Amos (עמוס) - Amos 12

¹ צדיק אתה יהוה כי אריב אליך אך משפטים אדבר אותך מדוע דרך רשעים צלחה שלו כל בגדי בגד² נטעתם גם שרשו ילכו גם עשו פרי קרוב אתה בפיהם ורחוק מכליותיהם³ ואתה יהוה ידעתני תראני ובחנת לבי אתך התקם כצאן לטבחה והקדשם ליום הרגה⁴ עד מתי תאבל הארץ ועשב כל השדה ייבש מרעת ישבי בה ספתה בהמות ועוף כי אמרו לא יראה את אחריתנו⁵ כי את רגלים רצתה וילאוך ואיך תתחרה את הסוסים ובארץ שלום אתה בוטח ואיך תעשה בגאון הירדן⁶ כי גם אחיך ובית אביך גם המה בגדו בך גם המה קראו אחריך מלא אל תאמן בם כי ידברו אליך טובות⁷ עזבתי את ביתי נטשתי את נחלתי נתתי את ידדות נפשי בכף איביה⁸ היתה לי נחלתי כאריה ביער נתנה עלי בקולה על כן שנאתיה⁹ העיט צבוע נחלתי לי העיט סביב עליה לכו אספו כל חית השדה התיו לאכלה¹⁰ רעים רבים שחתו כרמי בססו את חלקתי נתנו את חלקת חמדתי למדבר שממה¹¹ שמה לשממה אבלה עלי שממה נשמה כל הארץ כי אין איש שם על לב¹² על כל שפים במדבר באו שדדים כי חרב ליהוה אכלה מקצה ארץ ועד קצה הארץ אין שלום לכל בשר¹³ זרעו חטים וקצים קצרו נחלו לא יועלו ובשו מתבואתיכם מחרון אף יהוה¹⁴ כה אמר יהוה על כל שכני הרעים הנגעים בנחלה אשר הנחלתי את עמי את ישראל הנני נתשם מעל אדמתם ואת בית יהודה אתוש מתוכם¹⁵ והיה אחרי נתשי אותם אשוב ורחמתים והשבתים איש לנחלתו ואיש לארצו¹⁶ והיה אם למד ילמדו את דרכי עמי להשבע בשמי חי יהוה כאשר למדו את עמי להשבע בבעל ונבנו בתוך עמי¹⁷ ואם לא ישמעו ונתשתי את הגוי ההוא נתוש ואבד נאם יהוה