Secondo libro delle Cronache ܕܒܪܝܡܝܢ 30

¹ ܘܫܕܪ ܚܙܩܝܐ ܠܘܬ ܟܠܗ ܐܝܣܪܝܠ ܘܕܒܝܬ ܝܗܘܕܐ ܘܐܦ ܐܓܪ̈ܬܐ ܟܬܒ ܠܕܒܝܬ ܐܦܪܝܡ ܘܠܕܒܝܬ ܡܢܫܐ ܠܡܐܬܐ ܠܒܝܬܗ ܕܡܪܝܐ ܕܒܐܘܪܫܠܡ ܠܡܥܒܕ ܥܐܕܐ ܠܡܪܝܐ ܚܝܠܬܢܐ ܐܠܗܐ ܕܐܝܣܪܝܠ

² ܘܐܬܚܫܒܘ ܡܠܟܐ ܘܪ̈ܘܪܒܢܘܗܝ ܘܟܠܗ ܥܡܐ ܕܐܝܣܪܝܠ ܕܗܘܘ ܒܐܘܪܫܠܡ ܠܡܥܒܕ ܥܐܕܐ ܠܡܪܝܐ ܐܠܗܐ ܕܐܝܣܪܝܠ ܒܝܪܚܐ ܬܢܝܢܐ

³ ܡܛܠ ܕܠܐ ܡܫܟܚܝܢ ܗܘܘ ܠܡܥܒܕܗ ܒܗ ܒܙܒܢܐ ܗ̇ܘ ܡܛܠ ܕܟܗ̈ܢܐ ܠܐ ܐܬܩܕܫܘ ܗܘܘ ܘܡܠܦܢ̈ܘܗܝ ܕܥܡܐ ܠܐ ܐܬܩܦܣܘ ܗܘܘ ܠܐܘܪܫܠܡ

⁴ ܘܫܦܪ ܦܬܓܡܐ ܒܥܝܢ̈ܘܗܝ ܕܡܠܟܐ ܘܒܥܝܢ̈ܘܗܝ ܕܟܠܗ ܥܡܐ ܕܐܝܣܪܝܠ

⁵ ܘܩܡܘ ܘܐܫܪܘ ܦܬܓܡܐ ܠܡܥܒܕܗ ܘܐܥܒܪܘ ܩܠܐ ܒܟܠܗ ܐܝܣܪܝܠ ܡܢ ܒܪܫܒܥ ܘܥܕܡܐ ܠܕܢ ܠܡܐܬܐ ܘܠܡܥܒܕ ܥܐܕܐ ܠܡܪܝܐ ܐܠܗܐ ܕܐܝܣܪܝܠ ܒܐܪܫܠܡ ܡܛܠ ܕܣܓܝ ܗܘܐ ܠܗ ܥܘܬܪܗܘܢ ܛܒ

⁶ ܘܐܙܠܘ ܛܒܠܪ̈ܐ ܒܐܓܪ̈ܬܐ ܕܡܠܟܐ ܘܕܪ̈ܘܪܒܢܘܗܝ ܒܟܘܠܗ ܐܝܣܪܝܠ ܘܝܗܘܕܐ ܒܦܘܩܕܢܐ ܕܡܠܟܐ ܘܐܡ̇ܪܝܢ ܒܢ̈ܝ ܐܝܣܪܝܠ ܬܘܒܘ ܠܘܬ ܡܪܝܐ ܐܠܗܗ ܕܐܒܪܗܡ ܘܕܐܝܣܚܩ ܘܕܐܝܣܪܝܠ ܘܢܗܦܟ ܫܪܟܢܐ ܕܐܫܬܟܚ ܡܢܟܘܢ ܡܢ ܐܝܕܘ̈ܗܝ ܕܡܠܟܐ ܕܐܬܘܪ

⁷ ܠܐ ܬܗܘܘܢ ܐܝܟ ܐܒܗܝ̈ܟܘܢ ܘܐܝܟ ܐܚܝ̈ܟܘܢ ܕܟܕܒܘ ܒܡܪܝܐ ܐܠܗܐ ܕܐܒܗ̈ܬܢ ܘܝܗܒ ܐܢܘܢ ܠܠܘܛܬܐ ܐܝܟܢܐ ܕܐܢܬܘܢ ܚ̇ܙܝܢ

⁸ ܘܐܦ ܗܫܐ ܠܐ ܬܩܫܘܢ ܩܕܠܟܘܢ ܐܝܟ ܐܒܗ̈ܬܟܘܢ ܘܥܘܠܘ ܠܡܩܕܫܐ ܕܐܬܩܕܫ ܠܥܠܡ ܘܦܠܘܚܘ ܠܡܪܝܐ ܐܠܗܟܘܢ ܕܢܗܦܟ ܡܢܟܘܢ ܚܡܬܐ ܕܪܘܓܙܗ

⁹ ܡܛܠ ܕܐܬܓܠܝ ܥܠܝܟܘܢ ܘܥܠ ܐܚ̈ܝܟܘܢ ܘܥܠ ܒܢܝ̈ܟܘܢ ܘܗܘ ܢܬܠܟܘܢ ܠܪ̈ܚܡܐ ܠܥܝܢ ܫܒܝ̈ܟܘܢ ܘܢܗܦܟܟܘܢ ܠܐܪܥܐ ܗܕܐ ܡܛܠ ܕܚܢܢ ܗܘ ܘܪܚܡܬܢ ܡܪܝܐ ܐܠܗܟܘܢ ܘܠܐ ܢܗܦܟ ܐܦܘ̈ܗܝ ܡܢܟܘܢ ܟܕ ܬܬܦܢܘܢ ܠܘܬܗ

¹⁰ ܘܗܘܘ ܛܒܠܪ̈ܘܗܝ ܕܡܠܟܐ ܚܙܩܝܐ ܥ̇ܒܪܝܢ ܡܢ ܩܪܐ ܠܩܪܐ ܒܐܪܥܐ ܕܐܦܪܝܡ ܘܕܡܢܫܐ ܘܥܕܡܐ ܠܙܒܘܠܘܢ ܘܗܘܘ ܓ̇ܚܟܝܢ ܥܠܝܗܘܢ ܘܡܒܣܪܝܢ ܥܠܝܗܘܢ

¹¹ ܓܒܪ̈ܐ ܪ̈ܫܝܥܐ ܕܐܝܬ ܒܫܒܛܐ ܕܒܝܬ ܐܫܝܪ ܘܒܫܒܛܐ ܕܒܝܬ ܐܦܪܝܡ ܘܒܫܒܛܐ ܕܒܝܬ ܡܢܫܐ ܘܒܫܒܛܐ ܕܒܝܬ ܙܒܘܠܘܢ ܘܫܪܟܐ ܕܫܒ̈ܛܐ ܗܠܝܢ ܐܬܬܒܪܘ ܒܠܒܗܘܢ ܘܐܬܘ ܠܐܘܪܫܠܡ

¹² ܥܡ ܫܒܛܐ ܕܒܝܬ ܝܗܘܕܐ ܘܗܘܬ ܐܝܕܗ ܕܡܪܝܐ ܥܠܝܗܘܢ ܠܡܬܠ ܠܗܘܢ ܠܒܐ ܚܕ ܠܡܥܒܕ ܦܘܩܕܢܐ ܕܡܠܟܐ ܘܕܪ̈ܘܪܒܢܘܗܝ ܐܝܟ ܡܠܬܗ ܕܡܪܝܐ

¹³ ܘܐܬܟܢܫܘ ܠܐܪܫܠܡ ܥܡܐ ܣܓܝܐܐ ܠܡܥܒܕ ܥܐܕܐ ܕܦܛܝܪ̈ܐ ܒܝܪܚܐ ܬܢܝܢܐ ܥܡܐ ܣܓܝܐܐ ܕܛܒ

¹⁴ ܘܩܡܘ ܘܥܩܪܘ ܡܕܒܚ̈ܐ ܕܐܝܬ ܒܐܪܫܠܡ ܘܟܠܗܝܢ ܥܠܘ̈ܬܐ ܕܦܬܟܪ̈ܐ ܥܩܪܘ ܘܫܕܘ ܐܢ̈ܝܢ ܒܢܚܠܐ ܕܩܕܪܘܢ

¹⁵ ܘܥܒܕܘ ܦܨܚܐ ܒܐܪ̈ܒܥܣܪܐ ܫܒܥܐ ܝܘܡ̈ܝܢ ܒܝܪܚܐ ܬܢܝܢܐ ܘܟܗ̈ܢܐ ܘܠܘ̈ܝܐ ܐܬܩܕܫܘ ܘܐܝܬܝܘ ܥܠܘ̈ܬܐ ܠܒܝܬܗ ܕܡܪܝܐ

¹⁶ ܘܩܡܘ ܥܠ ܐܬܪܗܘܢ ܐܝܟܐ ܕܡܬܚܙܐ ܐܝܟܢܐ ܕܟܬܝܒ ܒܢܡܘܣܐ ܕܡܘܫܐ ܢܒܝܐ ܕܡܪܝܐ ܕܟܗ̈ܢܐ ܡܩܒܠܝܢ ܗܘܘ ܕܡܐ ܡܢ ܐܝܕܐ ܕܠܘ̈ܝܐ

¹⁷ ܡܛܠ ܕܣܓܝܐܝܢ ܗܘܘ ܓܝܪ ܒܥܡܐ ܕܐܝܣܪܐܝܠ ܕܠܐ ܐܬܩܕܫܘ ܘܠܘ̈ܝܐ ܩܡܘ ܠܗܘܢ ܥܠ ܢܟܣܬܐ ܕܐܡܪ̈ܐ ܘܚ̇ܙܝܢ ܗܘܘ ܟܠ ܐܝܢܐ ܕܕܟܐ ܠܡܬܩܕܫܘ ܠܡܪܝܐ

¹⁸ ܡܛܠ ܕܣܓܝܐ̈ܝܢ ܗܘܘ ܒܥܡܐ ܕܐܝܣܪܝܠ ܡܢ ܕܒܝܬ ܐܦܪܝܡ ܘܡܢܫܐ ܘܐܝܣܟܪ ܘܙܒܘܠܘܢ ܗܠܝܢ ܐܪܒܥܐ ܫܒ̈ܛܝܢ ܕܠܐ ܐܬܕܟܝܘ ܡܛܠ ܕܐܟܠܘܗܝ ܠܦܨܚܐ ܕܠܐ ܒܢܡܘܣ ܡܛܠ ܕܨܠܝ ܚܙܩܝܐ ܥܠܝܗܘܢ ܘܐܡܪ ܠܗܘܢ ܐܠܗܐ ܛܒܐ ܢܚܣܐ ܚܠܦ ܟܠܗ ܥܡܐ ܕܐܝܣܪܝܠ

¹⁹ ܡܛܠ ܕܐܬܩܢ ܠܒܢ ܠܡܨܠܝܘ ܠܡܪܝܐ ܐܠܗܐ ܕܐܒܗ̈ܬܢ ܘܩܘܕܫܐ ܠܐ ܗܘܐ ܕܟܐ ܡܢܢ

²⁰ ܘܫܡܥ ܡܪܝܐ ܒܩܠܗ ܕܚܙܩܝܐ ܘܐܣܝܗ ܠܥܡܐ

²¹ ܘܥܒܕܘ ܒܢ̈ܝ ܐܝܣܪܐܝܠ ܕܐܫܬܟܚܘ ܒܐܘܪܫܠܡ ܥܐܕܐ ܕܦܛܝܪ̈ܐ ܫܒܥܐ ܝܘܡ̈ܝܢ ܒܚܕܘܬܐ ܪܒܬܐ ܘܡܫܒܚܝܢ ܗܘܘ ܠܡܪܝܐ ܟܠܝܘܡ ܒܝܘܡ ܠܘ̈ܝܐ ܒܬܫ̈ܒܚܬܐ ܕܦܘܡܗܘܢ ܘܟܗ̈ܢܐ ܒܬܫܒܚ̈ܬܐ

²² ܘܡܠܠ ܚܙܩܝܐ ܥܡ ܟܠܗܘܢ ܠܘ̈ܝܐ ܕܡܫܒܚܝܢ ܗܘܘ ܬܫܒܚ̈ܬܐ ܛܒ̈ܬܐ ܩܕܡ ܡܪܝܐ ܘܐܟܠܘ ܗܘܘ ܓܒܪ̈ܐ ܫܒ̈ܥܐ ܝܘܡ̈ܝܢ ܘܡܕܒܚܝܢ ܗܘܘ ܕܒܚ̈ܐ ܫ̈ܠܡܐ ܠܡܪܝܐ ܘܡܘܕܝܢ ܗܘܘ ܠܡܪܝܐ ܐܠܗܐ ܕܐܒܗ̈ܬܗܘܢ

²³ ܘܐܬܟܠܝ ܟܠܗ ܥܡܐ ܕܐܝܣܪܝܠ ܠܡܥܒܕ ܫܒܥܐ ܝܘܡ̈ܝܢ ܐܚܪ̈ܢܝܢ ܘܫܒܥܐ ܝܘܡ̈ܝܢ ܕܚܕܘܬܐ

²⁴ ܡܛܠ ܕܚܙܩܝܐ ܡܠܟܐ ܕܝܗܘܕܐ ܐܦܪܫ ܘܝܗܒ ܠܥܡܐ ܫܒܥܐ ܐܠܦܝ̈ܢ ܚܝܘ̈ܬܐ ܪ̈ܘܪܒܬܐ ܘܕܩܕ̈ܩܬܐ ܘܦܪܫ ܘܝܗܒ ܠܥܡܐ ܕܐܝܣܪܝܠ ܬܘܪ̈ܐ ܐܠܦ ܘܥ̈ܢܐ ܥܣܪܐ ܐܠܦܝ̈ܢ ܘܐܬܩܕܫܘ ܟܗ̈ܢܐ ܣܓܝܐ̈ܐ

²⁵ ܘܚܕܝ ܟܠܗ ܥܡܐ ܕܝܗܘܕܐ ܘܟܗ̈ܢܐ ܘܠܘ̈ܝܐ ܘܟܠ ܥܡܐ ܕܐ̇ܬܝܢ ܡܢ ܥܡܐ ܕܐܝܣܪܝܠ ܘܓܝܘܪ̈ܐ ܕܐ̇ܬܝܢ ܡܢ ܐܪܥܐ ܕܐܝܣܪܐܝܠ ܘܕܝܬ̇ܒܝܢ ܒܝܗܘܕܐ

²⁶ ܘܗܘܬ ܚܕܘܬܐ ܪܒܬܐ ܒܐܘܪܫܠܡ ܡܛܠ ܕܡܢ ܝܘܡܘ̈ܗܝ ܕܫܠܝܡܘܢ ܒܪ ܕܘܝܕ ܡܠܟܐ ܕܐܝܣܪܝܠ ܠܐ ܗܘܬ ܐܝܟ ܗܕܐ ܒܐܘܪܫܠܡ

²⁷ ܘܩܡܘ ܟܗ̈ܢܐ ܘܠܘ̈ܝܐ ܘܒܪܟܘ ܠܥܡܐ ܕܐܝܣܪܝܠ ܘܫܡܥ ܡܪܝܐ ܒܩܠܗܘܢ ܘܥܠܬ ܨܠܘܬܗܘܢ ܠܡܘܬܒܐ ܕܩܘܕܫܗ ܠܫܡܝܐ