Secondo libro delle Cronache ܕܒܪܝܡܝܢ 33

¹ ܒܪ ܬܪ̈ܬܥܣܪܐ ܗܘܐ ܫܢ̈ܝܢ ܡܢܫܐ ܟܕ ܩܡ ܒܡܠܟܘܬܐ ܘܚܡܫܝܢ ܘܚܡܫ ܫܢ̈ܝܢ ܐܡܠܟ ܒܐܘܪܫܠܡ

² ܘܥܒܕ ܕܒܝ̣ܫ ܩܕܡ ܡܪܝܐ ܐܝܟ ܥ̇ܒ̈ܕܐ ܕܥܡ̈ܡܐ ܕܥܩܪ ܡܪܝܐ ܡܢ ܩܕܡ ܒܢ̈ܝ ܐܝܣܪܝܠ

³ ܘܗܦܟ ܘܒܢܐ ܡܕܒ̈ܚܐ ܕܥܩܪ ܚܙܩܝܐ ܐܒܘܗܝ ܘܐܩܝܡ ܥܠܘ̈ܬܐ ܠܦܬܟܪ̈ܐ ܘܥܒܕ ܢܡܪ̈ܐ ܘܣܓܕ ܠܗܘܢ ܘܠܟܠܗܘܢ ܚܝܠܘ̈ܬܐ ܕܫܡܝܐ

⁵ ܒܬܪܬܝܢ ܕܪ̈ܝܢ ܕܒܝܬܗ ܕܡܪܝܐ

⁶ ܘܐܦ ܗܘ ܐܥܒܪ ܒܪܗ ܒܢܘܪܐ ܒܢܚܠܐ ܪܒܐ ܘܐܚܕ ܥܝܢ̈ܐ ܘܢܚܫ ܢܚ̈ܫܐ ܘܥܒܕ ܚܪ̈ܫܐ ܘܫܐ̇ܠ ܒܟܠܕ̈ܝܐ ܘܒܙܟܘܪ̈ܐ ܘܐܣܓܝ ܠܡܥܒܕ ܕܒܝ̣ܫ ܩܕܡ ܡܪܝܐ ܘܠܡܪܓܙܘ ܩܕܡܘܗܝ

⁷ ܘܣܡܗ ܠܨܠܡܐ ܕܐܪ̈ܒܥ ܐܦܝ̈ܢ ܕܥܒܕ ܒܒܝܬܗ ܕܡܪܝܐ ܕܐܡܪ ܡܪܝܐ ܠܕܘܝܕ ܘܠܫܠܝܡܘܢ ܒܪܗ ܒܒܝܬܐ ܗܢܐ ܒܐܘܪܫܠܡ ܕܓܒܝܬ ܠܝ ܡܢ ܟܠܗܘܢ ܫܒ̈ܛܐ ܕܐܝܣܪܝܠ ܐܫܪܐ ܫܟܝܢܬܝ ܠܥܠܡ

⁸ ܘܠܐ ܐܘܣܦ ܬܘܒ ܠܡܦܩܘ ܠܐܝܣܪܝܠ ܡܢ ܐܪܥܐ ܗܕܐ ܕܝܗܒܬ ܠܐܒܗ̈ܝܗܘܢ ܒܠܚܘܕ ܐܢܗܘ ܕܢܛܪܘܢ ܠܡܥܒܕ ܟܠܡܕܡ ܕܦܩܕܬ ܐܢܘܢ ܘܠܟܠܗ ܢܡܘܣܐ ܘܠܩܝ̈ܡܘܗܝ ܘܠܕ̈ܝ̣ܢܘܗܝ ܕܦܩܕ ܐܢܘܢ ܥܒ̣ܕܝ ܡܘܫܐ

⁹ ܘܐܛܥܝ ܡܢܫܐ ܠܝܗܘܕܐ ܘܠܥܡܘܪ̈ܝܗ̇ ܕܐܘܪܫܠܡ ܠܡܥܒܕ ܥ̇ܒ̈ܕܐ ܒܝ̣ܫ̈ܐ ܐܝܟ ܥܡ̈ܡܐ ܕܐܘܒܕ ܡܪܝܐ ܡܢ ܩܕܡ ܒܢ̈ܝ ܐܝܣܪܝܠ

¹⁰ ܘܡܠܠ ܡܪܝܐ ܥܡ ܡܢܫܐ ܘܥܡ ܥܡܗ ܘܠܐ ܩܒܠܘ

¹¹ ܘܐܝܬܝ ܥܠܝܗܘܢ ܡܪܝܐ ܪ̈ܘܪܒܢܝ ܚܝܠܐ ܕܡܠܟܐ ܕܐܬܘܪ ܘܐܚܕܘ ܠܡܢܫܐ ܒܚܝܘ̈ܗܝ ܘܐܣܪܘܗܝ ܒܫܫ̈ܠܬܐ ܘܐܘܒܠܘܗܝ ܠܒܒܠ

¹² ܘܟܕ ܥܩܬ ܠܗ ܨܠܝ ܩܕܡ ܡܪܝܐ ܐܠܗܗ ܘܕܚܠ ܛܒ ܡܢ ܩܕܡ ܡܪܝܐ ܐܠܗܐ ܕܐܒܗ̈ܘܗܝ

¹³ ܘܨܠܝ ܩܕܡ ܡܪܝܐ ܘܫܡܥ ܒܩܠܗ ܘܩܒܠ ܨܠܘܬܗ ܘܐܗܦܟܗ ܠܐܘܪܫܠܡ ܠܡܠܟܘܬܗ ܘܝܕܥ ܡܢܫܐ ܕܡܪܝܐ ܗܘ ܐܠܗܐ

¹⁴ ܘܡܢ ܒܬܪ ܗܠܝܢ ܒܢܐ ܫܘܪܐ ܒܪܝܐ ܠܩܪܝܬܗ ܕܕܘܝܕ ܡܢ ܡܥܪܒܐ ܕܓܝܚܘܢ ܢܗܪܐ ܘܠܡܥܠܢܐ ܕܬܪܥܐ ܕܨܝ̈ܕܐ ܘܐܟܪܟܗ̇ ܠܟܠܗ̇ ܐܘܪܫܠܡ ܫܘܪܐ ܒܪܝܐ ܘܐܪܝܡܗ ܛܒ ܘܐܩܝܡ ܪ̈ܘܪܒܢܝ ܚܝܠܐ ܒܟܠܗܝܢ ܩܘܪ̈ܝܐ ܪ̈ܡܬܐ ܕܒܝܬ ܝܗܘܕܐ

¹⁵ ܘܐܥܒܪ ܠܐܠܗ̈ܐ ܢܘܟܪ̈ܝܐ ܘܠܨܠܡ̈ܐ ܓܠܝ̈ܦܐ ܕܐܝܬ ܒܒܝܬܗ ܕܡܪܝܐ ܘܟܠܗܝܢ ܥܠܘ̈ܬܐ ܕܒܢܐ ܗܘܐ ܒܛܘܪ ܒܝܬܗ ܕܡܪܝܐ ܘܒܐܘܪܫܠܡ ܘܫܕܐ ܐܢܘܢ ܠܒܪ ܡܢ ܩܪܝܬܐ

¹⁶ ܘܒܢܐ ܡܕܒܚܐ ܠܡܪܝܐ ܘܕܒܚ ܥܠܘ̈ܬܐ ܘܕܒܚ̈ܐ ܫܠܡ̈ܐ ܘܬܘܕܝܬܐ ܘܐܡܪ ܠܝܗܘܕܐ ܠܡܥܒܕ ܠܡܪܝܐ ܐܠܗܐ ܕܐܝܣܪܝܠ

¹⁷ ܬܘܒ ܥܐܕܐ ܘܕܒܚ̈ܐ ܐܚܪ̈ܢܐ ܥܠ ܥܠܘ̈ܬܐ ܠܐ ܬܣܩܘܢ ܐܠܐ ܩܕܡ ܡܪܝܐ ܐܠܗܟܘܢ

¹⁸ ܘܫܪܟܐ ܕܦܬܓܡܘ̈ܗܝ ܕܡܢܫܐ ܘܨܠܘܬܗ ܕܩܕܡ ܐܠܗܗ ܘܦܬܓܡ̈ܐ ܕܢܒ̈ܝܐ ܕܐܬܢܒܝܘ ܥܠܘܗܝ ܒܫܡܐ ܕܡܪܝܐ ܐܠܗܐ ܕܐܝܣܪܝܠ ܗܐ ܗܢܘܢ ܟܬܝܒܝܢ ܒܦܬܓ̈ܡܐ ܕܡܠܟ̈ܐ ܕܐܝܣܪܝܠ ܘܕܝܗܘܕܐ

¹⁹ ܘܨܠܘܬܗ ܘܕܐܫܬܡܥ ܒܩܠܗ ܘܟܠܗܘܢ ܚܛܗܘ̈ܗܝ ܘܥܘ̣ܠܗ ܘܕܘܟܝ̈ܬܐ ܕܒܢܐ ܒܗܝܢ ܡܕܒܚ̈ܐ ܘܐܩܝܡ ܟܘܡܪ̈ܐ ܘܕܥܒܕ ܚܘܓ̈ܒܐ ܠܦܬܟܪ̈ܐ ܗܐ ܗܢܘܢ ܟܬܝܒܝܢ ܒܦܬܓ̈ܡܘܗܝ ܕܚܢܢ ܢܒܝܐ

²⁰ ܘܫܟܒ ܡܢܫܐ ܥܡ ܐܒܗ̈ܬܗ ܘܩܒܪܘܗܝ ܒܒܝܬܗ ܒܓܢܬ ܓܙܐ ܘܐܡܠܟ ܐܡܘܢ ܒܪܗ ܒܬܪܗ

²¹ ܒܪ ܥܣܪ̈ܝܢ ܗܘܐ ܘܬܪ̈ܬܝܢ ܫܢ̈ܝܢ ܐܡܘܢ ܟܕ ܩܡ ܒܡܠܟܘܬܐ ܘܬܪܬܝܢ ܫܢ̈ܝܢ ܐܡܠܟ ܒܐܘܪܫܠܡ

²² ܘܥܒܕ ܕܒܝ̣ܫ ܩܕܡ ܡܪܝܐ ܐܝܟܢܐ ܕܥܒܕ ܡܢܫܐ ܐܒܘܗܝ ܘܠܟܠܗܘܢ ܨܠܡ̈ܐ ܘܦܬܟܪ̈ܐ ܕܥܒܕ ܡܢܫܐ ܐܒܘܗܝ ܕܒܚ ܐܡܘܢ ܘܣܓܕ

²³ ܘܠܐ ܙܥ ܡܢ ܩܕܡ ܡܪܝܐ ܐܠܗܗ ܡܛܠ ܕܗܘ ܡܢܫܐ ܙܥ ܗܘܐ ܡܢ ܩܕܡ ܡܪܝܐ ܐܠܗܗ ܡܛܠ ܕܗܘ ܐܡܘܢ ܐܣܓܝ ܗܘܐ ܠܡܚܛܐ

²⁴ ܘܐܬܢܟܠܘ ܥܠܘܗܝ ܥܒ̣ܕܘ̈ܗܝ ܘܩܛܠܘܗܝ ܒܒܝܬܗ

²⁵ ܘܩܛܠܘ ܥܡܐ ܕܐܪܥܐ ܠܟܠ ܡ̇ܢ ܕܐܬܢܟܠ ܥܠ ܡܠܟܐ ܐܡܘܢ ܘܐܡܠܟܘ ܥܡܐ ܕܐܪܥܐ ܠܝܘܫܝܐ ܒܪܗ ܒܬܪܗ