗ⁴ܐܢܬ ܦܩܕܬ ܕܢܛܪܘܢ ܦܘܩ̈ܕܢܝܟ ܪ̈ܘܪܒܐܝܬ⁵ܐܫܬܘܦ ܕܝܢ ܡܬܩ̈ܢܢ ܐܘܪ̈ܚܬܝ ܕܐܛܪ ܦܘܩ̈ܕܢܝܟ⁶ܘܠܐ ܐܒܗܬ ܡܐ ܕܢܛܪܬ ܟܘܠܗܘܢ ܦܘܩ̈ܕܢܝܟ⁷ܐܘܕܐ ܠܟ ܒܬܪܝܨܘܬܗ ܕܠܒܝ ܡܐ ܕܝܠܦܬ ܕܝ̈ܢܐ ܕܙܕܝܩܘܬܟ⁸ܦܘܩ̈ܕܢܝܟ ܢܛܪܬ ܠܐ ܬܪܦܝܢܝ ܠܥܠܡ⁹ܒܡܢܐ ܡܕܟܐ ܛܠܝܐ ܐܘܪܚܗ ܕܢܛܪ ܦܘܩ̈ܕܢܝܟ¹⁰ܒܟܠܗ ܠܒܝ ܥܩܒܬܟ ܠܐ ܬܛܥܝܢܝ ܡܢ ܦܘܩ̈ܕܢܝܟ¹¹ܒܠܒܝ ܛܫܝܬ ܡ̈ܠܝܟ ܕܠܐ ܐܚܛܐ ܠܟ¹²ܒܪܝܟ ܐܢܬ ܡܪܝܐ ܐܠܦܝܢܝ ܦܘܩ̈ܕܢܝܟ¹³ܒܣ̈ܦܘܬܝ ܬܢܝܬ ܟܠܗܘܢ ܕܝܢ̈ܐ ܕܙܕܝܩܘܬܟ¹⁴ܠܐܘܪܚܐ ܕܣܗܕܘܬܟ ܪܚܡܬ ܛܒ ܡܢ ܟܠܗ ܥܘܬܪܐ¹⁵ܒܦܘܩ̈ܕܢܝܟ ܪܢܝܬ ܘܝܕܥܬ ܐܘܪ̈ܚܬܟ¹⁶ܒܢܡܘܣܟ ܪܢܝܬ ܕܠܐ ܐܛܥܐ ܡ̈ܠܝܟ¹⁷ܥܢܝ ܠܥܒܕܟ ܕܐܚܐ ܘܐܛܪ ܡ̈ܠܝܟ¹⁸ܓܠܝ ܥܝܢ̈ܝ ܕܐܚܙܐ ܬܕܡܪ̈ܬܐ ܕܒܢܡܘܣܟ¹⁹ܥܡܘܪܐ ܐܢܐ ܥܡܟ ܠܐ ܬܛܫܐ ܡܢܝ ܦܘܩ̈ܕܢܝܟ²⁰ܨܒܬ ܢܦܫܝ ܘܐܬܪܓܪܓܬ ܠܕܝܢ̈ܝܟ ܒܟܠܙܒܢ²¹ܟܐܝܬ ܒܥܡ̈ܡܐ ܘܠܝܛܝܢ ܐܢܘܢ ܐܝܠܝܢ ܕܛܥܝܢ ܡܢ ܦܘܩ̈ܕܢܝܟ²²ܐܥܒܪ ܡܢܝ ܚܣܕܐ ܡܛܘܠ ܕܣܗܕܘܬܟ ܢܛܪܬ²³ܝܬܒܝܢ ܗܘܘ ܥܘ̈ܠܐ ܘܪܢܝܢ ܗܘܘ ܒܝ ܘܐܢܐ ܒܦܘܩ̈ܕܢܝܟ ܪܢܐ ܗܘܝܬ²⁴ܒܣܗܕܘܬܟ ܪܢܝܬ ܘܒܬܪܥܝܬܟ ܛܒܬܐ²⁵ܢܩܦܬ ܢܦܫܝ ܠܥܦܪܐ ܐܚܢܝ ܐܝܟ ܡܠܬܟ²⁶ܐܘܪ̈ܚܬܝ ܚܘܝܬܟ ܘܥܢܝܬܢܝ ܐܠܦܝܢܝ ܢܡܘܣܟ²⁷ܐܘܪܚܐ ܕܦܘܩ̈ܕܢܝܟ ܚܘܢܝ ܘܐܪܢܐ ܒܬܕܡܪ̈ܬܟ²⁸ܐܬܛܪܦܬ ܢܦܫܝ ܒܪܢܝܐ ܐܚܢܝ ܐܝܟ ܡܠܬܟ²⁹ܐܘܪܚܐ ܕܥܘ̈ܠܐ ܐܥܒܪ ܡܢܝ ܘܢܡܘܣܟ ܐܠܦܝܢܝ³⁰ܐܘܪܚܐ ܕܗܝܡܢܘܬܟ ܓܒܝܬ ܘܒܕܝܢ̈ܝܟ ܨܒܝܬ³¹ܢܩܦܬ ܠܣܗܕܘܬܟ ܡܪܝܐ ܠܐ ܬܒܗܬܝܢܝ³²ܒܐܘܪܚܐ ܕܦܘܩ̈ܕܢܝܟ ܗܠܟܬ ܡܛܠ ܕܚܕܝܬܢܝ³³ܐܠܦܝܢܝ ܡܪܝܐ ܐܘܪܚܐ ܕܦܘܩ̈ܕܢܝܟ ܘܐܛܪ ܐܢܘܢ³⁴ܣܟܠܝܢܝ ܕܐܛܪ ܢܡܘܣܟ ܘܐܛܪܝܘܗܝ ܡܢ ܟܠܗ ܠܒܝ³⁵ܗܠܟܝܢܝ ܒܫܒܝܠܐ ܕܦܘܩ̈ܕܢܝܟ ܡܛܠ ܕܒܗ ܨܒܝܬ³⁶ܐܦܢܐ ܠܒܝ ܠܣܗܕܘܬܟ ܘܠܐ ܠܡܬ̈ܠܐ³⁷ܐܥܒܪ ܥܝܢ̈ܝ ܕܠܐ ܢܚ̈ܙܝܢ ܕܓܠܘܬܐ ܘܒܐܘܪ̈ܚܬܟ ܐܚܢܝ³⁸ܐܫܪ ܡܠܬܟ ܠܥܒܕܟ ܕܕܚܠ ܠܟ³⁹ܐܥܒܪ ܡܢܝ ܚܣܕܐ ܡܛܠ ܕܕܝܢ̈ܝܟ ܫܦܝܪܝܢ ܐܢܘܢ⁴⁰ܨܒܝܬ ܒܦܘܩ̈ܕܢܝܟ ܘܒܙܕܝܩܘܬܟ ܐܚܢܝ⁴¹ܢܐܬܘܢ ܥܠܝ ܪ̈ܚܡܝܟ ܡܪܝܐ ܘܦܘܪܩܢܟ ܕܐܡܪܬ⁴²ܘܐܬܠ ܦܬܓܡܐ ܠܡܚܣ̈ܕܢܝ ܡܛܘܠ ܕܐܬܬܟܠܬ ܥܠ ܡ̈ܠܝܟ⁴³ܠܐ ܬܥܢܕ ܡܢ ܦܘܡܝ ܡܠܬܐ ܕܩܘܫܬܐ ܡܛܠ ܕܠܕܝܢ̈ܝܟ ܣܟܝܬ⁴⁴ܐܛܪ ܢܡܘܣܟ ܠܥܠܡ ܥܠܡܝܢ⁴⁵ܘܐܗܠܟ ܒܐܪܘܚܬܐ ܡܛܠ ܕܒܦܘܩ̈ܕܢܝܟ ܨܒܝܬ⁴⁶ܐܡܠܠ ܒܙܕܝܩܘܬܐ ܩܕܡ ܡ̈ܠܟܐ ܘܠܐ ܐܒܗܬ⁴⁷ܘܐܪܢܐ ܒܦܘܩ̈ܕܢܝܟ ܕܪܚܡܬ⁴⁸ܘܐܪܝܡ ܐܝ̈ܕܝ ܠܘܬ ܦܘܩ̈ܕܢܝܟ ܕܪܚܡܬ ܘܐܪܢܐ ܒܗܘܢ ܒܦܘܩ̈ܕܢܝܟ ܘܐܫܬܒܚ ܒܗܝܡܢܘܬܟ⁴⁹ܥܗܕ ܡܠܬܟ ܠܥܒܕܟ ܗܝ ܕܐܬܟܠܬܝܗܝ⁵⁰ܘܒܗ̇ ܐܬܒܝܐܝܬ ܒܡܘܟܟܝ ܡܛܠ ܕܡܐܡܪܟ ܐܚܝܢܝ⁵¹ܥܘ̈ܠܐ ܐܠܨܘܢܝ ܘܡܢ ܢܡܘܣܟ ܠܐ ܣܛܝܬ⁵²ܐܬܕܟܪܬ ܕܝܢ̈ܝܟ ܡܪܝܐ ܕܡܢ ܥܠܡ ܘܐܬܒܝܐܝܬ ܘܗܘܘ ܠܝ ܠܡܪܕܘܬܐ⁵³ܟܡܝܪܘܬܐ ܐܚܕܬܢܝ ܡܢ ܚ̈ܛܝܐ ܕܫܒܩܘ ܢܡܘܣܟ⁵⁴ܙܡܝܪܬܐ ܗܘܘ ܠܝ ܦܘܩ̈ܕܢܝܟ ܒܝܬ ܬܘܬܒܘܬܝ⁵⁵ܥܗܕܬ ܒܠܠܝܐ ܫܡܟ ܡܪܝܐ ܘܢܛܪܬ ܢܡܘܣܟ⁵⁶ܘܐܬܒܝܐܝܬ ܡܛܠ ܕܢܛܪܬ ܦܘܩ̈ܕܢܝܟ⁵⁷ܒܦܠܓܘܬܗ ܕܡܪܝܐ ܪܢܝܬ ܕܐܛܪ ܦܘܩ̈ܕܢܝܟ⁵⁸ܣܟܝܬ ܠܐ̈ܦܝܟ ܡܢ ܟܠܗ ܠܒܝ ܐܚܢܝ ܐܝܟ ܡܠܬܟ⁵⁹ܐܬܚܫܒܬ ܐܘܪ̈ܚܬܝ ܘܐܗܦܟܬ ܪ̈ܓܠܝ ܠܫܒܝ̈ܠܝܟ⁶⁰ܐܬܛܝܒܬ ܘܠܐ ܐܫܬܘܚܪܬ ܕܐܛܪ ܦܘܩ̈ܕܢܝܟ⁶¹ܚܒ̈ܠܐ ܕܥܘ̈ܠܐ ܥܪܙܠܘܢܝ ܘܡܢ ܢܡܘܣܟ ܠܐ ܣܛܝܬ⁶²ܒܦܠܓܗ ܕܠܠܝܐ ܩܡܬ ܕܐܘܕܐ ܠܟ ܥܠ ܕܝܢܝ̈ܟ ܙܕܝܩܐ⁶³ܪܚܡܐ ܐܢܐ ܕܟܠܗܘܢ ܕܚ̈ܠܝܟ ܘܕܐܝܠܝܢ ܕܢܛܪܝܢ ܦܘܩ̈ܕܢܝܟ⁶⁴ܪ̈ܚܡܝܟ ܡܪܝܐ ܡܠܝܐ ܐܪܥܐ ܐܠܦܝܢܝ ܦܘܩ̈ܕܢܝܟ⁶⁵ܛܒܬܐ ܥܒܕ ܥܡ ܥܒܕܟ ܡܪܝܐ ܐܝܟ ܕܐܡܪܬ⁶⁶ܛܥܡܐ ܘܛܝܒܘܬܐ ܘܡܕܥܐ ܐܠܦܝܢܝ ܡܛܠ ܕܗܝܡܢܬ ܒܦܘܩ̈ܕܢܝܟ⁶⁷ܥܕܠܐ ܐܬܡܟܟܬ ܗܝܡܢܬ ܘܡܐܡܪܟ ܢܛܪܬ⁶⁸ܛܒ ܐܢܬ ܡܪܝܐ ܘܡܛܐܒ ܐܠܦܝܢܝ ܦܘܩ̈ܕܢܝܟ⁶⁹ܣܓܝ ܥܘܠܐ ܕܫܒܗܪ̈ܢܐ ܘܐܢܐ ܒܟܠܗ ܠܒܝ ܢܛܪܬ ܦܘܩ̈ܕܢܝܟ⁷⁰ܐܬܓܒܢ ܠܒܗܘܢ ܐܝܟ ܚܠܒܐ ܘܐܢܐ ܢܛܪܬ ܢܡܘܣܟ⁷¹ܛܒ ܠܝ ܕܐܬܡܟܟܬ ܕܐܠܦ ܦܘܩ̈ܕܢܝܟ⁷²ܛܐܒ ܠܝ ܢܡܘܣܗ ܕܦܘܡܟ ܡܢ ܐ̈ܠܦܐ ܕܕܗܒܐ ܘܕܣܐܡܐ⁷³ܐ̈ܝܕܝܟ ܥܒܕܢܝ ܘܐܬܩܢܢܝ ܐܠܦܝܢܝ ܢܡܘܣܟ⁷⁴ܕܢܚܙܘܢ ܕܚ̈ܠܝܟ ܘܢܚܕܘܢ ܕܠܡܠܬܟ ܣܒܪܬ⁷⁵ܝܕܥܬ ܕܙܕܝܩ̈ܝܢ ܐܢܘܢ ܕܝܢ̈ܝܟ ܡܪܝܐ ܘܗܝܡܢܘܬܟ ܡܟܟܬܢܝ⁷⁶ܢܗܘܘܢ ܪ̈ܚܡܝܟ ܠܒܘܝܐܝ ܐܝܟ ܕܐܡܪܬ ܠܥܒܕܟ⁷⁷ܢܐܬܘܢ ܥܠܝ ܪ̈ܚܡܝܟ ܘܐܚܐ ܡܛܘܠ ܕܒܢܡܘܣܟ ܐܬܝܠܦܬ⁷⁸ܢܒܗܬܘܢ ܥܘ̈ܠܐ ܕܒܥܘܠܐ ܡܟܟܘܢܝ ܘܐܢܐ ܪܢܝܬ ܒܦܘܩ̈ܕܢܝܟ⁷⁹ܢܬܦܢܘܢ ܠܘܬܝ ܕܚ̈ܠܝܟ ܘܐܝܠܝܢ ܕܝܕܥܝܢ ܣܗܕܘܬܟ⁸⁰ܢܪܢܐ ܠܒܝ ܒܦܘܩ̈ܕܢܝܟ ܘܠܐ ܐܒܗܬ⁸¹ܪܓܬ ܢܦܫܝ ܠܦܘܪܩܢܟ ܘܠܡܠܬܟ ܣܒܪܬ⁸²ܣܟܝ ܥܝܢ̈ܝ ܠܡܐܡܪܟ ܕܐܡܬܝ ܬܒܝܐܝܢܝ⁸³ܡܛܠ ܕܗܘܝܬ ܐܝܟ ܙܩܐ ܒܐܓܠܝܕܐ ܘܦܘܩ̈ܕܢܝܟ ܠܐ ܛܥܝܬ⁸⁴ܟܡܐ ܐܢܘܢ ܝܘܡ̈ܬܗ ܕܥܒܕܟ ܘܐܡܬܝ ܥܒܕ ܐܢܬ ܠܝ ܕܝܢܐ ܡܢ ܪ̈ܕܘܦܝ⁸⁵ܚܦܪܘ ܠܝ ܓܘܡܨܐ ܥܘ̈ܠܐ ܕܠܐ ܡܢ ܢܡܘܣܟ⁸⁶ܟܠܗܘܢ ܦܘܩ̈ܕܢܝܟ ܡܗܝܡܢܝܢ ܘܥܘ̈ܠܐ ܪܕܦܘܢܝ⁸⁷ܥܕ ܩܠܝܠ ܡܘܒܕܝܢ ܗܘܘ ܠܝ ܒܐܪܥܐ ܘܐܢܐ ܠܐ ܫܒܩܬ ܦܘܩ̈ܕܢܝܟ⁸⁸ܐܝܟ ܪ̈ܚܡܝܟ ܐܚܢܝ ܕܐܛܪ ܣܗܕܘܬܗ ܕܦܘܡܟ⁸⁹ܠܥܠܡ ܐܢܬ ܗܘ ܡܪܝܐ ܘܡܠܬܟ ܩܝܡܐ ܒܫܡܝܐ⁹⁰ܘܠܕܪܕܪܝܢ ܗܝܡܢܘܬܟ ܬܩܢܬ ܐܪܥܐ ܘܐܩܝܡܬܗ̇⁹²ܐܠܘ ܠܐ ܢܡܘܣܟ ܕܗܘܐ ܠܝ ܪܢܝܐ ܐܒܕ ܗܘܝܬ ܒܡܘܟܟܝ⁹³ܠܥܠܡ ܠܐ ܐܛܥܐ ܦܘܩ̈ܕܢܝܟ ܡܛܠ ܕܒܗܘܢ ܐܢܘܢ ܚ̈ܝܝ⁹⁴ܕܝܠܟ ܐܢܐ ܦܨܢܝ ܡܛܠ ܕܦܘܩ̈ܕܢܝܟ ܢܛܪܬ⁹⁵ܥܠܝ ܣܟܝܘ ܥܘ̈ܠܐ ܕܢܘܒܕܘܢܢܝ ܘܣܗܕܘܬܟ ܐܣܬܟܠܬ⁹⁶ܠܟܠ ܣܘܦܐ ܚܙܝܬ ܩܨܐ ܘܛܒ ܪܘܝܚ ܦܘܩܕܢܟ⁹⁷ܡܐ ܪܚܡܬ ܢܡܘܣܟ ܘܟܘܠܗ ܝܘܡܐ ܗܘܝܘ ܪܢܝܝ⁹⁸ܚܟܡܝܢܝ ܡܢ ܒ̈ܥܠܕܒܒܝ ܡܛܠ ܕܦܘܩ̈ܕܢܝܟ ܢܛܪܬ⁹⁹ܡܢ ܟܠܗܘܢ ܡ̈ܠܦܢܝ ܣܟܠܝܢܝ ܡܛܠ ܕܣܗܕܘܬܟ ܗܘܬ ܠܝ ܪܢܝܐ¹⁰⁰ܝܬܝܪ ܡܢ ܩܫܝ̈ܫܐ ܐܣܬܟܠܬ ܡܛܠ ܕܦܘܩ̈ܕܢܝܟ ܢܛܪܬ¹⁰¹ܡܢ ܟܠܗ̇ ܐܘܪܚܐ ܒܝܫܬܐ ܟܠܝܬ ܪ̈ܓܠܝ ܕܐܛܪ ܦܘܩ̈ܕܢܝܟ¹⁰²ܡܢ ܕܝܢ̈ܝܟ ܠܐ ܣܛܝܬ ܡܛܠ ܕܐܢܬ ܐܠܦܬܢܝ¹⁰³ܚܠܝܢ ܡ̈ܠܝܟ ܠܫܡ̈ܝ ܚܟܝ ܛܒ ܡܢ ܕܒܫܐ ܠܦܘܡܐ¹⁰⁴ܒܦܘܩ̈ܕܢܝܟ ܪܢܝܬ ܡܛܠ ܗܢܐ ܣܢܝܬ ܟܘܠܗ̇ ܐܘܪܚܐ ܕܥܘ̈ܠܐ¹⁰⁵ܫܪܓܐ ܗܝ ܡܠܬܟ ܠܪ̈ܓܠܝ ܘܢܘܗܪܐ ܠܫܒܝ̈ܠܝ¹⁰⁶ܐܝܡܝܬ ܘܐܫܪܬ ܕܐܛܪ ܕܝܢ̈ܐ ܕܙܕܝܩܘܬܟ¹⁰⁷ܐܬܡܟܟܬ ܪܘܪܒܐܝܬ ܡܪܝܐ ܐܚܢܝ ܐܝܟ ܡܠܬܟ¹⁰⁸ܒܡ̈ܠܘܗܝ ܕܦܘܡܝ ܨܒܝ ܡܪܝܐ ܘܡܢ ܕܝܢ̈ܝܟ ܐܠܦܝܢܝ¹⁰⁹ܢܦܫܝ ܒܐ̈ܝܕܝܟ ܗܝ ܒܟܠܙܒܢ ܘܢܡܘܣܟ ܠܐ ܛܥܝܬ¹¹⁰ܣܡܘ ܠܝ ܚ̈ܛܝܐ ܦܚ̈ܐ ܘܡܢ ܦܘܩ̈ܕܢܝܟ ܠܐ ܣܛܝܬ¹¹¹ܝܪܬܬ ܣܗܕܘܬܟ ܠܥܠܡ ܡܛܠ ܕܒܘܣܡܐ ܗܝ ܕܠܒܝ¹¹²ܐܦܢܝܬ ܠܒܝ ܕܐܥܒܕ ܦܘܩ̈ܕܢܝܟ ܠܥܠܡ ܒܫܪܪܐ¹¹³ܣܢܝܬ ܠܥܘ̈ܠܐ ܘܢܡܘܣܟ ܪܚܡܬ¹¹⁴ܣܬܪܝ ܘܒܝܬ ܓܘܣܝ ܐܢܬ ܗܘ ܘܠܡܠܬܟ ܣܒܪܬ¹¹⁵ܥܒܪܘ ܡܢܝ ܥܘ̈ܠܐ ܕܐܛܪ ܦܘܩ̈ܕܢܘܗܝ ܕܐܠܗܝ¹¹⁶ܐܫܪܝܢܝ ܒܡܠܬܟ ܘܐܚܐ ܘܠܐ ܬܒܗܬܝܢܝ ܡܢ ܣܒܪܝ¹¹⁷ܣܝܥܝܢܝ ܘܐܬܦܪܩ ܘܐܬܝܠܦ ܒܦܘܩ̈ܕܢܝܟ ܒܟܠܙܒܢ¹¹⁸ܐܣܠܝܬ ܠܟܠ ܕܛܥܝܢ ܡܢܟ ܡܛܠ ܕܥܘܠܐ ܗܘ ܪܢܝܗܘܢ¹¹⁹ܣܡܟܝܢܝ ܘܐܬܦܪܩ ܘܐܪܢܐ ܒܟܘܠ ܙܒܢ ܒܦܘܩ̈ܕܢܝܟ¹²⁰ܩܦܘܕ ܒܣܪܝ ܡܢ ܕܚܠܬܟ ܘܡܢ ܕܝܢ̈ܝܟ ܕܚܠܬ¹²¹ܥܒܕ ܕܝܢܐ ܘܙܕܝܩܘܬܐ ܠܐ ܬܫܒܘܩܝܢܝ ܒܐܝܕܐ ܕܛܠܘ̈ܡܝ¹²²ܒܣܡܝܗܝ ܠܥܒܕܟ ܒܛܒܬ̈ܐ ܘܠܐ ܢܥܫܩܘܢܢܝ ܫܒܗܪ̈ܢܐ¹²³ܥܝܢ̈ܝ ܣܟܝ ܠܦܘܪܩܢܟ ܘܠܡܐܡܪܐ ܕܙܕܝܩܘܬܟ¹²⁴ܥܒܕ ܠܥܒܕܟ ܐܝܟ ܪ̈ܚܡܝܟ ܘܐܠܦܝܢܝ ܢܡܘܣܟ¹²⁵ܥܒܕܟ ܐܢܐ ܣܟܠܝܢܝ ܘܐܕܥ ܣܗܕܘܬܟ¹²⁶ܙܒܢܐ ܗܘ ܠܡܦܠܚܗ ܠܡܪܝܐ ܘܗܐ ܒܛܠܘ ܢܡܘܣܟ¹²⁷ܡܛܠ ܗܢܐ ܪܚܡܬ ܦܘܩ̈ܕܢܝܟ ܛܒ ܡܢ ܕܗܒܐ ܘܛܒ ܡܢ ܟܐ̈ܦܐ ܛܒ̈ܬܐ¹²⁸ܟܠܗܘܢ ܦܘܩ̈ܕܢܝܟ ܪܚܡܬ ܘܟܠܗ̇ ܐܘܪܚܐ ܕܥܘ̈ܠܐ ܣܢܝܬ¹²⁹ܪ̈ܘܪܒܢ ܐܢܝܢ ܣܗܕ̈ܘܬܟ ܡܛܠ ܗܢܐ ܢܛܪܬ ܐܢܝܢ ܢܦܫܝ¹³⁰ܦܬܚ ܡܠܬܟ ܘܐܢܗܪ ܘܣܟܠ ܠܫܒܪ̈ܐ¹³¹ܦܘܡܝ ܦܬܚܬ ܘܣܩܬ ܪܘܚܐ ܘܣܟܝܬ ܠܦܘܪܩܢܟ¹³²ܐܬܦܢ ܥܠܝ ܘܪܚܡ ܥܠܝ ܡܛܘܠ ܕܪܚܡܬ ܫܡܟ¹³³ܐܬܩܢ ܗ̈ܠܟܬܝ ܒܫ̈ܒܝܠܝܟ ܘܠܐ ܢܫܬܠܛ ܒܝ ܥܘܠܐ¹³⁴ܦܪܘܩܝܢܝ ܡܢ ܛܠܘܡܝܗ ܕܒܪܢܫܐ ܕܐܛܪ ܦܘܩ̈ܕܢܝܟ¹³⁵ܐܢܗܪ ܐ̈ܦܝܟ ܥܠ ܥܒܕܟ ܘܐܠܦܝܢܝ ܢܡܘܣܟ¹³⁶ܬ̈ܦܐ ܕܡ̈ܝܐ ܐܬܘ ܡܢ ܥܝܢ̈ܝ ܥܠ ܕܠܐ ܢܛܪܘ ܢܡܘܣܟ¹³⁷ܙܕܝܩ ܐܢܬ ܡܪܝܐ ܘܛܒ ܬܪ̈ܝܨܝܢ ܕܝܢ̈ܝܟ¹³⁸ܦܩܕܬ ܣܗܕܘܬܟ ܒܙܕܝܩܘܬܐ ܘܒܗܝܡܢܘܬܐ¹³⁹ܫܢܩܢܝ ܚܣܡܐ ܒܟܠܙܒܢ ܡܛܠ ܕܛܥܘ ܡܠܬܟ ܒ̈ܥܠܕܒܒܝܟ¹⁴⁰ܓܒܝܐ ܗܝ ܡܠܬܟ ܛܒ ܘܥܒܕܟ ܪܚܡܗ̇¹⁴¹ܙܥܘܪ ܐܢܐ ܘܫܝܛ ܘܦܘܩ̈ܕܢܝܟ ܠܐ ܛܥܝܬ¹⁴²ܙܕܝܩܘܬܟ ܩܝܡܐ ܠܥܠܡ ܘܢܡܘܣܟ ܒܫܪܪܐ¹⁴³ܐܘܠܨܢܐ ܘܥܩܬܐ ܡܛܝܘܢܝ ܘܒܦܘܩ̈ܕܢܝܟ ܪܢܝܬ¹⁴⁴ܙܕܝܩܐ ܗܝ ܣܗܕܘܬܟ ܠܥܠܡ ܣܟܠܝܢܝ ܘܐܚܐ¹⁴⁵ܩܪܝܬܟ ܡܢ ܟܠܗ ܠܒܝ ܡܪܝܐ ܥܢܝܢܝ ܘܐܛܪ ܦܘܩ̈ܕܢܝܟ¹⁴⁶ܩܪܝܬܟ ܦܪܘܩܝܢܝ ܘܐܛܪ ܣܗܕܘܬܟ¹⁴⁷ܩܕܡܬ ܒܨܦܪܐ ܘܓܥܝܬ ܘܣܟܝܬ ܠܡܠܬܟ¹⁴⁸ܩܕܡ ܥܝܢ̈ܝ ܠܡܛܪܬܐ ܕܐܪܢܐ ܒܡܠܬܟ¹⁴⁹ܫܡܥ ܩܠܝ ܡܪܝܐ ܐܝܟ ܪ̈ܚܡܝܟ ܘܒܕܝܢ̈ܝܟ ܐܚܢܝ¹⁵⁰ܩܪܒܘ ܪ̈ܕܘܦܝ ܕܥܘܠܐ ܘܡܢ ܢܡܘܣܟ ܐܬܪܚܩܘ¹⁵¹ܩܪܝܒ ܐܢܬ ܡܪܝܐ ܘܟܠܗܘܢ ܦܘܩ̈ܕܢܝܟ ܒܩܘܫܬܐ¹⁵²ܡܢ ܩܕܝܡ ܝܕܥܬ ܣܗܕܘܬܟ ܡܛܠ ܕܡܢ ܥܠܡ ܬܩܢܬܗ̇¹⁵³ܚܙܝ ܡܘܟܟܝ ܘܦܨܢܝ ܡܛܠ ܕܢܡܘܣܟ ܠܐ ܛܥܝܬ¹⁵⁴ܕܘܢ ܕܝܢܝ ܘܦܨܢܝ ܘܒܡܠܬܟ ܐܚܢܝ¹⁵⁵ܪܚܝܩ ܗܘ ܦܘܪܩܢܐ ܡܢ ܥܘ̈ܠܐ ܡܛܠ ܕܠܐ ܒܥܘ ܦܘܩ̈ܕܢܝܟ¹⁵⁶ܣܓ̈ܝܐܝܢ ܐܢܘܢ ܪ̈ܚܡܝܟ ܡܪܝܐ ܘܒܕܝܢܝ̈ܟ ܐܚܢܝ¹⁵⁷ܣܓܝܘ ܪ̈ܕܘܦܝ ܘܒ̈ܥܠܕܒܒܝ ܘܡܢ ܣܗܕܘܬܟ ܠܐ ܣܛܝܬ¹⁵⁸ܚܙܝܬ ܠܥܘ̈ܠܐ ܘܝܕܥܬ ܕܡܐܡܪܟ ܠܐ ܢܛܪܘ¹⁵⁹ܚܙܝ ܕܪܚܡܬ ܦܘܩ̈ܕܢܝܟ ܡܪܝܐ ܒܛܝܒܘܬܟ ܐܚܢܝ¹⁶⁰ܪܝܫ ܡܠܬܟ ܩܘܫܬܐ ܘܠܥܠܡ ܟܠܗܘܢ ܕܝܢ̈ܐ ܕܙܕܝܩܘܬܟ¹⁶¹ܪ̈ܘܪܒܢܐ ܪܕܦܘܢܝ ܣܪܝܩܐܝܬ ܘܡܢ ܡܠܬܟ ܕܚܠ ܠܒܝ¹⁶²ܚܕܝܬ ܒܡܐܡܪܟ ܐܝܟ ܗܘ ܕܐܫܟܚ ܒܙܬܐ ܣܓܝܐܬܐ¹⁶³ܥܘܠܐ ܣܢܝܬ ܘܐܣܠܝܬ ܘܢܡܘܣܟ ܪܚܡܬ¹⁶⁴ܫܒܥ ܒܝܘܡܐ ܫܒܚܬܟ ܥܠ ܕܝܢ̈ܝܟ ܙܕܝܩܐ¹⁶⁵ܣܓܝ ܗܘ ܫܠܡܐ ܕܐܝܠܝܢ ܕܪܚܡܝܢ ܢܡܘܣܟ ܘܠܝܬ ܠܗܘܢ ܟܪܝܗܘܬܐ¹⁶⁶ܣܒܪܬ ܠܦܘܪܩܢܟ ܡܪܝܐ ܘܦܘܩ̈ܕܢܝܟ ܥܒܕܬ¹⁶⁷ܢܛܪܬ ܢܦܫܝ ܣܗܕܘܬܟ ܘܪܚܡܬܗ̇ ܪܘܪܒܐܝܬ¹⁶⁸ܢܛܪܬ ܦܘܩ̈ܕܢܝܟ ܘܣܗ̈ܕܘܬܟ ܘܟܠܗܝܢ ܐܘܪ̈ܚܬܝ ܠܩܘܒܠܟ¹⁶⁹ܬܥܘܠ ܬܫܒܘܚܬܝ ܩܕܡܝܟ ܡܪܝܐ ܘܒܡܠܬܟ ܐܚܢܝ¹⁷⁰ܬܥܘܠ ܒܥܘܬܝ ܩܕܡܝܟ ܘܒܡܠܬܟ ܦܨܢܝ¹⁷¹ܢܡ̈ܠܠܢ ܣܦܘ̈ܬܝ ܬܫܒ̈ܚܬܟ ܟܕ ܬܠܦܝܢܝ ܦܘܩ̈ܕܢܝܟ¹⁷²ܢܒܥ ܠܫܢܝ ܡܐܡܪܟ ܡܛܠ ܕܟܠܗܘܢ ܦܘܩ̈ܕܢܝܟ ܒܙܕܝܩܘܬܐ¹⁷³ܬܥܕܪܢܝ ܐܝܕܟ ܡܛܠ ܕܨܒܝܬ ܒܦܘܩ̈ܕܢܝܟ¹⁷⁴ܣܟܝܬ ܢܦܫܝ ܠܦܘܪܩܢܟ ܘܒܢܡܘܣܟ ܪܢܝܬ¹⁷⁵ܬܚܐ ܢܦܫܝ ܘܬܫܒܚܟ ܘܕܝܢܟ ܗܘ ܢܥܕܪܢܝ¹⁷⁶ܐܬܛܥܝܬ ܐܝܟ ܥܪܒܐ ܐܒܝܕܐ ܒܥܝܘܗܝ ܠܥܒܕܟ ܡܛܠ ܕܦܘܩ̈ܕܢܝܟ ܠܐ ܛܥܝܬ

Cambia Bibbia

Confronta con un'altra Bibbia

Versetti esaminati